John 9

Yesu'a mago vekamo ita'amo'mo alino ate'niya afinateti'mo aulagala'mo ali hu'niya vekamo alino ayakeno ate'niya gemae

Yesu'a ne'uno'ae'mo ageyana mago vekamo ita'amo'mo alino ate'niya afinateti'mo aulagala'mo ne'ageya ya'amo alagi ohane'niya vekamo mai'nigeno age'niye. Ge'amo ne'afiya vaya'mogimo, Tisao, ina la'mo hu'niya hosu kava'mo'a ita'amo'mo alino ate'niya afinateti'mo aulagamo ne'ageya ya'amo ohane'niya vekamo mai'niye. Ani kava'mo aepa'amo agai'amo hu'niya hosu kava'mo'a hu'nifi ita'afo'ala'moganimo hu'na'a hosu kava'animo'a ani agufa kava'mo hu'niye, hu'a afi ge'nageno'ae'mo Yesu'a, ani kava'mo aepa'amo hane'niyana agai'amo hu'niya hosu kava'mo'a ohanege ita'afo'ala'mogani hu'na'a hosu kava'animo'a ohanege hu'niya'monanafa Goti himamu'amo agaete'mo afole aisige'a muki vaya'mogi agesayafe'mo ani kava'mo hu'niye. Muki feluga'amo nagaemo alino nate'nige'na emi'ne'nova vekamo hau'niya ali'ya'amo aliguve. Hani'mo hisige'apae'mo muki vaya'mogimo ali'ya'mo afa'a o'aligae. Ma mopafi'mo mai'ne'nae'mo ma mopafi vaya'ai ha le ya'apigana hu'na mai'ne'na ae'na ha le'na ne'apatove, huno hapa paiteno Yesu'a mopa atanamo ali'neno avenatu'na he male'neno alino hapa hatiteno aulagalate'mo faleno ate'niye. Faleno ateteno'ae'mo, uka Silomi ani kotupi'mo ani'mo faleka kalo pao, huno ha pai'niye. Ani Silomi ani kotune agimo aepa'amo hane'niyana alino ate'nigeno u'niyategae. Ani vekamo uno anipi'mo faleno kalo paeteno aulagala'mo alagepa huno ageno ayaketeno no'alegamo u'niye. U'nige'apae'mo no'ale vaya'e hogoteno itopale'mo fai mai'neno monie'mo aukaya nehige'apa ne'agaya vaya'mogi'e'mo, itopale mai'neno muki afina'mo monie'mo aukaya nehiya vekamofiye, hu'a apafi ge'nae. Mago vaya'amogimo, ani vekamae, hu'a hapa pai'nage'apae'mo mago vaya'amogimo, ha'ao, agaekana agufa vekamo mai'niyana alu vekamo mai'negaiye, hu'a hu'nae. Agai'amo, ani vekamo nagaeke'mo mai'nove, huno hapa pai'nige'apae'mo, 10 haiya kava huka kaulagamo ageka ayake'nane, hu'a afi ge'nageno'ae'mo, 11 mago vekamo agi'amo Yesu'a mopa atanamo alino hapa hatiteno naulagalate'mo faleno nateteno'ae'mo, Uka Silomi ani kotupi'mo faleka kalo pao, huno naha pai'nige'na u'na fale'na kalo paete'nae'mo naulagamo age'na ayake'nove, huno hapa pai'niye. 12 Ani vekamo haiyate mai'niye, hu'a afi ge'nageno'ae'mo, o'age'nove, huno hapa pai'niye.

13 Apakaemo ani vekamo avaleli'a Falasi mono vaya'aitegamo u'nae. 14 Yesu'a mopa atanamo alino hapa hatiteno aulagalate'mo faleno ateteno alino ayakeno ate'niya afina'mo Sapati afina'mae. 15 Inagi Falasi vaya'mogimo halate hu'apae'mo, haiya agufa kava'mo hu'nigeka kaulagala'mo alagepa huka age'nane, hu'a loka hu'a afi ge'nageno'ae'mo, agaemo hapamo alino naulagalate'mo faleno nate'nige'na u'na anipi'mo fale'na kalo paete'nae'mo naulagala'mo alagepa hu'na age'nove, huno hapa pai'niye. 16 Mago Falasi vaya'amogimo, Sapati afina ke'aepa gemo akame nosiya'mofe'mo Gotitegati'mo o'me'niye, hu'a hu'nage'apae'mo mago vaya'amogimo hu'apae'mo, haiya agufa kava'mo huno hosu kava'mo nehisiya vekamo'a ani agufa no'agona agufa aune kava'mo afa'a hugiye, hu'a hu'nae. Ani gemo hute'a ali'a fako hu'a lole nofi vaya'mo mai'nae. 17 Falasi vaya'mogimo halate mago'e hu'a, kaulagala'mo alino ayakeno kate'niya vekae'mo na agufa gemo hugane, hu'a loka hu'a afi ge'nageno'ae'mo, Gotitegati gemo alinineno aeno hakalo huno hapa nepaiya vekamo mai'niye, huno hapa pai'niye. 18 Yu vaya'mogimo aulagala'mo ohane'niya vekamo aulagala'mo alo huno ate'niya kavafe'mo ava gemo afite'apae'mo, lama ge nehiye, hu'a apakesa o'afi'naya'mofe'mo ita'afo'ala'moganife'mo ge hu'nage'ana e'na'age'anae'mo, 19 mani vekamo mafa'netanimo mai'nifiye. Lanakaemo, alita'a ate'no'a afinateti'mo aulagala'mo ohane'niya mafa'nemo mai'niye, hutana neha'a'mofe'mo hemenimo haiya kava hu'nigeno aulagala'mo alagepa huno age'niye, hu'a anafi ge'nage'anae'mo 20 ita'afo'ala'moganimo, ago age'no'ana mafa'neti'amo mai'neno alita'a ate'no'a afinateti'mo aulagala'mo ohane'niya mafa'nemo mai'nigeta'a age'no'ae. 21 Hemenimo haiya kava huno aulagala'mo alagepa huno ne'agefi, ina la'mo alino alagepa huno ate'nifi, huta'a alagi o'age'no'ae. Ani kavafe'mo agai'ae'mo loka huta afi gegeno'ao alopa vekamo mai'niya'mofe'mo agai'amo lapa paino, hu'ana hapa pai'na'ae. 22 Ita'afo'ala'moganimo Yu vaya'aife'mo koli'apimo hu'na'a'mofe'mo mani agufa gemo hu'na'ae. Apakaemo hogote'a vege hu'apae'mo, ina lagimo Yesufe'mo, Kalaisi vekamo mai'niye, hu'a nehisafigeta mono nopati'mo alita hapafaita apatalegaune, hu'a ago ge hu male'nae. 23 Hu'a ge hu male'naya'mofe'mo ita'afo'ala'moganimo, alopa vekamo mai'niyanagi agai'ae'mo ge hutapa afi gegeno lapa paino, hu'ana hapa pai'na'ae. 24 Apakaemo halate ani hogoteno aulagala'mo alagepa huno no'ageya vekae'mo ge hu'nageno e'nige'apae'mo, kagaemo kagaikage'mo Goti'mo ala agi'amo amiyo. Lagaemo ani vekamo ago age'nonana hosu kava'mo nehiya vekamo mai'nigeta age'none, hu'a ha pai'nageno'ae'mo, 25 nagaemo hosu kava'mo nehisiya vekamo mai'nisifi hu'na o'age'nove. Magoke kava'amo alagi age'novana hogote'na naulagala'mo alagepa hu'na o'age'nova vekamo mai'nova'monanafa hemenimo alagepa hu'na ne'agove, huno hapa pai'nige'apae'mo, 26 kagaetegamo na agufa kava'mo hu'niye. Haiya kava huno kaulagala'mo alino alagepa huno kate'niye, hu'a afi ge'nageno'ae'mo, 27 ago lapa pai'nova'monanafa o'afi'nae. Na kava higetapae'mo halate mago'e hutapa afigefe'mo nehae. Afole o'ai'niyesina agufa kava'mo hemenimo ago afole ai'nigetapae'mo ge'amo ne'afiya vaya'mo maisayafe'mo nehafiye, huno hapa pai'nige'apae'mo, 28 kagaemo ani vekamo ge'amo ne'afina vekamo mai'nana'monanafa lagaemo Mosese ge'amo ne'afuna vaya'mo mai'none. 29 Ago afi'nonana Goti'a Mosesefe'mo ha pai'niye, huta afi'nona'monanafa ani kanomo haiyategati'mo e'nifi huta o'afi'none, hu'a ha pai'nageno'ae'mo, 30 aeto agufa gemo nehage'nae'mo ani gemo afi'na nahau ne'auve. Haiyategati'mo e'nifi hutapa o'afi'naya'monanafa naulagamo alino ayakeno nate'niye. 31 Afi'nonana Goti'a hosu kava'mo nehaya vaya'ai ge'apimo no'afiya'monanafa agaefe'mo mono hute'a hau'niya agufa kava'ageke'mo nehaya vaya'ai ge'apimo ne'afiye, huta afi'none. 32 Akeya'vilaga afinateti'mo eno hemenimo mai'nona afina'mo muki vaya'mogimo ita'amo'mo alino ate'niya afinateti'mo mago vekamo'a aulagala'mo hosu'niya vekamo aulagala'mo alino ayakeno ate'niya ava gemo o'afi'nae. Muki vaya'mogimo ma mopamo alo hu'niya afinateti'mo ani agufa kavafe'mo ava gemo o'afi'a maime maime e'nae. 33 Ani vekamo Gotitegati'mo o'me'niyesinana magoke alagepa kava'mo afa'a osu'niyesine, huno hapa pai'nige'apae'mo 34 Itakamo'mo alino kate'nigekae'mo hosu kavapike'mo mai'nanagi hemenimo kagaemo alika laya malesanafe'mo nehapiye, hu'a hute'a mono nopati'mo ali'a hafai'a atale'nae.

Yu'ilaga mafa'nemo aulagamo ali hu'niya kavafe'mo ava gemo hu'niya gemae

35 Yesu'a ali'a hafai'a atale'naya kavafe'mo ava gemo afiteno uno kahauya huno ageno avateteno'ae'mo, kagaemo Goti mafa'ne'ae'mo kagesa afika fatago nehapiye, huno afi ge'nigeno'ae'mo, 36 Ala nene, ani vekamo ina la'ae. Naha paige'nao agaefe'mo nagesa afi'na fatago hino, huno ha pai'nigeno, 37 ago age'nanageno hemenimo ge kaha nepaiya vekamo agaemae, huno ha pai'nigeno'ae'mo, 38 Ala kava nene, nagesa afi'na fatago nehuve, huno ha paiteno agaefe'mo mono hu'niye.

39 Yesu'a ina ge huno hapa pai'niye. Nagaemo ali'na fako hu'na apatesuvafe'mo ma mopafi'mo emi'ne'nove. Nagaemo apaulagamo ali hu'nisiya vaya'mogi age'a ayakesayafe'mo emi'ne'nove. Ani kava hute'na apaulagamo afa'a hane'nige'a ne'agaya vaya'mo apaulagamo ali hufa vayakana hu'a mai'ne'a o'agesayafe'mo emi'ne'nove. 40 Mago Falasi vaya'mo agae'e'mo magokepi lokae'a mai'naya vaya'mogi ani hu'niya gemo afite'apae'mo, lagae'e'mo laulagamo ali hu'nifiye, hu'a afi ge'nageno'ae'mo, 41 lapaulagamo ali hu'niya vaya'mo mai'naesinana hosu kavatapimo ohane'niyesina'monanafa ne'agone, hutapa nehaya'mofe'mo hosu kavatapimo afa'a hane'niye, huno hapa pai'niye.

Copyright information for `KYG