Luke 17

Apayate ne'aliya kavafe'mo hu'niya gemae

(Mt 18:6-7,21-22; Mk 9:42)

Yesu'a ge'amo ne'afiya vaya'aife'mo, Vaya'mo apayate aligaya'monanafa apayate alisaya vaya'mo vaehae, hu'na, lusi hanageke ya'mo aligae. Lusi hanageke ya'mo aligaya'monanafa mago vekamo'a ani agufa aise mafa'nemo'a hosu kava'mo hisiyafe'mo hogoteno ayate'mo o'ali'nisige'apae'mo atafau'a alopa yafate'mo nofi aete'a lugo'afi'mo aete'a alini u'a solovala anipi'mo yaga au'a atalesageno'ae'mo aise hanageke ya'mo aligiye. Lapakaitapile'mo alagepa hutapa yagaitapa lapateyo. Konagakamo'mo kagaetegamo hosu kava'mo hu'nisigekae'mo hosu kava'mo hu'nane, huka ge hauvo. Aipamo alino afe lesigekae'mo hosu kava'amo alika atalo. Konagakamo'mo magoke felugamo seveni'a afina'mo kagaetegamo hosu kava'mo huteno seveni'a afina'mo eno'ae'mo, kagaetegamo hosu kava'mo hu'novanage'na mago'e hu'na ani agufa hosu kava'mo osuguve, huno hisigekae'mo hosu kava'amo alika atalo, huno hapa pai'nige'a apa vaya'amogi, lagesa afita fatago hu'nona kavatile'mo mago'e huka alika ko sika lato, hu'a ha pai'nageno Ala kava ne'mo'a, lapakesa afitapa fatago hu'nisaya kava'mo aise avina yakana huno hane'nisiyana mago yosae'mo, kagae'e hafuyaka'e'mo aika vakaika lamika anipi'mo halate hago, hutapa hisageno'ae'mo getapimo afa'a afigiye, huno hapa pai'niye.

Ali'ya'mo ne'aliya vaya'aife'mo apava gemo hu'niya gemae

Lapakaepati'mo kayo kayo vekatapimo'a mopafi'mo ai'yumo ai'nisifi sipisipile'mo yagaino apate'nisifi huno mai'neno esigekae'mo, malage huka haikeka hi'yalamute'mo mai'neka ne'ya'mo no, huka ha paigapiye. Ha'ao, ani gemo osugana'monanafa hogoteka ne'ya'nimo kaeka hatika nate'neka ali'ya'mo alisana kukenakamo alika vaili'neka ne'ya'nimo alinikeka namiyo. Namige'na netesugeka kagaemo henaga'amo negane, huka ha paigane. Ge'amo akame nehiya'mofe'mo kahao ke hove, huno hugifiye. Ha'ao. 10 Ani kava'mo hutapa muki gemo Goti'a lapa pai'niya ge'amo afitetapae'mo akame hutetapa ani gemo hutapae'mo, ali'ya'mo ne'aluna vaya'age'mo mai'none. Alagepa kava'mo afa'a osu'nona'monanafa ali'yatigeke'mo ali'none, hutapa hiyo, huno hapa pai'niye.

Yesu'a teni'a vaya'mo lepalosi ya'mo hapau'niya vaya'mo alino alagepa huno apate'niya gemae

11 Yesu'a Yulusalemu taonifi'mo ugefe'mo Samaliya ko'mo hanete Galeliya ko'mo hanete hutegeno folagapi hane'niya kate'mo uno 12 mago taonifi'mo haino falegefe'mo nehige'apae'mo teni'a lepalosi vaya'mo e'a fotu hugefe'mo muga afagi'ale'mo e'a he ti'a mai'ne'apae'mo 13 alopa geleti'mo, Yesuvo, Ala kava nene, kahau huka lato, hu'a ha pai'nageno 14 Yesu'a apaketeno'ae'mo, utapa mono hu'a ne'apataya vaya'aina lapakufamo alita apave liyo, huno hapa pai'nige'apae'mo kategamo ne'vageno'ae'mo apakufalafa'mo alino hamale'niye. 15 Ani vayapati'mo mago vekamo'a alino agufalegamo ageyana agufalafa'mo alino hamale'nigeno ageteno'ae'mo aino atagi neno ne'eno'ae'mo alopa gefati'mo Goti agi'ale'mo alino asaga hulino eno 16 Yesu aiyafi'mo ago'ya faiteno hao ke he'niye. Ani vekamo Samaliya kotega vekae. 17 Yesu'a ani vekamo ageteno'ae'mo, teni'a vaya'mo ali'na alagepa hu'na apate'novana naeni'a vaya'mo haiya'alega mai'nae. 18 Na kava higeno'ae'mo mani magoke alu nofi vekamo'a Goti agi'ale'mo alino asaga huno atesiyafe'mo e'niye, huno hapa paiteno agaefe'mo, 19 kagesa afika fatago hu'nana kavakamo'mo alino alagepa huno kate'niyanagi he tika afa'a uvo, huno ha pai'niye.

Goti'a yagaino ne'apateya kavafe'mo ava gemo hu'niya gemae

(Mt 24:23-28,37-41)

20 Mago Falasi vaya'mogimo Yesufe'mo, hainu afina'mo Goti'a yagaino apatesiya kava'mo afole aigiye, hu'a afi ge'nageno'ae'mo, Goti'a yagaino apatesiya kava'mo afole aisiya'mo'mo muki vaya'mogimo apaulagafati'mo o'agegae. 21 Vaya'mogi, manile afole ai'niye, hu'a osuge, mugalega afole ai'niye, hu'a osuge hu'a osugae. Afiyo, Goti'a vaya'ai apaipafi'mo yagaino ne'apate, huno hapa pai'niye.

22 Ge'amo ne'afiya vaya'aife'mo, henaga'amo lapakaemo, Vemo Mafa'nemo aise afina'mo agesunafe'mo nehune, hutapa hugayana o'nagegae. 23 Mago vaya'mogi lapakaefe'mo, mugalegamo utapa ageyo, hu'a lapa paige, manile etapa ageyo, hu'a lapa paige hisagetapae'mo ge'apimo afitetapa utapa apakame osiyo. 24 Alino alave alave nehigeno'ae'mo muki koku'nate'mo aeno ha lege'apae'mo muki vaya'mogi ne'agaya kava huno Vemo Mafa'nemo eminesige'a agegae. 25 Eminegaiya'monanafa hogoteno lusi agafu kisiya ya'mo ne'alisige'apae'mo hemeni afina'mo mai'naya vaya'mogimo apakame'yamo amigae.

26 Noa'a mai'niya afina'mo haiya agufa kava'mo hu'a mai'nafi Vemo Mafa'nemo afina'e'mo ani agufa kavake'mo hu'a maigae. 27 Ne'ya'mo nege ani'mo nege a'mo alige a'mafa'nemo lagauli'a uge hume hume ne'ageno'ae'mo Noa'a sipifi'mo haino mai'nigeno'ae'mo ani'mo heteno muki vaya'aina ago aeno apati kae'niye. 28 Ani kava hu'a Loti'a mai'niya afina'mo ne'ya'mo nege ani'mo nege mago ya'mo miya faige maketi huge hoyamo vaige no kige hume hume ne'ageno'ae'mo 29 Loti'a Sotomi taonifati'mo ataleno ne'vigeno'ae'mo ani afina'mo ata'e ata neleya yafa'e'mo ko aigekana huno koku'napati'mo emineno muki vaya'mo apaleno apasaga li'niye. 30 Ani agufa kavake'mo hu'a mai'nisageno Vemo Mafa'nemo afole aigiye. 31 Ani afina'mo kumatega mai'nisaya vaya'mogi no'apifati'mo kagemi ya'apimo alisayafe'mo fale'a ohaiyo. Hoyalega mai'nisaya vaya'mogi no'apilega halate ai'a atagi ne'a o'viyo. 32 Lapakaemo Loti a'a'mo'mo hu'niya kavafe'mo lapakesa afitapa ho hiyo. 33 Ina lagimo ma mopafi'mo alagepa hu'a maige maige hu'a maisaya kavate'mo yagai'a ne'atesafigeno alagepa hu'a ne'maisaya kava'apimo hano hugiya'monanafa ina lagimo alagepa hu'a ne'maisaya kava'apimo atale'nisafige'a alagepa hu'a maisaya kava'apimo aligae. 34 Nagaemo lapa pai'nae'mo, ani hani'ilagamo lole vekala'mo magoke hipale'mo lokae'ana havae'nisa'apati'mo mago vekamo avaleli'a ute'a mago vekamo ategae. 35 Lole atala'mo magokepi lokae'ana ali'ya'mo ne'alisa'apati'mo mago a kanomo avaleli'a ute'a mago a kanomo ategae. 36 Lole vekala'mo hoyafi'mo lokae'ana mai'nisa'apati'mo mago vekamo avaleli'a ute'a mago vekamo ategae, huno hapa pai'nige'apae'mo, 37 Ala kava nene, haiya'alegamo ani agufa kava'mo afole aigiye, hu'a afi ge'nageno'ae'mo, afu anaga'mo kefa'apimo hane'niya yategamo hakiki anaga'mo haleli e'a ali'a anupa hu'a ne'maiye, huno hapa pai'niye.

Copyright information for `KYG