Luke 23

Yesu'mo Pailati aulagale'mo agoti hu'a ate'naya gemae

(Mt 27:1-2,11-14; Mk 15:1-5; Yo 18:28-38)

Muki kanisole vaya'amogi he ti'a avaleli'a Pailatitegamo u'nae. Apakaemo aepa fai'a agoti hu'a ate'apae'mo, ani vekamo'a, Gamani vaya'ai gemo o'afiyo. Alatapimo Sisa'mo takesi monimo o'amiyo. Nagaemo Kalaisi vekamo alatapimo kini vekamo mai'nove, huno laha pai'nigeta afi'none, hu'a ha pai'nageno Pailati'a, Yu vaya'aite'mo ne'yagaina ala kini veka'apimo mai'napiye, huno afi ge'nigeno'ae'mo, he, kagaemo ani gemo alagi ago hane, huno ha pai'niye. Pailati'a mono hu'a ne'apataya vaya'aite'mo yagai'a ne'apataya vaya'e muki vaya'efe'mo, agoti hu'na atesuva kava'mo o'agove, huno hapa pai'nige'apae'mo lokiya gefati'mo hu'apae'mo, Galeliya kotegati'mo aepa faino alino apaya maleme maleme eno manile Yutiya kotega'e'mo alino apaya maleno'ae'mo muki vaya'mogi hosu kava'mo hisayafeke'mo alino he tino ne'apate, hu'a ha pai'nae.

Heloti aulagale'mo agoti hu'a ate'naya gemae

Pailati'a ani gemo afiteno'ae'mo, Galeliya kotega vekamo mai'nifiye, huno apafi ge'nige'apae'mo, he, hu'a ha pai'nageno'ae'mo, Heloti'a yagaino ne'apateya kote vekamo mai'niye, huno huteno Helotitegamo alino ate'nigeno u'niye. Ani afina'mo Heloti'a Yulusalemu taonifi'mo eno mai'niye. Heloti'a Yesufe'mo ava gemo hu'nageno afiteno'ae'mo, mago no'agaya agufa aune kava'mo hisigeno agesiyafe'mo hau'nigeno yatala afina'mo agava huno mai'niya'mofe'mo Yesu'mo ageteno'ae'mo amogaga ai'niye. Inagi Yesufe'mo loka huno afi ge afi ge hu'niya'monanafa ge'ale'mo aeno atagaina huno ge osu'niye. 10 Mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'mogi'e'mo he ti'a lokiya gefati'mo hu'apae'mo, ma agufa kava'mo hu'niye ina agufa kava'mo hu'niye, hu'a hosu faigoko gemo hu'a ate'nae. 11 Heloti'e ati vaya'amogi'e'mo agi'ale'mo ali'a afepi atege hu'a faipa hu'a atege hute'a alagepa kukenamo ali'a vai'a atete'apae'mo Heloti'a halate alino ate'nigeno Pailatitegamo u'niye. 12 Hogote'ana Heloti'e Pailati'e'mo kame kame hu'ana mai'na'a'monanafa ani afina'mo ali'ana konaga he'na'ae.

Pailati'a malipu yosale'mo nili aigeno falino, huno hapa pai'niya gemae

(Mt 27:15-26; Mk 15:6-15; Yo 18:39—19:16)

13 Pailati'a mono hu'a ne'apataya vaya'aite'mo yagai'a ne'apataya vaya'e Yu vaya'aite'mo yagai'a ne'apataya vaya'efe'mo ge hu'nige'apae'mo e'nageno hapa paino'ae'mo, 14 ani vekamo nagaetegamo avalelitetapa agoti hutapa atetetapae'mo, agaemo vaya'aife'mo, gamani vaya'ai gemo o'afiyo, huno hapa paiteno apakesa nefaiye, hutapa naha pai'nage'nae'mo lapaulagale'mo ago ali'na fako hu'na ate'nove. Afiyo, hosu kava'mo hu'niye, hutapa hosu faigoko gemo hu'naya'monanafa ani hosu kava'mo hu'niye, hu'na o'agove. 15 Ani kava huno Heloti'a hosu kava'amo o'ageno alino ate'nigeno halate aino atagi neno lagaetegamo e'niye. Afiyo, kamiti amagisugeno falisiya agufa kava'mo osu'niya'mofe'mo 16 nofi kayoteti'mo amagite'na afa atesugeno ugiye, huno hapa pai'niye. 17 Pailati'a hopa afina'mo kalavusifi'mo mai'naya vayapati'mo magoke vekamo hatu maeno atesigeno visiya vekamo mai'niye. 18 Mai'niya'monanafa muki vaya'amogi magokepi'mo ae'a lago hu'a alopa gefati'mo hu'apae'mo, ani vekamo amagiyo, amagiyo, Malamasi'a hatu maeka ategeno lagaetegamo eno, hu'a hu'nae. 19 Malamasi'a ani taonifi'mo gamani vaya'aina apamagi'a ali'a hapafaitalegefe hu'naya afina'mo mago vekamo kamiti amagi'nigeno fali'niya'mofe'mo kalavusi hu'a ate'nae. 20 Pailati'a Yesu'mo afa'a atesiyafe'mo huno'ae'mo halate ge huno apafi ge'niya'monanafa 21 malipu yosale'mo nili aiyo, nili aiyo, hu'a hu'nae. 22 Pailati'a halate napa tali afina'mo, na agufa kava'mo hu'nigetapaene. Haiya agufa hosu kava'mo hu'niye. Amagisugeno falisiya agufa hosu kava'amo o'agova'mofe'mo nofi kayoteti'mo amagite'na afa'a atesugeno ugiye, huno hapa pai'niya'monanafa 23 mago'e mago'e hu'a alopa gefati'mo magokepi'mo hu'a ae'a lago hu'a hu'apae'mo, malipu yosale'mo nili aiyo, nili aiyo, hu'a huge huge hu'a mai'naya gemo'mo Pailati gemo ago hu'a ae'a ati kae'naya'mofe'mo 24 Pailati'a ge'apimo afiteno hapau'niya kava'mo hu'niye. 25 Gamani vaya'aina apamagino alino hapa faitalesiyafe'mo hu'niya afina'mo mago vekamo kamiti amagi'nigeno fali'niya'mofe'mo kalavusi hu'a ate'naya vekae'mo ato hu'a ha pai'naya vekamo hatu maeno ateteno hapau'niya kava'mo akame huno Yesufe'mo malipu yosale'mo nili aigeno falino, huno ati vaya'aife'mo hapa paiteno avaleno apami'niye.

Malipu yosale'mo nili ai'naya gemae

(Mt 27:32-44; Mk 15:21-32; Yo 19:17-27)

26 Avaleli'a ne'vageno'ae'mo Saimoni'a Sailini taonifi vekamo kahaufilagati'mo ne'ege'a fotu nehu'apae'mo atafau'ne'a malipu yosamo ali'a agi'nale'mo kofi'a ate'nageno alino kofilino Yesu akame huno u'niye. 27 Asole vaya'mo akame hu'a u'nage'apae'mo a'ne anaga'mogimo yulagefa aige avi'ya huge huli'a akame hu'a u'nae. 28 Yesu'a aino afe leno'ae'mo, Yulusalemu a'ne anagane, avi'ya hutapa o'nateyo. Lapakaitapi'e mafa'netapi'efeke'mo avi'ya hutapa lapateyo. 29 Na agufa kava'mo hugiya'mofe'mae. Afiyo, mago afina'mo afole aisige'apae'mo, anamo a'negi mafa'ne ali'a no'apataya a'negi mafa'nemo nu no'apamiya a'negi hu'a alagepa hu'a ne'maiye, hu'a hugae. 30 Ani afina'moalopa avee'mo, aika nakupaeka emikeka lagufale'mo asagauka aigeta falino. Aise avee'mo, eka aeka lati kao, hu'a ha paigae. 31 Hegafa yosale'mo ani kava'mo nehaya'mofe'mo vai'niya yosale'mo na agufa kava'mo hugae, huno hapa pai'niye.

32 Malipu yosale'mo agae'e'mo magokepi nili aite'a ali'a he ti'a anatesayafe'mo ke'aepa gemo amagi'ana atale'na'a vekala'e'mo apavaleli'a u'nae. 33 Mago aupilaga agi'amo Anu Ayamufagayagamo u'a ava'yi hute'a Yesu'e gamani ke'aepa gemo amagi'ana atale'na'a vekala'e'mo malipu yosale'mo nili aite'a ali'a he ti'a apate'nae. Mago vekamo ali'a lamaga haopale'mo he ti'a atete'a mago vekamo ali'a hoga haopale'mo he ti'a ate'nae. 34 Yesu'a, Afo, hu'na, na agufa kava'mo nehupi hu'a o'age'naya'mofe'mo hosu kava'mo anona'apimo afa'a alika atalo, huno nunumu'mo hu'niye. Kukena'amo ali'a fako hu male'ne'a yafateti'mo yokalo le'nae. 35 Muki ve a'nemo he ti'a mai'ne'a aulu he'a age'a mai'nae. Yagai'a ne'apataya vaya'e'mo magokepi lokae'a mai'ne'a hu'apae'mo, vaya'ai apakufamo alino katino apate'niye. Kalaisi vekamo Goti'a lekana paino ate'niya vekamo mai'nisiyana agai'a agufamo afa'a alino katino ategaiye, hu'a hute'a hu'a faipa hu'a ate'nae. 36 Ani kava hu'a ati vaya'mogi e'a atu ofa nofi alagafati ani'mo ali'a amite'apae'mo, 37 Yu vaya'aite'mo ala kini veka'apimo mai'nisanana kagaika kagufamo alika katika kato, hu'a hute'a hu'a faipa hu'a ate'nae.

38 Avo'mo kaeno'ae'mo,

mani vekamo Yu vaya'aite'mo ala kini veka'apimo'mae,

huno avo'mo kaeteno Yesu agenopalegamo malipu yosale'mo nili ai male'niye. Ani avo'mo kae'niya gemo Galiki gefati'mo kaege Latini gefati'mo kaege Himulu gefati'mo kaege huno avo'mo kae male'niye.

Mago vekamo ke'aepa gemo amagino atale'niya vekamo malipu yosale'mo Yesu'e'mo nili aite'a ali'a he ti'a ate'naya vekamo'a Yesufe'mo agesa afino fatago hu'niya gemae

39 Mago vekamo ke'aepa gemo amagino atale'niya vekamo malipu yosale'mo Yesu'e'mo nili aite'a ali'a he ti'a ate'naya vekamo'a ina ge hu'niye, Kalaisi vekamo mai'nisanana kagaika'e la'agae'e'mo lahau vaiyo, huno huteno huno faipa huno ate'niye. 40 Ate'nigeno mago vekamo'mo ge hauteno'ae'mo, agoti hu'a latete'apae'mo, hosu kava'mo hu'nayanage'a afa'a faligae, hu'a laha pai'nagetae'mo magokepi falisunafe'mo mai'nona'mofe'mo Gotife'mo koli nosapiye. 41 La'agaemo hosu kava'mo hu'no'a'mofe'mo anonati'alefe'mo kayo'mo nela'amiya'monanafa mani vekamo magoke hosu kava'mo alagi osu'niye, huno ha paiteno'ae'mo 42 Yesufe'mo, Ala kava nene, vaya'aite'mo alagi yagaika apatesana himamukamo alisana afina'mo nagaefe'mo kagesa afika ho huvo, huno ha pai'nigeno'ae'mo, 43 lama gemo kaha nepauve, hemenitomo Palanaisi kote'mo haisanageta'a nagae'e'mo maigu'ae, huno ha pai'niye.

Yesu'a fali'niya gemae

(Mt 27:45-56; Mk 15:33-41; Yo 19:28-30)

44 Felugakuku'mo muki ko'alegamo hani hulinuno une'mo koti'niye. 45 Yegemo'mo aeno ha neleya ya'amo hano hu'nigeno'ae'mo alopa mono nopi'mo alapa'age lavolavo kitamo aeno apake aino lole hu'nigeno'ae'mo 46 Yesu'a alopa gefati'mo huno'ae'mo,afo'nimogae, hu'na, naune'name'mo ali'na kayapi'mo nekamuve, huno huteno fali'niye. 47 Ati vaya'aite'mo yagaino ne'apateya vekamo'a ani gemo afiteno'ae'mo, lama gemo nehuve, mani vekamo fatago vekamo mai'niye, huno hapa paiteno Goti agi'ale'mo alino asaga huno ate'niye.

48 Muki vaya'amogi muki kava'mo hisage'a agesayafe'mo e'a ali'a anupa hu'a mai'naya vaya'mogimo age'nage'a nili ai'nageno fali'nige'a agete'a atale'a hapaifi'yamo amagite'a no'apilega u'nae. 49 Yesu ao vaya'e Galeliya kotegati'mo magokepi lokae'a akame hu'a e'naya a'nemogi'e'mo afagi'ale'mo he ti'a mai'ne'a aulu he'a age'nae.

Yosefe'a Yesu agufa'amo alinino uno yafakapi'mo kino ate'niya gemae

(Mt 27:57-61; Mk 15:42-47; Yo 19:38-42)

50 Mago kanisole vekamo Yosefe'a Alamatiya taonimo Yu vaya'ai taonifi vekamo alagepa fatago vekamo mai'niye. 51 Agaemo Goti'a yagaino apatesiya kava'mo afole aisiya afinafeke'mo agava mai'niye. Agaemo alu kanisole vaya'mogi vege hute'a hu'naya kavatefe'mo, he kanalene, huno osu'niye. 52 Agaemo uno Pailatife'mo, Yesu agufa'amo aligesuve, huno afi ge'niye. 53 He, huno ha pai'nigeno eno malipu yosaleti'mo Yesu agufa'amo aino akailino emineno male'neno alagepa yaveyave lavolavoleti'mo agufale'mo hayaeno ateteno yafapi'mo ago kafi male'naya yafa kapi'mo mago vaya'mo ki'a o'apate'naya yafakapi'mo alinino uno kino ate'niye.

54 Ani afina'mo ne'ya'mo nesaya ya'mo ali'a alu ne'aiya afina'mogeno Sapati afina'mo ago afole aigefe hu'niye. 55 A'ne anaga'mo Galeliya kotegati Yesu'e'mo magokepi lokae'a e'naya a'nemogi Yosefe'a akame hu'a u'a agayana yafa ka'mo hane'nigeno Yesu kefa'amo kino ate'nige'a agete'apae'mo 56 atale'a no'apilega u'a alagepa atumo ne'aiya malasini'e uveli'e'mo alo hute'a Sapati afina'mo ke'aepa gemo akame hu'a mai'a falu hu'nae.

Copyright information for `KYG