Luke 19

Sakiyasife'mo ava gemo hu'niya gemae

Yeliko taonifi'mo uno ava'yi huteno ne'vigeno'ae'mo mago vekamo agi'amo Sakiyasi'a takesi monimo ne'aliya vaya'aite'mo yagaino ne'apateya vekamo lusi kagemi ya'amo hane'niya vekamo mai'niye. Agaemo haiya agufa vekamofi huno agesiyafe'mo hu'niyana aupa vekamo mai'niya'mofe'mo asole vaya'mogi ae'a akani'nageno'ae'mo o'age'niye. O'ageno'ae'mo aeno apaka seno nagu nagu huno ne'uno'ae'mo mani kateke'mo egaiyanage'na agegauve, huno agesa afiteno mago yosafi'mo haino mai'neno agesiyafe'mo agava mai'niye. Yesu'a ani mai'niya yate'mo eno he tino mai'neno alino maku huno ageteno'ae'mo, Sakiyasiyo, malage huka emikeno. Hemenimo kagae nopi'mo uta'a maigu'ae, huno ha pai'nigeno malage huno emineno amogaga aiteno avalelino uno no'afi'mo alino falu fala huno ate'niye. Ani kava'mo agete'apae'mo, hosu vekamo nopi'mo hai'niye, hu'a hute'a hagalu hagalu hu'a ge ne'nae.

Sakiyasi'a vaya'ai apaulagale'mo he tino mai'neno'ae'mo, Ala kava nene, ago, kagemi ya'nimo folagapati'mo ali'na fako hu'na kagemi ya'apimo ohane'nisiya vaya'aina apamite'na mago vaya'aife'mo aigofe gemo hute'na kumaya'mo ali'nisuvana fo'a afina'mo ali'na fako hu'na anona'apilefe'mo apamite apamite hu'na ne'apamuve, huno ha pai'nigeno Yesu'a, Emalehamu aginago vekamo mai'niya'mofe'mo ani afina'mo mani afamo anaga'ai apakufamo ago ali'na kati'na apate'nove. 10 Vemo Mafa'nemo'a lageso hu'naya vaya'mo kahauya huno apaketeno apakufamo alino katino apatesiyafe'mo e'niya'mofe'mo ani kava'mo ago afole ai'niye, huno hapa pai'niye.

Monimo alino apami'niya kavafe'mo aeno kalafefa gemo hu'niya gemae

(Mt 25:14-30)

11 Ani gemo afitageno'ae'mo Yulusalemu taoni haopale'mo ago uno ava'yi hu'niya'mofe'mo hemenitomo Goti'a yagaino ne'apateya kava'mo ago afole aigiye, hu'a apakesa afi'naya'mofe'mo Yesu'a ina gemo aeno kalafefa gemo huno hapa pai'niye. 12 Mago yagaino ne'apateya nofi vayapati vekamo'a, Ala kini vekamo afagi kotega mai'niyategamo visugeno lekana paino natesige'na halate ai'na atagi ne'na e'na ala kini vekamo maiguve, huno agesa afi'niye. 13 Agaemo teni'a vaya'mo ali'ya'amo ne'aliya vaya'aife'mo ge hu'nige'a e'nageno'ae'mo magoke magoke monimo alino fako huno apamite apamite huno apamiteno'ae'mo, mani monileti'mo ali'ya'mo aligeno'ao akamelegati'mo mago'e monimo afole aino. Ali'ya'mo alime alime ne'vige'na eno, huno hapa pai'niye. 14 Hapa paiteno u'niya'monanafa vaya'amogimo hosu apaipamo kali'a atete'apae'mo mago vaya'mo apa'mo ali'a apate'nage'a u'a Ala kini vekae'mo, ani vekamo'mo yagaino latesiyafe'mo olahau'niye, hu'a ha pai'nae. 15 Ha pai'naya'monanafa Ala kini vekamo'a ge'apimo o'afino ala'apimo yagaino apatesiya vekae, huno huteno lekana paino ate'nigeno aino atagi neno eno hogoteno apamiteno u'niya monileti'mo akamelega'amo na magi monimo afole ai'nifi huno agesiyafe'mo muki vaya'aife'mo ge hu'niye. 16 Mago vekamo hogoteno eno'ae'mo, Ala kava nene, magoke monimo nami'nana monileti'mo akamelega'amo teni'a monimo ali'nove, huno ha pai'nigeno'ae'mo, 17 alagepa huka ali'ya'nimo ali'nane. Aise yate'mo alagepa huka yagai'nana'mofe'mo teni'a taonile'mo yagaisanafe'mo lekana pai'na kate'nove, huno ha paitegeno 18 agae akamelegamo mago vekamo'a eno, Ala kava nene, magoke nami'nana monileti'mo akamelega'amo monimo faefu'amo ali'nove, huno ha pai'nigeno'ae'mo, 19 faefu'a taonile'mo yagaisanafe'mo lekana pai'na kate'nove, huno ha paitegeno 20 anile mago vekamo'a eno, Ala kava nene, nami'nana monimo afa'a ali'nove. Hanipausifi'mo ai'na fala ki'na ali kate'nove. 21 Kagaemo lokiya kaipa vekamo mai'neka mago vaya'mogi male'naya ya'mo alige mago vaya'mogi vai male'naya hoyafati'mo alige nehana'mofe'mo kagaefe'mo kolikamo hute'nae'mo fala ki'na ali'nove, huno ha pai'nigeno'ae'mo, 22 kagaemo hosu ali'ya'mo ali'nane. Kagaemo naha pai'nana gekaleti'mo agoti hu'na kategauve. Ago nage'nanana lokiya naipa vekamo mai'ne'na mago vaya'mogi male'naya ya'mo alige mago vaya'mogi hoyafati'mo alige hu'na mai'nogeka nage'nane. 23 Nage'nana'mofe'mo na kava higeka moni'nimo monimo ne'malaya nopi'mo o'male'nane. Male'nanesinana akamelagati'mo mago'e monimo aluvesine, huno ha paiteno 24 he ti'a mai'naya vaya'aife'mo, moni'amo alinita etapa teni'a monimo ali'niya vekamo amiyo, huno hapa pai'nige'apae'mo, 25 Ala kava nene, teni'a monimo ago ali'niye, hu'a ha pai'nageno'ae'mo, 26 lapa nepauve, ali'nisaya vaya'aina mago'e hu'na ali'na apamiguve. O'ali'nisaya vaya'ai apayapati'mo hapa falegauve, huno hapa paiteno'ae'mo, 27 inagi kame vaya'nimo agaemo yagaino latesiyafe'mo olahau'niye, hu'a hu'naya vaya'mo apavalelita etapa naulagale'mo kamiti apamagiyo, huno hapa pai'niye, huno Yesu'a hapa pai'niye.

Yesu'a Yulusalemu kotegamo ne'vige'apae'mo, ala kini vekae, hu'a hu'naya gemae

(Mt 21:1-11; Mk 11:1-11; Yo 12:12-19)

28 Ani gemo hapa paiteno'ae'mo hogoteno Yulusalemu taonifilagamo ne'vaya kate'mo uno 29 Metapesi taoni'e Metani taoni'e'mo hane'niya avemo agi'amo Alifi'aepa ave aiyafi'mo hane'niya kote'mo uno ava'yi huteno ge'amo ne'afi'a vekala'anife'mo, 30 lanaulagale'mo hane'niya taonifi'ina utana hai'ao. Utana ava'yi hutetanae'mo agesa'ana mago aikeli hosimo ae'a ate'nisaya hosile'mo mago vekamo'a mai'neno alinitata osu'niya hosimo mai'nisigetana agetetanae'mo hatu maetana avalelitana e'ao. 31 Mago vekamo'a, na agufa kava hisa'afe'mo hatu maetana ne'ata'ae, huno lanafi gesigetanae'mo, Ala kava ne'mo'a ali'ya'amo alisiyafe'mo higeta'aene, hutana ha pai'ao, huno hana paiteno alino anate'nige'ana u'ana hana pai'niya kava'mo huno mai'nige'ana age'na'ae. 33 Aikeli hosimo nofi'amo hatu mae'ana ne'ata'age'apae'mo hosimo afo'amogimo, na agufa kava'mo hisa'afe'mo hatu maetana ne'ata'ae, hu'a anafi ge'nage'anae'mo 34 Ala kava ne'mo'a ali'ya'amo alisiyafe'mo higeta'aene, hu'ana hapa paite'ana 35 Yesutegamo avaleli'ana e'na'ae. Kukena'animo asagi'ana aikeli hosile'mo yakai male'ne'ana Yesu'mo asaga hu'ana fai'ana ate'na'ageno 36 mai'neno alinino ne'vige'apae'mo visiya kate'mo kukena'apimo asagi'a yakai'a ateme ateme u'nae. 37 Yulusalemu haopalega Alifi'aepa aveleti'mo uno lamigefe nehige'apae'mo muki vaya'mo ge'amo ne'afiya vaya'amogi aepa fai'a apamogaga aite'a himamu'aleti'mo no'agaya agufa aune kava'mo hu'nige'a age'naya'mofe'mo alopa gefati'mo hute'a Goti agi'ale'mo ali'a asaga hume hume u'nae. 38 Apakaemo,

Ala kava ne'mo agi'alefe'mo ne'eyanagi ha maeno. Goti'a lagaefe'mo aipamo'mo falu hino. Goti'a hogote vekamo anaga vekamo agi'ale'mo alitapa asaga hiyo,
hu'a huge huge hu'a mai'nae.
39 Mago Falasi vaya'mo asole vaya'e'mo magokepi lokae'a u'naya vaya'mogimo, Tisao, gekamo ne'afiya vaya'aife'mo, ge osiyo, huka hapa paiyo, hu'a ha pai'nageno'ae'mo, 40 lapa nepauve, ge osu'a afa'a maisayana yafa'mo'a age aigiye, huno hapa pai'niye.

Yesu'a Yulusalemu taonifi'mo mai'naya vaya'aife'mo avi'ya'mo hu'niya gemae

41 Yulusalemu taonifi'mo uno ava'yi nehuno avi'ya huno'ae'mo, 42 Yulusalemu vaya'mogitapae, Lapakaemo Goti'a alino nanu aeno lapatesigetapa visaya ka'mo agesayafe'mo nahau'niya'monanafa aeno ati kaeno lapate'niyanagetapa afa'a o'agegae. 43 Henaga'amo mago afina'mo afole aisige'apae'mo kame vayatapimogi e'a mopamo kafili u'a muki lapaune hetapa visaya kate'mo male'a akani malegae. 44 E'a ae'a halagape vaitalesageno mago yafate'mo akalo hu'a male'naya yafa'mo'a alu yafate'mo ohane'nisiya yafa'e vaya'e'mo ali'a mopafi'mo yaga au'a atalegae. Goti'a lapa maesiyafe'mo emine'niyana agetapa aeto osu'naya'mofe'mo kame vayatapimo egae, huno hapa pai'niye.

Yesu'a alopa mono nopi'mo maketi ne'malaya vaya'mo alino hapafaino apatale'niya gemae

(Mt 21:12-17; Mk 11:15-19; Yo 2:13-22)

45 Agaemo Yu vaya'ai alopa mono nopi'mo haino aepa faino maketi ne'malaya vaya'mo alino hapafaino apatale'niye. 46 Agaemo, avo'mo kae male'niya gemo'a huno'ae'mo,no'nie'mo, nunumu'mo nehaya none, hu'a hugae, huno avo'mo kae male'niya'monanafa lapakaemokumaya vaya'mo e'a fala ki'a ne'maiya none, hutapa alita hamaletapa ate'nae, huno hapa pai'niye. 47 Muki afina'mo mono nopi'mo alino apaya malege malege huno mai'nige'apae'mo mono hu'a ne'apataya vaya'aite'mo yagai'a ne'apataya vayanagi ke'aepa gemo avo'mo kae'a ali'a apaya ne'malaya vayanagi ala apaki vayanagi hu'a haesaya kafe'mo kahauya hu'a mai'nae. 48 Hu'naya'monanafa muki afa vaya'mogi'e'mo ge'amo afisayafe'mo hapau'niya'mofe'mo haesaya ka'mo o'age'nae.

Copyright information for `KYG