Luke 7

Yesu'a ati vaya'aite'mo yagaino ne'apateya vekamo ali'ya'amo ne'aliya vekamo alino alagepa huno ate'niya gemae

(Mt 8:5-13)

Yesu'a mani muki ge'amo vaya'aife'mo aeno hakalo huno hapa paino hano huteno ataleno Kapeneyamu taonifi'mo u'niye. Mago Lomu gamani vekamo'a ati vaya'aite'mo yagaino ne'apateya vekamo ali'ya'amo ne'aliya vekamo hau'niya vekamo kaita hau'nigeno faligefe hu'niye. Yagaino ne'apateya vekamo'a Yesufe'mo ava gemo afiteno'ae'mo Yu vayatama vaya'aife'mo, utapa Yesufe'mo, eka ali'ya'nimo ne'aliya vekamo alika alagepa huka ato, hutapa ha paiyo, huno hapa paiteno alino apate'nige'a Yesutegamo u'nae. U'apae'mo, Kahao ke honagi alagi ha maesana vekamo mai'niye. Yu vaya'mogitae'mo hau'nigeno mono no'mo kino late'niya'mofe'mo eka ha mao, hu'a Yesufe'mo ha pai'nae. Inagi Yesu'e'mo magokepi lokaeli'a u'a no haopale'mo ava'yi hu'nageno'ae'mo yagaino ne'apateya vekamo'a ao vaya'mo alino apate'nige'a Yesutega u'apae'mo, Ala kava nene, agaemo mago ali'ya'mo kamisuvafe'mo o'nahau'niye. Alagepa vekamo o'mai'nova'mofe'mo no'nifi'mo eka haikeka maisanafe'mo o'nahau'niye. Ina agufa vekamo mai'nova'mofe'mo kagaetegamo uguve, hu'na nagesa o'afi'nove. Afa'a mai'neka ge'age'mo nehugeno'ao ali'ya'nimo ne'aliya vekamo alagepa huno maino. Ne'yagaiya kava'mo ago age'nove. Mago vaya'mogi nagaete'mo yagai'a ne'natege'na nagaemo ati vaya'aite'mo yagai'na ne'apatove. Inagi mago vekae'mo uvo, hu'na nehugeno ne'viye. Mago vekae'mo eno, hu'na nehugeno ne'e. Ali'ya'nimo ne'aliya vekae'mo, ani ali'ya'mo aliyo, hu'na nehugeno ali'ya'mo ne'aliye, huno laha pai'niye, hu'a Yesufe'mo ha pai'nae.

Yesu'a ani gemo afiteno'ae'mo hau aiteno aino afe leno muki akame hu'a e'naya vaya'aife'mo, lapa nepauve, nagaefe'mo agesa afino fatago nehiya agufa kava'mo Isaleli vaya'ai apaipafi'mo afole o'ai'nige'na o'age'nova agufa kava'mo afole ai'niye, huno hapa pai'niye. 10 Alino apate'nige'a u'naya vaya'mo ai'a atagi ne'e'a no'ale'mo ava'yi hute'apae'mo agayana ali'ya'amo ne'aliya vekamo kaita'amo hano hu'nige'a age'nae.

Yesu'a mago neya vekamo fali'nigeno alino he tino ate'niya gemae

11 Mago afina'mo utege'a Yesu'e'mo ge'amo ne'afiya vayanagi asole vayanagi hu'a Neni taonifi'mo u'nae. 12 Yesu'a uno taonimo lafi kipa haopale'mo ne'vige'apae'mo mago fali'niya vekamo kogu a kanomo'a magoke'age'mo alino ate'niya mafa'ne'amo fali'nige'a hi'yopa male'a alini'a e'nae. Kogu a'ne'e asole vaya'mo ani taonifi'mo mai'naya vaya'e'mo magokepi lokaeli'a e'nae. 13 Ala kava ne'mo'a kogu a kanomo ageteno'ae'mo hau huno ateteno, avi'ya osuvo, huno ha paiteno 14 uno hi'yopale'mo aya'mo male'nige'apae'mo alini'a e'naya vaya'mo anile he ti'a mai'nae. Agaemo ge huno'ae'mo, neya vekae, hu'na, kaha pai'nae'mo he tiyo, hu'na kaha nepauve, huno nehigeno 15 fali'niya vekamo he tino fai mai'neno aepa faino age ai'niye. Yesu'a avaleno ita'amo'mo ami'niye. 16 Muki vaya'amogi koli hute'a Goti agi'ale'mo ali'a asaga hu'a atete'a, ala vekamo Gotitegati gemo alinino eno aeno hakalo huno hapa nepaiya vekamo lagaetegamo ago afole ai'niye. Goti'a vaya'ale'mo emineno hapa mae'niye, hu'a hu'nae. 17 Ani kavafe'mo ava gemo huli u e'a hu'nageno aino atagu faeno muki Yutiya kotega'e muki haopalega'e'mo uneno hu'niye.

Yoni'a lole vekala'mo alino anate'nige'ana Yesutegamo u'na'a gemae

(Mt 11:12-19)

18 Yoni ge'amo ne'afiya vaya'mogi ani kava'mo hu'niya ava gemo afite'apae'mo ani gemo Yonife'mo ha pai'nae. 19 Yoni'a ge'amo ne'afi'a vekala'anife'mo ge hu'nige'ana e'na'ageno Yesutegamo utanae'mo, afole aigiye, hu'a hu'naya vekamo mai'napi alu vekae'mo agava maisune, hutana afi ge'ao, huno hana paiteno alino anate'nige'ana Yesutegamo u'na'ae.

20 Lole vekala'moganimo u'ana Yesufe'mo, Yoni'a ani'mo faleno ne'apateya vekamo'a alino la'ategeta'a ne'o'ae. Agaemo, agaetegamo utanae'mo, afole aigiye, hu'a hu'naya vekamo mai'napi alu vekae'mo agava maisune, hutana afi ge'ao, huno la'aha pai'niye, hu'ana ha pai'na'ae. 21 Ani afina'mo Yesu'a muki vaya'mo alu kaita alu kaita'mo hapau'niya vaya'mo alino hapageno apatege hosu apaune vaya'mo vaya'ai apaipafati'mo alino hapa faino apatalege apaulagamo ali hu'niya vaya'mo apaulagamo alino ayakeno apatege huno mai'niye. 22 Yesu'a ge'anile'mo aeno atagaina huno hana paino'ae'mo, Yonitegamo utanae'mo ne'aga'a kava'e ne'afi'a ge'efe'mo ava gemo hutana ha pai'ao. Apaulagamo ali hu'niya vaya'aina ali'na ayake'na apatege apaiya hosu'niya vaya'mo ali'na alagepa hu'na apatege lepalosi ya'mo hapau'niya vaya'mo ali'na apakufalafa'mo hamale'na apatege apakesa akani'niya vaya'mo ali'na halo ai'na apatege fali'naya vaya'mo ali'na he ti'na apatege kagemi ya'apimo ohane'niya vaya'aife'mo alagepa faigoko gemo ae'na hakalo hu'na hapa paige hu'na mai'nove. 23 Nagaefe'mo lole apakesa no'afiya vaya'mogi Goti aulagale'mo alagepa hu'a mai'nayanage'a afa'a apamogaga aigae, huno hana pai'nige'ana u'na'ae.

Yesu'a Yonife'mo ava gemo hu'niya gemae

24 Yoni'a apa'mo alino anate'nige'ana u'na'a vekala'mo eta'ageno'ae'mo Yesu'a Yonife'mo ava gemo huno hapa paino'ae'mo, ka'me kotega utapa na agufa ya'mo agesayafe'mo u'nae. Mago hopale'mo yasimo ne'aligeno'ae'mo havaeno ape nehiya hopamo agesayafe'mo u'nafiye. 25 Lapakaemo na agufa ya'mo agesayafe'mo u'nae. Alagepa kukenamo vaino ali'niya vekamo agesayafe'mo u'nafiye. Ha'ao, alagepa kukenamo vai'a ne'aliya vaya'mogimo ala'apimo yagai'a ne'apataya vaya'ai no'apifike'mo ne'maiye. 26 Na agufa ya'mo agesayafe'mo u'nae. Gotitegati gemo alinino eno aeno hakalo huno hapa nepaiya vekamo agesayafe'mo u'nafiye. He, nagaemo lapa pai'nae'mo agaemo Gotitegati gemo alinino eno aeno hakalo huno hapa nepaiya veka'age'mo o'mai'nifa 27 Goti mukufi gemo'a ava gemo huno'ae'mo,

afiyo, nagaemo apa veka'nimo ali'na atesugeno uno hogoteteno ka'mo valino kategaiye, huno hu'niya vekamo mai'niye,
huno hapa pai'niye.
28 Lapa nepauve, Yoni'a muki ma mopafi mai'naya vaya'mo ago aeno apaka se'niya'monanafa Goti'a yagaino ne'apateya kegi'yafi'mo mai'niya vekamo henaga vekamo'a Yoni'mo ago aeno aga se'niye. 29 Muki afa vaya'mogi'e takesi moni ne'aliya vaya'mogi'e'mo Yoni'a hu'niya gemo afite'apae'mo, Goti'a alagepa vekamo fatago vekae, hu'a hu'nageno Yoni'a ani'mo faleno apate'niya'monanafa 30 Falasi vaya'e ke'aepa gemo lekana pai'a ali'a apaya ne'malaya vaya'mogi'e'mo Yoni'a ani'mo faleno apatesiyafe'mo ohapau'nige'apae'mo, ha'ao, hu'a hu'naya'mofe'mo Goti'a hapa maesiya gemo hiyo, huno hapa pai'niya gemo ago amagi'a atale'nae. 31 Ala kava ne'mo'a, hemeni afina'mo mai'naya vaya'mogi na agufa vayakana hu'a mai'nafige'na lapa paiguve. 32 Apakaemo mago mafa'ne anagakana hu'a mai'nae. Mago mafa'ne anaga'mogimo maketi kumate'mo mai'ne'apae'mo, lagaemo yave'yamo ne'amagunagetapae'mo lapakaemo oae'nae. Yulagefa ai'nonana avi'ya'mo osu'nae, hu'a nehae. 33 Ani kava hutapa Yoni'a ani'mo faleno ne'apateya vekamo'a ne'ya'mo mo sino mai'neno nofi alagafati ani'mo o'ne'nigetapae'mo, hosu aune vekamo aipafi'mo mai'niye, hutapa nehae. 34 Vemo mafa'nemo'mo eno ne'ya'mo mo osino nege nofi alagafati ani'mo nege hu'nigetapae'mo, ageyo, ne'yafe'mo lusi kava huno hau'nigeno lusi ne'ya'mo neteno nofi alagafati ani'efe'mo lusi kava huno hau'nigeno ne'neya vekae. Takesi moni ne'aliya vaya'e hosu vaya'e'mo apao vekamo mai'niye, hutapa nehae. 35 Lapakaemo ani gemo nehaya'monanafa Goti vaya'amogi afite'a age'naya vaya'mogi Goti'a afiteno age'niya kavafe'mo, Goti kava'amo alagepa fatago kava'mo hane'niye, hu'a nehae, huno hapa pai'niye.

Yesu'a Falasi vekamo nopi'mo haino mai'niya gemae

36 Mago Falasi vekamo'a Yesufe'mo, eno, nagae nopi'mo ne'ya'mo negau'ae, huno ge hu'nigeno Yesu'a no'afi'mo haino hi'yalamute'mo mai'niye. 37 Ani taonifi'mo mai'niya a'mo hosu a kanomo'a afi'niyana Yesu'mo eno Falasi vekamo nopi'mo hi'yalamute'mo mai'niye, hu'a hu'naya gemo afiteno'ae'mo yafa kepi uvelimo'a alagepa atumo ne'aiya uvelimo alinineno 38 Yesu akamelegamo he tino mai'neno aiyalegamo avi'ya'mo hu'niye. Avi'ya'mo nehigeno'ae'mo aunumo'mo kalo kalo huno aiya agotofule'mo asagauno ai'nigeno ayokateti'mo alino hau huno ateteno aiyale'mo haeno neteno uvelimo lakino faleno ate'niye.

39 Yesufe'mo eno, huno ge hu'niya Falasi vekamo'mo ageteno'ae'mo, ani vekamo Gotitegati gemo alinineno aeno hakalo huno hapa nepaiya vekamo mai'niyesinana haiya agufa a kanomo'mo eno name ne'alifi huno ageteno hosu kava'mo nehiya a kano mai'niye, huno age'niyesine, huno aipafi'mo agesa afi'niye. 40 Yesu'a agesa afi'niya agesale'mo aeno atagaina huno ha paino'ae'mo, Saimoniyo, mago gemo kaha paigesuve, huno ha pai'nigeno, Tisao, afa'a naha paiyo, huno ha pai'niye. 41 Yesu'a, lole vekala'mogani anona'animo hane'niyana mago vekamo vani hataleti kina anona'amo hane'nigeno mago vekamo teni kina anona'amo hane'niye. 42 Ani anona'anilefe'mo moni'animo alagi ohane'nigeno anami'niya vekamo'a, afa'a ate'ao, huno hana pai'niye. Lole vekalapati'mo haiya vekamo'a anona'amo anamino atale'niya vekae'mo lusi kava huno hau'nisigeno alu vekamo aeno aga segaiye, huno afi ge'nigeno'ae'mo, 43 Nagesa afuvana alopa anona'amo hane'nigeno afa'a atale'niya vekae, huno ha pai'nigeno, he lama gemo nehane, huno ha paiteno 44 ani a kanomo aino afe leno aulu hae'niye. Saimonife'mo, mani a kanomo age'napiye. Nokafi'mo e'na hai ne'nogekae'mo naiyamo sese hisuvafe'mo ani'mo he fika o'nami'nana'monanafa mani a kanomo'a aunuleti'mo naiyamo sese huno nateteno ayokateti'mo alino hau huno nate'niye. 45 Hai ne'nogekae'mo nahaeka o'ne'nana'monanafa hai'ne'na mai'nova afinateti'mo naiyale'mo haeno nege nege huno mai'niye. 46 Afa uvelileti'mo alika nagenopafi'mo lakika faleka o'nate'nana'monanafa mani a kanomo'a naiyale'mo alagepa atumo ne'aiya uvelileti'mo lakino faleno nate'niye. 47 Ani kava'mo hu'niya'mofe'mo kaha pai'nae'mo, ani a kanomo'a nagaefe'mo lusi kava huno hau ayamopafi'mo hau'niya kava'aleti'mo huno'ae'mo, alopa hosu kava'nimo anona'nimo ago alino atale'niye, huno alino lapave neliye. Aise hosu kava'nimo alino atale'niye, huno agesa afi'nisiya vekamo'mo aise'ato'amo hau ayamopafi'mo nehaiye, huno ha paiteno 48 ani afe'mo, hosu kavakamo ali'na atale'nove, huno ha pai'nige'apae'mo 49 agae'e'mo magokepi lokae'a mai'naya vaya'mogimo apakai'apimo apaipafi'mo apakesa afi'apae'mo, mani vekamo ina la'mo mai'neno'ae'mo hosu kava'amo alino atale'niye, hu'a apakesa afi'nae. 50 Agaemo ani afe'mo, kagesa afika fatago hu'nana kavakamo'mo kagufamo alino katino kate'niyanagi kaipamo'mo falu hu'nisigeka afa'a uvo, huno ha pai'niye.

Copyright information for `KYG