John 12

Maliya'a Yesu aiyale'mo uvelimo lakino faleno ate'niya gemae

(Mt 26:6-13; Mk 14:3-9)

Sigisi'a afina'mo utesigeno Pasova hopa afina'mo afole aisiyafe'mo hu'niya afina'mo Yesu'a Metani taonifi'mo Layosi'a fali'niyateti'mo alino he tino ate'niya kotegamo e'niye. E'nige'a une ne'ya'mo alo hute'a Mata'a ne'ya'mo alino fako huno apami'nige'a Layosigi'e'mo magokepi lokae'a mai'ne'a ne'nae. Mai'ne'apae'mo Maliya'a alopa monileti'mo miya nefaiya uvelimo alagepa atumo ne'aiya uvelimo lole kapufi'mo nehaneya agufa uvelimo alinineno Yesu aiyalate'mo lakino faleno ateteno ayokateti'mo alino hau huno ate'nigeno'ae'mo alagepa atu'amo'mo ani mai'naya nopi'mo havai te'niye. Yutasi'a Isakaliyoti kotega vekamo Saimoni mafa'ne'amo'mo ge'amo ne'afiya vayapati vekamo kutulu ya'mo alisiya vekamo'a, na kava higeno'ae'mo alagepa atumo ne'aiya uvelimo alino maketi hisige'a tali hataleti kinaleti'mo miya faitesageno alino kagemi ya'apimo ohane'nisiya vaya'aina apamiyafe'mo hu'niye, huno hu'niye. Kagemi ya'apimo ohane'nisiya vaya'aife'mo agesa o'afi'niya'monanafa moni kute'mo ne'yagaiya vekamo mai'neno kupati'mo kumaya'mo ne'aliya vekamo mai'niya'mofe'mo ani gemo hu'niye. Yesu'a, afa'a ateyo. Falisuge'a ki'a natesaya afinafe'mo agesamo afiteno uvelimo lakino faleno nate'niye. Kagemi ya'apimo ohane'nisiya vaya'mo muki afina'mo lapakae'e'mo magokepi lokaetapa maigaya'monanafa nagaemo muki afina'mo lapakae'e'mo magokepi lokaeta o'maigune, huno hapa pai'niye.

Yesu'a eno mai'niye, hu'a hu'naya gemo afite'apae'mo muki Yu vaya'mo Yesuke'mo agesayafe'mo o'me'nayana Layosi'a fali'niyateti'mo alino he tino ate'niya veka'e'mo anakesayafe'mo e'nae. 10 Layosi'mo afa'a mai'nige'a agete'a muki Yu vaya'mogi Yesufe'mo apakesa afi'a fatago hu'nage'apae'mo mono hu'a ne'apataya vaya'aite'mo yagai'a ne'apataya vaya'mogimo, Layosi'e'mo anamagigune, hu'a hute'a vege hu'a mai'nae.

Yesu'a yagaino ne'apateya kini vekagana huno Yulusalemu taonifi'mo uno ava'yi hu'niya gemae

(Mt 21:1-11; Mk 11:1-11; Lu 19:28-40)

12 Ega'amo asole vaya'mo Pasova afina'mo e'naya vaya'mogimo afi'nayana, Yesu'a Yulusalemu taonifi'mo ne'e, hu'a hu'naya gemo afite'apae'mo 13 u'a vayavekana yosamo akopa'amo yage'a alite'a u'a fotu hisayafe'mo ne'u'apae'mo, laha mao.

Ala kava ne'mo agi'aleti'mo ne'eya vekamo Goti'a ha maeno. Agaemo Isaleli vaya'aite'mo yagaino ne'apateya kini vekamae, hu'a hu'nae.
14 Yesu'a mago aikeli noki afumo agotofule'mo uno haino fai maiteno e'niye. Goti Mukufi'mo avo'mo kae male'niya gemo'a ani kavatefe'mo huno'ae'mo,

15 Saiyoni taonifi'mo mai'naya vaya'mogitapamo koli osiyo. Ageyo, ala vekatapimo yagaino nelapateya kini vekatapimo aikeli noki afule'mo fai maiteno ne'e,
huno hu'niye.
16 Ani afina'mo ge'amo ne'afiya vaya'mogi ani kava'mo aepa'amo age'a aeto osu'naya'monanafa Yesu'a fali'niyateti'mo alino he tino ate'nigeno koku'napi'mo haino mai'nige'apaeke'mo Yesufe'mo ava gemo huno avo'mo kae male'niya ava gee'mo apakesamo aino halo ai'nige'apae'mo, he, ani kava'mo Yesutegamo ago afole ai'niye, hu'a apakesa afi'a ho hu'nae. 17 Muki vaya'mogi Yesu'a Layosi'mo alino he tino ate'niya afina'mo agae'e'mo lokae'a mai'ne'a agete'apae'mo faigoko gemo huli'a u'e'a hu'nae. 18 Ani no'agaya agufa aune kava'mo hu'niya kavafe'mo ava gemo hu'nage'a afi'naya'mofe'mo asole vaya'mo agae'e'mo u'a fotu hu'nae. 19 Falasi vaya'mogi apakai'apimo hu'apae'mo, Lapakaemo ani vekamo aetapa o'agase'nae. Ageyo, muki ma mopafi vaya'mogi akame nehae, hu'a hu'nae.

Galiki nofi vaya'mogimo Yesu'mo agesayafe'mo e'naya gemae

20 Hopa afina'mo Gotife'mo mono hisayafe'mo Yulusalemu taonifi'mo u'a hai'naya vayapati'mo mago vaya'amo Galiki nofi vaya'mo mai'nae. 21 Apakaemo Filipi'a Galeliya kotega Metasaita taonifi vekalegamo e'a, lao vekae, hu'a, Yesu'mo agesunafe'mo nehune, hu'a afi ge'nageno 22 Filipi'a uno E'nalufe'mo ha paitege'ana Yesutegamo u'ana ha pai'na'ae. 23 Yesu'a ge'apile'mo aeno atagaina huno hapa paino'ae'mo, hemenimo Vemo Mafa'nemo'a ala agi'amo alisiya afina'mo afole ai'niye. 24 Lama ge lapa nepauve. Avina ya'mo mopafi'mo ofai'nisayana magoke avina ya'mo alagi hanegaiya'monanafa fai male'nisageno faliteno'ae'mo halate hageteno asole avina ya'mo alino ategaiye. 25 Muki vaya'mogimo ma mopafi alagepa hu'a maisaya kavafe'mo hapau'nisiya'mo'mo afa'a maisaya ya'apimo atalegae. Muki vaya'mogimo ma mopafi alagepa hu'a maisaya kavafe'mo ohapau'nisiya'mo'mo afa'a maisaya ya'apimo o'atale'a alagepa hu'a alagi maige maige hu'a maigae. 26 Ali'ya'nile'mo maigefe'mo hisaya vaya'mogi nagae nakameke'mo hiyo. Ani kava'mo hu'a ali'ya'nile'mo mai'nisaya vaya'mogi nagae nakameke'mo hute'a u'na maisuva kotegamo u'a maigae. Inagi Afo'nimo'mo ali'ya'nile'mo mai'nisaya vaya'ai apaki'apile'mo alino asaga huno apategaiye, huno hapa pai'niye.

Yesu'a falisiya kavafe'mo hapa pai'niya gemae

27 Naipamo'mo atete nehisige'nae'mo na agufa gemo huguve. Afo, hu'na, nagaetegamo hosu kava'mo afole aisiya kava'mo alika atalo, hu'na hugufiye. Ha'ao. Ani hosu kava'mo alisuvafeke'mo emi'ne'nove. 28 Afo, kagikale'mo alika asaga huvo, huno hu'nigeno koku'napati'mo ge huno'ae'mo, nagi'nile'mo ali'na asaga hu'novanage'na halate mago'e hu'na nagi'nile'mo ali'na asaga huguve, huno hu'niye. 29 Hu'nige'apae'mo asole vaya'mo anile'mo he ti'a mai'ne'a afite'apae'mo, hakalu hu'niye, hu'a hu'nage'apae'mo mago vaya'amogi, enisole vekamo'a ha pai'niye, hu'a hu'naya'monanafa 30 Yesu'a, ani gemo nagaefeke'mo osu'nifa lapakae'efe'mo hu'niye. 31 Hemenimo ma mopafi vaya'ai hosu kava'apimo afole aisigeno Goti'a alino fako huno apategaiye. Hemenimo ma mopafi vaya'aite'mo yagaino ne'apateya vekamo alino hafaino atalegaiye. 32 Apakaemo ma mopafati'mo ali'a he ti'a natetesage'nae'mo muki vaya'amo nagai'nilegamo ai'na apavayu huli'na egauve, huno hapa pai'niye. 33 Agaemo haiya agufa kava hu'na faligufi, huno hapa pai'niye. 34 Asole vaya'mogi, lagae ke'aepa gemo'a huno'ae'mo, Kalaisi vekamo alagi maige maige huno maigiye, huno hu'niya'monanafa na kava higekae'mo Vemo Mafa'nemo ali'a he ti'a ategae, huka nehane. Ani Vemo Mafa'nemo ina la'mae, hu'a afi ge'nae. 35 Yesu'a, aise afina'mo ha le ya'mo alino ne'apamiya vekamo lapakae'e'mo magokepi lokaeno mai'neno'ae'mo aeno ha leno lapategaiye. Aeno ha le'nisiya yategamo umenitata hiyo fiku yanageno hani lapaugiyanagi. Hanipi'mo umenitata nehiya vekamo'a haiya kate'mo ne'ufi huno o'agegaiye. 36 Ha le ya'mo alino ne'apamiya vekamo lapakae'e'mo magokepi lokaeno mai'niyanagi agaefe'mo lapakesa afitapa fatago higeno'ao ha le vaya'mo ha malegayanagi, huno hapa paiteno apataleno uno fala kino mai'niye.

Apakesa afi'a fatago osu'naya kavafe'mo apava gemo hu'niya gemae

37 Yesu'a asole no'agaya agufa aune kava'mo apaulagale'mo hu'niya'monanafa agaefe'mo alagi apakesa afi'a fatago osu'nae. 38 Aiyeya'a Gotitegati gemo alinineno aeno hakalo huno hapa nepaiya vekamo'a hu'niya gemo afole aisiyafe'mo apakesa afi'a fatago osu'nae. Aiyeya'a ani kavatefe'mo,

Ala kava nene, ina la'mo hapa pai'nona gemo afi'niye. Ala kava ne'mo'a ina la'mo himamu'amo'a agufamo alino katino atesiya himamu'amo alino ave li'niye,
huno avo'mo kae male'niye.
39 Aiyeya'a ani kavatefe'mo mago'e gemo huno'ae'mo,

Goti'a apaulagaleti'mo o'agege apaipafati'mo alagepa hu'a afi'a aeto osuge hisayafe'mo apaulagamo alino fali kaeno apateteno apaipamo alino yafakana huno lokiya vaino apate'niye. Goti'a huno'ae'mo, nagaetegamo ai'a atagine'a esage'nae'mo ali'na alagepa hu'na o'apatesuvafe'mae, huno hu'niye,
huno avo'mo kae male'niye. Aiyeya'a ani gemo huno avo'mo kae male'niya'mofe'mo Yesu'e'mo magokepi lokae'a mai'naya vaya'mogi afa'a apakesa afi'a fatago osu'nae.
41 Aiyeya'a Yesu ha le konali ya'amo age'niya'mofe'mo ani agufa gemo huno ava gemo hu'niye. 42 Ani gemo hu'niya'monanafa asole vaya'mo yagai'a ne'apataya vaya'mogimo Yesufe'mo apakesa afi'a fatago hu'naya'monanafa Falasi vaya'mogimo mono nopati'mo ali'a laha fai'a latalegae, hu'a apakesa afi'naya'mofe'mo agi'amo ae'a hakalo hu'a hapa opai'nae. 43 Apakaemo ma mopafi vaya'mogi ala apaki'apimo ali'a apamisayafeke'mo lusi kava huno hapau'niya'monanafa Goti'a ala apaki'apimo alino apamisiyafe'mo aise'amo hapau'niye.

Yesu ge'amo'mo vaya'mo agoti huno apatesiya gemae

44 Yesu'a alopa gefati'mo gemo huno'ae'mo, nagaefe'mo apakesa afi'a fatago nehaya vaya'mogimo nagaefeke'mo apakesa afi'a fatago nosaya'monanafa ani kava'mo hu'a alino nate'nige'na emi'ne'nova veka'efe'mo apakesa afi'a fatago nehae. 45 Ina lagimo nage'nafi ani kava hu'a alino nate'nige'na emi'ne'nova veka'e'mo age'nae. 46 Apakaemo nagaefe'mo apakesa afi'a fatago nehaya vaya'mo hanipi'mo o'maisayafe'mo ha le yakana hu'na ma mopafi'mo emi'ne'nove. 47 Nagaemo ge'nimo afite'a akame nosisaya vaya'mo agoti hu'na o'apategauve. Nagaemo ma mopafi vaya'mo agoti hu'na apatesuvafe'mo emi'no'me'nofa apakufamo ali'na kati'na apatesuvafe'mo emi'ne'nove. 48 Mago vaya'mogimo ge'nimo o'afi'a apakame'ya ne'namisayana agoti huno apategaiye. Ma mopamo alino hano huno atalesiya afina'mo ge'nimoke'mo agoti huno apategaiye. 49 Nagaemo mani gemo nagai'ni nagesafati'mo nagesamo afi'na nosufa muki ya'mo Afo'amo'mo alino nate'nige'na emi'ne'nova vekamo'a ani gemo huvo, huno naha pai'niya gemo nehuve. 50 Afo'nimo'mo mani gemo huvo, huno naha pai'niya gemo ago afi'novana alagepa hu'a maige maige hu'a maisaya ya'mo alino ne'apamiya gemo hane'nige'na afite'nae'mo hapa nepauve.

Copyright information for `KYG