John 16

Asagautapa o'aisayafe'mo mani gemo lapa nepauve. Apakaemo mono no'apifati'e mono no'apifati'e'mo ali'a lapa fai'a lapatalete lapataleteke'mo hugae. Mago afina'mo afole aisige'apae'mo kamiti lapamagite'apae'mo, Goti ali'ya'amo alagi ne'alune, hu'a apakesa afigae. Muki ya'mo Afo'amo'mo o'age'naya kava hu'a nagaemo o'nage'naya'mofe'mo ani agufa kava'mo lapakaetegamo hugae. Ani kava'mo afole aisigetapae'mo, ani agufa kavafe'mo laha pai'niya kava'mo hemenimo afole ai'niye, hutapa lapakesa afitapa ho hisayafe'mo mani gemo lapa nepauve.

Goti Auneme'amo ali'ya'ae'mo ava gemo hu'niya gemae

Hogote'na lapakae'e'mo magokepi lokae'na mai'nova afina'mo mani gemo lapa opai'nova'monanafa
hemenimo alino nate'nige'na emi'ne'nova vekalegamo haisuvafe'mo nehu'nae'mo mani gemo lapa nepauve. Lapa nepauva'monanafa lapakaepati'mo magoke vekamo'a haiyategamo ugane, huno alagi loka huno ge huno nafi oke'niye. Mani gemo lapa nepauva'mofe'mo lapaipafi'mo lapaipamo'mo lusi kava huno kana hu'niya kava'mo havai te'niya'monanafa lama ge lapa nepauve, lapa maesugetapa mago'e huta alagepa hutapa maisayafe'mo lapatale'na haiguve. Lapatale'na ohaisuvana lapa maesiya vekamo ali'na atesugeno lapakaetegamo emi no'megaiya'monanafa lapatale'na haisuva'mo'mo lapa maesiya vekamo ali'na atesugeno eminegaiye. Emi'neno'ae'mo ma mopafi vaya'ai hosu kava'apigi fatago kava'nigi agoti hu'na apatesuva kava'nigi huno alino apave lisige'a agegae. Nagaefe'mo apakesa afi'a fatago nosaya'mofe'mo hosu kava'apimo alino apave lisige'a agegae. 10 Nagaemo Afo'nimotega u'na haisugetapae'mo alagi o'nagegaya'mofe'mo fatago kava'nimo alino apave lisige'a agegae. 11 Nagaemo ma mopafi vaya'aite'mo yagaino ne'apateya vekamo ago agoti hu'na ate'nova'mofe'mo agoti hu'na apatesuva kava'mo alino apave lisige'a agegae. 12 Nagaemo mago'e gemo hane'niyanage'na lapa paigefe huva'monanafa kana hu'niya gemo hane'niya'mofe'mo o'afigae. 13 Hemenimo o'afigaya'monanafa Auneme'amo lama gemo aepa vekamo emineno'aeke'mo muki lama ge'amo alino lapave ligiye. Agai'amo agesafati'mo agesa afino ani gemo osugifa afi'niya gemo lapa paiteno afole aisiya kavafe'mo ava gemo huno lapa paigiye. 14 Agaemo ha le konali ya'nimo alino lapave liteno nagi'nile'mo alino asaga huno nategaiye. 15 Afo'nimo muki ya'amo nagai'ni ya'age'mo hane'niya'mofe'mo ani gemo hu'nae'mo, Goti Auneme'amo'a ha le konali ya'nimo alino lapave ligiye, hu'na ago lapa pai'nove.

Yesu'a, yulagefa aitetapae'mo halate lapamogaga aigae, huno hapa pai'niya gemae

16 Aise afina'mo utesigetapa o'nagegaya'monanafa halate mago'e huno aise afina'mo utesigetapa nagegae, huno hapa pai'niye. 17 Mago ge'amo ne'afiya vaya'amogimo ani gemo afite'apae'mo, aise afina'mo utesigetapa o'nagegaya'monanafa halate mago'e huno aise afina'mo utesigetapa nagegae, huno laha paige Afo'nimotega haiguva'mofe'mae, huno laha paige hu'niya gemo aepa'amo na agufa gemo hu'niye. 18 Aise afinane, huno hu'niya gemo aepa'amo na agufa gemo'mo hu'niye. Na agufa kavafe'mo ani gemo hu'nifi huta o'afi'none, hu'a hu'nae. 19 Inagi Yesu'a loka hu'a ge hu'a nafi gesayafe'mo nehae, huno apaketeno'ae'mo, nagaemo, aise afina'mo utesigetapa o'nagegaya'monanafa halate mago'e huno aise afina'mo utesigetapa nagegae, hu'na lapa pai'nova gee'mo gemo huge afige hutapa mai'nafiye. 20 Alagi lama ge lapa nepauve, lapakaemo avi'ya'mo hugaya'monanafa ma mopafi vaya'mogimo apamogaga aigae. Yulagefa aitetapae'mo halate aitapa afe letapa lapamogaga aigae. 21 A'nemogimo mafa'nemo ali'a apatesayafe'mo hu'naya afina'mo apakafu ki'nige'apae'mo yulagefa ne'aiya'monanafa ali'a apatete'apae'mo apakafu ki'niya kavafe'mo apakesa o'afi'a mafa'ne'apieke'mo apamogaga ne'aiye. 22 Ani kava hutapa hemenimo yulagefa ne'aiya'monanafa halate e'na lapakesugetapae'mo lapaipafi'mo lapamogaga aigae. Mago vekamo'mo ani lapamogaga aisaya kavatapimo afa'a alino o'atalegaiye. 23 Ani afina'mo afole aisigetapae'mo mago kavafe'mo loka huta nafi okegae. Alagi lama ge lapa nepauve, lapakaemo Afo'nimofe'mo nagi'nileti'mo muki yafe'mo afi gesageno'ae'mo afa'a alino lapamigiye. 24 Hogotetapa nagi'nileti'mo ge hutapa afi oke'nae. Afa'a ge hutapa afi gegeno'ao alino lapamisigeno lapaipafi'mo lapamogaga aisaya kava'mo havai tegaiye, huno hapa pai'niye.

Yesu'a, ma mopafi kava'mo ae'na agase'nove, huno hapa pai'niya gemae

25 Nagaemo ani kavafe'mo ae'na kalafefa gemo hu'na lapa pai'nova'monanafa afole aisiya afina'mo ae'na kalafefa gemo lapa opaigufa Afo'nimofe'mo ava gemo hu'na afole ai'na lapa paiguve. 26 Ani afina'mo afole aisigetapae'mo nagi'nileti'mo nunumu hutapa afi gegae. Lapakaemo nagi'nileti'mo ago ge hutapa afi gegaya'mofe'mo Afo'nimofe'mo ge hu'na afige'na lapa maesuva agufa kava'mo ohanegaiye. 27 Lapakaemo nagaefe'mo lapau lapayamopafi'mo lapau'nigetapae'mo Gotitegati'mo emine'niye, hutapa lapakesa afitapa fatago nehaya'mofe'mo Afo'nimo'mo agai'amo lapakaefe'mo hau ayamopafi'mo hau'niye. 28 Nagaemo Afo'nimotegati'mo ma mopafi'mo emi'ne'nove. Halate ma mopamo atale'na Afo'nimotegamo haiguve, huno hapa pai'nige'apae'mo 29 ge'amo ne'afiya vaya'mogimo, vae, hemenimo aeka kalafefa gemo huka laha nopaipa huka afole aika laha nepaine. 30 Hemenimo lagaemo ago kage'nonana mago vekamo'a kagaefe'mo mago gee'mo loka huno kafi gesiyafe'mo agava o'maika hogoteka vaya'ai apaipafi'mo ne'apakanageta kage'none. Muki kava'mo ne'agana'mofe'mo kagaefe'mo Gotitegati'mo emike'nane, huta lagesa afita fatago nehune, hu'a ha pai'nageno'ae'mo, 31 Hemenimo lapakesa afitapa fatago nehafiye. 32 Afiyo, ani afina'mo eno alagi ago hogo hu'niya'monanafa hemenimo ago afole ai'niyanagetapa nataletapa atagu faetapa notapilegamo utetapa hisage'na nagai'nige'mo maiguve. Maiguva'monanafa muki ya'mo Afo'amo'mo nagae'e'mo magokepi lokaeno mai'niya'mofe'mo nagai'nige'mo o'maiguva'monanafa muki ya'mo Afo'amo'e'mo magokepi lokaeta'a maigu'ae. 33 Lapakaemo nagaepi'mo mai'netapae'mo lapaipamo'mo falu hisiyafe'mo mani gemo lapa nepauve. Ma mopafi'mo mai'netapae'mo hanageke ya'mo alitapa maigaya'monanafa nagaemo ma mopafi kava'mo ago ae'na agase'nova'mofe'mo lapakaemo lokiya vaitapa maiyo, huno hapa pai'niye.

Copyright information for `KYG