John 8

Kumai kava'mo hu'niya a kanomo ava gemae

Muki vaya'mo no'apilegamo atale'a utageno Yesu'a Alifi'aepa avefi'mo uno mai'niye. Ega'amo kotilamiyapi'mo halate atagi nenuno Yulusalemu taonifi alopa mono nopi'mo haino mai'nige'apae'mo agaetegamo e'a ali'a anupa hu'a mai'nageno itopale'mo mai'neno'ae'mo aepa faino alino apaya male'niye. Alino apaya ne'malege'apae'mo ke'aepa gemo avo'mo kae'a ali'a apaya ne'malaya vaya'e Falasi vaya'mogi'e'mo mago a kanomo kumai kava'mo hu'nige'a age'naya a kanomo avaleli'e'a muki vaya'ai apaulagale'mo ali'a he ti'a ate'nae. Ate'ne'apae'mo, Tisao, mani a kanomo'a kumai kava'mo hu'nigeta age'none. Mosese'a ke'aepa gemo huno'ae'mo, ani agufa kava'mo hisaya a'ne anaga'aina yafa kayoteti'mo ago kamiti apamagiyo, huno hu'niyana kagaemo na agufa gemo hugane, hu'a afi ge'nae. Amalageka hu'a atete'apae'mo hosu gemo hu'niye, hu'a hute'a agoti hu'a atesaya gee'mo kahauya hisayafe'mo ge hu'a afi ge'naya'monanafa ape huno mai'neno ati yagaina ayateti'mo mopale'mo avo'mo kaeno mai'niye. He ti'a mai'ne'a mago'e mago'e gemo hu'a afi ge'nageno'ae'mo he tino mai'neno hapa paino'ae'mo, lapakaepati'mo magoke hosu kava'mo alagi osu'nisiya vekamoke'mo hogoteno yafa kayoteti'mo amagino, huno hapa paiteno halate ape huno mopale'mo avo'mo kaeno mai'niye. Ani gemo afi'nageno'ae'mo yu'ilaga vekatapimo'a hosu kava'apimo alino apave li'nige'apae'mo muki vaya'amo atale'a ute ute hu'a u'nae. Hogote'a asole kafugamo mai'naya vaya'mo utage'apae'mo henaga'amo aise kafugamo mai'naya vaya'mo magoke magoke vaya'mo ute ute hu'a u'nae. Atale'a utageno Yesu'a agai'age'mo mai'nigeno ani a kanomo asole vaya'ai folagapi'mo he tino mai'niye. 10 Yesu'a he tino ageyana ani a kanomo agai'age'mo mai'nigeno ageteno'ae'mo, agoti hu'a katesayafe'mo hu'naya vaya'mo haiyate mai'nae. Mago vekamo'a hosu a kanomo mai'nane, huno hu'niya vekamo o'mai'nifiye, huno afi ge'nigeno'ae'mo, 11 Ala kava nene, mago vekamo o'mai'niye, huno ha pai'nigeno Yesu'a, nagae'e'mo hosu a kanomo mai'nane, hu'na osuguve. Kagaemo afa'a ataleka uteka halate mago'e huka hosu kava'mo osuvo, huno ha pai'niye.

Yesu'a ha le yakana huno mai'niya gemae

12 Yesu'a halate ina ge huno hapa pai'niye. Ma mopafi vaya'ai ha le ya'apimo mai'nove. Ina lagimo nakame nehisafige'a alagepa hu'a maisaya ya'mo alino apave lisiya ha le ya'mo alite'a hanipi'mo umenitata osugae. 13 Falasi vaya'mogimo, kagaikaeke'mo ani faigoko gemo huka kaha maeka nehana gemo'mo alagi kanale nosiye, hu'a ha pai'nageno 14 Yesu'a, nagai'nieke'mo ani faigoko gemo hu'na naha mae'na nehuva'monanafa he alagi lama ge nehuve. Haiya kotegati'mo e'nofi haiya kotegamo visufi hu'na ago age'nova'mofe'mo alagi lama ge nehuve. Lapakaemo haiya kotegati'mo e'nofi haiya kotegamo visufi hutapa o'nage'nae. 15 Lapakaemo lapakufa'aleke'mo apaketetapa alitapa fako hutapa ne'apatae. Nagaemo mago vaya'mo ali'na fako hu'na no'apatove. 16 Nagai'nige'mo o'mai'nofa Afo'nimo'a alino nate'nige'na emine'nova veka'e'mo magokepi lokaeta'a mai'no'a'mofe'mo ali'na fako hu'na apatesuvana alagepa hu'nage'mo ali'na fako hu'na apategauve. 17 Lapakae ke'aepa gemo'a huno'ae'mo, lole vekala'moganimo magoke agufa gege'mo nehisa'ana alagi lama ge neha'ae, hutapa nehae, huno hapa pai'niye. 18 Nagaemo nagai'nieke'mo ani faigoko gemo hu'na naha mae'na nehugeno Afo'nimo'a alino nate'nige'na emine'nova vekamo'e'mo nagaefe'mo faigoko ge'nimo huno naha maesiya gemo nehiye, huno hapa pai'nige'apae'mo, 19 Afokamo'mo haiyate mai'niye, hu'a afi ge'nageno'ae'mo, lapakaemo nagaemo nagetapa aeto osu'naya'mofe'mo Afo'nimo agetapa aeto osu'nae. Nagetapa aeto hu'naesinana Afo'nimo'e'mo agetapa aeto hu'naesine, huno hapa pai'niye. 20 Yesu'a alopa mono nopi'mo ofalini monimo ne'malaya kesimo hane'niya nopi'mo haino alino apaya ne'maleno'ae'mo mani gemo hapa pai'niye. Afina'amo afole o'ai'niya'mofe'mo atafau'a kalavusi hu'a o'ate'nae.

Lapakaemo visuva kotegamo alagi o'ugae, huno hapa pai'niya gemae

21 Yesu'a halate ina ge huno hapa pai'niye. Nagaemo visuva kotegamo u'na mai'nisugetapae'mo utapa kahauya hutapa nagegefe'mo hugayana alagi hosu kavatapifi'mo mai'netapae'mo faligae. Visuva kotegamo afa'a o'ugae. 22 Yu vaya'mogimo apakai'apimo, visuva kotegamo o'ugae, huno hu'niya gemo aepa'amo na agufa gemo hu'niye. Agai'amo ane'mu aesiyafe'mo hu'nifi, hu'a hu'nae. 23 Yesu'a, lapakaemo afepilagati'mo e'nage'na nagaemo anagati'mo emi'ne'nove. Lapakaemo ma mopafi vaya'mo mai'nae. Nagaemo ma mopafi vekamo o'mai'nove. 24 Ani kavatefe'mo, hosu kavatapifike'mo mai'netapae'mo faligae, hu'na ago lapa pai'nove. He, lapakaemo hutapae'mo, agaemo muki afina'mo ne'maiya vekamo mai'niye, hutapa nagaefe'mo lapakesa afitapa fatago osisayana hosu kavatapifike'mo mai'netapae'mo faligae, huno hapa pai'niye. 25 Apakaemo, ina lagae, hu'a afi ge'nageno'ae'mo, ali'ya'nimo aepa fai'na ali'nova afinateti'mo ago lapa paime lapa paime e'na hemeni'e'mo ani agufa gege'mo hu'na lapa nepauve. 26 Nagaemo asole kavatapie'mo lapava gemo hu'na agoti hu'na lapatesuva gemo lapa paisuva gemo hane'niya'monanafa alino nate'nige'na emi'ne'nova vekamo'a alagi lama ge nehige'na afite'nae'mo ma mopafi vaya'aife'mo hapa nepauve. 27 Apakaemo muki ya'mo afo'amofe'mo ani gemo nehiye, hu'a o'afi'nae. 28 Inagi Yesu'a, lapakaemo Vemo Mafa'nemo alita he titapa atetetapae'mo, Mesaiya vekamo mai'niye, hutapa agegae. Agai'amo agesafati'mo agesa afino mago kava'mo osu'nifa muki ya'mo Afo'amo'a alino aya male'niya gemo hapa pai'niye, hutapa nagegae. 29 Nagaemo muki afina'mo alino nate'nige'na emi'ne'nova vekamo'a hau'niya agufa kava'age'mo nehuva'mofe'mo nataleno no'vifa nagae'e'mo magokepi lokaeno ne'maiye, huno hapa pai'niye. 30 Asole vaya'mogimo ani gemo afite'apae'mo agaefe'mo apakesa afi'a fatago hu'nae.

Afa'a ne'maiya vaya'e kalavusifi ne'maiya vaya'efe'mo apava gemo hu'niya gemae

31 Inagi Yesu'a Yu vaya'mogi agaefe'mo apakesa afi'a fatago nehaya Yu vaya'aife'mo, ge'nifi'mo maime maime ne'visayana lama ge vaya'mo ge'nimo ne'afiya vaya'mo mai'nae. 32 Lama ge'amo afitapa aeto hisageno lama ge'aleti'mo hatu maeno lapatesigetapa afa vaya'mo maigae, huno hapa pai'niye. 33 Hapa pai'nige'apae'mo, Emalehamu aginago vaya'amo mai'nonage'apae'mo kalavusi hu'a olate'nae. Na kava higekae'mo, afa vaya'mo maigae, huka nehane, hu'a ha pai'nageno'ae'mo 34 alagi lama ge lapa nepauve, haiya vaya'mogi hosu kava'mo nehisafigeno hosu kava'apimo'a kalavusi huno apate'nige'a ali'ya'amo ne'aliya vaya'mo mai'nae. 35 Kalavusi ali'ya'mo ne'aliya vekamo'a ali'ya aepa vekamo no'afi'mo uno haino alagi o'maigiya'monanafa ali'ya aepa vekamo mafa'ne'amoke'mo no'afi'mo alagi maigiye. 36 Goti Mafa'ne'amoke'mo hatu maeno lapatesigetapa alagi afa vaya'mo maigae. 37 Lapake'novana Emalehamu aginago vaya'amo mai'nage'na lapake'nova'monanafa ge'nimo lapaipafi'mo afitapa o'male'naya'mofe'mo namagisayafe'mo nehae. 38 Nagaemo Afo'nimo'a alino nave li'nige'na age'nova kavafe'mo ava gemo hu'na lapa nepauva'monanafa lapakaemo afotapimo'a hiyo, huno nehiya gege'mo akame hutapa nehae, huno hapa pai'nige'apae'mo, 39 Emalehamu'a afotimo'mo mai'niye, hu'a ha pai'nageno'ae'mo, Emalehamu mafa'ne'amo lama ge mafa'ne'amo mai'naesinana Emalehamu'a hu'niya agufa kavake'mo nehaesine. 40 Goti'a naha pai'nige'na afite'nae'mo alagi lama ge lapa nepauva'monanafa lapakaemo namagisayafeke'mo nehae. Emalehamu'a ani agufa kava'mo osu'niye. 41 Lapakaemo afotapimo'a nehiya agufa kava'mo nehae, huno hapa pai'nige'apae'mo, Afotimo'mo magoke vekamo Goti'a mai'niye. Megusa mafa'nemo o'mai'none, hu'a ha pai'nageno'ae'mo, 42 Nagai'nimo nagesa afi'na o'me'nofa Goti'a alino nate'nige'na e'nove. Gotitegati'mo emi'ne'nova'mofe'mo Goti'a afotapimo'a mai'niyesinana nagaefe'mo lapau lapayamopafi'mo lapau'niyesine. 43 Na kava higetapae'mo ge'nimo afitapa aeto nosae. Ge'nie'mo olapau'niya'mofe'mo ge'nimo afa'a o'afigae. 44 Afotapimo'mo Satani'a mai'nigetapae'mo mafa'ne'amo mai'netapae'mo afotapimo'mo hau'niya kava'mo akame nehae. Aepa fai'niya afinateti'mo vaya'mo ne'apamagiya vekamo mai'niye. Lama gemo aipafi'mo alagi ohane'niya'mofe'mo lama gelefe'mo kame nehiye. Aigofe gemo aepa ne'mo mai'niya'mofe'mo aipafati'mo alagi aigofe gemo nehiye. 45 Mai'niya'monanafa nagaemo lama ge lapa nepauva'mofe'mo nagaefe'mo alagi lama ge nehiye, hutapa lapakesa afitapa fatago nosae. 46 Lapakaepati'mo haiya vekamo'a hosu kava'nimo alino nave ligiye. Lama ge nehisuvana na kava higetapae'mo alagi lama ge nehiye, hutapa nosae. 47 Goti'a alino apate'niya vaya'mogimo Goti ge'amo ne'afiye. Lapakaemo Goti'a alino olapate'niya'mofe'mo Goti ge'amo no'afiye, huno hapa pai'niye.

Yesu'a Emalehamufe'mo ava gemo hu'niya gemae

48 Yesu'a ani ge hapa pai'nige'apae'mo, lagaemo kagaefe'mo, Samaliya vekamo mai'nigeno hosu aune vekamo aipafi'mo mai'niye, huta nehune. Lama ge nosupiye, hu'a afi ge'nageno'ae'mo, 49 mago hosu aune vekamo naipafi'mo o'mai'niye. Nagaemo Afo'nimo agi'ale'mo ali'na asaga hu'na ne'atova'monanafa lapakaemo nagi'nile'mo alitapa afepi ne'natae. 50 Vaya'mogi nagi'nile'mo ali'a asaga hu'a natesayafe'mo ali'ya'mo no'alufa mago vekamo alino fako huno ne'apateya vekamoke'mo nagi'nile'mo alino asaga huno atesiyafe'mo ali'ya'mo ne'aliye. 51 Lama ge lapa nepauve, Ge'nimo akame nehaya vaya'mo ofaligae, huno hapa pai'nige'apae'mo, 52 Hemenimo lagaemo afi'nonana hosu aune vekamo kaipafi'mo mai'niye, huta ago afi'none. Emalehamu'a ago fali'nige'a Gotitegati gemo alini e'a ae'a hakalo hu'a hapa nepaiya vaya'mo ago fali'naya'monanafa kagaemo hukae'mo, ge'nimo akame nehaya vaya'mo ofaligae, huka nehane. 53 Kagaemo laginago vekamo Emalehamu'mo ago aeka agase'napiye. Agaemo ago fali'niye. Gotitegati gemo alini e'a ae'a hakalo hu'a hapa nepaiya vaya'e'mo ago fali'nae. Kagaemo ina la'nae, huka kagesa ne'afine, hu'a afi ge'nageno 54 Yesu'a, nagai'ni nagi'nile'mo ali'na asaga hu'na ne'natovesinana ina agufa kavakana huno hane'niyesine. Lapakaemo Afo'nimofe'mo, Gotitimo'mo mai'niye, hutapa nehaya vekamo'a nagi'nile'mo alino asaga huno ne'nate. 55 Gotitimo'mo mai'niye, hutapa nehaya'monanafa o'age'nage'na nagaeke'mo age'nove. O'age'nove, hu'na nehuvesinana lapakaekana hu'na aigofe ge'e vekamo mai'novesine. Nagaemo ago age'nova'mofe'mo ge'amo akame nehuve. 56 Lapakinago vekamo Emalehamu'a nagaemo afole aisugeno nagesiyafe'mo hau'nigeno avayagunagu huno nagava mai'niye. Nageteno'ae'mo amogaga ai'niye, huno hapa pai'nige'apae'mo 57 Kagaemo fifiti'a kafugamo o'mai'nananagi Emalehamu'a age'napiye, hu'a afi ge'nageno'ae'mo, 58 alagi lama ge lapa nepauve, Emalehamu'a ita'amo'mo alino o'ate'niya afinateti'mo nagaemo hogote'na muki afina'mo mai'nova vekamo alagi mai'nove, huno hapa pai'nige'apae'mo 59 yafa kayoteti'mo ali'a yaga au'a amagisayafe'mo ne'aligeno'ae'mo Yesu'a alopa mono nopati'mo ataleno apakae folagapi'mo lami'nige'a o'amagi'nageno afa'a uno lamino u'niye.

Copyright information for `KYG