Luke 6

Sapati afina'mo nehaya kavafe'mo hu'niya gemae

(Mt 12:1-8; Mk 2:23-28)

Mago Sapati afina'mo Yesu'e ge'amo ne'afiya vaya'e'mo viti hoya folagapi'mo ne'u'apae'mo ge'amo ne'afiya vaya'mogi viti alagamo lagi'a haleti'ya'amo apaya he'a hale'a atalete'a neme neme u'nae. Ne'vage'apae'mo mago Falasi vaya'mogi apakete'apae'mo, na kava higetapa Sapati afinafe'mo ani agufa kava'mo osiyo, huno ke'aepa gemo'a hu'niya kava'mo nehae, hu'a hapa pai'nageno Yesu'a, laginago vekamo Nevini'a hu'niya kavafe'mo ava gemo lekana paitapa o'afi'nafiye. Nevini'e magokepi lokae'a mai'naya vaya'e'mo apaka te'nigeno'ae'mo Goti mono nopi'mo haino afa vaya'mogi no'nafa mono hu'a ne'apataya vaya'amogige'mo ne'naya peleti mayamo Goti aulagale'mo male'naya peleti mayamo alino neteno agae'e'mo lokae'a mai'naya vaya'aina alino apami'niye. Vemo Mafa'nemo'a Sapati afinate'e'mo ne'yagaiya vekamo mai'niye, huno hapa pai'niye.

Sapati afina'mo Yesu'a aya'mo kalage ki'niya vekamo alino api aino ate'niya gemae

(Mt 12:9-14; Mk 3:1-6)

Mago Sapati afina'mo mago vekamo aya'mo kalage ki'niya vekamo mono nopi'mo mai'nigeno Yesu'a haino alino apaya male'niye. Ke'aepa gemo avo'mo kae'a ali'a apaya ne'malaya vaya'e Falasi vaya'mogi'e'mo hosu kava'mo nehiye, hu'a hisaya kafe'mo kahauya hu'a agesayafe'mo yagai'a mai'nae. Agete'apae'mo, Sapati afina'mo alino api aino atesifigetae, hu'a hute'a agava mai'nae. Yesu'a apaipafi'mo ageteno aya'mo kalage ki'niya vekae'mo, eka male'mo he tika maiyo, huno ha pai'nigeno eno haopale'mo he tino mai'niye. Yesu'a apakaefe'mo, Sapati afina'mo Goti ke'aepa ge'amo akame hisayafe'mo na agufa kava'mo hane'niye. Vaya'mo ali'a alagepa hu'a apatesaya kavapi ali'a hosu hu'a apatesaya kava'mo hane'niye. Apakufamo ali'a kati'a apatesaya kavapi vaya'mo hapaesaya kava'mo hane'niye, huno apafi ge'niye. 10 Aulu hapaeno apaketeno agaefe'mo, kaya'mo aeka hayo huvo, huno ha pai'nigeno aya'mo aeno hayo hu'nigeno'ae'mo afa aya'mo alino hamale'niye. 11 Apaipamo lusi kava huno le'nige'apae'mo, agaetegamo na agufa kava'mo hisune, hu'a hute'a ge huge afige hu'a mai'nae.

Yesu'a apa vaya'amo lekana paino apate'niya gemae

(Mt 10:1-4; Mk 3:13-19)

12 Mago afina'mo Yesu'a nunumu'mo hisiyafe'mo avele'mo haino ani hani'ilagamo Gotife'mo nunumu'mo huge huge nehigeno 13 koti'nigeno ge'amo ne'afiya vaya'aife'mo ge hu'nige'a e'nageno apakaepati'mo tuolofu'a vaya'mo lekana paino apateteno apaki'apimo apa vayane, huno apate'niye. 14 Ani vaya'ai apaki'apimae. Saimonife'mo Yesu'a saufa agi'amo Pita'ae, huno ate'niya vekagi agana'amo E'nalu'agi Yemisi'agi Yoni'agi Filipi'agi Matalomiyu'agi 15 Matiyu'agi Tomasi'agi Afiyasi mafa'nemo Yemisi'agi Saimoni'a ayamufa vekae, hu'a agi ae'naya vekagi 16 Yemisi mafa'ne'amo Yutasi'agi Isakaliyoti kotega vekamo Yutasi'a kutulu ya'mo ali'niya vekagi hu'a mai'nae.

Yesu'a asole vaya'mo alino alagepa huno apate'niya gemae

(Mt 4:24-25; Mk 3:7-12)

17 Aveleti'mo Yesu'e apakae'e'mo emi e'a otule'mo he ti'a mai'nae. Asole vaya'mo ge'amo ne'afiya vayanagi muki Yutiya haopalegati'mo ege Yulusalemu taonifati'mo ege ani agi'nale Taiya taonifati'e Saitoni taonifati'e'mo ege hu'a e'a mai'nae. Ge'amo afisayafe'mo ege kaita'apimo alino alagepa huno apatesiyafe'mo ege hu'a e'a mai'nae. 18 Hosu apaune vaya'mo vaya'ai apaipafi'mo mai'ne'a ali'a hosu hu'a ne'apataya apaune vaya'mo alino hapafaino apatale'niye. 19 Ame ali'nageno himamu'amo u'nigeno alino alagepa huno apate'niya'mofe'mo ame alisayafe'mo hu'nae.

Alagepa hu'a ne'maiya vaya'e alagepa hu'a no'maiya vaya'efe'mo hu'niya gemae

(Mt 5:1-12)

20 Yesu'a alino maku huno apakeyana ge'amo ne'afiya vaya'mo mai'nageno apaketeno'ae'mo, kagemi yatapimo o'male'nisaya vaya'mogitapamo Goti'a yagaino ne'apateya kegi'yafi'mo haitapa mai'nageno muki ya'amo lapakaitapi ya'mo hane'niya'mofe'mo Goti aulagale'mo alagepa hutapa mai'nayanagetapa afa'a lapamogaga aigae. 21 Hemenimo lapaka netesiya vaya'mogitapa henaga'amo lusi ne'ya'mo netapa lapamu hugaya'mofe'mo Goti aulagale'mo alagepa hutapa mai'nayanagetapa afa'a lapamogaga aigae. Hemenimo avi'ya'mo nehaya vaya'mogitapa henaga'amo kigi hugaya'mofe'mo Goti aulagale'mo alagepa hutapa mai'nayanagetapa afa'a lapamogaga aigae. 22 Vemo mafa'nemo akame nehaya'mofe'mo hosu apaipa kali'a lapatege ali'a lapafai'a lapatalege hu'a faipa hu'a lapatete'apae'mo lapakitapile'mo ali'a afepi lapatege hugaya'mofe'mo Goti aulagale'mo alagepa hutapa mai'nayanagetapa afa'a lapamogaga aigae. 23 Ani agufa kava'mo lapakaetegamo hisaya afina'mo lapamogaga aitetapa lapavayagunagu nehutapae'mo aetapa hailo hiyo koku'napati'mo alopa miyatapimo aligayanagi. Lapakaetegamo hisaya agufa kava'mo apakinagomogi ani kava hu'a Gotitegati gemo alini e'a ae'a hakalo hu'a hapa nepaiya vaya'aitegamo hu'naya'mofe'mo lapamogaga aiyo. 24 Lapamogaga aigaya'monanafa kagemi yatapimo male'naya vayane, ehetapiye, amuse nehaya ya'mo ago ali'nayanagi. 25 Ne'ya'mo ago netapa lapamu nehaya vayane, vaehae, henaga'amo lapaka tegaiyanagi. Kigi nehaya vayane, vaehae, henaga'amo yulagefa aitapa avi'ya'mo hugayanagi. 26 Muki vaya'mogimo lapakitapile'mo ali'a asaga hu'a lapatesaya afina'mo vaehae, hu'na, avovo kava'mo afole aigiye. Apakinago vaya'mogimo ani kava hu'a aigofe gemo alini e'a ae'a hakalo hu'a hapa nepaiya vaya'ai apaki'apile'mo ali'a asaga hu'a apate'nae.

Yesu'a, Kame vayatapie'mo lapau lapayamopafi'mo lapaino, huno hu'niya gemae

(Mt 5:38-48)

27 Hemenimo mani hisuva gemo ge'nimo ne'afiya vaya'mogitapae'mo hugesuve. Kame vayatapie'mo lapau lapayamopafi'mo lapaino. Hosu apaipamo kali'a nelapatesaya vaya'aina hapa maeyo. 28 Hosu hanageke ya'mo lapamigune, hu'a nehaya vaya'aife'mo, Goti'a lapa maeno, hutapa hiyo. Hu'a faipa hu'a lapatesaya vaya'aife'mo nunumu hutapa apateyo. 29 Mago vekamo'a kagalametale'mo nekamagisigekae'mo aika afe leka magokayaga kagalametamo amiyo. Mago vekamo'a saketikamo aliteno'ae'mo siotika'e'mo aligefe husigekae'mo, o'aliyo, huka osuvo. 30 Mago yafe'mo aukaya husaya vaya'aina afa'a alitapa apamiyo. Kagemi yatapimo ali'nisaya vaya'aife'mo, halate namiyo, hutapa osiyo. 31 Lapakaetegamo husaya kavafe'mo lapau'nisigetapa ani kava hutapa apakaetega'e'mo hiyo. 32 Apakaemo lapakaefe'mo hapau apayamopafi'mo hapau'nisiya vaya'aife'mo lapau lapayamopafi'mo lapau'nisiya'mo'mo Goti'a lapao ke hegaifiye. Ha'ao. Hosu vaya'mogi'e'mo apakaefe'mo hapau apayamopafi'mo nehapaiya vaya'aife'mo hapau apayamopafi'mo nehapaiye. 33 Lapakaemo lapakaetegamo alagepa kava'mo nehaya vaya'aitegamo alagepa kava'mo nehisaya'mo'mo Goti'a lapao ke hegaifiye. Ha'ao, hosu vaya'mogi'e'mo ani agufa kava'mo nehae. 34 Inagi mago ya'mo alitapa apami'netapae'mo halate ali'a lamigae, hutapa lapakesa ne'afisaya'mo'mo Goti'a lapao ke hegaifiye. Ha'ao, hosu vaya'mogi ali'a apami'naya anona'apilefe'mo halate alisayafeke'mo hosu vaya'aina ali'a ne'apamiye. 35 Lapakaemo kame vayatapie'mo lapau lapayamopafi'mo lapau'nisigetapa alagepa kava'mo hutetapa anonatapile'mo halate alisayafe'mo lapakesa o'afitapa fiku alita apamiyo alopa yatapimo aligayanagi. Ala Ne'mo hogote anaga vekamo'a muki ya'amo alino ne'apamige'a alite'apae'mo kahao ke hove, hu'a osu'a fiku ne'aliya vaya'e hapaku atale'ne'a ne'aliya vaya'e'mo alagepa kava'mo huno yagaino ne'apateya'mofe'mo ani agufa kava'mo hisaya'mo'mo mafa'ne'amo maigae. 36 Afotapimo'mo hau huno ne'apateya kava hutapa lapau hutapa apateyo, huno hapa pai'niye.

Vaya'mo alitapa fako hutapa o'apateyo, huno hu'niya gemae

(Mt 7:1-5)

37 Lapakaemo vaya'aife'mo, hosu kava'mo hu'nae, hutapa hutetapa alita fako hutapa o'apateyo, Goti'a, hosu kava'mo hu'nae, huno huteno alino fako huno olapategaiyanagi. Ina kava ma kava'mo nehana kanomo mai'nane, hutapa osiyo. Goti'a lapakae'efe'mo, ina kava ma kava'mo nehana vekamo mai'nane, huno osugiyanagi. Lapakaemo lapakaetegamo hosu kava'mo hu'nisaya vaya'aife'mo afa'a ateyo, hutapa hiyo, Goti'a lapakae'efe'mo, afa'a ateyo, huno hugiyanagi. 38 Alagepa yatapimo alitapa apamigeno'ao Goti'a alino lapamino. Goti'a havai te'nisigeno'ae'mo aeno alagi huteno mago'e huno alino maleno havai teteno ayateti'mo maleno alagi huteno aino ati kaeteno talasisi kupi'mo ku ai malegaiye. Haiya agufa kava'mo hutapa alita fako hutapa apamisafi ani agufa kava'mo huno Goti'a alino fako huno lapamigiye, huno hapa pai'niye.

Yesu'a aeno kalafefa gemo huno hapa pai'niya gemae.

39 Yesu'a ina gemo aeno kalafefa gemo huno hapa paino'ae'mo, mago aulagamo ali hu'nisiya vekamo'mo aulagamo ali hu'nisiya vekamo afa'a alino kanale huno avalelino ugifiye. Ha'ao avalelino visiyategamo u'ana kelifi'mo asagau'ana aiga'ae. 40 Ge'amo ne'afiya vekamo'a alino aya ne'maleya vekamo aeno no'agase. Tisa vekamo'a alino aya maleme aya maleme visigeno afiteno'ae'mo alino aya male'niya vekagana huno maigiye.

41 Na kava higetapae'mo konagatapimogi apaulagafi hane'niya afaya'mo ne'agaya'monanafa lapaulagafi hane'niya alopa latapa yosamo no'agae. 42 Na kava higetapae'mo konagatapie'mo, konaga'nimogae, kaulagafati'mo afaya'mo ali'na atalegauve, hutapa hapa nepaiya'monanafa alopa latapa yosamo lapaulagafi'mo hane'niyana no'agae. Aetapa ati nekaya vayane, hogotetapa lapaulagafi hane'niya alopa latapa yosamo alitapa atale'netapa konagatapimogi apaulagafi hane'niya afaya'mo alitapa atalesayafe'mo agetapa alagepa hutapa agegayanagi.

Hosu yosamo'mo hosu yosa alaga'age'mo aegaiye, huno hu'niya gemae

(Mt 7:16-20; 12:33-35)

43 Alagepa yosamo'mo hosu yosa alagamo afa'a no'ae. 44 Vaya'mogimo yosa alaga'amo agete'apaeke'mo na agufa yosamo hane'nifi hu'a agegae. Vaya'mogimo aufe nofipati'mo fiki yosa alagamo olagigae. Aise aufe yosafati'mo mago nesaya yosa alagamo olagigae. 45 Inagi mago alagepa vekamo aipafi'mo alagepa kava'mo hane'nigeno alagepa kava'mo aipafati'mo afole ne'aiye. Hosu vekamo aipafi'mo hosu kava'age'mo hane'nigeno hosu kava'mo aipafati'mo afole ne'aiye. Ani agufa ya'mo aipafi'mo havai te'neno haineno avayafati'mo afole ne'aiye, huno hapa pai'niye.

Lole vekala'moganimo no'mo ki'na'a kavafe'mo anava gemo hu'niya gemae

(Mt 7:24-27)

46 Na kava higetapa nagaefe'mo, Ala kava nene, Ala kava nene, nehutapae'mo ge'nimo no'afiye. 47 Muki vaya'amogimo nagaetega e'a ge'nimo afite'apae'mo akame nehaya vaya'mo haiya agufa vekagana hu'a mai'nafige'na ali'na lapave liguve. 48 Apakaemo no ki'niya vekagana hu'a mai'nae. Ani vekamo'mo no'mo kisiyafe'mo hogoteno yatala kelimo kafilino lami male'neno alopa yafa'mo faino ate'neno no'mo ki male'niye. Ki male'nigeno'ae'mo lusi ani'mo heteno no'mo aeno ago'ya faigefe hu'niyana alopa yafa'mo faino ate'neno ki male'niya'mofe'mo afa'a alino kanage osu'niye. 49 Ki male'niya'monanafa ge'nimo fiku afite'a akame nosaya vaya'mo mago vekamo'mo no'amo yafa'mo faino o'ate'neno ki male'niya vekagana hu'a mai'nae. Mopalafate'mo ki male'nigeno'ae'mo ani'mo'a aeno ago'ya faitale'nigeno malage huno anipi'mo asagauno ai'nigeno alagi aeno halagape vaino alino hosu huno ate'niye, huno hapa pai'niye.

Copyright information for `KYG