John 19

Pailati'a Yesufe'mo, amagigeno falino, huno hapa pai'niya gemae

Inagi Pailati'a ati vekae'mo, nofi kayoteti'mo amagiyo, huno ha pai'nigeno amagi'niye. Ati vaya'mogimo u'a aufe nofi'mo ali'a kalagi'a kakolitamo alo hute'a agenopale'mo male'a ate'ne'a haesa lavolavo alonoku'mo ali'a male'a atete'apae'mo, Yu vaya'aite'mo yagaika ne'apatana kini vekamo mai'nananagi alagepa huka maiyo, hu'a hute'a apaya'mo ali'a ataleli e'a amagite amagite hu'a amagi'nae.

Pailati'a halate kumatega lamino, afiyo, amagisuva kava'mo aepa'amo o'age'nova'mofe'mo lapakaemo, amagisiya kava'mo aepa'amo o'age'niye, hutapa lapakaemo agesayafe'mo lapakaetegamo avaleli'na emi'negauve, huno hapa pai'niye. Yesu'a aufe nofi kakolitamo agenopale'mo male'a atete'a haesa lavolavo alonoku'mo male'a ate'naya ya'mo alinino kumatega emine'nigeno Pailati'a, ani vekamo mai'nigi ageyo, huno hapa pai'niye. Mono hu'a ne'apataya vaya'aite'mo yagai'a ne'apataya vaya'e alopa mono note'mo ne'yagaiya ati vaya'mogi'e'mo agete'apae'mo, malipu yosale'mo nili aiteka alika he tika ato. Malipu yosale'mo nili aiteka alika he tika ato, hu'a alopa gefati'mo ge hu'nageno'ae'mo Pailati'a, amagisuva kava'mo aepa'amo o'age'nogi lapakaitapige'mo avalelita utapa malipu yosale'mo nili aitetapa alita he titapa ateyo, huno hapa pai'niye. Yu vaya'mogi, agaemo Goti mafa'ne'amo mai'nove, huno hu'niya'mofe'mo ke'aepa getimo'mo huno'ae'mo, ago faligiye, huno hu'niye, hu'a ha pai'nae. Pailati'a ani gemo afiteno'ae'mo mago'e huno koli hu'niye. Halate Pailati'a agoti nopi'mo haino Yesufe'mo, haiyategati'mo e'nane, huno afi ge'nigeno'ae'mo Yesu'a ge osuno afa'a mai'niye. 10 Pailati'a, nagaefe'mo naha opaigapiye. Nagaefe'mo yagaika apatesana vekamo maigane, hu'a lekana pai'a nate'naya'mofe'mo afa'a ateyo, hu'na hisuge'a katesageka afa'a ugane. Amagiyo, hu'na hisuvana malipu yosale'mo nili aite'a ali'a he ti'a kategae, huno ha pai'nigeno 11 Yesu'a, Goti'mo namagisana agufa himamukamo okami'niyesinana nagaetegamo mago kava'mo afa'a osanesine. Hu'niya'mofe'mo navalelineno kami'niya vekamo hosu kava'amo'mo kagae hosu kava'mo ago aeno agase'niye, huno ha pai'niye. 12 Pailati'a ani gemo afiteno'ae'mo Yesu'mo afa'a atesigeno visiya kafe'mo kahauya hu'niya'monanafa Yu vaya'mogimo, atesanageno visiyana Sisa'a hogote vekamo ala'apimo yagaino ne'apateya vekamo ao vekamo o'mai'nane. Ala'apimo yagai'na ne'apatova kini vekamo mai'nove, hu'a nehaya vaya'mo Sisa kame'amo mai'nae, hu'a alopa gefati'mo ge hu'nae. 13 Pailati'a ani gemo afiteno'ae'mo Yesu'mo kumatega avalelino lamino fai mai'neno agoti huno ne'apateya siate'mo fai mai'niye. Asole latapa yafa'mo mopafi male'naya yafate'mo siamo maleteno fai mai'niya yatefe'mo Himulu gefati'mo agi'amo Gamatagayagae, hu'a agi ae'nae.

14 Ani afina'mo Pasova ne'ya'mo alo nehaya afina'mo hane'niye. Yegemo haineno makasa haeyategamo Pailati'a, ageyo, yagaino nelapateya kini vekatapimo mai'niye, huno hapa pai'nige'apae'mo, 15 malipu yosale'mo nili aiyo, nili aiyo, nili aiteka alika he tika ato, hu'a alopa gefati'mo ge hu'nae. Pailati'a, yagaino nelapateya kini vekatapimo malipu yosale'mo nili aite'na ali'na he ti'na atesufiye, huno apafi ge'nige'apae'mo mono hu'a ne'apataya vaya'aite'mo yagai'a ne'apataya vaya'mogimo, Sisake'mo yagaino nelateya kini netimo mai'niye, hu'a ha pai'nae. 16 Inagi Pailati'a Yesu'mo avalelino uno malipu yosale'mo nili aite'a ali'a he ti'a atesayafe'mo avaleno apami'nige'a avaleli'a u'nae.

Yesu'mo malipu yosale'mo nili aite'a ali'a he ti'a ate'naya gemae

(Mt 27:32-44; Mk 15:21-32; Lu 23:26-43)

17 Avaleli u'nageno'ae'mo malipu yosa'amo agai'amo alino kofilino uno taonimo alino ataleno malaga mago aupilaga agi'amo Anu'ayamufagayagamo uno ava'yi hu'niye. Himulu gefati'mo agi'amo Gogatagayagae. 18 Ani aupilagamo malipu yosale'mo nili aite'a ali'a he ti'a ate'nae. Lole vekala'e'mo malipu yosale'mo nili aite'a aluga aluga haopalate'mo ali'a he ti'a anate'nageno Yesu'a folagapi'mo mai'niye. 19 Pailati'a mago gemo avo kaeteno mago vekamo ami'nigeno agenopalegamo malipu yosale'mo nili ai male'niye. Ani gemo'a huno'ae'mo, Yesu'a Nasalasa vekamo Yu vaya'aite'mo ala'apimo yagaino ne'apateya kini vekamae, huno avo'mo kae male'niye. 20 Yesu'a malipu yosale'mo nili aite'a ali'a he ti'a ate'naya aupilagamo taoni haopale'mo hane'niya'mofe'mo muki Yu vaya'mogimo ani kae male'niya avopi'mo lekana pai'a age'nae. Ani gemo Himulu gefati'mo kaege Galiki gefati'mo kaege Lomu gefati'mo kaege huno avo'mo kae male'niye. 21 Inagi mono hu'a ne'apataya vaya'aite'mo yagai'a ne'apataya vaya'mogimo Pailatife'mo, Yu vaya'aite'mo ala'apimo yagaino ne'apateya kini vekamae, huka avo'mo okaeka Yu vaya'aite'mo yagai'na ne'apatova kini veka'apimo mai'nove, huno hu'niye, huka avo'mo kao, hu'a ha pai'nageno 22 Pailati'a, ha'ao, ago avo'mo kae male'nova'mofe'mo ani gemo alagike'mo hanegaiye, huno hapa pai'niye.

23 Ati vaya'mogimo Yesu'mo malipu yosale'mo nili aite'a ali'a he ti'a ate'ne'apae'mo kukena'amo ali'a fako hu'a lole'e lole'e hetamamo malete'a apamete apamete hu'a ali'nae. Yesu'a agufale'mo vaino ne'aliya sioti'amo ofakani'niya sioti'amo asagi'a male'ne'apae'mo, 24 alita apake o'aigetao yokalo letetaeke'mo aeno lagasesiya vekamo'a ani siotimo aligiye, hu'a hu'nae. Goti mukufi'mo hu male'niya gemo afole aisiyafe'mo ani kava'mo hu'nae. Ani gemo'a huno'ae'mo,

Kukena'nimo ali'a fako hu'a magoke magoke hu'a ali'nae. Yokalo lete'a mago aeno apakase'niya vekamo'a yatala kukena'nimo ali'niye,
huno hu'niye.

25 Yesu ita'amo'agi ita'amo agana'amo'agi Maliya'a Lopasi anagi Maliya'a Maganala kotega anagi hu'a e'a Yesu malipu yosa aepale'mo he ti'a mai'nae. 26 Yesu'a anakeyana ita'amo'e hau'niya vekamo ge'amo ne'afiya veka'e'mo e'ana mai'na'ageno anaketeno'ae'mo ita'amofe'mo, Ane, huno, agaemo mafa'nekamae, huno ha paiteno 27 ge'amo ne'afiya vekae'mo, agaemo itakamo'mae, huno ha pai'nigeno ani vekamo'mo ani afina'mo no'alegamo avalelino uno alagepa huno yagaino ateno mai'niye.

Yesu'mo ago fali'niya gemae

(Mt 27:45-56; Mk 15:33-41; Lu 23:44-49)

28 Yesu'mo agesa afino'ae'mo, muki ali'ya'nimo ago ali'na hano hu male'nove, huno ago ageteno'ae'mo Goti mukufi'mo hu'niya gemo alino afole aino atesiyafe'mo ina gemo huno'ae'mo, anife'mo ne'nahaiye, huno hu'niye. 29 Mago yuvapafi'mo nofi alagafati ani'mo atu neheya ani'mo hane'nige'a kanipa kayote'mo fai'a lanu paite'a ani anipi'mo kaki'nofagana ya'mo ali'a aete'a alini u'a Yesu'a nesiyafe'mo ami'nae. 30 Ani ani'mo neteno'ae'mo, ali'ya'nimo ago ali'na hano hu'nove, huno huteno ape huno mai'neno'ae'mo auneme'amo ataleteno fali'niye.

Ati vekamo'a Yesu haopafi'mo hayoleti'mo ae'niya gemae

31 Ani afina'mo Pasova ne'ya'mo alo hu'a ne'malaya afina'mo hane'niya'mofe'mo egamo hogote Sapati hopa afina'mo malipu yosale'mo nili ai'naya vaya'mo malipu yosale'mo apakufa'amo hanesiyafe'mo Yu vaya'mogi ohapau'niya'mofe'mo ati vaya'mogi Pailatife'mo u'a apaiyamo ai'a lo aete'a apakufa'amo ai'a akai'a ataleyo, hu'a ha pai'nae. 32 Ati vaya'mogi u'a lole vekala'ani anaiyala'mo ai'a lo aete'apae'mo 33 u'a Yesu'mo agayana ago fali'nige'a agete'a aiyamo ai'a lo o'ae'naya'monanafa 34 mago ati vekamo'a haopafi'mo hayoleti'mo ne'aegeno'ae'mo malage huno kola'e ani'e'mo emine'niye. 35 Apakesa afi'a fatago hisayafe'mo ani kava'mo age'niya vekamo'a faigoko gemo huno hapa pai'niye. Agaemo, lama ge nehuve, huno, ago age'nove, huno hapa pai'niye. 36 Goti mukufi'mo hu male'niya gemo ali'a afole ai'a atesayafe'mo ani kava'mo hu'nae. Mago gemo'mo huno'ae'mo,magoke ayamufamo ai'a lo o'aegae, huno hu'niye. 37 Mago'e huno Goti mukufi gemo'a huno'ae'mo,agufafi'mo ae'naya vaya'mogimo agegae, huno hu'niye.

Lole vekala'moganimo yafa kapi'mo alini u'ana ki'ana ate'na'a gemae

(Mt 27:57-61; Mk 15:42-47; Lu 23:50-56)

38 Ani kava'mo hutageno Yosefe'a Alamatiya taonifi vekamo'a uno Pailatife'mo, Yesu kefa'amo alininu'na ki'na ategesuve, huno afi ge'nigeno'ae'mo, he, huno ha pai'niye. Yosefe'a Yesu ge'amo ne'afiya vekamo mai'niya'monanafa Yu vaya'aife'mo koli hu'niya'mofe'mo aeno hakalo huno hapa opai'niye. 39 Nikonimasi'a hogoteno mago hani'ilagamo Yesutegamo e'niya vekamo'mo lole yosalapati ani'mo'a alagepa atumo ne'aiya malasini ani'mo'a kefa'amo okasalino afa'a hanesiya anitalani anaki'animo meya'e atosi'e'mo lusi kava huno kana hu'niya ku'mo alinino e'niye. Kana hu'niya ya'amo'mo 34 kilo agufa kana hu'niya ya'mo hane'niye. 40 Lole vekala'mogani Yesu kefa'amo ali'ana alagepa yaveyave lavolavofi'mo hayaete'ana alagepa atumo ne'aiya malasinimo ali'ana folagapi'mo malete'ana hayae'na'ae. Ani kava'mo Yu vaya'mogi nehaya agufa kava'mo hu'na'ae. 41 Malipu yosale'mo nili aite'a ali'a he ti'a ate'naya haopale'mo mago yosa hoyamo hane'nigeno mago saufa yafa ka'mo hane'nige'a mago vekamo ki'a o'ate'naya yafa ka'mo hane'niye. 42 Yu vaya'mogi Pasova ne'ya'mo alo hu'a ne'malaya hopa afina'mo ago eno hogo hu'nigeno ani yafa ka'mo haopale'mo hane'niya'mofe'mo alini e'ana yafa kapi'mo ki'ana ate'na'ae.

Copyright information for `KYG