Jonah 2

Yona'a Gotife'mo nunumu hu'niya gemae

Yona'a noyamemo agupafi'mo mai'neno'ae'mo Ala kava ne'mo Goti'amofe'mo nunumu hu'niye. Nunumu huno'ae'mo, Ala kava nene, Alopa hanageke ya'mo ali'ne'na naipafi'mo lusi kava huno nagafu ki'nige'nae'mo kagaefe'mo keya ae'na ge hu'nogekae'mo ge'nile'mo aeka atagaina hukae'mo naha mae'nane. Nagaemo fali'naya vaya'mo u'a mai'naya kotegae'mo agi'amo Siyo kotegati'mo, naha mao, hu'na keya ae'na ge hu'nogekae'mo ge'nimo afi'nane. Kagaemo alika yaga auka natale'nanage'na emi'ne'na solovala ani'mo afepilagamo mai'nove. Ani'mo'a faino ku aiteno alagi aeno nati kae'niye. Ani'mo'a lusi kava huno ayamukiki huteno aino holakau huno aeno naga seteno aeno nati kae'niye. Ago alika naha faika natale'nana'monanafa halate kagae aote mono nofe'mo aulu hegauve. Ani'mo'a aeno naga seno aeno nati kae'nige'na navamusa'mo no'auve. Solovalapi kahaumo'mo nagenopale'mo kino nati kae'niye. Nagaemo ave aiyafi'mo emi'ne'nogeno'ae'mo ka'nimo akanino nate'neno natafauno nate'niya'monanafa kagaemo Ala kava ne'nimogamo nagufamo kasalisiya kelifati'mo navalelika haikeka nate'nane. Ala kava nene, Falisuva agufa naipamo kali'niye, hu'na hute'na kagaefeke'mo nagesamo afi'na ho hute'na nunumu hu'nova ge'nimo'mo kagae aote mono nopi'mo faleno hai'niye. Aigofe goti'apimogife'mo mono nehaya vaya'mogi kahau huka apatesana Gotigamo ago katale'nae. Katale'naya'monanafa yokemo hu'na kagikale'mo ali'na asaga huguve. Mago ofalinimo kamigekana hu'na navayafati'mo kagikale'mo ali'na asaga huguve. Ani kava huguve, hu'na nago'ya atale'na kaha pai'nova gemo amagi'na o'atalegauve. Ala kava ne'moke'mo vaya'ai apakufamo alino katino ne'apate, huno nunumu hu'niye.

10 Ala kava ne'mo'a noyamee'mo ha paigeno uno ani agi'nale'mo Yona'mo mu valino ate'niye.

Copyright information for `KYG