John 1

Mago vekamo agi'amo Goti Ge'amae, huno hu'niya gemae

Ema akeya'vilaga Goti'a ma mopamo alo osu'niya afina'mo aepa fai'niya afinateti'mo mago vekamo agi'amo Goti Ge'amo mai'niye. Ani vekamo Goti'e'mo magokepi lokae'ana mai'ne'anae'mo Gotike'mo mai'niye. Agaemo aepa fai'niya afinateti'mo Goti'e'mo magokepi lokae'ana mai'na'ae. Goti'a agaetetike'mo muki asole ya'amo alo hu'niye. Magoke ya'mo mago alu kateti'mo alagi afole o'ai'niye. Agaemo alagepa hu'a ne'maiya kava'mo aepa vekamo mai'nigeno agaepatike'mo alagepa hu'a ne'maiya kava'mo afole aiteno vaya'aitegamo aeno ha le'nige'a age'nae. Ani aeno ha neleya ya'mo'a hanipi'mo aeno ha nelegeno'ae'mo hani hu'niya ya'mo'a mago'e huno aeno o'agase'niye.

Ani vekamo Goti Ge'amo ma mopafi'mo afole ai'niya gemae

Goti'a mago vekamo agi'amo Yoni'a alino ate'nigeno e'niye. Agaemo aeno ha neleya yafe'mo ava gemo huno hapa paisige'a muki vaya'mogi ge'amo afite'apae'mo apakesa afi'a fatago hisayafe'mo e'niye. Agai'amo aeno ha neleya vekamo o'mai'nifa aeno ha neleya vekae'mo ava gemo aeno hakalo huno hapa paisiyafe'mo e'niye. Ani vekamo alagi lama ge alagepa ha le vekamo'a muki vaya'mo ma mopafi'mo afole ne'aiya vaya'mo ha le ya'mo alino ne'apamiye. 10 Goti'a agaetetike'mo alo hu'niya mopafi'mo afole ai'niya'monanafa age'a aeto osu'nae. 11 Agaemo ko'alegamo emine'nige'apae'mo vaya'amogimo ali'a falu fala hu'a o'ate'nae. 12 Muki vaya'mogi ali'a falu fala hu'a o'ate'naya'monanafa agai'a agi'alefe'mo apakesa afi'a fatago hute'a ali'a falu fala hu'a ate'naya vaya'mo Goti mafa'ne'amo ha malesayafe'mo himamu'amo alino apami'niye. 13 Apakaemo ita'api afo'apimogi kolateti'mo ali'a o'apatege apakai'api hapau'nige'a ali'a o'apatege alu vaya'mogi hapau'nige'a ali'a o'apatege hu'naya'monanafa Goti'a agai'amo hau'nigeno alino apate'nige'apa mafa'ne'amo ha male'nae.

14 Ani vekamo agi'amo Goti Ge'amo'mo emineno agufa'amo aliteno nata neno eno lagae'e'mo magokepi lokaeno mai'niye. Lagae'e'mo lokaeno mai'nigeta age'nonana ha le konali ya'amo Afo'amo'mo aiya magoke mafa'ne'amo aeto agufa kumani mafa'ne'amo ha le konali ya'amo'a aeno ha le'nigeta age'none. Fiku laha maeno lamisiya kava'a'e lama ge'a'e'mo aipafi'mo havai te'nigeno aeno ha le'nigeta age'none. 15 Yoni'a, ani vekae'mo hogote'na ava gemo hu'na lapa pai'nae'mo, nagae nakame'mo huno esiya vekamo hogote vekamo mai'niya'mofe'mo aeno nagase'niya vekamo mai'niye, hu'na lapa pai'nove, huno hapa pai'niye. 16 Muki alagepa ya'amo fiku laha maeno lamisiya ya'amo agae aipafi'mo havai te'niya ya'mo ani kava huno fiku laha maeno lamiteno halate mago'e huno laha maeno lami'nigeta ago ali'none. 17 Ani kavatefe'mo Goti'a Moseseteti'mo ke'aepa ge'amo alino lami'niya'monanafa Yesu Kalaisiteti'mo fiku laha maeno lamiteno lama ge'amo alino afole aino ate'niye. 18 Muki vayapati'mo magoke vekamo'a alagi Goti'mo o'age'niya'monanafa Goti'a aiya magoke mafa'ne'amo'a muki ya'mo Afo'amo haopale'mo mai'niya mafa'ne'amoke'mo alino lave li'nigeta age'none.

Ani faleno ne'apateya vekamo Yonife'mo ava gemo hu'niya gemae

(Mt 3:1-12; Mk 1:7-8; Lu 3:15-17)

19 Yu vaya'mogi Yulusalemu taonifati'mo mono hu'a ne'apataya vaya'e Livai nofi vaya'e'mo ali'a apate'nage'a Yonitegamo e'apae'mo, ina lagamae, hu'a afi ge'nae. 20 Afi ge'nageno'ae'mo Yoni'a mago gemo aeno ati okae'nifa muki ge'amo aeno hakalo huno hapa paino'ae'mo, Kalaisi ne'mo o'mai'nove, huno hapa pai'nige'apae'mo, 21 Kalaisi ne'mogamo o'mai'nisanana kagikamo ina lagamo mai'nane. Ilaiyagamo mai'napiye, hu'a afi ge'nageno'ae'mo, Ilaiya'namo o'mai'nove, huno hapa pai'nige'apae'mo, Goti Mukufi gemo'a huno'ae'mo, magoke vekamo Gotitegati gemo alinineno aeno hakalo huno hapa paisiya vekamo afole aigiye, huno hu'nigeta agava mai'none. Ani vekamo mai'napiye, hu'a afi ge'nageno'ae'mo, ha'ao, ani vekamo o'mai'nove, huno hapa pai'nige'apae'mo, 22 ina lagamo mai'napigi laha paigetao ali'a late'nageta e'nona vaya'aife'mo uta hapa paino. Kagaikae'mo ina la'namae huka nehane, hu'a afi ge'nae. 23 Yoni'a, Aiyeya'a Gotitegati gemo alinineno aeno hakalo huno hapa nepaiya vekamo'a mago vekae'mo ava gemo huno avo'mo kae male'niye. Avo'mo kaeno'ae'mo,

ka'me kotegamo mai'neno alopa gefati'mo huno'ae'mo, Ala kava ne'mo esiya ka'mo alagepa hutapa valitapa ateyo,
huno nehiye, huno avo'mo kae male'niye. Nagaemo ani vekamo mai'nove, huno hapa pai'niye.
24 Ali'a apate'nage'a e'naya vaya'mo Falasi mono vayapati vaya'mo mai'nae. 25 Apakaemo, Kalaisi ne'mo o'maige Ilaiya'namo o'maige ani vekamo Gotitegati gemo alinineno aeno hakalo huno hapa nepaiya vekamo o'maige hu'na o'mai'nove huka nehanagi na kava higekae'mo ani'mo faleka ne'apatane, hu'a afi ge'nageno'ae'mo, 26 nagaemo ani'aletike'mo fale'na ne'apatova'monanafa lapakae folagapi'mo mago vekamo mai'niyana o'age'nae. 27 Nagae nakame'mo huno ne'eya vekamo'a aeno nagase'nige'na ina agufa vekamo mai'nova'mofe'mo su'mo nofi'amo afa'a hakalu osegauve, huno hapa pai'niye. 28 Yoni'a Metamala taonimo mugagayaga faligamo Yoneni anipi'mo faleno apate'niya haopalegamo ani gemo afole ai'niye.

Yesu'a Goti aikeli sipisipi veka'amo mai'niya gemae

29 Ega'amo Yoni'a ageyana Yesu'mo agaetegamo ne'egeno ageteno'ae'mo, Ageyo, huno, ani vekamo Goti aikeli sipisipi veka'amae. Muki ma mopafi vaya'ai hosu kava'apimo alino ne'atale. 30 Nagaemo ani vekae'mo, nagae nakame'mo huno esiya vekamo hogote vekamo mai'niya'mofe'mo aeno nagase'niya vekamo mai'niye, hu'na ago ae'na hakalo hu'na lapa pai'nove. 31 Agaemo o'age'nova'monanafa Isaleli vaya'mo ali'na apave lisuvafe'mo e'na ani'mo fale'na ne'apatove, huno hapa pai'niye. 32 Yoni'a agaefe'mo faigoko ge'amo huno hapa paino'ae'mo, agovana Goti Auneme'amo koku'napati'mo kaugo'yavegana huno halelino emineno agaete'mo hakaleno alagi mai'nige'na age'nove. 33 Age'novana ina lapi hu'na o'age'nova'monanafa ani'mo fale'na apatesuvafe'mo alino nate'nige'na e'nova vekamo'a, Naune'name'mo emineno mago vekale'mo maige maige huno maisigeka agegane. Ani vekamo'a naote Naune'nameteti'mo faleno ne'apateya vekamo mai'niye, huno naha pai'nige'nae'mo 34 ani kava'mo hu'na age'nova'mofe'mo ani vekamo Goti mafa'ne'amae, hu'na ae'na hakalo nehuve, huno hapa pai'niye.

Hogote'a Yesu ge'amo afi'naya vaya'aife'mo apava gemo hu'niya gemae

35 Halate ega'amo Yoni'e ge'amo ne'afi'a vekala'e'mo he ti'a mai'nae. 36 Yoni'a ageyana Yesu'a u'nigeno ageteno'ae'mo, age'ao, huno, ani vekamo Goti aikeli sipisipi veka'amo mai'niye, huno hana pai'nige'anae'mo 37 lole vekala'mo ge'amo ne'afi'a vekala'moganimo afite'ana Yesu'mo akame hu'ana u'na'ae. 38 Akame hu'ana u'na'ageno Yesu'a aino afe leno anaketeno'ae'mo, na agufa yafe'mo kahauya neha'ae, huno anafi ge'nige'anae'mo, Lamai, ina ge hu'ana Tisao, nehavana no'mo haiyate hane'niye, hu'ana afi ge'na'ageno'ae'mo, 39 etana age'ao, huno hana pai'nige'anae'mo e'ana magokepi lokae'a u'nae. Netepi'mo u'a ava'yi hute'a anakaemo nehavaeya no'mo agete'ana agae'e'mo ani afina'mo lokae'ana maili'u'a une ti'nigeno yegemo uno lamino fale'niye. 40 Yoni'a hu'niya gemo afite'ana Yesu'mo akame hu'ana u'na'a vekalapati'mo mago vekamo agi'amo E'nalu'a Saimoni Pita agana'amo'mae. 41 E'nalu'a uno hogoteno nepu'amo Saimonife'mo kahauya huno ageteno'ae'mo, Mesaiya vekamo ago age'nove, huno ha pai'niye. Mesaiya vekae agimo aepa'amo Kalaisi ne'mo Goti'a ali'ya'ale'mo lekana paino ate'niya vekamae. 42 E'nalu'a Saimoni'mo avalelino Yesutegamo u'niye. Yesu'a Saimoni'mo ageteno'ae'mo, Saimoniyo, huno, Yoni mafa'ne'amo mai'nane. Kagikamo Sifasigae hu'na katove, huno ha pai'niye. Sifasi'a ina kava huno Pita'ae agimo aepa'amo yafane.

Yesu'a Filipi'e Natanielo'efe'mo ge hu'niya gemae

43 Ega'amo Yesu'a Galeliya kotegamo visiyafe'mo ne'uno'ae'mo Filipi'mo uno ageteno'ae'mo, eka nakame hugeta'ao, huno ha pai'niye. 44 Filipi'a Metasaita taonifi'mo E'nalu'e Pita'e'mo mai'na'a taonifi'mo mai'niye. 45 Filipi'a uno kahauya huno Natanielo'mo ageteno'ae'mo, Mosese'a ke'aepa gemo avo'mo kae male'niya Mukufi'mo mago vekae'mo ava gemo huno avo'mo kae male'nige'apae'mo Gotitegati gemo alini e'a ae'a hakalo hu'a hapa nepaiya vaya'mogi'e'mo ani kava hu'a ava gemo hu'a avo'mo kae male'naya vekamo ago age'nove. Agi'amo Yesu'a Yosefe mafa'ne'amo Nasalasa taonifi vekamo mai'nige'na age'nove, huno ha pai'nigeno 46 Natanielo'a Filipife'mo, Nasalasa taonifati'mo magoke alagepa ya'mo afa'a afole aigifiye, huno afi ge'nigeno'ae'mo Filipi'a, afa'a uka ago, huno ha pai'niye. 47 Yesu'a ageyana Natanielo'mo agaetegamo ne'egeno ageteno'ae'mo, lama ge Isaleli vekamo mai'niye. Magoke aigofe ge'amo ohane'niya vekamae, huno hu'nigeno 48 Natanielo'a, haiya kava huka nage'nane, huno afi ge'nigeno Yesu'a, nagaemo kage'novana Filipi'a kagaefe'mo keya aeno ge osu'niya afina'mo fiki yosa aepafi'mo mai'nanage'na kage'nove, huno ha pai'nigeno'ae'mo, 49 Tisao, Goti mafa'ne'amo mai'neka Isaleli vaya'aite'mo yagaika ne'apatana kini veka'apimo mai'nane, huno ha pai'niye. 50 Yesu'a, fiki yosa aepafi'mo mai'nanage'na kage'nove, hu'na kaha pai'nova'mofe'mo kagesa afika fatago nehapiye. Henaga'amo mani kava'mo aeno agase'niya kava'mo afole aisigeka agegane, huno ha paiteno'ae'mo, 51 alagi lama ge kaha nepauve, kagaemo ageganana koku'na'mo halo aisige'apae'mo Goti enisole vaya'amogi Vemo mafa'neleti'mo u'a haite'a emi'ete'a hisageka apakegane, huno ha pai'niye.

Copyright information for `KYG