John 21

Yesu'a ge'amo ne'afiya vaya'mo seveni'a vaya'aitegamo afole ai'niya gemae

Henaga'amo ge'amo ne'afiya vaya'mo mago ani kotu'mo agi'amo Taipiliyasi ani kotu agi'nale'mo mai'nageno Yesu'a halate afole ai'niye. Ina kava'mo huno apakaetegamo afole ai'niye. Saimoni Pita'agi Tomasife'mo lago'ya mafa'neo, hu'a agi ne'aya vekagi Natanielo'a Kena taonifi Galeliya kotega vekagi Sepeti mafa'nelanagi mago'e lole vekala'mo ge'amo ne'afi'a vekalanagi hu'a magokepi lokae'a mai'nae. Saimoni Pita'a muki vaya'aife'mo, u'na umenimo male'ne'na noyamemo aligesuve, huno hapa pai'nige'apae'mo, muki'amo magokepi lokaeta ugune, hu'a ha paite'a sipifi'mo hai'a maite'a u'nayana muki hani'ilagamo noyamemo o'ali'nae. Yegemo haine'nigeno'ae'mo Yesu'a ani agi'nale'mo he tino mai'nige'apae'mo Yesu'a mai'niye, hu'a o'age'nae. Yesu'a, ma neya ve, huno, mago noyame ali'nafiye, huno apafi ge'nige'apae'mo, ha'ao, o'ali'none, hu'a ha pai'nageno'ae'mo, umenimo alita sipimo lamaga aupilagamo yaga auta maleyo noyamemo aligayanagi, huno hapa pai'nige'a umenimo ali'a yaga au'a male'nageno asole noyamemo e'a hai'e'a havai te'nage'a he'a halau'nayana lusi kava huno kana hu'nige'a he'a ohalau'nae. Yesu'a agaefe'mo hau'niya vekamo ge'amo ne'afiya vekamo'a Pitafe'mo, ani vekamo Ala kava ne'mae, huno ha pai'nigeno Pita'a ani gemo afiteno'ae'mo ali'ya'mo aligefe'mo huno'ae'mo asagino male'niya kukena'amo alino vaiteno anipi'mo asagauno ai'niye. Sipimo afagi'ale'mo o'male'nafa ani agi'nale'mo male'naya'mofe'mo mago ge'amo ne'afiya vaya'mo sipifi mai'ne'a umenimo he'a halauli'a e'nae. Mopafi'mo emi'e'ne'a agayana mago noyame'e peleti maya'e'mo ata hokanufale'mo kae male'nige'a age'nae. 10 Yesu'a, hemenimo ali'naya noyamefati'mo mago aliteyo, huno hapa pai'nigeno 11 Saimoni Pita'a sipifi'mo uno haino umenimo heno halaulino eno ani agi'nale'mo male'niye. Muki'amo alopa noyamemo 153'amo u'a hai'a mai'naya'monanafa umenimo aino kapalu o'ae'niye. 12 Yesu'a, etapa ne'ya'mo alita neyo, huno hapa pai'nige'apae'mo ge'amo ne'afiya vaya'mogi, Ala kava neke'mae, hu'a age'naya'mofe'mo ina lagamae, hu'a afi gesayafe'mo koli hute'a ge hu'a afi oke'nae. 13 Inagi Yesu'a eno peleti mayamo alino apamiteno noyame'e'mo ani kava huno alino apami'niye. 14 Yesu'a fali'niyateti'mo halate he tino'ae'mo napa tali afina'mo ge'amo ne'afiya vaya'ai apaulagale'mo eno afole ai'nige'a age'nae.

Yesu'e Pita'e'mo ge huge afige hu'na'a gemae

15 Ne'ya'mo nete'apae'mo Yesu'a Saimoni Pitafe'mo, Yoni mafa'ne'amo Saimoniyo, nagaefe'mo kahau kayamopafi'mo kahau'nigeka ani vaya'aina aeka apakaseka mai'napiye, huno afi ge'nigeno'ae'mo, Ala kava nene, ago nage'nanana kagaefe'mo nahau'niye, huno ha pai'nigeno'ae'mo, nagae aikeli sipisipi vaya'aina ne'ya'mo alika apamiyo, huno ha pai'niye. 16 Halate napa tu afina'mo Yesu'a, Yoni mafa'ne'amo Saimoniyo, nagaefe'mo kahau kayamopafi'mo kahau'nifiye, huno afi ge'nigeno'ae'mo, Ala kava nene, he ago nage'nanana kagaefe'mo nahau'niye, huno ha pai'nigeno'ae'mo, nagae sipisipi vaya'aite'mo yagaika apato, huno ha pai'niye. 17 Halate napa tali afina'mo Yesu'a, Yoni mafa'ne'amo Saimoniyo, nagaefe'mo kahau'nifiye, huno afi ge'nigeno'ae'mo Pita'a Yesu'mo napa tali afina'mo nagaefe'mo kahau'nifiye, huno afi ge'niya'mofe'mo aipamo'mo kana hu'nigeno'ae'mo, Ala kava nene, huno, kagaemo muki kava'amo ago age'nanana kagaefe'mo nahau'niye, huno ha pai'nigeno'ae'mo, nahau'niya sipisipi vaya'aina ne'ya'mo alika apamiyo. 18 Alagi lama ge kaha nepauve, neya vekamo mai'nekae'mo kukenakamo kagaikamo alika vaitekae'mo kagesa afi'nana kotegamo afa'a utaleka ne'ane. Henaga'amo kosuna letekae'mo kaya'mo aeka hayo hu'nisanageno kukenakamo alino vaino kateteno visanafe'mo okahau'nisiya kotegamo kavalelino ugiye, huno ha pai'niye. 19 Yesu'mo Pita'a haiya agufa kava'mo huno falisifigeno Goti'a agi'ale'mo alino asaga huno atesiya kavafe'mo alino apave lisiyafe'mo ani gemo hu'niye. Ani gemo huteno'ae'mo Pitafe'mo, nakame huvo, huno ha pai'niye.

Yesu'a hau'niya vekae'mo ava gemo hu'niya gemae

20 Pita'a aino afe leno ageyana ge'amo ne'afiya vayapati'mo Yesu'a hau'niya vekamo anakame huno ne'egeno age'niye. Ani vekamo'mo hogote'a ne'ya'mo ne'naya afina'mo Yesu haopale'mo mai'neno'ae'mo Ala kava nene, huno, kavalelino hosu vaya'aina apamisiya vekamo ina la'mae, huno afi ge'niya vekamae. 21 Pita'a ageteno Yesufe'mo ani vekalegamo, na agufa kava'mo afole aigiye, huno afi ge'nigeno 22 Yesu'a, afa'a mai'nisige'na emi'negauve, hu'na hisuvana kagae ya'mo ohane'niye. Kagaemo nakame huvo, huno ha pai'niye. 23 Yesu'a ani gemo hu'niya'mofe'mo ani konaga vaya'mogi apakai'apimo ge hu'apae'mo, ani vekamo ofalisiyafe'mo hu'niye, hu'a hu'nae. Hu'naya'monanafa Yesu'a, ofaligiye, huno osu'nifa afa'a mai'nisige'na emi'negauve, hu'na hisuvana kagae ya'mo ohane'niye, huno hu'niye. 24 Ani vekamo'mo ani gemo ago avo'mo kae male'nigeno hemenimo ani kavafe'mo faigoko ge'amo nehiye. Lagaemo hu'niya gemo afitetae'mo lama gemae, huta afi'none. 25 Yesu'a mago'e huno muki kava'amo hu'niya'monanafa muki hu'niya kava'amo avo'mo kaesunana asole mukumo hanesigeno ma mopafi'mo hanesiya ka'mo ohane'niye, hu'na nagesa afi'nove.

Copyright information for `KYG