John 14

Yesu'a kakana hu'na mai'nove, huno hu'niya gemae

Yesu'a, Lapausoli osuge lapaipamo'mo atete osuge hutapa maiyo. Gotife'mo lapakesa afitapa fatago huge nagaefe'mo lapakesa afitapa fatago huge nehaya'mofe'mo o'ataletapa mago'e hutapa lapakesa afitapa fatago hiyo. Afo'nimo'mo mai'niya kotegamo maisaya no'mo asole no'mo hane'niye. Ohane'niyesinana hane'niye, hu'na lapa opauvesine. Lapakaemo haitapa maisaya notapimo nagaemo alo hisuvafe'mo haiguve. Hai'na notapimo alo hu'na lapatete'nae'mo nagaegi'e'mo magokepi haita lokaeta maisunafe'mo emi'ne'na lapavalesugeta uta haigune. Visuva kotegamo ago agege visuva ka'mo ago agege hu'nae, huno hapa pai'nigeno Tomasi'a, Ala kava nene, visana kotegamo lagaemo o'age'nona'mofe'mo haiya kava huta visana ka'mo agegaune, huno afi ge'nigeno'ae'mo, Nagaemo ka'mo mai'ne'na lama gemo aepa vekamo mai'ne'nae'mo vaya'mo afa'a maisaya ya'mo aepa vekamo mai'nove. Muki vaya'mogimo muki ya'mo Afo'amotegamo apakai'apimo afa'a o'ugafa nagaetegamo ete'apaeke'mo muki ya'mo Afo'amotegamo afa'a ugae. Ago nagetapa aeto hu'naesinana ani kava hutapa Afo'nimo'mo ago agetapa aeto hu'naesine. Hemenimo mani afinateti'mo aepa faitapa Afo'nimo'mo alagi agetapa aeto nehae, ago age'naya'mofe'mae, huno hapa pai'nigeno Filipi'a, Ala kava nene, Muki ya'mo Afo'amo'mo lave ligeta agetetae'mo alagine huteta maino, huno ha pai'nigeno Yesu'a, Filipigamo lapakae'e'mo yatala afina'mo magokepi lokae'na mai'novana nageka aeto osu'napiye. Nage'niya vekamo'a muki ya'mo Afo'amo'mo ago age'niya'mofe'mo na kava higekae'mo muki ya'mo Afo'amo'mo lave liyo, huka nehane. 10 Nagaemo muki ya'mo Afo'amopi'mo mai'nogeno muki ya'mo Afo'amo'mo nagaepi'mo mai'niye, huka kagesa afika fatago osu'napiye. Lapa nepauva gemo nagai'ni nagesafati'mo nagesa afi'na lapa nopauva'monanafa agaemo muki ya'mo Afo'amo'mo nagaepi'mo mai'neno'ae'mo ali'ya'amo ne'aliye. 11 Muki ya'mo Afo'amopi'mo mai'nogeno muki ya'mo Afo'amo'mo nagaepi'mo mai'niye, hu'na nehuvanagi lapakesa afitapa fatago hiyo. Nehuva gee'mo lapakesa afitapa fatago nosisayana lokiya kava'mo nehuva kava'mo agetetapae'mo lapakesa afitapa fatago hiyo. 12 Lama ge lapa nepauve, nagaefe'mo apakesa afi'a fatago nehaya vaya'mogimo nagaemo nehuva agufa kava'mo afa'a hugae. Afo'nimotegamo haiguva'mofe'mo nagaemo nehuva kava'mo ago ae'a nagase'a mago'e kava'mo hugae. 13 Lapakaemo nagi'nileti'mo na agufa kavafe'mo nunumu'mo hutapa afi gesafi Afo'nimo ha le konali ya'amo ali'na lapave lisuvafe'mo ani kava'mo afa'a huguve. 14 Nagi'nileti'mo muki kavafe'mo nafi gesayana ani kava'mo afa'a huguve.

Yesu'a Goti Auneme'amo ali'na atesugeno emi'negaiye, huno hapa pai'niya gemae

15 Nagaefe'mo lapau lapayamopafi'mo lapau'nisiya'mo'mo ma kava'mo hiyo, hu'na nehuva gemo akame hiyo. 16 Nagaemo muki ya'mo Afo'amofe'mo nunumu'mo hisugeno mago alu vekamo emineno lapakae'e'mo muki afina'mo alagi magokepi lokaeno mai'neno lapa maesiyafe'mo alino lapamigiye. 17 Goti'a Auneme'amo alagi lama ge'age aepa Auneme'amo alino lapamigiye. Ma mopafi vaya'mogimo agaemo o'age'a age'a aeto osu'naya'mofe'mo afa'a o'aligaya'monanafa lapakae'e'mo mai'niya'mofe'mo ago age'nae. Agaemo lapakae'e'mo ago mai'niyanageno lapakaepi'mo maigiye. 18 Megusa mafa'negana hutapa o'maisayafe'mo lapakaetegamo emi'negauve. 19 Aise afina'mo utesige'apae'mo ma mopafi vaya'mogimo halate o'nagegaya'monanafa lapakaemo halate ago nagegae. Maige maige hu'na ne'mauva vekamo mai'nova'mofe'mo lapakaemo ani kava hutapa afa'a maigae. 20 Ani afina'mo afole aisigetapae'mo agetapae'mo Afo'amopi'mo mai'nigeta agaepi'mo mai'nonageno lagaepi'mo mai'niye, hutapa nagegae. 21 Vaya'mogi ke'aepa ge'nimo ma kava hiyo, ina kava osiyo, hu'na hapa nepauva gemo alite'a akame nehaya vaya'mogi nagaefe'mo hapau apayamopafi'mo nehapaiya vaya'mo mai'nae. Afo'nimo'mo nagaefe'mo hapau apayamopafi'mo nehapaiya vaya'aife'mo ani kavake'mo huno hau ayamopafi'mo hau'nisige'na nagae'e'mo ani kavake'mo hu'na nahau nayamopafi'mo nahau'nisige'na nagai'nimo ali'na apave lisuge'apa nagegae, huno hapa pai'nigeno 22 Yutasi'a Isakaliyoti kotega vekamo hamo'amo'mo, Ala kava nene, na kava higekae'mo kagaikamo kagesunafe'mo lagaeke'mo alika lave ligana'monanafa ma mopafi vaya'mo alika apave oligane, huno afi ge'nigeno'ae'mo 23 Yesu'a ge'ale'mo aeno atagaina huno ha paino'ae'mo, nagaefe'mo hapau apayamopafi'mo nehapaiya vaya'mogimo ge'nimo akame hugae. Akame hisageno Afo'nimo'a apakaefe'mo hau ayamopafi'mo hau'nisigeta'a agae'e nagae'e'mo apakaemo maisayategamo eta'a magokepi lokaeta'a maige maige huta maigune. 24 Nagaefe'mo hapau apayamopafi'mo nohapaiya vaya'mogimo ge'nimo alagi akame nosae. Nagesafati'mo nagesa afi'na mani gemo lapa nopaufa muki ya'mo Afo'amo'mo alino nate'nige'na emi'ne'nova vekalegati'mo mani gemo alite'na lapa nepauve. 25 Lapakae'e'mo magokepi lokae'na mai'ne'nae'mo mani gemo lapa nepauve. 26 Hemenimo lapa nepauva'monanafa muki ya'mo Afo'amo'mo aote Auneme'amo'mo lapa maesiya vekamo nagi'nileti'mo alino atesigeno lapakaetegamo emineno muki ge'amo alino lapaya maleteno lapaipa lapakesa alino he tino lapatesigetapa lapa nepauva gee'mo lapakesa afitapa ho hugae. 27 Naipamo'mo falu hu'nige'na ne'mauva kava hutapa lapaipamo'mo falu hu'nisigetapa maisayafe'mo ali'na nelapamuve. Ma mopafi vaya'mogi ali'a ne'apamiya kava hu'na ali'na nolapamuve. Lapausoli hutetapa lapaipamo'mo atete hu'nisigetapa koli osiyo. 28 Nagaemo, lapatale'na haite'nae'mo halate emi'negauve, hu'na lapa pai'nogetapa ago afi'nae. Nagaefe'mo lapau lapayamopafi'mo lapau'niyesinana Afo'nimo'mo ago aeno nagase'niya vekalegamo haisuvafe'mo lapamogaga ne'aiyesine. 29 Ani kava'mo afole aisigetapae'mo lapakesa afitapa fatago hisayafe'mo hemenimo lapa nepauve. 30 Ma mopafi vaya'aite'mo yagaino ne'apateya vekamo ago ne'eya'mofe'mo yatala gemo lapa opaiguve. Ago ne'eya'monanafa agae ya'mo naipafi'mo ohane'niya'mofe'mo afa'a yagaino o'nategaiye. 31 Ma mopafi vaya'mogi muki ya'mo Afo'amofe'mo nagaemo nahau nayamopafi'mo nahau'niya kava'mo agesayafe'mo muki ya'mo Afo'amo'mo, ma kava huvo, huno naha pai'niya kava'mo akame hu'na nehuve. Mani nopati'mo ataleta he tita vigetao.

Copyright information for `KYG