Luke 21

Kogu a kanomo'a ofalinimo male'niya kavafe'mo hu'niya gemae

(Mk 12:41-44)

Yesu'a Yu vaya'ai alopa mono nopi'mo mai'neno'ae'mo alino maku huno apakeyana kagemi ya'apimo hane'niya vaya'mogi ofalini monimo fiku ne'atalaya kesifi'mo male'nageno apake'niye. Mago kogu a kanomo kagemi ya'amo alagi o'male'niya a kanomo'a eno lole asagalifa monimo male'nigeno ageteno'ae'mo, lama gemo lapa nepauve, ani kagemi ya'amo o'male'niya kogu a'mo'a male'niya ofalinimo'a muki vaya'mogi male'naya ofalini monimo ago aeno aga se'niye. Kagemi ya'apimo hane'niya vaya'mogi ali'ya'amo ohane'niya monimo male'naya'monanafa kogu a kanomo'a muki moni'amo ne'ya'amo miya faino nesiya moni'e'mo ago male'niye, huno hapa pai'niye.

Yesu'a alopa mono no'mo he'a halagape vaigae, huno hu'niya gemae

(Mt 24:1-2; Mk 13:1-2)

Mago vaya'mo ge'amo ne'afiya vaya'mogi, alagepa yafa'aletike'mo ki malete'a ofalini ne'malaya konali yateti'mo ali'a hu male'naya kanale no'mo hane'niye, hu'a hu'nageno'ae'mo, hemenimo age'naya note'mo hane'niya yafa'mo akalo akalo huno hane'niyana muki yafa'amo ali'a halagape vai'a ali'a atagu fae'a atalegae, huno hapa pai'nige'apae'mo, Tisao, hainu afina'mo ani kava'mo afole aigiye. Hogoteta na agufa alagena kava'mo agetesunageno'ae'mo afole aigiye, hu'a afi ge'nageno'ae'mo, humi olapatesayafe'mo ehetapiye. Alagepa hutapa yagaiyo. Asole vaya'mogi e'a nagi'nimo aete'apae'mo, Kalaisi vekamo mai'nove, hu'a huge, ani afina'mo ago afole ai'niye, hu'a huge hisagetapae'mo apakame osiyo. Mago vaya'mogi kame nehisaya kavafe'mo apava gemo huli'a ege lusi kaveta hisaya kavafe'mo apava gemo huli'a ege hisagetapae'mo koli osiyo. Ani agufa kavako'mo hogoteno afole aisigetapae'mo hemenimo alagi ago hano hisiya afina'mo hogo nehiye, hutapa osiyo. 10 Mago nofi vaya'mogi alu nofi vaya'mo kame hapaege mago gamani vaya'mogi alu gamani vaya'aina kame hapaege hugae. 11 Muki aupilagamo lusi imima'mo alige kafu hu kava'mo afole aige kaita hapau kava'mo'a aino atagu faeno uneno hisige'apae'mo asole vaya'mo lusi kaita'mo hapauge hugiye. Koku'nate alagena kava'mo agete'apae'mo lusi kava hu'a koli hugae. 12 Ani kava'mo afole o'ai'nisige'apae'mo hogote'a apaini hu'a lapatege kalavusi hu'a lapatege mono nokopi'mo agoti hu'a lapatete'a kalavusi hu'a lapatege hugae. Apakaemo nagi'nilefe'mo lapavaleli e'a ala'apimo yagai'a ne'apataya vaya'aitega'e gamani vaya'aitega'e'mo ali'a he ti'a lapatesagetapae'mo nagae nava gemo faigoko ge'nimo hapa paigae. 14 Lapakaemo hogotetapa lapakesa afitapae'mo nagaemo ge'apile'mo na agufa gemo ae'na atagaina hu'na hapa paiguve, hutapa lapakesa o'afiyo. 15 Nagai'nimo alagepa hu'a afite'a age'naya gemo ali'na lapamisugetapa hapa paisage'a afite'apae'mo getapile'mo afa'a hu'a ae'a ati kae'a ge osugae. 16 Itatapi afotapimogimo lapavaleli'a uge konagatapimogi lapavaleli'a uge vayatapimogi lapavaleli'a uge hu'a lapavaleli u'a agoti hu'a lapatesage'apae'mo mago vaya'amogi lapakaemo lapaesagetapa faligae. 17 Nakame nehaya'mofe'mo muki vaya'mogi apaini hu'a lapategaya'monanafa 18 alagepa hutapa maisageno magoke lapayoka'mo lageso osugiye. 19 Lapakaemo alagepa kate'mo o'ataletapa lokiya vaitapa maisayana maige maige hutapa maisaya ya'mo aligae.

Yesu'a, Yulusalemu taonifi'mo lusi hanageke ya'mo afole aigiye, huno hu'niya gemae

(Mt 24:15-21; Mk 13:14-19)

20 Lapakaemo apakesage'apae'mo ati vaya'mo e'a Yulusalemu taonifi'mo fai'a ku aisagetapa apaketetapae'mo, muki ani taonifi'mo mai'naya vaya'mo hapae'a hano hu'a apatalesaya afina'mo alagi hogo hiye, hutapa lapakesa afiyo. 21 Ani afina'mo Yutiya kotega mai'nisaya vaya'mo apaune hetale'a avelegamo haiyo. Alopa taonifi'mo mai'nisaya vaya'mo atale'a apaune he'a viyo. Malaga mai'nisaya vaya'mogimo Yulusalemu taonifi'mo ohaiyo. 22 Goti mukufi'mo avo'mo kae male'naya gemo afole aisiyafe'mo Goti'a ani afina'mo anona'apilefe'mo lusi kayo'mo apamigiye. 23 Goti'a ani vaya'aife'mo aipamo leno apateteno apakafu kisiya kayo'mo apamigiya'mofe'mo vaehae, apaipagu'e mai'nisaya a'ne'e mafa'nemo nu ne'apamisaya a'ne'efe'mo nahau hu'na ne'apatove. 24 Ati vaya'mogimo mago vaya'amo naipeleti'mo lugo'apimo he'a hatagaute'a mago vaya'amo kalavusi hu'a apatete'a muki nofi vaya'aitegamo apavaleli u'a apategae. Alu nofi vaya'mogimo e'a Yulusalemu taonifi'mo kame hute'a ali'a hosu hu'a ateme ateme ne'visageno kana'apimo alagi hano hugiye. 25 Koku'napi'mo alagena kava'mo yege lenagi kai lenagi kanefi tenagi huno aeto aeto agufa kava'mo afole aigiye. Solovala ani'mo'a aino holakau holakau huno uneno nehisige'apae'mo muki kotegamo mai'naya vaya'mogi haiya kava hisune, hu'a hute'a lusi kava hu'a koli hugae. 26 Koku'napi mai'naya apaune vaya'mo lokiya'apimo aino atagu faisige'apae'mo, na agufa kava'mo ma mopafi'mo afole aigefe nehifi, hu'a apakesa afite'apae'mo fali'naya vayakana hu'a maigae. 27 Ani kava'mo hutesigeno'ae'mo Vemo Mafa'nemo'a hiyate'mo himamu'a'e lusi ha le konali ya'a'e'mo eminesige'a agegae. 28 Ani kava'mo aepa faino afole aisigetapae'mo hatu maeno lapatesiya afina'mo alagi hogo hugiya'mofe'mo alita maku hutapa agetetapae'mo lapamogaga aiyo.

29 Agaemo aeno kalafefa gemo huno hapa paino'ae'mo, lapakaemo fiki yosa'e muki alu yosale'e'mo ageyo. 30 Saufa anupamo malegetapa agetetapae'mo, ko'mo ne'aiya afina'mo alagi hogo hiye, hutapa nehae. 31 Ani kava huno ani kava'mo afole aisigetapa agetetapae'mo, Goti'a yagaino apatesiya afina'mo alagi ago hogo hiye, hutapa hugae. 32 Lama gemo lapa nepauve, hemeni afina'mo mai'nisaya vaya'mo ofali'a afa'a mai'nisageno muki ani agufa kava'mo afole aigiye. 33 Koku'na'e ma mopa'e'mo hano hugiya'monanafa ge'nimo alagi hano osuno afa'a hanege hanege huno hanegaiye.

34 Lapakaitapile'mo alagepa huta yagaitapa lapateyo. Fiku yanagetapa lusi yagita huge lokiya ani'mo netetapa negi nagi gemo huge ma mopafi yafe'mo lapakesa ala'amo afige lapausoli huge nehisageno mani afina'mo malage huno kesi kateti'mo afole aigiye. 35 Ma mopafi muki haopalegamo mai'naya vaya'aitegamo ane'ai'mo'a yagagafamo ne'atafaiya agufa kavakana huno apatafaugiye. 36 Inagi muki afina'mo kava yagaitapa maiyo. Muki afole aisiya kava'amo aetapa kasalo paetapa Vemo Mafa'nemo aulagale'mo he titapa maisayafe'mo nunumu hiyo, huno hapa pai'niye.

37 Muki afina'ae afina'ae'mo alopa mono nopi'mo alino apaya malege malege huno mai'nigeno hani'mo nehigeno'ae'mo Alifi'aepa avelegamo uno haino havaetale havaetale huno mai'niye. 38 Muki afina'mo kotilamiyapi'mo muki vaya'mogimo ge'amo afisayafe'mo agaetegamo ege ege hu'a mai'nae.

Copyright information for `KYG