Luke 16

Kagemi yate'mo hosu kava huno ne'yagaiya vekae'mo ava gemo hu'niya gemae

Yesu'a ge'amo ne'afiya vaya'aife'mo, mago alopa kagemi ya'amo hane'niya vekamo mai'nigeno ani kagemi ya'ale'mo yagaino ne'ateya vekamo mai'niye. Mai'nige'apae'mo mago vaya'mogi e'a, kagemi yakale'mo yagaino nekateya vekamo'a kagemi yakamo fiku alino ne'atale, hu'a ha pai'nageno'ae'mo agaefe'mo ge hu'nigeno e'nigeno'ae'mo, na agufa kava'mo hu'nana kavafe'mo kava gemo afi'nove. Hu'nisana kavafe'mo kagesa afika avo'mo kaeka namiyo. Kagemi ya'nile'mo mago'e huka yagaika o'nategane, huno ha pai'nigeno kagemi ya'ale'mo yagaino ne'ateya vekamo'a, na kava hisuve. Aepa vekamo'a naha faino natalesiyafe'mo hiye. Nayamufa vekamo o'mai'nova'mofe'mo hoya ali'ya'mo afa'a o'aliguve. Mago vaya'ai ne'yatefe'mo aukaya hisuvafe'mo navagage hugiye. Hisuva kava'mo hemenimo ago age'nove. Aepa vekamo'a naha faitalesige'apae'mo mago vaya'mogi nagaefe'mo, lagae nopi'mo eka maiyo, hu'a naha paisage'nae'mo hisuva kavafe'mo nagesa afi'nove, huno aipafi'mo agesa afi'niye. Ala veka'apimo'a anona'apimo hane'niya vaya'aife'mo ge hu'nige'a magoke magoke vaya'mo ete ete hu'nageno'ae'mo hogoteno e'niya vekae'mo, anonakamo na magi hane'niye, huno afi ge'nigeno'ae'mo, vani hataleti kalisi talamumo hane'niye, huno ha pai'nigeno'ae'mo, anonakalefe'mo malage huka apepamo alika apake aika fifiti'ae huka avo'mo kao, huno ha pai'niye. Alu vekae'mo, anonakamo na magi hane'niye, huno afi ge'nigeno'ae'mo, vani hataleti'a falaova ku'mo hane'niye, huno ha pai'nigeno'ae'mo, anonakalefe'mo malage huka apepamo alika apake aika eiti'ae huka avo'mo kao, huno ha pai'niye. Aepa vekamo'a kagemi ya'ale'mo hosu kava'mo huno yagaino ne'ateya vekamo agi'ale'mo alino asaga huno ateteno'ae'mo, agufae'mo alagepa huno agesa afi'niya vekae, huno hu'niye. Ma mopafi vaya'mogimo ma mopafi vaya'aitegamo alu kava alu kava'mo hisayafe'mo alagepa hu'a apakesa afite'a hale yate'mo ne'maiya vaya'aina ae'a apaka se'a mai'nae. Nagaemo lapa nepauve, ma mopafi hosu monileti'mo alita lapao ya'mo hiyo. Lapakaemo falisage'a lapao vaya'mogi ali'a falu fala hu'a lapatetesagetapae'mo no'apifi'mo hanege hanege huno hanesiya no'apifi'mo faletapa haigayanagi. 10 Mago vekamo'mo aise yate'mo alagepa huno yagai'nisiya'mo'mo ani kava huno alopa yate'e'mo alagepa huno yagaigiye. Mago vekamo'mo aise yate'mo alagepa huno o'yagai'nisiya'mo'mo ani kava huno alopa yate'e'mo alagepa huno o'yagaigiye. 11 Lapakaemo ma mopafi hosu monile'mo alagepa hutapa no'yagaisayana ina la'mo lama ge monimo alino lapamigiye. 12 Alu vaya'ai yate'mo alagepa hutapa yagaita o'apate'nisayana ina la'mo lapakaitapi ya'mo alino lapamigiye. 13 Ali'ya'mo ne'aliya vekamo'a lole ali'ya aepa vekala'ani gemo afiteno akame huno ali'ya'mo afa'a o'aligiye. Mago vekae'mo hau'nisigeno alu vekae'mo hosu aipamo kalino ategaiye. Mago vekamo ge'amo ne'afisiyana alu vekae'mo akame'yamo amigiye. Goti ali'ya'ale'e moni ali'yate'e'mo afa'a o'maigae, huno hapa pai'niye. 14 Falasi vaya'mogimo monie'mo hapa'ye nehiya vaya'mogi ani muki hu'niya ge'amo afite'apae'mo apaipamo le'a ate'nae. 15 Yesu'a apakaefe'mo, lapakaemo vaya'ai apaulagale'mo kanale vaya'mo maisayafe'mo muki kava'mo nehaya'monanafa Goti'a lapaipafi'mo ne'age. Vaya'mogimo mago kavafe'mo agi'ale'mo ali'a ne'asagaya'monanafa Goti aulagale'mo alagi hosu'niya kava'mo hane'niye. 16 Ke'aepa ge'e Gotitegati gemo alini e'a ae'a hakalo hu'a hapa nepaiya vaya'ai ge'api'e'mo haneme haneme ne'egeno'ae'mo Yoni'a afole ai'niye. Yoni'a afole ai'niya afinateti'mo Goti'a yagaino ne'apateya kavafe'mo alagepa faigoko ge'amo aeta hakalo huta hapa paime hapa paime eta hemeni'e'mo hapa nepaunage'apae'mo muki vaya'mo afela vayakana hu'a apaya mukiki hu'a hai'a nefalae. 17 Ani gemo nehuva'monanafa koku'na'e ma mopa'e'mo hano hisiya kava'mo alagi kana osu'niya'monanafa ke'aepa gemo'a aise ya'ato'amo hano hisiyafe'mo lusi kava huno mago'e huno kana hu'niye.

18 Haiya vaya'mogimo a'ne'apimo hapa fai'a apatalete'a alu a'nemo ne'alisafi kumai kava'mo nehae. Haiya vekamo'a hafaino atale'nisiya a kanomo ne'alisifi kumai kava'mo nehiye, huno hapa pai'niye.

Kagemi ya'e veka'e Layosi'efe'mo anava gemo hu'niya gemae

(Mt 5:31-32; 19:9; Mk 10:11-12)

19 Yesu'a, mago kagemi ya'e vekamo'a muki afina'mo alagepa kukenamo hogote kukena'ageke'mo alino vaige alagepa ne'ya'age'mo nege huno mai'niye. 20 Mai'nigeno'ae'mo mago vekamo agi'amo Layosi'mo ne'yafe'mo hau'nigeno'ae'mo aukaya nehiya vekamo lusi amu'mo ale'niye. Mago vaya'mogimo ani vekamo avaleli u'a kagemi ya'e vekamo lafi hi'yana'amo malaga havae'a ate'nageno havaeno mai'neno'ae'mo 21 hi'yalamuteti'mo asagauno aisiya ne'ya atupamo alino nesiyafe'mo mai'niye. Mai'nige'apae'mo kalamogi e'a amute'mo sagani sagani hu'a ne'a mai'nae. 22 Afa'a mai'neno aukaya nehiya vekamo fali'nige'apae'mo enisole vaya'mogi emi e'a avaleli hai'a koku'napi Emalehamu haopale'mo ate'nageno mai'niye. Ani kava'mo huno kagemi ya'e vekamo fali'nige'apae'mo alini u'a ki'a ate'nae. 23 Ata kopi'mo lamino mai'nigeno lusi kava huno agafu nekigeno'ae'mo alino maku huno ageyana Emalehamu haopale'mo Layosi'mo avaleli hai'a ate'nageno Emalehamu'e'mo mai'na'ageno anake'niye. 24 Anaketeno'ae'mo alopa gefati'mo keya aino'ae'mo, Naginago afo Emalehamuvo, kahau huka nateteka Layosi'mo alika ategeno uno ati yagaina ayateti'mo anipi'mo aeteno alinino emineno, navenafu'nale'mo malesigeno falu nahaino. Ata kopi'mo mai'nogeno lusi nagafu'mo nekiye, huno ha pai'nigeno 25 Emalehamu'a naginago mafa'neo, kagesa afika ho huvo. Kagaemo ma mopafi mai'nekae'mo muki afina'mo alagepa ya'age'mo alika mai'nanageno Layosi'a hosu ya'age'mo alino mai'niya'monanafa hemenimo alagepa huno mai'nigeka kagaemo lusi kava huno kagafu nekiye. 26 Mago'e gemo hane'niyana Goti'a folagapi'mo mago lusi kalokalopamo male'niyanage'a ma kote mai'naya vaya'mogi lakae'a kagaetegamo o'visage'a kagae kote mai'naya vaya'mogi lakae'a ma kotegamo o'megae, huno ha pai'nigeno'ae'mo 27 Kagemi ya'e vekamo'a mago'e huno ge huno'ae'mo, naginagomo, kahao ke hovanagi, Layosi'mo alika ategeno'ao afo'nimo notegamo uno lamino hapa paino. 28 Faefu'a konaga'nimogi mai'nayanageno uno, ehetapiye, huno hapa paisige'a afite'apae'mo mani lusi kava huno apakafu kisiya kote'mo emi o'megae, huno ha pai'nigeno 29 Emalehamu'a, Mosese'a avo'mo kae male'niya ge'e Gotitegati gemo alini e'a ae'a hakalo hu'a hapa nepaiya vaya'mogi avo'mo kae male'naya ge'e'mo hane'niyanage'a afa'a afigae, huno ha pai'nigeno'ae'mo, 30 Ha'ao, naginagomo, o'afigaya'mofe'mo mago fali'nisiya vekamo'mo he tinuno hapa paisige'apaeke'mo afite'a apaipamo ali'a afe legae, huno ha pai'nigeno'ae'mo, 31 Mosese'a avo'mo kae male'niya ge'e Gotitegati gemo alini e'a ae'a hakalo hu'a hapa nepaiya vaya'mogi avo'mo kae male'naya ge'e'mo o'afisayana mago fali'nisiya vekamo'a he tinuno hapa paisiya gemo o'afigae, huno ha pai'niye, huno Yesu'a hapa pai'niye.

Copyright information for `KYG