John 15

Yesu'a nofikana hu'na mai'nove, huno hu'niya gemae

Yesu'a huno'ae'mo, nagaemo lama ge alagamo ne'aeya nofikana hu'na mai'nove. Afo'nimo'mo ani nofi hoya aepa vekamo mai'neno ne'yagaiye. Agaemo nagaepati'mo ae'niya nofi akopamo'mo alagamo no'aeya nofi akopamo hatagauteno alino alagepa huno ne'atale. Ani agufa kavake'mo huno alagamo ne'aeya nofi akopafati'mo mago'e huno alagamo aesiyafe'mo hatagauno alino alagepa huno ne'ate. Nagaemo hatagau'na ali'na alagepa hugekana hu'na ali'na lapaya male'nova geleti'mo hosu kavatapimo sese hu'na lapate'nogetapa yaveyave vaya'mo mai'nae. Nagaepi'mo aeta hanitapa maige'nao nagaemo lapakaepi'mo alagi maino. Nofi akopamo'mo nofi'afi'mo aeno ohani'nigeno alagamo no'aeya agufa kava'mo hutapa nagaepi'mo alagi o'mai'nisaya'mo'mo alagamo alagi o'aegae.

Nagaemo nofi'agana hu'na mai'nogetapa nofi akopa'agana hutapa mai'nae. Naote maige lapaote maige huta mai'nisunana lapakaemo mago kava'mo afa'a osugaya'mofe'mo nagaepi'mo alagi mai'nisage'na lapakaepi'mo alagi mai'nisugetapae'mo asole alagamo afa'a aegae. Mago vekamo'a nagaepi'mo aeno hanino o'mai'nisiya'mo'mo akopamo hatagauno atale'nisigeno leno vaitesige'a ali'a anupa hute'a atafi'mo ali'a yaga au'a kaesageno leno asagaligiye. Lapakaemo nagaepi'mo aeta hanitapa mai'nisageno ge'nimo lapaipafi'mo hane'ninagetapa lapau'nisiya yafe'mo Gotife'mo ge hutapa afi gesageno'ae'mo afa'a alino lapamigiye. Lapakaemo asole alagamo ae'netapae'mo Afo'nimo'mo ala agi'amo alita amisaya kavateti'mo ge'nimo ne'afiya vaya'mo maigae. Afo'nimo'mo nagaefe'mo hau ayamopafi'mo hau'niya kava huno lapakaefe'mo nahau nayamopafi'mo nahau'niye. Nahau nayamopafi'mo nahau'niya kavapi'mo aetapa hanitapa maiyo. 10 Ge'aepa ge'nimo akame hisayana nahau nayamopafi'mo nahau'niya kavapi'mo aetapa hanitapa maigae. Ani kava hu'na Afo'nimo ke'aepa ge'amo akame nehu'nae'mo Afo'nimo'mo hau ayamopafi'mo hau'niya kavapi'mo alagi mai'nove. 11 Namogaga ne'auva kava'mo'a lapaipafi'mo havai tesigetapae'mo lapamogaga aisayafe'mo mani gemo lapa nepauve. 12 Ge'aepa ge'nimo hane'niyana lapakaefe'mo nahau nayamopafi'mo nahau'niya kava huno konagatapie'mo lapau lapayamopafi'mo lapaino. 13 Mago vekamo'a ao vaya'ae'mo hau ayamopafi'mo hau'niyanageno falino apatesiyana ani agufa hau ayamopafi'mo hau'niya kava'amo'mo muki vaya'mogimo hapau apayamopafi'mo hapau'niya kava'apimo ago aeno apakase'niye. 14 Lapakaefe'mo muki ma kava hiyo, ina kava osiyo, hu'na lapa pai'nova ge'nimo akame nehisaya'mo'mo nao vaya'mo mai'nae. 15 Ali'ya aepa vekamo'mo ali'ya'amo ne'aliya vaya'mo muki ali'ya'amo alisayafe'mo ali'ya'mo aepa'amo alino apave noliya'monanafa ali'ya'nimo ne'aliya vaya'age'mo mai'nae, hu'na hemenimo mago'e hu'na ge osuguve. Afo'nimotegati'mo muki ge'amo afi'nova gemo ago lapa pai'nova'mofe'mo nao vaya'mo mai'nae, hu'na nehuve. 16 Lapakaemo lekana paitapa o'nate'nafa nagaege'mo lekana pai'na lapate'novanagetapa alagamo hanege hanege huno hanesiya alagamo aesayafe'mo lekana pai'na lapate'nove. Afo'nimofe'mo nagi'nileti'mo muki kavafe'mo ge hutapa afi gesayana afa'a alino lapamigiye. 17 Inagi ina ke'aepa gee'mo lapa pai'nae'mo, konagatapie'mo lapau lapayamopafi'mo lapaino, hu'na ago lapa pai'nove, huno hapa pai'niye.

Ma mopafi vaya'mogimo apaini hu'a lapategae, huno hapa pai'niya gemae

18 Ma mopafi vaya'mogimo apaini hu'a lapatesagetapae'mo, hogote'a Ala kava nefe'mo apaini hu'a ate'naya kava hu'a apaini hu'a nelatae, hutapa lapakesa afiyo. 19 Lapakaemo ma mopafi vaya'mo mai'naesinana ma mopafi vaya'mogimo vaya'apie'mo hapau'niya agufa kava'mo hu'a lapakaefe'mo hapau apayamopafi'mo hapau'niesine. Hapau'niyesina'monanafa nagaemo ma mopafi vayapati'mo lekana pai'na lapate'nogetapa ma mopafi vayapi'mo o'mai'naya'mofe'mo apaini hu'a nelapatae. 20 Nagaemo, mago ali'ya'amo ne'aliya vekamo'mo ali'ya'mo afo'amo'mo aeno no'agase, hu'na lapa pai'nova gee'mo lapakesa afiyo. Apakaemo apaini hu'a nate'nisaya kava hu'a lapakae'e'mo apaini hu'a lapategae. Apakaemo ge'nimo afi'nisayana getapimo afigae. 21 Apakaemo alino nate'nige'na emi'ne'nova vekamo o'age'nayanage'a vaya'nimo mai'naya'mofe'mo lapakaetegamo muki ani agufa kavake'mo hugae. 22 Emi'ne'na hapa opai'novesinana apakame'ya o'namisageno hosu kava'apimo afa'a ohane'niyesine. Ago hapa pai'nova'mofe'mo hosu kavatimo o'age'none, hu'a alagi osugae. 23 Ina lagimo apaini hu'a ne'natesafi ani kava hu'a Afo'nimotega'e'mo apaini hu'a ne'atae. 24 Nagaemo apakaetegamo e'na vaya'mogi nosaya agufa kava'mo osu'novesinana apakame'ya o'namisageno hosu kava'apimo ohane'niyesina'monanafa hu'nova kava'mo ago agete'apae'mo nagaetega'e Afo'nimotega'e'mo apaini hu'a nela'atae. 25 Apakae ke'aepa gemo'mo huno'ae'mo,apakaetegamo mago hosu kava'mo osu'nova'monanafa fiku apaini hu'a nate'nae, huno avo'mo kae male'niya gemo afole aisiyafe'mo ani kava'mo nehae. 26 Nagaemo lapa maesiya vekamo alagi lama ge'age'mo aepa Auneme'amo Afo'nimotegati'mo ali'na atesugeno emineno nagaefe'mo faigoko gemo hugiye. 27 Lapakaemo ali'ya'nimo aepa fai'na ali'nova afinateti'mo nagae'e'mo magokepi lokaeta maime maime etapa hemeni'e'mo mai'naya'mofe'mo lapakae'e'mo nagaefe'mo faigoko ge'nimo aeta hakalo hugae, huno hapa pai'niye.

Copyright information for `KYG