Luke 12

Ae'a ati nekaya kavafe'mo ehetapiye, huno hu'niya gemae

(Mt 10:26-27)

Muki asole vaya'mo e'a ali'a anupa hu'a fai'a kili pae'a mai'nageno'ae'mo Yesu'a ge'amo ne'afiya vaya'aife'mo, Falasi vaya'ai peleti mayafi'mo aeno apafu neleya yafe'mo ae'a ati nekaya kavafe'mo ehetapiye. Goti'a muki hu'a ae'a ati nekaya kava'mo alino afole aino apave ligiye. Muki kava'mo hu'a fala nekiya kava'mo muki vaya'ai apaulagale'mo afole aigiye. Lapakaemo hanipi'mo nehaya gemo ha le'yategamo afole aisige'a afigae. Lapakaemo kitamo ki male'netapae'mo sumi gefati'mo nehaya gemo ali'a anupa hu'a mai'nisayate'mo ae'a hakalo hu'a hapa paisage'a afigae.

Vaya'aife'mo koli osutapa Gotifeke'mo koli hiyo, huno hu'niya gemae

(Mt 10:28-31)

Nao vaya'mogitapae, ma mopafi vaya'aife'mo koli osiyo. Afa'a lapaesagetapa faligaya'monanafa mago'e hu'a lapakafu kisiya ya'mo ali'a olapamigae. Ina lafe'mo koli hisafige'na lapa paiguve. Afa'a lapaesigetapa falitesageno'ae'mo himamu'aleti'mo alino ata kopi'mo yaga auno lapatalesiya nefeke'mo koli'amo hiyo. He, agaefeke'mo koli'amo hiyo, hu'na nehuve. Vaya'mogimo naya magokayaga'a aise namamo lole asagefa monilateti'mo miya nefaiya'monanafa Goti'a ani agufa magoke namae'mo age kanino no'atale. Nama anaga'mo ina agufa ya'mo mai'nagetapae'mo aeta apaka setapa mai'naya'mofe'mo Goti'a mago'e huno yagaino lapategaiyanagi koli osiyo. Goti'a lapayoka'mo magoke magoke huno lekana paino age'niye, huno hapa pai'niye.

Yesu vaya'amo mai'none, hu'a ae'a hakalo hu'a hapa nepaiya kavafe'mo hu'niya gemae

(Mt 10:32-33; 12:32; 10:19-20)

Nagaemo lapa pai'nae'mo, vaya'mogimo mago vaya'ai apaulagale'mo nagi'nimo aete'apae'mo Yesu'mo akame nehuve, hu'a ae'a hakalo hu'a hapa nepaisaya vaya'aife'mo Vemo Mafa'nemo'mo Goti enisole vaya'amogi apaulagale'mo vaya'nimo mai'nae, huno apaki'apimo aegaiye. Vaya'mogimo mago vaya'ai apaulagale'mo nagi'nimo o'ae'a afa'a mai'nisaya vaya'aife'mo Goti enisole vaya'amogi apaulagale'mo vaya'nie, hu'na apaki'apimo o'ae'na afa'a maiguve. 10 Muki vaya'mogimo Vemo Mafa'nee'mo hu'a faipa hu'a atesaya vaya'ai hosu kava'apimo Goti'a afa'a alino atalegaiya'monanafa Aote Auneme'ae'mo hu'a faipa hu'a atesaya vaya'ai hosu kava'apimo alagi alino o'atalegaiye.

11 Vaya'mogimo agoti hu'a lapatesayafe'mo mono nopi'mofi yagai'a ne'apataya vaya'aitegamofi kanisole vaya'aitegamofi hu'a lapavaleli'a visagetapa he titapa mai'netapae'mo, na agufa gemo hugupi na agufa gemo huta ge'apile'mo aeta atagaina huta hapa paigupi, hutapa lapakesa afitetapa atete osiyo. 12 Aote Auneme'amo'mo ani afina'mo na agufa gemo hisafigeno alino lapaya malesigetapa afa'a hugae, huno hapa pai'niye.

Negi nagi kagemi ya'e vekamo ava gemo hu'niya gemae

13 Asole vayapati'mo mago vekamo'a, Tisao, afo'nimo'mo ago falitegeno muki kagemi ya'amo nepu'nimoke'mo ali'niye. Kagaemo ina gemo huka ha paiyo, kaganakamo'mo kagemi ya'mo alika fako huka amiyo, huka ha paiyo, huno ha pai'nigeno'ae'mo, 14 ina la'mo nagaefe'mo kagemi yatanimo alino fako huno lanamisiya vekae, huno lekana paino nate'niye, huno ha paiteno'ae'mo 15 muki vaya'aife'mo, lapakaemo kagemi yafe'mo lapa'ye hisiya kava'mo afole o'aisiyafe'mo ehe alagepa hutapa yagaitapa lapateyo. Lusi kagemi ya'mo ne'aliya kava'mo'a alagepa hu'a maisaya kava'mo aepa'amo ohane'niye, huno hapa paiteno 16 ani kavafe'mo huno aeno kalafefa gemo huno hapa paino'ae'mo, mago kagemi ya'e vekamo'a hoya'afati'mo asole ne'ya'mo afole ai'niye. 17 Agaemo aipafi'mo agesa afino'ae'mo, ne'ya'nimo malesuva noko'nimo ago kili pae'niya'mofe'mo nagaemo na agufa kava'mo huguve. 18 Nagaemo ina kava'mo huguve. Ne'ya'nimo ne'malova noko'nimo halate ali'na halagape vai'na alopa alopa noko'nimo kite'na muki ne'ya'ni'e kagemi ya'ni'e'mo ali'na ani nokopi'mo malegauve. 19 Malete'nae'mo, naune'nameyo, muki kafuga'ae'mo alagepa huka maisanafe'mo muki kagemi yakamo alika male'nane. Ne'yakamo nege anikamo nege nehuka kamogaga aika maika falu huka maiyo, hu'na huguve, huno agesa afi'niye. 20 Agesa afi'niya'monanafa Goti'a, negi vekae, hemeni hani'ilagamo kagupi mafa'nemo halate alika namiyo, hu'na hisugeka faligane. Falisanage'apae'mo ina lagimo ageka male'nana kagemi yakamo aligae, huno ha pai'niye, huno hapa paiteno'ae'mo, 21 ani kava hu'a apakai'apilefeke'mo kagemi ya'apimo age'a ne'malaya'monanafa Gotitefe'mo age'a no'malaya vayane, huno hapa pai'niye.

Ma mopafi yafe'mo lapakesa ala'amo afitapa lapausoli osiyo, huno hu'niya gemae

(Mt 6:25-34)

22 Yesu'a ge'amo ne'afiya vaya'aife'mo, ani kava huno hane'niya'mofe'mo lapa pai'nae'mo, afa'a ne'maiya kava'mo'a hogote kava'mo hane'neno ne'ya'mo ago aeno aga se'niye. Lapakufamo hogote ya'mo hane'neno kukenamo ago aeno aga se'niye. Aeno aga se'niya'mofe'mo ma mopafi maisaya kavafe'mo, vae, na agufa ne'ya'mo negaune, na agufa kukenamo alita vaigune, hutetapa lapakesa ala'amo afitapa lapausoli osiyo. 24 Nama anagafe'mo lapakesa afiyo. Nama anaga'mogimo avina ya'mo ali'a male'ne'a hoyamo ali'a o'vaige ne'ya'apimo ali'a no'apifi'mo o'malege hu'a ne'maiya'monanafa Goti'a ne'ya'apimo afa'a alino ne'apamiye. Lapakaemo nama anaga'mo ago aetapa apaka se'naya'mofe'mo Goti'a mago'e huno ne'ya'mo afa'a alino lapamigiye. 25 Lapakaepati'mo mago vekamo'a agesa ala'amo afino hausoli hu'nisiya'mo'mo Goti'a faligiye, huno lekana paino ate'niya afinapati'mo mago'e huno aise'amo alino yatala huno o'ategaiye. 26 Lapakaemo ani aise kava'mo hisaya himamutapimo ohane'niya'mofe'mo na kava higetapa alu kava alu kavafe'mo lapausoli nehae. 27 Lapakaemo kahaufilaga ausee'mo lapakesa afiyo. Ausemo'a agai'amo hageteno ali'ya'mo o'alino kukena'amo alo nosiye. Alo nosiya'monanafa ausemo kukena konali ya'amo'a ala veka'apimo yagaino ne'apateya vekamo agi'amo Salomoni'a alino vai'niya kukena'a'e konali ya'a'e'mo ago aeno aga se'niye. 28 Goti'a kahaufilaga kahaumo hemenimo hane'niyanageno ega'amo atamo lesiya kahaumo ausemo alino vaino ne'apateya'mofe'mo mago'e huno kukenatapimo alino vaino lapategaiye. Gotife'mo aise'amo lapakesa afitapa fatago nehaya vayanagi afiyo. 29 Ne'ya'mo nesaya yafe'mo kahauya hutetapa na agufa ne'ya'mo negaune hutapa osuta lapausoli osiyo. 30 Malaga vaya'mogimo ani yafe'mo hapa'ye nehige'apae'mo kahauya nehaya'monanafa Afotapimo'a afa'a maisayafe'mo aligae huno ago age'niye. 31 Goti'a yagaino lapatesiya kavafe'mo kahauya higeno'ao ma mopafi'mo maisaya ya'e'mo alino lapamigiyanagi. 32 Aise sipisipi anaga'mogitapamo lapamo'yamo o'aiyo. Afotapimo'mo yagaino ne'apateya kote'mo maisayafe'mo hau'niyanagetapa haita faletetapa muki ya'amo aligaya'mofe'mae. 33 Kagemi yatapimo alitapa maketi hige'a miya faitesagetapa alisaya monimo alitapa fako hutapa kagemi ya'apimo o'male'nisaya vaya'aina apamiyo. Koku'napi'mo alagepa kagemi yatapimo alitapa malegeno'ao hano osuno afa'a haneno. Koku'napi yatapimo kumaya'mo o'alige kafamo'mo o'nege hisigeno alagepa huno hanege hanege huno hanesiya yatapimo lapaya mukiki hutapa aliyo. 34 Kagemi ya'apimo age'a ne'malaya kotefeke'mo apaipa kalite'a apakesa ne'afiye.

Ala kava ne'mo eminesiya'ae'mo alo hutapa maiyo, huno hu'niya gemae

(Mt 24:42-44)

35 Kukena'apimo ali'a vaite'a lamu'apifi'mo kani ae'a kaete'a alo hu'a mai'naya vayakana hutapa maiyo. 36 Mago ali'ya aepa vekamo'a a'mo ali'nige'apae'mo lusi yagita hu'nayategamo ugefe'mo hu'nige'apae'mo ali'ya'amo ne'aliya vaya'mogi agava mai'nae. Eno hakalu hakalu nehisige'apae'mo malage hu'a kitamo yaki'a atesayafe'mo yagai'a agava mai'naya vayakana hutapa maiyo. 37 Aepa vekamo esiya afinafe'mo ohavae'a afa'a yagai'a agava mai'naya vaya'aifeke'mo hapao ke hegaiye. Lama gemo lapa pai'nae'mo hapao ke heteno'ae'mo, haitetapa hi'yalamute'mo siate'mo maiyo, huno hapa paiteno ali'ya'mo ne'aliya kukenamo alino vaili'neno ne'ya'mo alino apamigiye. 38 Hani'ilaga folagu'mo osu'nisigeno esifi folagu'mo hano hutesiya afina'mo esifi huno eteno'ae'mo yagai'a agava mai'nisaya vaya'aifeke'mo hapao ke hegaiye.

39 No aepa vekamo'a kumaya ne'aliya vekamo esiya afinafe'mo afi'niyesinana au okaleno afa'a yagaino mai'nisigeno kumaya ne'aliya vekamo'a eno no'amo aeno akaino kumaya o'ali'niyesine. 40 Ani kava'mo hutapa alo hutapa maiyo. Vemo Mafa'nemo hemenimo emi'no'megaiye, hutapa nehisageno'ae'mo eminegaiye, huno hapa pai'nigeno, 41 Pita'a, Ala kava nene, lagaefe'mo mani aeka kalafefa gemo laha nepaipi muki vaya'aife'mo hapa nepaine, huno loka huno afi ge'nigeno'ae'mo 42 ali'ya aepa vekamo'a mago alagepa huno afi'nisiya vekamo'a ali'ya'amo ne'aliya vaya'aite'mo yagai'neno ne'ya'apimo alino fako huno apamisiyafe'mo lekana paino ategaiye. 43 Ali'ya'amo alagepa huno ne'alisiya'mo'mo ali'ya aepa vekamo'a eno'ae'mo hao ke hegaiye. 44 Lama gemo lapa nepauve, ali'ya aepa vekamo'a, muki ya'nile'mo yagaiyo, huno ha paigiya'monanafa 45 ali'ya'amo ne'aliya vekamo'a, hemenimo ali'ya aepa veka'nimo o'megaiye, huno huteno ali'ya'mo ne'aliya ve a'nemo aepa faino apamagiteno alopa ne'ya'e ani'e'mo neteno negi maleno mai'neno'ae'mo 46 o'megaiye, huno agesa afi'nisiya afina'mo malage huno eno heno folagapati'mo apalo atiteno ge'amo no'afiya vaya'aitegamo alino ategaiye. 47 Ali'ya'mo ne'aliya vekamo'a ali'ya aepa veka'amo ge'amo ago afi'niyana alo huteno akame nosisiyana lusi kava huno amagigiya'monanafa 48 ali'ya'mo ne'aliya vekamo'a ali'ya aepa vekamo hau'niya kava'mo o'afi'neno amagisiya hosu kava'mo hu'nisiya'mo'mo vase huno amagigiye. Vaya'mogimo alopa ya'mo apami'nage'a ali'naya vaya'aife'mo, alopa ya'mo namiyo, hu'a hugae. Alopa ya'mo apami'nage'a ali'naya vaya'ai anona'apimo alopa anonamo mago'e huno hanegaiye.

Ali'na fako hu'na apatesuvafe'mo emi'ne'nove, huno hu'niya gemae

(Mt 10:34-36)

49 Atamo ali'na ma mopafi'mo yaga ausuvafe'mo emi'ne'nove. Aepa faino lesiyafe'mo nahau'niya'monanafa ole'niyanageno legaiye. 50 Ani'mo fale'a ne'apataya kava hu'a hosu kavateti'mo ali'a fale'a nategae. Kana nahaume nahaume ne'visige'na u'na aliguve. 51 Ma mopafi vaya'mo magokepi mai'a falu hu'a maisayafe'mo emine'niye, hutapa lapakesa ne'afifiye. Ha'ao, ago lapa pai'nae'mo, ali'na fako hisuvafe'mo emi'ne'nove. 52 Ani afinateti'mo magoke nopi'mo faefu'a vaya'mo mai'nisayateti'mo ali'a fako hu'a lole'e mago'e vaya'mogi lole vekala'anitegamo kame hu'a anatesage'ana lole vekala'moganimo anonale lole'e mago'e vaya'aitegamo kame hu'ana apatega'ae. 53 Ali'a fako hute'apae'mo afo'amo'mo mafa'ne'alegamo kame huno atesigeno mafa'ne'amo'a afo'amotegamo kame huno atesigeno ita'amo'mo a'mafa'ne'alegamo kame huno atesigeno a'mafa'ne'amo'a ita'amotegamo kame huno atesigeno mago a'mo'a anofelo'amotegamo kame huno atesigeno anofelo'amo'a anofelotegamo kame huno ategaiye, huno hapa pai'niye.

Afole aisiya alagena kavafe'mo hu'niya gemae

(Mt 16:2-3)

54 Yesu'a muki vaya'aife'mo, lapakaemo ago age'nayana yegemo lamino nefaleya kotegamo hiya'mo ki'nigetapa agetetapae'mo hemenimo ko'mo aisiyafe'mo hiye, hutapa nehageno'ae'mo ani kava'mo afole ne'aiye. 55 Ago age'nayana lusi yasimo ali'nigetapa agetetapae'mo alagepa ko'mo aligefe hiyanageno yegemo legaiye, hutapa nehageno'ae'mo ani kava'mo afole ne'aiye. 56 Aetapa ati nekaya vayanagi ma mopale alagena kava'mo ago age'naya'monanafa na kava higetapa hemenimo nehuva alagena kava'mo no'agae. 57 Na kava higetapae'mo alita fako hutetapa alagepa kava'mo no'agae, huno hapa pai'niye.

Alika nanu aeka anato, huno hu'niya gemae

(Mt 5:25-26)

58 Kagaemo hosu kava'mo hu'nisanageno agoti huno kategefe hisiya vekamo'a agoti gemo ne'afiya vekalegamo kavalelino ne'visigekae'mo alika alagepa huka ato. Alagepa huka alika fako osisana'mo'mo agoti gemo ne'afiya vekamo'a kavalelinuno amisigeno kavaleno alino ati vekamo amisigeno alino kalavusi huno kategaiye. 59 Muki anonakale'mo o'amisanageno magoke monitomo lageso hisigekae'mo kalavusifati'mo ataleka o'ugane, huno hapa pai'niye.

Copyright information for `KYG