John 2

Mago vekamo'mo a'mo ali'nige'apae'mo ne'ya'mo ne'naya gemae

Lole afina'mo utegeno mago vekamo'mo a'mo ali'nige'apae'mo Kena taonimo Galeliya kotegamo ne'ya'mo ne'nae. Yesu ita'amo'mo ani nopi'mo haino mai'niye. Ani vaya'mogimo Yesu'e ge'amo ne'afiya vaya'efe'mo ge hu'nage'a e'a mai'nae. Mani asole vaya'mo mai'naya'mofe'mo nofi alagafati ani'mo ago ne'a hano hu'nageno'ae'mo Yesu ita'amo'mo agaefe'mo, nofi alagafati ani'apimo ago ne'a hano hu'nae, huno ha pai'nigeno'ae'mo, ane, Nagaemo hisuva kava'mo kagae ali'ya'mo ohane'nifa nagai'ni ali'ya'nimo hane'niye. Nagae afina'mo afole o'ai'niye, huno ha pai'niye.

Yesu ita'amo'mo ali'ya'mo ne'aliya vaya'aife'mo, na agufa kava'mo hiyo, huno lapa paisifi ge'amo akame hutapa hiyo, huno hapa pai'niye. Ani nopi'mo sigisi'a yafa ani ke'mo hane'nigeno Yu vaya'ai mono kava'apimo akame hu'a ani'mo nefalaya ke'mo hane'niye. Ani kepi'mo teni'a paketi ani'mo hane'nisifi fifitini'a paketi ani'mo hane'nisifi huno hane'niya agufa ke'mo hane'niye. Yesu'a ali'ya'mo ne'aliya vaya'aife'mo, utapa ani'mo hefilitetapa muki ke'afi'mo lakitapa havai teyo, huno hapa pai'nige'a u'a hefili e'a laki'a havai te'nageno'ae'mo, ani ani kepati'mo hefilitutapa ne'yate'mo ne'yagaiya vekamo amiyo, huno hapa pai'niye. Anilafa'mo hefili'a u'a ami'nageno neno afi ge'niye. Agaemo nofi alagafati ani'mo alino hamaleno ate'niya anike'mo ne'niye. Haiya'alegati'mo ani nofi alagafati ani'mo alini'a e'nafi huno o'age'niya'monanafa ali'ya'mo ne'aliya vaya'mogi ani ani'mo he fi'apaeke'mo age'nae. Neteno'ae'mo a'mo ali'niya vekae'mo gemo hu'nigeno e'nigeno ha paino'ae'mo, 10 muki vaya'mogimo hogote'a ne'ya'mo ne'naya yate'mo e'a mai'naya vaya'mo alagepa nofi alagafati anike'mo ali'a laki'a apami'nage'a asole ani'mo netage'apaeke'mo henaga'age'mo hosu'niya nofi alagafati ani'mo ali'a ne'apamiye. Ani kava'mo nehaya'monanafa kagaemo hemenimo alagepa nofi alagafati ani'mo maleka mai'neka alinikeka nelamine, huno ha pai'niye. 11 Yesu'a hogote afina'mo mani no'agaya aune kava'mo Kena taonifi'mo hu'niye. Ani taonifi'mo ha le konali ya'amo alino apave li'nige'apae'mo ge'amo ne'afiya vaya'mogimo agaefe'mo apakesa afi'a fatago hu'nae.

12 Henaga'amo Yesu'agi ita'amo'agi agana'amogimogi ge'amo ne'afiya vaya'amogi hu'a Kapeneyamu taonifi'mo u'a aise afina'mo mai'nae.

Yesu'a Yu vaya'ai alopa mono nopi'mo uno hai'niya gemae

(Mt 21:12,13; Mk 11:15-17; Lu 19:45-46)

13 Yu vaya'ai hopa afina'mo Pasova ne'ya'mo ne'naya afina'mo eno hogo hu'nigeno'ae'mo Yesu'a Yulusalemu taonifi'mo u'niye. 14 Uno Yu vaya'ai alopa mono nopi'mo haino apakeyana ani vaya'mogimo pulumakagi sipisipigi namagi hu'a maketi nehaya vaya'mo maige alu nofi vaya'ai monimo alite'a Yu nofi vaya'ai monimo alite'a ne'apamiya vaya'mo maige hu'a mai'nageno apake'niye. 15 Agaemo nofi'mo alino ana aeno nofi kayo'mo alo huno ali'neno sipisipi'e pulumaka'e'mo alino hapafaitalege'a apaune hetale'a kumatega lami'nae. Agaemo alu nofi vaya'ai monimo alite'a Yu nofi vaya'ai monimo alite'a ne'apamiya vaya'ai hi'yalamu'apimo alino ago'ya faino ataleteno alaga moni'apimo alino aino atagu faeno atale'niye. 16 Agaemo namamo miya nefaiya vaya'aife'mo, afo'nimo nopi'mo situvamo malegekana agufa kava'mo nehagi mani namamo alinitapa viyo, huno hapa pai'niye. 17 Ani afina'mo ge'amo ne'afiya vaya'mogi Goti mukufi'mo avo'mo kae male'niya ge'ae'mo apakesa afi'a ho hu'nae. Ani gemo'mo,kagae no'mo alagepa huno hanesiyafe'mo naya mukiki nehuva kava'mo atagana huno leno nasaga li'niye, huno hu'niye. 18 Ani kava'mo hu'nige'apae'mo Yu vaya'mogi agete'a, kagaemo mani kava'mo nehana'mofe'mo na alagena ya'mo ne'yagaina ya'mo ali'napigi alika lave ligane, hu'a afi ge'nae. 19 Afi ge'nageno'ae'mo, mani Goti mono no'amo hetapa halagape vaisage'nae'mo lole'e mago'e afina'mo halate ali'na ki'na hano huguve, huno hapa pai'nige'apae'mo, 20 asole vaya'mogimo, foti sigisi'a kafugafi'mo kime kime e'a ki'a hano hu'naya'monanafa kagaemo lole'e mago'e afina'mo halate alika kika hano hugapiye, hu'a afi ge'naya'monanafa 21 Yesu'a agai'a agufae'mo hu'niye. 22 Goti'a fali'niyateti'mo halate alino he tino ate'nige'apae'mo ge'amo ne'afiya vaya'mogi ani hu'niya ge'ae'mo apakesa afi'a ho hute'a Goti Mukufi'mo avo'mo kae male'niya ge'enagi Yesu'a hu'niya ge'enagi hu'a apakesa afi'a fatago hu'nae.

Yesu'a muki vaya'ai apaipafi'mo apake'niya gemae

23 Pasova ne'ya'mo ne'naya afina'mo Yesu'a Yulusalemu taonifi'mo mai'neno'ae'mo no'agaya aune kava'mo hu'nige'apae'mo asole vaya'mogimo agete'a agaefe'mo apakesa afi'a fatago hu'nae. 24 Hu'naya'monanafa Yesu'a muki ma mopafi vaya'ai apaipafi'mo ago apake'niya'mofe'mo alagi lama ge nehae, huno agesa o'afi'nifa afa'a yagu yaga huno mai'niye. 25 Gemo afino alagepa huno afiteno apakesiyafe'mo mago vaya'mogi apava gemo hu'a ha opaigafa agai'age'mo muki ma mopafi vaya'ai apaipafi'mo ago apake'niye.

Copyright information for `KYG