Luke 10

Yesu'a seveti'a vaya'mo alino apate'nige'a u'naya gemae

Ala kava ne'mo'a seveti'a vaya'mo lekana paino apateteno lole vekala'mo alino lokaeno anatete anatete huteno'ae'mo, muki visuva taoni'afi'e kotega'e'mo utapa hogonetege'na vino. Hoyafati'mo ne'ya'mo ago afu le'niyana alisaya vaya'mo aise'amo mai'naya'mofe'mo hoya aepa vekae'mo, hoyakafati'mo ne'ya'mo alisaya vaya'mo alika apatege'a viyo, hutapa nunumu'mo hiyo. Viyo, hu'na hute'na ali'na lapatesugetapa visayategamo aikeli sipisipigana hutapa afela kalamo mai'nayategamo ugae. Lapakaemo hanipausitapigi kutapigi sutapigi hutapa o'alitapa afa'a viyo. Kategamo ne'utapae'mo ge apamamaesayafe'mo o'maitapa viyo. Utapa haisaya nopi'mo mai'nisaya vaya'aife'mo, lapaipamo'mo falu hino, hutapa hapa paiyo. Aipamo'mo falu nehisiya vekamo mai'nisiyana afa'a aipamo'mo falu hu'nisigeno maigiye. Aipamo'mo falu nosisiya vekamo mai'nisiyana getapimo'a ha o'maesigeno afa yatega asagauno aigiye. Alu nopi alu nopi'mo uteta osutapa haisaya nopike'mo maiyo. Ali'ya'mo ne'aliya vaya'mogi miya'apimo alagi alisaya vaya'mo mai'naya'mofe'mo lapamisaya ne'ya'e ani'e'mo alitapa neyo. Visaya taonifi'mo mai'nisaya vaya'mogimo ali'a falu fala hu'a lapatesagetapae'mo mai'netapa ne'ya'mo lapamisaya ya'mo afa'a alita neyo. Kaita hapau'nisiya vaya'mo alitapa hapagetapa apatetetapae'mo, Goti'a yagaino ne'apateya kava'mo lapaopale'mo ago e'niye, hutapa hapa paiyo. 10 Visaya taonifi'mo mai'nisaya vaya'mogimo ali'a falu fala hu'a olapatesagetapae'mo taoni'apifi kate'mo utapa he titapa mai'netapae'mo, 11 lapakaetegamo faigoko gemo hanesiyafe'mo apakae taonifi'mo lapaiyalegati'mo mumusopamo alitapa kalo paetaletapa ugae. Afiyo, Goti'a yagaino ne'apateya kava'mo lapaopale'mo ago afole ai'niya'monanafa o'age'nae, hutapa hapa paiyo. 12 Lapa nepauve, Goti'a agoti huno apatesiya afina'mo Sotomi taonifi'mo mai'naya vaya'mogimo mago hosu ya'mo aligaya'monanafa mani taonifi'mo mai'naya vaya'mogi mago'e hu'a hosu ya'mo aligae.

Mago taonifi'mo mai'naya vaya'mogi apakesa afi'a fatago osu'naya vaya'aife'mo hu'niya gemae

(Mt 11:20-24)

13 Kolasini taonifi mai'naya vayanagi Metasaita taonifi mai'naya vayanagi vaehae. Mago vekamo'a uno Taiya taonifi'e Saitoni taonifi'e'mo no'agaya agufa aune kava'mo lapakaetegamo hu'nova agufa aune kava'mo hu'niesinana apakaemo akeya'vilaga ago apaipamo ali'a afe lete'apae'mo kogu a'nemogi ali'a ne'vaiya agufa kukenamo ali'a vaite'a hapamo faletale'a mai'naesine. 14 Mai'naesina'mofe'mo agoti huno apatesiya afina'mo Taiya taonifi mai'naya vaya'e Saitoni taonifi mai'naya vaya'e'mo aise kayo'mo aligaya'monanafa lapakaemo alopa kayo'mo aligae. 15 Kapeneyamu taonifi vaya'mogitapae, lapavaleno alino anale lapate'niyanageno alino afepi lapateteno ata kopi'mo alino lapategaiye. 16 Ge'amo ne'afiya vaya'aife'mo, getapimo ne'afiya kava hu'a ge'nimo ne'afiye. Apakame'ya nelapamiya kava hu'a apakame'yamo ne'namiye. Apakame'ya ne'namiya kava hu'a alino nate'nige'na emi'ne'nova veka'e'mo apakame'ya ne'amiye, huno hapa paiteno alino apate'nige'a u'nae.

Ge'amo ne'afiya vaya'mo atagi ne'a e'naya gemae

17 Seveti'a vaya'mo atagi ne'a Yesutegamo e'apae'mo apamogaga aite'apae'mo, Ala kava nene, kagikale'mo ne'aetae'mo hosu apaune vaya'aife'mo hiyo huta hu'nona gemo afi'nae, hu'a ha pai'nageno'ae'mo, 18 agovana Satani'mo koku'napati'mo alino alave nehiya yakana huno asagauno ne'aige'na age'nove. 19 Afiyo, nagalo'yave'e sokopiyoni'e'mo lapaiyaleti'mo aetapa latapaisayafe'mo himamu'nimo ali'na lapami'nove. Kame vayatapimogi himamu'apimo aetapa apaka sesayafe'mo himamu'nimo ali'na lapami'novanage'a muki vaya'mogi afa'a olahapaegae. 20 Himamu'nimo ago ali'naya'mofe'mo hosu apaune vaya'mogi getapimo afi'naya kavafeke'mo lapamogaga o'aitapa Goti'a koku'napi hane'niya mukufi'mo lapakitapimo ago avo'mo kae male'niya kavafeke'mo lapamogaga aiyo, huno hapa pai'niye.

Yesu'a Gotife'mo amogaga ai'niya kavafe'mo hu'niya gemae

(Mt 11:25-27; 13:16-17)

21 Ani afina'mo Yesu'a Aote Auneme'aleti'mo aipafi'mo amogaga ne'aino'ae'mo, Afo, koku'nate'e ma mopale'e'mo yagaika ne'anatana vekamae. Kagaemo afite'a age'naya vaya'mogimo o'afisayafe'mo mani kava'mo alika fala ki male'nana'monanafa mafa'negana hu'a ne'maiya vaya'mo alika apave li'nana kavatefe'mo kahao ke nehove. He, Afo, kahau'nigekae'mo, afole aiyo, huka hu'nane, huno nunumu hu'niye. 22 Huteno'ae'mo, Afo'nimo'mo muki yate'e vaya'aite'e'mo yagaisuvafe'mo alino nate'niye. Muki vaya'mogimo mafa'ne'amo o'age'nafa afo'amoke'mo age'niye. Ani kava hu'a vaya'mogimo muki ya'mo Afo'amo'mo o'age'nafa mafa'ne'amoke'mo age'niye. Ani kava huno mafa'ne'amo'a lekana paino apate'nisiya vaya'mo alino apave lisige'apae'mo muki ya'mo Afo'amo'mo agegae, huno hapa pai'niye. 23 Apakai'apige'mo mai'ne'apae'mo Yesu'a aino afe leno ge'amo ne'afiya vaya'aife'mo, lapakaemo age'naya agufa kava'mo hu'a age'nisaya vaya'mogi Goti aulagale'mo alagepa hu'a mai'nayanage'a afa'a apamogaga aigae. 24 Lapa pai'nae'mo, hogote'a muki vaya'mo Gotitegati gemo alini e'a ae'a hakalo hu'a hapa nepaiya vaya'e muki vaya'mo ala'apimo mai'ne'a yagai'a ne'apataya vaya'mogi'e'mo lapakaemo ne'agaya agufa kava'mo agesayafe'mo hu'nayana o'age'nae. Lapakaemo ne'afiya agufa gemo afisayafe'mo hu'nayana o'afi'nae, huno hapa pai'niye.

Samaliya vekamo'a kame'amo ha mae'niya gemae

25 Mago ke'aepa gemo ne'afiya vekamo'a Yesu'mo amalageka hisiyafe'mo he tino, Tisao, alagepa hu'na maige maige hu'na maisuvafe'mo na agufa kava'mo hisuve, huno afi ge'nigeno'ae'mo, 26 ago avo'mo kae male'niya ke'aepa gemo'a na agufa gemo hu'niye. Lekana pai'nana gemo'mo na yane hu'niye, huno afi ge'nigeno'ae'mo,

27 Ala kava ne'mo Gotikamofeke'mo muki kaipafatinagi muki kaunekamepatinagi muki himamukafatinagi muki kagesa ne'afina yapatinagi huka kahau kayamopafi'mo kahaino. Kagaikae'mo kahau kayamopafi'mo kahau'niya kava huka kahaopale'mo mai'naya vaya'aife'mo kahaino,
huno ha pai'nigeno'ae'mo,
28 he, lama gemo nehane. Ani kava'mo huka maime maime uvo alagepa huka maige maige huka maisana ya'mo aligananagi, huno ha pai'nigeno 29 agaemo avagage osisigeno agi'amo alagepa huno hanesiyafe'mo Yesufe'mo, nahaopale'mo mai'niya vekamo ina la'ae, huno afi ge'niye.

30 Yesu'a, mago vekamo Yulusalemu taonifati'mo eno Yeliko taonifi'mo lamisiyafe'mo e'niye. Kategamo ne'vige'apae'mo kumaya alisayafe'mo ne'apamagiya vaya'mogi e'a atafau'a kukena'amo asagi'a alite'a amagi'a ate'a u'nageno faligefe'mo hu'niye. 31 Ani afina'mo mago vekamo mono huno ne'apateya vekamo ani kate'mo uno ageteno ka agi'nalegati'mo aino kalaeno u'niye. 32 Ani kava huno mago Livai nofi vekamo mono ali'yate'mo mai'niya vekamo eno ageteno ka agi'nalegati'mo aino kalaeno u'niye. 33 Agege'ana atale'ana u'na'a'monanafa mago Samaliya vekamo'mo eno ageteno'ae'mo hau huno ateteno 34 uno amagi'naya amute'mo uveli'e nofi alagafati aniteti'e'mo alino lakino faleno ateteno hayaeno ateteno noki afu'amo agotofule'mo asagauno faino ateteno avalelineno nata vaya'mo e'a nehavaya nopi'mo ate'neno yagaino ate'niye. 35 Ega'amo monimo alino ani e'a nehavaya note'mo ne'yagaiya vekamo amiteno'ae'mo, alagepa huka yagaika ato. Henaga'amo, mago'e monimo aliguve, huka hisana'mo'mo esuva afina'mo kamiguve, huno ha pai'niye, huno Yesu'a ani vekae'mo, 36 lole'e mago'e vayapati'mo kumaya vaya'mogi amagi'naya vekamo haopale'mo mai'niya vekamo haiya vekae, huno afi ge'nigeno'ae'mo, 37 hau huno ate'niya vekae, huno ha pai'nigeno'ae'mo, uka ani agufa kava'mo huvo, huno ha pai'niye.

Yesu'a Mata'e Maliya'e'mo no'anifi'mo haino mai'niya gemae

38 Henaga'amo Yesu'e ge'amo ne'afiya vaya'e'mo Yulusalemu taonifi'mo ugefe'mo ne'u'apae'mo mago taonifi'mo u'a ava'yi nehageno'ae'mo mago a'mo agi'amo Mata'a alino falu fala huno ateteno no'afi'mo avalelino hai'niye. 39 Yesu'a haino mai'nigeno'ae'mo Mata agana'amo'mo Maliya'a Yesu aiyafi'mo mai'neno hu'niya gemo afi'niye. 40 Afi'niya'monanafa Mata'a lusi ne'ya'mo yagita hisiyafe'mo agesa afi'neno'ae'mo hau'e hau'e huteno eno Yesufe'mo, Ala kava nene, nagana'nimo'mo natale'nige'na nagai'nige'mo ali'ya'mo ne'aluva kavafe'mo kagesa no'afipiye. Uka atokamo'mo ha'mao, huka ha paiyo, huno ha pai'nigeno'ae'mo, 41 Matao, Matao, muki kavafe'mo kagesa ala'amo ne'afinageno kaipamo'mo atete nehiya'monanafa alagepa huka maisanafe'mo magoke alisana ya'mo hane'niye. 42 Maliya'a ani alagepa yafeke'mo agesa afiteno lekana paino ali'niya'mofe'mo mago vekamo'a ayapati'mo alino hafaleno o'atalegaiye, huno ha pai'niye.

Copyright information for `KYG