Jonah 4

Goti'a aipamo'mo falu huno apate'nigeno'ae'mo Yona'a aipamo le'niya gemae

Goti'a hu'niya kavafe'mo Yona'a alagi ohau'nigeno'ae'mo aipamo le'niye. Yona'a nunumu huno'ae'mo, Ala kava nene, huno, Ko'nimo atale'na o'me'nova afina'mo ani kava'mo hugane, hu'na hu'nofiye. He, ani gemo ago hu'nove. Ani kava'mo hugane, hu'na nagesamo afi'nova'mofe'mo atale'na naune hetale'na Tasisi taonifi'mo ugefe'mo hu'nove. Ago afi'novana kagaemo fiku hapa maeka apamiteka kahau huka ne'apatana Gotigamo mai'nane. Kaipamo malage huno nole. Kahau kayamopafi'mo kahau'niya kava'mo asole kavakamo hane'niye. Kagaemo vaya'mo apamagisanafe'mo okahau'niya'mofe'mo kaipa kagesamo alika afe nelane. Ani kava nehana'mofe'mo Ala kava nene, hu'na, Hemenimo afa'a ne'mauva ya'nile'mo alige'na ago falino. Afa'a maisuvana kanale osugiye. Kanale kavanage'na afa'a faliguve, huno nunumu hu'niye. Ala kava ne'mo'a, Yonao, huno, Kaipamo neleya kavakamo'a kanale kava'mo nehapiye, huno afi ge'niye. Yona'a taonifati'mo ataleno malaga lamino yegemo haine ne'eya kategamo uno uluna no'mo kiteno ulunapi'mo mai'neno taonifi'mo na agufa kava'mo afole aisifi huno agava mai'neno ageno mai'niye.

Ala kava ne'mo Goti'a yegemo o'alesigeno ulunapi'mo maisiyafe'mo nofife'mo, hago, huno hu'nigeno nofi'mo hageteno no yosale'mo kino hai'niye. Yona'a ani nofife'mo lusi kava huno amuse hu'niye. Egamo kotilamiyapi'mo Goti'a mago kafamo alino kayo ate'nigeno eno nofipi'mo ne'nigeno falu te'niye. Yegemo haineteno le'nigeno'ae'mo Goti'a amuko yasimo alino ate'nigeno amuko yasi alige yegemo'mo Yona agenopale'mo alege hu'nigeno Yona'a aulagamo'mo atete huteno kalafe kalafe hu'nigeno faligefe'mo hu'niye. Yona'a Gotife'mo, Faliguve. Afa'a maisuvana kanale osugiye. Kanale kavanage'na afa'a faliguve, huno ha pai'nigeno Goti'a, Nofi'mo falu te'niya'mofe'mo kaipamo le'nigeka kanale kava'mo nehapiye, huno afi ge'nigeno'ae'mo, he, naipamo lusi kava huno le'nige'na alagepa kava'mo nehuve. Afa'a faligesuve, huno ha pai'niye.

10 Ala kava ne'mo'a, Ani nofite'mo yagaika o'atege alagepa huno hanesiyafe'mo ali'ya'mo o'alige huka mai'nane. Ani nofi'mo magoke hani'ilagamo malage huno hageteno alu hani'ilagamo ago falu te'niye. Ani aise nofi'mo ina agufa nofife'mo kahau huka ne'atane. 11 Ani kava hu'na Niniva vaya'aife'mo nahau hu'na ne'apatove. Niniva taonifi'mo lusi asole nute mafa'ne anaga'mo vani hataleti tuveti tauseni'amo (120,000) maige asole afumo maige hu'a mai'nae, huno ha pai'niye.

New Testament

Copyright information for `KYG