Jonah 3

Yona'a Niniva taonifi'mo u'niya gemae

Halate Ala kava ne'mo'a Yonafe'mo, Alo huka alopa taonimo Niniva taonifi'mo uka ago kaha pai'nova gemo aeka hakalo huka hapa paiyo, huno ha pai'niye. Ha pai'nigeno Yona'a Ala kava ne'mo ge'amo afiteno alo huno Niniva taonifi'mo u'niye. Niniva taonimo alopa taonimo hane'niye. Mago vekamo'a ani taonifi'mo magokayaga atupalegati'mo usiyana lole'e mago'e feluga'e hani'ilaga'e'mo maime maime uno magokayaga atupalegamo ava'yi hisiya agufa alopa taonimo hane'niye. Yona'a ani taonimo magokayaga atupalegati'mo uno magoke felugamo maiteno uno taoni folagapi'mo muki vaya'aife'mo, Foti'a afina'mo utesigeno Goti'a Niniva taonimo alino hano huno ataleteno alino lapago'ya lagauno lapatalegaiye, huno aeno hakalo huno hapa pai'niye. Niniva taonifi'mo mai'naya vaya'mogimo Goti ge'amo ani gemo afite'apae'mo, lama gemo hu'niye, hute'a apakesa afi'a fatago hu'nae. Lagaemo ina agufa vaya'mogita'e ala lagi vaya'mogita'e'mo laipamo alita afe leteta ne'ya'mo mosi'neta kogu agufa kukenamo alita vaiteta maigune, hu'a hu'nae.

Ala kini veka'apimo Niniva vaya'aite'mo yagaino ne'apateya vekamo'a ani gemo afiteno'ae'mo yagaino ne'apateya siate'mo fai mai'niyateti'mo he tino vaili'neno yagaino ne'apateya kukena'amo asagino maleteno kogu kukenamo alino vaiteno la'nefafi'mo itopale mai'niye. Agaemo mago ke'aepa gemo huteno Niniva vaya'aitegamo atale'nigeno uneno hu'niye. Ani gemo huno'ae'mo, Ala vekatapimo'na'e yahauve vaya'e'mo ke'aepa gemo hu male'none. Ani gemo hutae'mo, Muki vaya'amogitapamogi pulumakagi sipisipimogi hutapa ani'mo o'nege ne'ya'mo o'nege hutetapa afa'a mositapa maiyo. Muki vaya'amogitapamo kogu agufa kukenamo alita vaitetapa afumo kogu kukenamo alita kofitapa apateyo. Gotife'mo lokiya vaitapa nunumu hiyo. Muki vaya'amogitapamo lapaote lapaote hutapa hosu kavatapimo ataletetapa vaya'mo ne'apamagiya kava'e kaveta nehaya kava'e'mo ataletetapa maiyo. Goti'a ani kava'mo huguve, huno hu'niya ge'e aipamo leno late'niya kava'e'mo atalesifi o'atalesifigeta ofalisunafe'mo amalageka huta agegaune, huno hapa pai'niye.

10 Ani kava hu'a hosu kava'apimo atale'nageno Goti'a apaketeno'ae'mo aipa agesamo alino afe leteno ani kava'mo huguve, huno hapa pai'niya kava'mo osuno atale'niye.

Copyright information for `KYG