Luke 24

Yesu'a ago he ti'niya gemae

(Mt 28:1-10; Mk 16:1-8; Yo 20:1-10)

Satepi'mo hogote afina'mo kotilamiyapi'mo a'ne anaga'mogi alagepa atumo ne'aiya malasinimo alo hu'naya malasinimo alini u'a agayana ani yafa'mo ago alino heleve huno atale'nigeno yafa ka'mo aka hu'nige'a agete'a u'a yafakapi'mo hai'a agayana kefa'amo ohane'nige'a age'nae. Na kava hu'nifi, hute'a apakesa ala'amo ne'afige'anae'mo alave alave nehiya kukenamo vailifa vekala'mo hapaopale'mo afole aite'ana he ti'ana mai'na'age'apae'mo koli hute'a ape hu'a mai'nage'anae'mo, na kava higetapa afa'a mai'niya vekamo kanolule'mo etapa kahauya nehae. Manifi'mo o'mai'nifa ago he tino u'niye. Galeliya kotegamo mai'neno'ae'mo ago lapa paino'ae'mo, Vemo Mafa'nemo avaleli u'a hosu vaya'ai apayapi'mo atesage'apae'mo malipu yosale'mo nili aite'a ali'a he ti'a atesageno faliteno lole'e mago'e afina'mo kanolufi'mo maiteno ago he tigiye, huno hu'niya gee'mo lapakesa afitapa ho hiyo, hu'ana hapa pai'na'age'apae'mo apakesa afi'a ho hu'nae. Yafa ka'mo atale u'a leveni'a vaya'e muki vaya'efe'mo ani kavafe'mo ava gemo hu'a hapa pai'nae. 10 Maliya'a Maganala kotega anagi Yovana'agi Maliya Yemisi ita'amo'agi mago'e a'ne anaganagi hu'a ani gemo apa vaya'aife'mo hapa pai'nage'a 11 afite'apae'mo afa'a aigofe nehae, hu'a apakesa afi'nae. 12 Apakesa afi'naya'monanafa Pita'a nagu nagu huno uno yafa kapi'mo ape huno ageyana hayaeno ate'niya lavolavo'age'mo hane'nigeno ageteno ataleno ne'eno'ae'mo, haiya agufa kava'mo hu'nifi, huno agesa afime afime no'alega u'niye.

Lole vekala'mo Emeyasi kotega ne'vaya kate'mo ne'va'ageno'ae'mo Yesu'a afole ai'niya gemae

(Mk 16:12-13)

13 Ani afina'mo ge'amo ne'afi'a vekala'mo Emeyasi taonifi'mo ugefe'mo u'na'ae. Yulusalemu taonifati'mo Emeyasi taonimo ne'vaya ka'mo aise afagi'ale'mo ina kava'mo huno leveni kilomitamo hane'niye. 14 Anakaemo ne'u'anae'mo afole ai'niya kavafe'mo ge huge afige hume hume ne'va'ageno 15 Yesu'a agai'age'mo eno anakame huno anakae'e'mo u'niye. 16 Anaulagale'mo mago ya'mo'a ago aino ati kae'nige'ana Yesu'mae, hu'ana o'age'na'ae. 17 Yesu'a, na agufa kavafe'mo ge huge afige hume hume ne'va'ae, huno anafi ge'nige'anae'mo anile'mo he ti'ana mai'ne'anae'mo anaipamo'mo kana huge hosu anaugosamo kalige hu'na'ae. 18 Ani vekalapati'mo mago vekamo agi'amo Kiliyopasi'a ge'ale'mo aeno atagaina huno ha paino'ae'mo, muki vaya'mo Yulusalemu taonifi'mo ete ete hu'a mai'naya vaya'mogi hemenimo afole ai'niya kavafe'mo ava gemo hu'a ne'afiya'monanafa kagaemo o'afika mai'napiye, huno afi ge'nigeno'ae'mo, 19 na agufa kava'mo afole ai'niye, huno anafi ge'nige'anae'mo, Yesu'a Nasalasa vekamo Gotitegati gemo alinino eno aeno hakalo huno hapa nepaiya vekamo mai'neno Goti aulagale'e muki vaya'ai apaulagale'e'mo himamu'aleti'mo lokiya kava'mo huge lokiya gemo hapa paige huno mai'niye. 20 Mai'nige'apae'mo mono hu'a ne'apataya vaya'aite'mo yagai'a ne'apataya vaya'e yagai'a nelataya vaya'mogi'e'mo kamiti amagisayafe'mo gamani vaya'aitegamo avaleli u'a atete'a malipu yosale'mo nili aite'a ali'a he ti'a ate'nae. 21 Lagaemo, ani vekamo'a Isaleli vaya'mogita hatu maeno lategaiye, huta lagesa afitetae'mo laipafati'mo lamogaga ai'niye. Ani kava'mo ago afole ai'nigeno lole'e mago'e afina'mo ago u'niye. 22 Mago lagae'e'mo mai'naya a'nemogimo mago gemo laha pai'nagetae'mo lahau ai'none. 23 Apakaemo kotilamiyapi'mo yafakapi'mo u'a agayana kefa'amo ohane'nige'a agete'apae'mo atale'a ai'a atagi ne'e'apae'mo, enisole vekala'mo anake'nonage'anae'mo, kanolufati'mo ago he tino afa'a mai'niye, hu'ana laha pai'na'ae, hu'a laha pai'nae. 24 Lagaepati'mo mago lole vekala'mo u'ana a'ne anaga'mogi laha pai'naya kavafe'mo yafakapi'mo age'na'ana Yesu kefa'amo o'age'na'ae, hu'ana ha pai'na'ageno'ae'mo, 25 O negi vekalane, hu'na, lanakaemo muki ge'amo Gotitegati gemo alini e'a ae'a hakalo hu'a hapa pai'naya vaya'mogi hu'naya gee'mo lanakesa afitana fatago hisa'afe'mo ago lanake kani'nigetana vase vase hutana ne'afi'ae. 26 Apakaemo, Kalaisi vekamo hogoteno agafu kitesigeno'aeke'mo ala agi'amo aligiye, hu'a avo'mo kae male'naya gemo o'afi'na'afiye. 27 Agaemo Mosese'a agaefe'mo ava gemo huno avo'mo kae male'niya gemo aepa faiteno aepa'amo alino anaya male'niye. Ani kava'mo huno muki vaya'mo Gotitegati gemo alini e'a ae'a hakalo hu'a hapa nepaiya vaya'mogimo agaefe'mo ava gemo hu'naya gemo aepa'amo alino anaya maleme maleme u'niye. 28 Anakaemo uta'a maigu'ae, hu'ana hu'na'a taonimo haopale'mo u'a ava'yi hute'apae'mo Yesu'a ago anataleno uno afagi hugekana hu'nige'anae'mo 29 lokiya gefati'mo hu'anae'mo, hemenimo ago uneti'nigeno hani hugefe hiyanagi ataleka eka la'agae'e'mo maiyo, hu'ana ha pai'na'ageno eno nopi'mo haino anakae'e'mo lokaeno mai'niye. 30 Hi'yalamute'mo anakae'e'mo magokepi lokaeno mai'neno'ae'mo peleti mayamo alino nunumu'mo huno hao ke heteno akaya heno anami'niye. 31 Anami'nigeno'ae'mo anaulagamo ayake'nige'ana Yesu'mae, hu'ana ageta'ageno malage huno alino lageso hu'nige'ana mago'e hu'ana o'age'na'ae.

32 Anakai'animo, kategamo ne'etae'mo Goti Mukufati gemo aepa'amo alino la'aya ne'malegeno'ae'mo la'aipafi'mo haga'age gemo afole ai'nigeno la'aipamo'mo falu huteno la'amogaga ai'niye, hu'ana hu'na'ae. 33 Hute'anae'mo malage hu'ana he ti'ana Yulusalemu taonifi'mo ai'ana atagi ne'ana e'na'ae. E'ana ava'yi hute'ana apake'na'ana leveni'a vaya'e mago apakae'e'mo lokae'a mai'naya vaya'e'mo ali'a anupa hu'a mai'ne'apae'mo 34 apakaemo, alagi lama ge hu'a Ala kava ne'mo ago he ti'niye. He titeno'ae'mo Saimonitegamo ago afole ai'nigeno age'niye, hu'a hana pai'nage'anae'mo 35 kategamo afole ai'niya kavafe'mo ava gemo huge peleti mayamo alino akaya he'nige'ana Yesu'mae, hu'ana age'na'a kavafe'mo ava gemo huge hu'ana hapa pai'na'ae.

Yesu'a ge'amo ne'afiya vaya'ai folaga'apifi'mo afole ai'nige'a age'naya gemae

(Mt 28:16-20; Mk 16:14-18; Yo 20:19-23)

36 Ani gemo hapa nepai'ageno'ae'mo Yesu'a agai'age'mo folaga'apifati'mo afole aiteno'ae'mo, lapaipamo'mo falu hino, huno hapa pai'nige'apae'mo, 37 afene, hu'a hute'a hapau aite'a atete hu'nae. 38 Agaemo, na kava higetapae'mo lapaipamo'mo kana hu'nigetapa lole lapakesa ne'afiye. 39 Nayapi'e naiyafi'e'mo eta agetetapa name alitetapae'mo, agaemae, hutapa nageyo. Amega nagufa'e nayamufa'ni'e'mo hane'niyana afe'mo'a amega agufa'e ayamufa'e'mo ani kava huno ohane'niye, huno hapa paiteno 40 aya'e aiya'e'mo alino apave li'nige'a 41 agete'apae'mo lusi kava hu'a apamogaga ai'naya'monanafa apakesa afi'a fatago osu'nafa lole apakesa afi'nae. Agaemo, mago ne'ya'mo manile hane'nifiye, huno apafi ge'nige'apae'mo 42 mago kae malefa noyame'e kevekeve anu'e'mo ali'a ami'nageno 43 apaulagale'mo alino ne'niye. 44 Neteno'ae'mo, mani kavafe'mo lapakae'e'mo mai'ne'nae'mo ago lapa pai'nae'mo, muki kavafe'mo nava gemo hu'a avo'mo kae male'naya gemo afole aigiye. Mosese'a avo'mo kae male'niya nava gegi Gotitegati gemo alini e'a ae'a hakalo hu'a hapa nepaiya vaya'mogi avo'mo kae male'naya nava gegi Samu gefi'mo avo'mo kae male'naya nava gemogi huno afole aigiye, 45 huno apakesa huno halo aino hapa paiteno alino apaya male'niye. 46 Huno hapa paiteno'ae'mo, Kalaisi vekamo agafu kisigeno faliteno'ae'mo napa tali afina'mo kanolufati'mo he tigiye. 47 He tino mai'nisige'apae'mo Yulusalemu taonifati'mo aepa faite'a hapa pai'apae'mo, lapaipamo alita afe legeno'ao Goti'a Kalaisi agi'aleti'mo hosu kavatapimo alino ataleno, hu'a hapa paite'apae'mo ani agufa gemo hu'a muki nofi vaya'aife'mo ae'a hakalo hu'a hapa paisaya kava'mo hane'niye, hu'a avo'mo kae male'nae. 48 Lapakaemo mani kava'mo ago age'naya'mofe'mo ani kavafe'mo faigoko ge'nimo hutapa hapa paisaya vaya'mo mai'nae. 49 Afiyo, Afo'nimo'mo, Naune'name'mo ali'na lapamiguve, huno lapa pai'niyanage'na Goti Auneme'amo ali'na atesugeno lapakaetegamo emi'negaiye. Emi'negaiya'monanafa utapa Yulusalemu taonifike'mo hogotetapa agava maime maime ne'vigeno'ao Goti Auneme'amo'mo emineno lokiya vaino lapategaiye, huno hapa pai'niye.

Goti'a Yesu'mo halate koku'napi'mo avalelino hai'niya gemae

(Mk 16:19-20; Ap 1:9-12)

50 Agaemo apavalelino Metani taoni haopalegamo uno ava'yi huteno aya'mo alino asagauno aeno hayo hu'neno'ae'mo, Goti'a alagepa huno lapa maeno, 51 huno hapa nepaigeno'ae'mo Goti'a koku'napi'mo avalelino hai'niye. 52 Nehaige'apae'mo agaefe'mo mono hute'a ai'a atagi ne'a Yulusalemu taonifi'mo ne'u'apae'mo lusi kava hu'a apamogaga aime aime u'nae. 53 Mai'ne'apae'mo muki afina'mo alopa mono nopi'mo hai'a Goti agi'ale'mo ali'a asaga hu'a atege atege hu'a mai'nae. He, lama ge.

Copyright information for `KYG