John 13

Yesu'a ge'amo ne'afiya vaya'mo apaiyamo sese huno apate'niya gemae

Alopa ne'ya'mo ne'naya Pasova afina'mo ago afole aigefe'mo hogo hu'nigeno'ae'mo Yesu'a agai'amo ago afi'niyana ma mopamo atale'na Afo'nimotegamo haisuva afina'nimo ago eno hogo hu'niye, huno afi'niye. Agaemo ma mopafi mai'naya vaya'amogife'mo hau ayamopafi'mo haume haume eno hano hu'niya afina'e'mo hau'niye. Satani'a Yutasi'mo Isakaliyoti kotega vekamo Saimoni mafa'ne'amo'a Yesu'mo avaleno hosu vaya'ai apayapi'mo atesiya agesamo alino ami'niye. Ne'ya'mo nete'apae'mo Yesu'a ago age'niyana muki ya'mo Afo'amo'mo muki vaya'aite'e muki yate'e'mo yagaisuvafe'mo lekana paino nate'niye. Gotitegati'mo emi'ne'novanage'na halate Gotitegamo haiguve, huno ago age'niye. Ageteno'ae'mo hi'yalamuteti'mo he tino kukena'amo asagino maleteno taoli kenamo alino hapili'neno yuvapafi'mo ani'mo laki male'neno ge'amo ne'afiya vaya'ai apaiyamo aepa faino sese huno apateteno hapili'niya taolileti'mo alino hau huno apate'niye. Agaemo Saimoni Pita haopale'mo ne'egeno'ae'mo, Ala kava nene, naiyamo sese huka natesanafe'mo hapiye, huno afi ge'nigeno'ae'mo, hemenimo nagaemo nehuva kava'nimo aepa'amo o'age'nananageka henaga'age'mo agegane, huno ha pai'nigeno Pita'a, hemeni'e muki afina'e'mo naiyamo sese huka o'nategane, huno ha pai'nigeno'ae'mo, kaiyamo sese hu'na okatesuvana hemenimo nafalu'nimogamo o'mai'nananageka hetamakamo o'aligane, huno ha pai'nigeno Saimoni Pita'a, Ala kava nene, naiya'age'mo sese huka o'nateka naya'e nagenopa'e'mo sese huka nato, huno ha pai'nigeno 10 Yesu'a, ago ani'mo fale'nisaya vaya'mo muki apakufa'alegamo o'ani'ya ofaino afa'a alagepa huno hane'niya'mofe'mo halate ani'mo ofalegaya'monanafa apaiya'age'mo sese hugae. Muki'amogitapamo ani'mo ago fale'naya'monanafa lapakaepati'mo magoke vekamo o'ani'ya'amo fai'niya vekamo mai'niye. 11 Yesu'a agai'amo avalelinuno hosu vaya'aina apamisiya vekamo ago age'niya'mofe'mo lapakaepati'mo o'ani'ya'amo fai'niya vekamo mai'niye, huno hapa pai'niye.

12 Yesu'a apaiyamo sese huno apateteno'ae'mo kukena'amo halate alino vaiteno hi'yalamute'mo haino siate'mo fai mai'neno'ae'mo, nagaemo lapaiyamo sese hu'na lapate'nova kava'mo aepa'amo age'nafiye. 13 Lapakaemo nagaefe'mo nagi aetapae'mo, Tisao, hutapa nagi aege, Ala kava nene, hutapa nagi aege nehaya gemo he, ani agufa vekamo mai'nova'mofe'mo alagi lama ge nehae. 14 Nagaemo Ala kava vekatapimo maige tisa vekatapimo maige hu'ne'nae'mo lapaiyamo sese hu'na lapate'nova'mofe'mo konagatapimogi apaiyamo sese hutapa apateyo. 15 Mani hemenimo hugetapa agaya agufa kava'mo hisayafe'mo ali'na lapave li'novanagi ani agufa kava'mo hiyo. 16 Lama ge lapa nepauve. Mago ali'ya'mo ne'aliya vekamo'a ali'ya'mo afo'amo aeno no'agase. Ani kava huno apa vekamo'a alino ate'nigeno u'niya vekamo aeno no'agase. 17 Lapakaemo ani gemo afitapa alagepa hu'netapae'mo ani kava'mo nehisayana Goti aulagale'mo alagepa hutapa mai'nayanagetapa afa'a lapamogaga aigae. 18 Nagaemo mani gemo muki'amogitapae'mo nosuve. Lekana pai'na lapate'nova vaya'mo ago lapake'nova'monanafa Goti mukufi'mo hu male'niya gemo afole aisiyafe'mo lekana pai'na ate'nove. Ani gemo'a huno'ae'mo,nagae'e'mo magokepi lokaeno mai'neno ne'ya'mo ne'niya vekamo'a kame huno nate'niye, huno hu'niye. 19 Ani agufa kava'mo nagaetegamo afole o'ai'nige'nae'mo ago hogote'na mani gemo lapa nepauve. Afole aisigetapae'mo nagaefe'mo, muki afina'mo ne'maiya vekamo mai'niye, hutapa lapakesa afitapa fatago hisayafe'mo hemenimo mani gemo lapa nepauve. 20 Lama ge lapa nepauve. Ina lagimo ali'na apate'noge'a ne'vaya vaya'aina ali'a falu fala hu'a ne'apatesafige'a ani kava hu'a nagae'e'mo ali'a falu fala hu'a ne'natae. Ina lagimo nagaemo navale'a ali'a falu fala hu'a ne'natesafige'a ani kava hu'a alino nate'nige'na emi'ne'nova veka'e'mo ali'a falu fala hu'a ne'atae, huno hapa pai'niye.

Yesu'a, mago vekamo'a nagaemo navaleno hosu vaya'aina apamigiye, huno hapa pai'niya gemae

(Mt 26:20-25; Mk 14:17-21; Lu 22:21-23)

21 Yesu'a ani gemo nehigeno'ae'mo agai'a aipamo'mo atete hu'nigeno ina gemo aeno hakalo huno hapa nepaino'ae'mo, alagi lama ge lapa nepauve. Lapakaepati'mo mago vekamo'a navaleno hosu vaya'aina apamigiye, huno hapa pai'niye. 22 Ge'amo ne'afiya vaya'mogimo ani gemo afite'apae'mo, lagaepati'mo ina lafe'mo hu'nifi, hu'a apakesamo afite'a i'aulagafi o'aulagafi hu'a mai'nae. 23 Mago vekamo ge'amo ne'afiya vekae'mo Yesu'a hau ayamopafi'mo hau'niya vekamo Yesu haopale'mo mai'niye. 24 Saimoni Pita'a kini aiteno, ina lafe'mo nehane, huka ge huka afi go, huno ha pai'nigeno 25 Yesu haifi'yale'mo havaeno ape huno mai'neno'ae'mo, Ala kava nene, ina lafe'mo nehane, huno afi ge'nigeno'ae'mo 26 Yesu'a, peleti maya atupamo ali'na anipi'mo aete'na amisuva vekamae, huno ha paiteno peleti maya atupamo alino anipi'mo aeteno Yutasi'a Isakaliyoti kotega vekamo Saimoni mafa'ne'amo alino ami'niye. 27 Yutasi'a peleti maya atupamo ali'nigeno'ae'mo Satani'a agae aipafi'mo faleno hai'niye. Yesu'a Yutasife'mo, huguve, huka nehana kava'mo malage huka huvo, huno ha pai'niye. 28 Hi'yalamute'mo siate'mo fai mai'naya vaya'mogimo Yesu'a na agufa kavafe'mo ani gemo hu'nifi hu'a o'afi'nae. 29 Yutasi'a moni kute'mo ne'yagaiya vekamo mai'niya'mofe'mo mago ge'amo ne'afiya vaya'mogi, uka hopa afina'mo nesuna ne'ya'mo miya faiyo, huno hu'nifi, kagemi ya'apimo ohane'nisiya vaya'aina alika fako huka apamiyo, huno hu'nifi, hu'a apakesa afi'nae. 30 Yutasi'a peleti mayamo afa aliteno malage huno kumategamo lami'niye. Hani'ilaga folagu'mo lami'niye.

Saufa ke'aepa gemo hapa pai'niya gemae

31 Yutasi'a apataleno kumategamo lamitegeno'ae'mo Yesu'a, hemenimo Vemo Mafa'nemo'a ala agi'amo aligiye. Agaemo Goti ha le konali ya'amo alino apave lisigeno Goti'a agaeteti'mo ala agi'amo aligiye. 32 Agaemo Goti ha le konali ya'amo alino apave lisigeno'ae'mo Goti'a agai'amo Vemo Mafa'nemo'mo ha le konali ya'amo alino apave ligiye. He, hemenimo malage huno alino apave ligiye. 33 Mafa'ne'nimogitapae, aise afina'mo lapakae'e'mo magokepi lokae'na maiguve. Kahauya hutapa nagesayafe'mo hugaya'monanafa o'nagegae. Yu vaya'aife'mo, visuva kotegamo afa'a o'ugae, hu'na hapa pai'novanage'na hemeni'e'mo lapakae'e'mo ani agufa gege'mo hu'na lapa nepauve. 34 Hemenimo mago saufa ke'aepa gemo lapa nepauve. Konagatapimogife'mo lapau lapayamopafi'mo lapaino. Lapakaefe'mo nahau nayamopafi'mo nahau'niya kava huno konagatapimogife'mo lapau lapayamopafi'mo lapaino. 35 Konagatapimogife'mo lapau lapayamopafi'mo lapausige'apae'mo muki vaya'mogimo lapakete'apae'mo, Yesu ge'amo ne'afiya vaya'mo mai'nae, hu'a hugae, huno hapa pai'niye.

Yesu'a Pitafe'mo, nagaefe'mo o'age'nova vekae, huka huteka kakame'ya namigane, huno ha pai'niya gemae

(Mt 26:31-35; Mk 14:27-31; Lu 22:31-34)

36 Saimoni Pita'a agaefe'mo, Ala kava nene, haiyategamo ugane, huno afi ge'nigeno'ae'mo, visuva kotegamo hemenimo afa'a nakame huka o'ugana'monanafa henaga'age'mo afa'a nakame huka ugane, huno ha pai'nigeno'ae'mo, 37 Ala kava nene, na kava hinage'na afa'a kakame hu'na o'uguve. Kagaetefe'mo falisuvafe'mo alo hu'nove, huno ha pai'nigeno'ae'mo, 38 nagaetefe'mo falisanafe'mo alo hu'napiye. Alagi lama ge kaha nepauve, kokolemo'mo age o'ai'nisigekae'mo nagaefe'mo o'age'nova vekae, huka huteka kakame'yamo namigane, huno ha pai'niye.

Copyright information for `KYG