John 17

Yesu'a nunumu'mo huno apate'niya gemae

Yesu'a ani gemo ago hapa paiteno'ae'mo alino maku huno koku'nategamo age'neno nunumu'mo hu'niye. Afo, ani afina'mo ago afole aiyanagi kagikale'mo alino asaga huno katesiyafe'mo Mafa'nekamo agi'ale'mo alika asaga huka ato. Kagaemo muki ma mopafi vaya'aite'mo yagaino apatesiyafe'mo lekana paika ate'nane. Apavaleka ami'nana vaya'mo afa'a maige maige hu'a maisaya ya'mo alino apamisiyafe'mo himamu'amo ago alika ami'nane. Kagaemo lama ge'age Gotiga'e Yesu Kalaisi'mo alika ate'nanageno emine'niya veka'e'mo anake'a aeto hu'naya vaya'mogimo maige maige hu'a maisaya ya'mo ago ali'nae. Nagaemo ma mopafi mai'ne'nae'mo kagikale'mo ali'na asaga hu'na kate'nove. Kagaemo ani ali'ya'mo aliyo, huka naha pai'nana ali'yakamo ago alagi ali'na hano hu'nove. O Afo, kagae'e'mo magokepi lokae'na mai'ne'nae'mo kaulagale'mo ha le konali ya'nimo ma mopamo alo osu'nana afinateti'mo ali'nova ha le konali ya'nimo alika namiyo.

Nagaemo ma mopafi vayapati'mo apavaleka nami'nana vaya'mo kagikamo aepa'amo ali'na apave li'nove. Ani vaya'mo vayakamo mai'nageka ago apavaleka nami'nane. Apakaemo kagae gemo alite'a gekale'mo yagai'a ate'ne'a akame hu'nae. Hemenimo apakaemo ago age'nayana muki alika nami'nana ya'mo kagaetegatike'mo e'niye, hu'a age'nae. Ani kava'mo hu'na nami'nana gemo ali'na apami'noge'a alite'apae'mo, Gotitegati'mo emine'niye, hu'a nagete'apae'mo Goti'a alino ate'nigeno emine'niye, hu'a apakesa afi'a fatago nehae. Nagaemo nunumu'mo hu'na ne'apatove. Nagaemo ma mopafi vaya'aife'mo nunumu'mo hu'na no'apatofa apavaleka nami'nana vaya'mo vayakamo mai'naya'mofe'mo nunumu'mo hu'na ne'apatove. 10 Muki vaya'nimo vayakamo mai'nae. Ani agufa kava'mo hu'a vayakamo vaya'nimo mai'nae. Apakaemo ha le konali ya'nimo ali'a apave lite'a nagi'nile'mo ali'a asaga hu'a ne'natae. 11 Hemenimo ma mopafi'mo mago'e hu'na o'mai'na atale'na kagaetegamo haiguva'monanafa apakaemo ma mopafi'mo mai'nae. Afo, hu'na, kaote vekamo mai'neka alagepa kava'age'mo nehana vekae, ani kava'mo huta'a magoke'age'mo mai'no'a kava hu'a apavaleka nami'nana vaya'mo magoke'age'mo mai'nayanage'a ani kava hu'a maisayafe'mo himamukaleti'mo yagaika apato. 12 Nagaemo ma mopafi'mo apakae'e'mo magokepi lokae'na mai'ne'nae'mo kagikaleti'e himamukaleti'e'mo yagai'na apate'noge'a afa'a mai'naya'monanafa magoke vekae'mo kagae mukufi gemo'mo, lageso hugiye, huno hu'niya gemo afole aisiyafe'mo lageso hu'niye. 13 Hemenimo nagaemo kagaetegamo haisuvafe'mo nehu'nae'mo ma mopafi mai'ne'nae'mo namogaga ne'auva kava hu'a apamogaga aisaya kava'mo apaipafi'mo havai tesiyafe'mo mani gemo hu'na nunumu hu'na ne'apatove. 14 Nagaemo kagae gemo ali'na apami'noge'a ali'nage'apae'mo ma mopafi vaya'mogimo apakaefe'mo alagi ohapau'nige'a apaini hu'a apate'nae. Ma mopafi vaya'mo o'mai'naya'mofe'mo apaini hu'a apate'nae. 15 Nagaemo, ma mopafati'mo apavalelika haiyo, hu'na ge nosufa, hosu vekamo'mo apakaetegamo hosu kava'mo osisiyafe'mo yagaika apato, hu'na nunumu hu'na ne'apatove. 16 Nagaemo ma mopafi vekamo o'mai'nova kava hu'a ma mopafi vaya'mo o'mai'nae. 17 Lama gekaleti'mo apavaleka alika kagaetegamo apaote apato. Gekamo alagi lama ge'ageke'mo hane'niye. 18 Kagaemo ma mopafi vaya'aitegamo alika nate'nanage'na emi'ne'nova kava hu'na ma mopafi vaya'aitegamo ali'na apate'noge'a u'nae. 19 Kagaemo lama gekaleti'mo apavaleka alika apaote apatesanafe'mo nagaemo ali'yakamo alisuvafe'mo ali'na naote nate'nove.

20 Nagaemo mani vaya'aifeke'mo nunumu hu'na no'apatofa ge'apileti'mo nagaefe'mo apakesa afi'a fatago hisaya vaya'efe'mo nunumu hu'na ne'apatove. 21 Apakaemo muki'amogi magoke'age'mo mai'ne'a Afo'nimogamo nagaepi'mo mai'nanage'na kagaepi'mo mai'nova kava hu'a la'agaepi'mo magoke'age'mo maisayafe'mo nunumu hu'na ne'apatove. Magoke'age'mo mai'nisage'apae'mo ma mopafi vaya'mogi apakete'apae'mo nagaefe'mo, Goti'a alino ate'nigeno emine'niye, hu'a apakesa afi'a fatago hisayafe'mo nunumu hu'na ne'apatove. 22 Magoke'age'mo mai'no'a kava hu'a magoke'age'mo maisayafe'mo alika nami'nana ha le konali ya'nimo ali'na apami'nove. 23 Nagaemo apakaepi'mo mai'nogeka nagaepi'mo mai'nana'mofe'mo magoke'age'mo maisayafe'mo nunumu hu'na ne'apatove. Magoke'age'mo mai'nisage'a ma mopafi vaya'mogimo apakete'apae'mo, Goti'a alino ate'nigeno emine'niye. Goti'a Mafa'ne'ae'mo hau ayamopafi'mo hau'niya kava huno apakaefe'mo hau ayamopafi'mo hau'niye, hu'a hisayafe'mo nunumu hu'na ne'apatove. 24 Afo, nahau'niyanagi apavaleka nami'nana vaya'nimo nagaetegamo e'a mai'ne'a alika nami'nana ha le konali ya'nimo agesayafe'mo nahau'niye. Ma mopamo alo osu'nana afina'mo nagaefe'mo kahau kayamopafi'mo kahau'niya'mofe'mo ha le konali ya'nimo alika nami'nane. 25 O Afo, fatago kava'age'mo nehana vekamogae, hu'na, ma mopafi vaya'mogimo okage'naya'monanafa nagaemo kage'noge'apae'mo mani vaya'mogi kagete'apae'mo, Goti'a Afo'amo'mo alino ate'nigeno emine'niye, hu'a afi'nae. 26 Nagaefe'mo kahau kayamopafi'mo kahau'niya kavakamo apakaepi'mo hanesige'na apakaepi'mo maisuvafe'mo kagikamo aepa'amo ali'na apave li'novanage'na mago'e hu'na ali'na apave liguve, huno nunumu hu'niye.

Copyright information for `KYG