Luke 20

Yesufe'mo, ina la'mo, yagaika apatesana vekae, huno lekana paino kate'niye, hu'a afi ge'naya gemae

(Mt 21:23-27; Mk 11:27-33)

Mago afina'mo Yesu'a Yu vaya'ai alopa mono nopi'mo haino alagepa faigoko gemo alino apaya ne'malege'apae'mo mono hu'a ne'apataya vaya'aite'mo yagai'a ne'apataya vayanagi ke'aepa gemo avo'mo kae'a ali'a apaya ne'malaya vayanagi vayatama vayanagi hu'a e'a, haiya agufa alagena yakamo yagaika apatesana ya'mo ali'nekae'mo mani kava'mo nehane. Ina la'mo mani kava'mo huvo, huno kaha pai'niye, hu'a afi ge'nageno'ae'mo, inage'na nagae'e'mo mago gemo lapafi gesugetapae'mo naha paiyo. Yoni'a ani'mo faleno apatesiyafe'mo Goti'a lekana paino ate'nifi vaya'mogi lekana pai'a ate'nae, huno apafi ge'nige'apae'mo apakai'apimo ge huge afige hu'apae'mo, ge'ale'mo na agufa ge huta ha paisune. Goti'a lekana paino ate'niye, huta hisunana na kava higetapa ge'ae'mo lapakesa afitapa fatago osu'nae, huno laha paigiye. Vaya'mogi lekana pai'a ate'nae, huta hisunana afa vaya'mogimo yafa kayoteti'mo lamagigae. Yoni'mo Gotitegati gemo alinino eno aeno hakalo huno hapa nepaiya vekae, hu'a apakesa ne'afiya'mofe'mae, hu'a hute'a ge'ale'mo ae'a atagaina hu'a ha pai'apae'mo, o'afi'none, hu'a ha pai'nageno'ae'mo, naha opai'naya'mofe'mo haiya agufa alagena ya'mo yagai'a ne'apataya vaya'mogi ne'aliya agufa alagena ya'mo ali'ne'nae'mo mani kava'mo nehufi hu'na lapa opaiguve, huno hapa pai'niye.

Hosu vaya'mogimo hoyale'mo ne'yagaiya kavafe'mo aeno kalafefa gemo hu'niya gemae

(Mt 21:33-46; Mk 12:1-12)

Yesu'a aepa faino aeno kalafefa gemo huno hapa paino'ae'mo, mago vekamo'a nofi hoyamo vai maleteno mago vaya'mogi yagai'a atesageno nofi alagamo afu lesigeno agaemo mago nofi alaga'amo alisige'apae'mo apakaemo mago nofi alaga'amo alisayafe'mo apavaleno apateteno afagi kotegamo uno yatala afina'mo mai'niye. 10 Nofi alagamo ago afu le'nigeno'ae'mo agaemo mago nofi alagamo alisiyafe'mo ali'ya'amo ne'aliya vekamo alino ate'nigeno u'niye. U'nige'apae'mo hoya'ale'mo ne'yagaiya vaya'mogimo atafau'a amagite'apae'mo, afa'a ataleka uvo, hu'a ha pai'nageno o'alino afa'a ataleno e'niye. 11 Agaemo alu vekamo ali'ya'amo ne'aliya vekamo alino ate'nigeno u'niyana ani agufa kava'mo hu'a amagite'a agaetegamo osisaya agufa kava'mo hute'a ali'a atalageno o'alino afa'a e'niye. 12 Halate mago alu vekamo alino ate'nigeno u'nige'apae'mo lusi kava hu'a amagi'nageno kola'amo'mo hu'nige'a malaga alini u'a yaga au'a atale'nae. 13 Hoyamo afo'amo'mo, nagaemo na kava hisuve. Nahau nayamopafi'mo nahau'niya mafa'ne'nimo ali'na atesugeno visige'apae'mo ge'amo afa'a afigae, huno agesa afi'niye. 14 Hu'niya'monanafa hoya'ale'mo ne'yagaiya vaya'mogi mafa'ne'amo e'nige'a agete'apae'mo apakai'apimo ge huge afige hu'apae'mo, ani vekamo'mo afo'amo ya'mo aligiya'mofe'mo amagigetao muki ya'amo lagaemo aligunanagi, hu'a hute'a 15 asagauli u'a malaga atale'ne'a kamiti amagi'nae. Hoyamo afo'amo'mo apakaetegamo na agufa kava'mo hugiye. 16 Eno hoya'ale'mo ne'yagaiya vaya'mo kamiti apamagiteno alino mago alu vaya'aina apamigiye, huno hapa pai'nige'a afite'apae'mo, ha'ao, fiku yanageno ani agufa kava'mo lagaetegamo afole aigiye, hu'a ha pai'nageno 17 Yesu'a aulu hapaeno apaketeno'ae'mo, mukufi'mo avo'mo kae male'niya gemo'a haiya agufa aepa'amo hane'niye. Ani gemo'a huno'ae'mo,

yafateti'mo no'mo nekiya vaya'mogimo mago no'mo nekiya yafafe'mo hu'apae'mo afa yafane, hu'a hute'a ali'a yaga au'a atale'nayana ani yafa'mo hogote yafa'mo alino afole aino ate'niye.
18 Haiya vaya'mogimo ani yafate'mo asagau'a ne'aisafigeno aino katali katalu huno apatalegaiya'monanafa ani yafa'mo'a haiya vaya'ai apakufale'mo asagauno aisifigeno aino lata paino aise aise huno atalegaiye, huno hu'niye, huno Yesu'a hapa pai'niye. 19 Ke'aepa gemo avo'mo kae'a ali'a apaya ne'malaya vaya'e mono hu'a ne'apataya vaya'aite'mo yagai'a ne'apataya vaya'mogi'e'mo, ani aeno kalafefa gemo lagaefeke'mo hu'niye, hu'a hute'a ani afina'mo kalavusi hu'a ategefe'mo hu'naya'monanafa afa vaya'aife'mo koli hu'nae.

Takesi monimo amisupiye, hu'a afi ge'naya gemae

(Mt 22:15-22; Mk 12:13-17)

20 Kalavusi hu'a atesaya kavafe'mo yagai'a mai'ne'apae'mo apamasa hisaya vaya'mo ali'a apate'nage'a u'a mai'ne'apae'mo Yesu'a alagepa hu'a e'a mai'nae, huno apakesiyafe'mo aigofe kava'mo hu'a mai'ne'a ge'amo afi'nae. Ge'amo ne'afi'apae'mo, hosu gemo nehisigetae'mo atafauta kalavusi huta ateteta Lomu vekamo yagaino nelateya vekamo avaleta amigune, hu'a hu'nae. 21 Apakaemo, tisao, lagaemo ago kage'nonana lama gemo alagepa huka alika apaya ne'malane. Goti ge'amo akame hisaya kate'mo visaya kavafe'mo lama gekaleti'mo alika apaya ne'malanageta kage'none. 22 Lagaemo Goti ke'aepa ge'amo akame hisunafe'mo takesi monimo gamani vekamo yagaino nelateya vekamo Sisana amisupi o'amisune, hu'a afi ge'nageno 23 humi atesayafe'mo hu'naya gemo afiteno'ae'mo, 24 ani alaga monimo alinitetapa nave liyo. Ani'alaga monile'mo ina la augosa'e agi'e'mo avo'mo kae male'naya agimo hane'niye, huno apafi ge'nige'apae'mo, Sisa agi'e augosa'e'mo hane'niye, hu'a ha pai'nageno'ae'mo, 25 Sisa ya'amo Sisa'mo amitetapa Goti ya'amo Goti'mo amiyo, huno hapa pai'nige'a 26 afite'apae'mo hapau aite'a ge osu'a mai'nae. Apakaemo vaya'ai apaulagale'mo ge'ale'mo hu'a atafau'a ategefe hu'nayana hu'a atafau'a o'ate'nae.

Yesufe'mo vaya'mo falite'a he tisaya kavafe'mo ge hu'a afi ge'naya gemae

(Mt 22:23-33; Mk 12:18-27)

27 Mago vaya'mogi, fali'naya vaya'aife'mo he otigae, hu'a nehaya vaya'ai apaki'apimo Satiyusi mono vaya'moge'a Yesutegamo e'nae. 28 E'a Yesufe'mo, Tisao, Mosese'a lagaefe'mo avo'mo kaeno'ae'mo, mago vekamo'a a'mo aliteno mafa'nemo alino o'ateno falitesigeno'ae'mo konaga'amo'mo ani a kanomo aliteno agae aimu'yale'mo mafa'nemo alino apateno. Fiku yanage'a fali'niya vekamo nofi vaya'amo fali'a hano hugae, huno laha pai'niye. 29 Mago afina'mo seveni'a konagamo mai'nae. Nepu'apimo'a a'mo aliteno mafa'nemo alino o'ateno ataleno falitegeno 30 agana'amo'a kogu'amo aliteno ani kava'mo huno mafa'nemo alino o'ateno fali'niye. 31 Ani kava huno napa tali konaga'amo'a ani a kanomo aliteno fali'niye. Ani kava hu'a seveni'a konagamogimo ani a kanomo alite'a atale'a falite'a alite'a atale'a falite'a hu'naya'monanafa mafa'nemo ali'a o'ate'a fali'nae. 32 Henaga'amo ani a kanomo fali'niye. 33 Seveni'a konagamogimo ani a kanomo ali'naya'mofe'mo fali'nayateti'mo he tisageno'ae'mo ani a kanomo ina late'mo maigiye, hu'a afi ge'nageno'ae'mo, 34 ma mopafi vaya'mogimo a'mo alige a'mafa'nemogimo vele'mo maige nehae. 35 Goti'a mago vaya'aife'mo, saufa afina'mo fali'nayategati'mo he ti'a maisaya vaya'mo mai'nae, huno agesa ne'afiya vaya'mo he tisaya afina'mo a'mo o'alige vele'mo o'maige hugae. 36 Ofali'a enisole vayakana hu'a maisayafeke'mo Goti mafa'ne'amo mai'naya'mofe'mo fali'nayateti'mo halate he tigayana alagi ofaligae. 37 Mosese'a aise yosafi'mo ata le'niya kavafe'mo ava gemo huno avo'mo kae male'niyana fali'naya vaya'mo he tigae, huno avo'mo kae male'niye. Mosese'a huno'ae'mo,

Ala kava ne'mo Emalehamu Goti'amo'mo maige Aisiki Goti'amo'mo maige Yekopu Goti'amo'mo maige huno mai'niye,
huno avo'mo kae male'niye.
38 Agaemo alagi fali'naya vaya'ai Goti'apimo'mo o'mai'nifa afa'a ne'maiya vaya'ai Goti'apimo'mo mai'niye. Muki vaya'amogimo Gotitefe'mo afa'a mai'nae, huno agesa ne'afiye, huno hapa pai'nige'apae'mo 39 mago vaya'mo ke'aepa gemo avo'mo kae'a ali'a apaya ne'malaya vaya'mogimo, Tisao, ge'apile'mo alagepa huka aeka atagaina huka nehane, hu'a ha pai'nae. 40 Apakaemo mago'e hu'a loka hu'a afi gesayafe'mo koli hute'a ge hu'a afi oke'a afa'a mai'nae.

Yesu'a Kalaisi nefe'mo ge huno apafi ge'niya gemae

(Mt 22:41-46; Mk 12:35-37)

41 Yesu'a, haiya agufa kava'mo huno Kalaisi vekamo'a Nevini akamelegati aginago veka'amo maigiye, hu'a nehae. 42 Nevini'a agai'amo Samu mukufi'mo huno'ae'mo,

Ala kava ne'mo'a Ala kava ne'nie'mo, lamaga nahaopale'mo fai maime maime ne'uge'nao kame vayakamo apamagite'na ali'na kaiya afe'alumelaga apatesuge'a maigae,
huno ha pai'niye.
44 Nevini'a ani gee'mo huno'ae'mo, Kalaisi vekae'mo Ala kava ne'nie, huno ha pai'niya'mofe'mo haiya kava huno Kalaisi vekamo'a Nevini akamelegati aginago'amo mai'niye, huno apafi ge'niye.

Yesu'a ke'aepa gemo ali'a apaya ne'malaya vaya'aife'mo hu'niya gemae

(Mt 23:1-36; Mk 12:38-40; Lu 11:37-54)

45 Muki vaya'ai apaulagale'mo ge'amo ne'afiya vaya'aife'mo ina ge huno hapa pai'niye, 46 Ke'aepa gemo avo'mo kae'a ali'a apaya ne'malaya vaya'mogimo hosu kava'mo nehayanagi alagepa hutapa yagaiyo. Apakufamo avaleli'a haisayafe'mo yatala kukenamo ali'a vaite'a umenitata nehaya kavafe'mo hapau'niye. Maketi kumate'mo mai'naya vaya'mogi ge apamamaete'a amuse hu'a ne'apataya kavafeke'mo nehapaiye. Muki mono nopi'e nopi'e'mo hogote siate'mo maige yagita nehayategamo ala apaki vaya'mo ne'maiya yate'mo maige hisayafeke'mo hapau'niye. 47 Apakaemo kogu a'ne'aife'mo humi apatete'a kagemi ya'apimo kumaya alite'a aigofe yatala yatala gemo hu'a nunumu'mo nehae, huno hapa pai'niye.

Copyright information for `KYG