John 10

Sipisipie'mo aeno kalafefa gemo huno hapa pai'niya gemae

Yesu'a, alagi lama ge lapa nepauve. Mago vekamo'a sipisipi anaga'mogi kegi'ya yu'ilagamo haleno haisiyafe'mo huno'ae'mo kipateti'mo faleno ohaino kegi'ya afafafati'mo aeno haleno nehaisiya vekamo kumaya vekamo mai'neno vaya'mo apamagiteno kumaya'mo ne'aliya vekamo mai'niye. Kipateti'mo faleno nehaiya vekamo'a sipisipile'mo ne'yagaiya vekamo mai'niye. Sipisipi anaga'mogi kipate'mo ne'yagaiya vekamo'a kitamo yakino ne'apatege'apa nehaiye. Haiteno'ae'mo agai'a sipisipi'ae'mo apaki nehige'apae'mo agemo ne'afiye. Hogoteno kumatega nelamino'ae'mo apaki aeno apaki hulino nelamiye. Agaemo sipisipi anaga'amo kumatega apavalelinuno hogote'nige'apae'mo sipisipi anaga'amogi agemo afi'a aeto nehaya'mofe'mo akame hu'a ne'vae. Sipisipi anaga'mogi alu vekamo afa'a akame hu'a o'ugae. Agae agemo afi'a aeto osu'naya'mofe'mo apaune he'a ugae, huno hapa pai'niye. Yesu'a mani gemo aeno kalafefa gemo hapa pai'niya'monanafa afi'a aeto osu'nae.

Yesu'a alagepa vekamo sipisipile'mo ne'yagaiya vekamo mai'niya gemae

Afi'a aeto osu'naya'mofe'mo Yesu'a halate hapa paino'ae'mo, alagi lama ge lapa nepauve. Nagaemo sipisipi anaga'mogi kipa'apimo mai'nove. Nagaemo emi'no'me'noge'apae'mo hogote'a kumaya'mo alige vaya'mo apamagite'a kumaya'mo alige hu'a mai'naya vaya'mo e'naya'monanafa sipisipi anaga'mogi apakemo afi'a aeto osu'nae. Nagaeke'mo kipa'apimo mai'nove. Goti'a nagaetetike'mo kegi'ya yu'ilagamo faleno hainesiya vekamo agufamo alino katino atesigeno alagepa huno maigiye. Eno haineteno lamiteno nehuno'ae'mo ne'ya'mo alino neteno alagepa huno maigiye. 10 Kumaya'mo ne'aliya vekamo'a kumaya'mo alige sipisipimo apamagige alino hosu huno apatege hisiyafeke'mo ne'e. Nagaemo sipisipimo kanale hu'a mago'e alagepa hu'a maige maige hu'a afa'a maisayafe'mo emi'ne'nove. 11 Nagaemo alagepa vekamo sipisipile'mo yagai'na ne'apatova vekamo mai'nove. Alagepa huno yagaino ne'apateya vekamo'a sipisipilefe'mo agai'amo afa'a maisiya ya'amo afa'a atalegaiye. 12 Miya'mo alisiyafeke'mo ali'ya'mo ne'aliya vekamo'a sipisipile'mo yagaino ne'apateya vekamo maige sipisipi aepa vekamo maige huno o'mai'niya'mofe'mo afela kalamo ne'egeno apataleno aune hetaleno ne'vigeno'ae'mo afela kalamo'a hapaeno hanilino ne'vige'apae'mo atale'a atagu fae'a u'e'a nehae. 13 Miya'mo alisiyafe'mo ali'ya'mo ne'aliya vekamo'a miya'mo alisiyafeke'mo agesa afiteno sipisipi anaga'aife'mo agesa no'afiya'mofe'mo ataleno aune hetaleno ne'viye. 14 Nagaemo alagepa vekamo sipisipile'mo yagai'na ne'apatova vekamo mai'nove. Afo'nimo'mo nage'nige'na afo'nimo'mo age'nova kava hu'na nagaemo sipisipi'nimo apake'noge'apa nagaemo nage'nae. Ani kava hu'na apakaetefe'mo afa'a maisuva ya'nimo atalete'na faliguve. 16 Mago nagae sipisipimo mani kegi'yafi'mo hai e'a o'mai'nae. Nagaemo apakaemo apavaleli'na egauve. Nagemo aisuge'apae'mo afi'a aeto hute'a e'a magoke sipisipi anaga'mo maisageno magoke vekamo sipisipile'mo yagaino apatesiya vekamo maigiye. 17 Afa'a maisuva ya'nimo alisuvafe'mo afa'a maisuva ya'nimo atalegauva'mofe'mo Afo'nimo'mo nagaefe'mo hau ayamopafi'mo hau'niye. 18 Mago vekamo'a afa'a maisuva ya'nimo nayapati'mo alino naha faleno o'atalegaiya'monanafa nagai'nimo nagesa afite'na atalegauve. Afa'a maisuva ya'nimo atalete'na halate alisuva himamu'nimo ago ali'nove. Afo'nimo'a ani kava'mo huvo huno naha pai'niya'mofe'mae, huno hapa pai'niye. 19 Ani gemo afi'nageno'ae'mo halate alino fako huno apate'niye. 20 Asole vaya'mogi hu'apae'mo, hosu aune vekamo aipafi'mo mai'nigeno'ae'mo negi gemo nehiye. Na kava higetapae'mo ge'amo ne'afiye, hu'a hu'nage'apae'mo 21 mago vaya'amogi, hosu aune vekamo aipafi'mo mai'nisiya vekamo'a ani agufa gemo afa'a osugiye. Hosu aune vekamo'a aulagamo ali hu'nisiya vekamo aulagamo afa'a alino ayakeno o'ategaiye, hu'a hu'nae.

Yesu'mo apakame'yamo ami'naya gemae

22 Yulusalemu taonifi'mo hopa afina'mo alopa mono no kitamo yaki'naya afinafe'mo apakesa afisayafe'mo hopa afina'mo afole ai'niye. Ani afina'mo yasimo ne'aliya afina'mogeno Yesu'a ani alopa mono no'mo kapa'amo osu'naya no'mo agi'amo Salomoni hiyato nopi'mo uneno huno mai'niye. 24 Uneno nehige'apae'mo Yu vaya'mogi fai'a ku ai'a ate'ne'apae'mo, lole lagesa ne'afunanagi na magi afina'mo laha opaika afa'a maigane. Kalaisi vekamo mai'nisanana huka haleka laha paiyo, hu'a ha pai'nageno'ae'mo, 25 ago lapa pai'novana o'afi'nae. Afo'nimo agi'alefe'mo nehuva kava'mo'a nagaefe'mo faigoko ge'nimo huno naha maeno nehiya gemo nehiye. 26 Ge nehiya'monanafa nagaemo sipisipi anaga'nimo o'mai'naya'mofe'mo lapakesa afitapa fatago nosae. 27 Nage ne'auge'apae'mo sipisipi anaga'nimogi nagemo ne'afiye. Apake'na aeto hu'noge'a nakame nehae. 28 Nagaemo maige maige hu'a maisaya ya'mo ali'na ne'apamuvanage'a alagi ofaligae. Mago vaya'mogi e'a nayapati'mo ali'a naha fale'a o'apatalegae. 29 Afo'nimo'a sipisipi anaga'amo apavalelineno ne'namiya vekamo'mo muki vaya'aina ago aeno apakase'niyanage'a muki vaya'mogi Afo'nimo ayapati'mo afa'a ali'a ha ofalegae. 30 Nagae'e Afo'nimo'e'mo magoke aiyaya vekala'mo mai'no'ae, huno hapa pai'nige'apae'mo 31 Yu vaya'mogimo halate yafa kayoteti'mo amagisayafe'mo ali'nae. 32 Yesu'a, Nagaemo asole alagepa kava'mo Afo'nimo'mo huvo, huno naha pai'niya kava'mo hute'na ali'na lapave li'nove. Muki nehuva kavapati'mo haiya agufa kavatefe'mo lapakesa afitetapae'mo namagisayafe'mo nehae, huno apafi ge'nige'apae'mo, 33 alagepa kava'mo hu'nana'mofe'mo kamagisunafe'mo nosuna'monanafa Gotife'mo huka faipa huka ne'atana'mofe'mo kamagisunafe'mo nehune. Ina agufa vekamo mai'nana'monanafa Goti'mo mai'nove, huka nehana'mofe'mae, hu'a ha pai'nageno'ae'mo, 34 Goti'a lapakae ke'aepa gemo avo'mo kae male'niya mukufi'mo hu'niya gemo'a huno'ae'mo,gotikana hutapa mai'nae, huno hu'niye. 35 Ago afi'nonana Goti mukufi hane'niya gemo alagi lama gemo hanege hanege huno hane'neno hano osisiya agufa gemo hane'niye. Goti mukufi'mo hane'niya gemo'a Goti ge'amo alino apami'niya vaya'aife'mo, gotikana hutapa mai'nae, huno hapa pai'niye. 36 Goti'a ani gemo ma mopafi vaya'aife'mo hu'niya'monanafa nagaemo, Goti mafa'ne'amo mai'nove, hu'na hu'nova'mofe'mo muki ya'mo Afo'amo'mo aote vekamo lekana paino ate'neno'ae'mo alino ate'nigeno e'niya vekae'mo, Gotife'mo huka faipa huka ne'atane, hutapa nehafiye. 37 Nagaefe'mo Afo'nimo'mo huvo huno naha pai'niya kava'mo nosisuvana nagaefe'mo aigofe gemo nehiye, hutapa hiyo. 38 Nehisuvana nagaefe'mo alagi lama ge nehiye, hutapa hiyo. Nagaefe'mo lapakesa afitapa fatago nosaya'monanafa Goti'a nehiya agufa kava'mo nehisuvana Afo'amo'a agaepi'mo mai'nigeno agaemo agaepi'mo mai'niye, hutapa hisayafe'mo nehuva kavafe'mo lapakesa afitapa fatago hiyo, huno hapa pai'nige'apae'mo 39 halate atafausayafe'mo hu'naya'monanafa ago faino kasalo paetaleno u'niye.

40 Yesu'a apataleno atagi neno uno Yoneni ani'mo lakaeno mugagayaga faligamo Yoni'a ani'mo faleno apate'niya yategamo mago'e afina'mo mai'niye. 41 Mai'nige'apae'mo asole vaya'mo agaetegamo e'a apakaemo, Yoni'a no'agona agufa aune kava'mo osu'niya'monanafa muki ge'amo ani vekae'mo ava gemo hu'niya gemo alagi lama ge hu'niye, hu'a hu'nae. 42 Inagi ani haopalegati'mo asole vaya'mogi agaefe'mo apakesa afi'a fatago hu'nae.

Copyright information for `KYG