Mark 10

Yesu'a a'ne'apimo hapa fai'a ne'apatalaya kavafe'mo hu'niya gemae

(Mt 19:1-12; Lu 16:18)

Yesu'a ani koteti'mo atalenuno Yutiya kotega Yoneni ani'mo lakaenuno mai'nige'apae'mo asole vaya'mo halate agaetega e'a ali'a anupa hu'a mai'nageno nehiya agufa kava'mo huno alino apaya male'niye. Mago Falasi vaya'mogi amalageka hisafe'mo agaetegamo e'apae'mo, ke'aepa gemo'a huno'ae'mo, a'nemo afa'a hapa fai'a atalegae huno hu'nifi osu'niye, hu'a afi ge'nae. Yesu'a, Mosese'mo na agufa ke'aepa gemo alino lapami'niye, huno apafi ge'nige'apae'mo, Mosese'a huno'ae'mo, mago vekamo'mo a'amo hafaino atalegefe'mo huno'ae'mo mago avo'mo kaeno a'amo amiteno ha faino atalegaiye, huno hu'niye, hu'a ha pai'nageno'ae'mo, lapaipamo'mo lokiya vai'niya'mofe'mo Mosese'a ani kava'mo hiyo, huno lapa pai'niye. Akeya'vilaga Goti'a muki ya'amo alo hu'niya afina'move kanomo alo huno ateteno a kanomo alo huno ate'niye. Ani kava'mo hu'niya'mofe'mo ve kanomo'mo ita'afo'ala'moganimo anataleno a'a'e'mo magokepi lokae'ana maiga'ae. Lole kanola'moganimo magoke anakufamo ali'ana hamalega'ae. Lole kanola'mo o'maiga'afa magoke kanola'mo maiga'ae. Goti'a alino lokaeno anate'niya kanolapati'mo mago vaya'mogimo ali'a apa he'a o'anatesaya kava'mo hane'niye, huno hapa pai'niye. 10 Nopi'mo haino mai'nige'apae'mo ge'amo ne'afiya vaya'mogi ani kavafe'mo loka hu'a afi ge'nae. 11 Afi ge'nageno'ae'mo, mago vekamo'mo a'amo hafaino ataleteno alu a kanomo ali'nisiya'mo'mo a'alegamo hosu kava'mo huteno kumai kava'mo hu'niye. 12 Mago a kanomo'mo anau'amo'mo atalenuno alu vele'mo mai'nisiya'mo'mo kumai kava'mo hu'niye, huno hapa pai'niye.

Yesu'a mafa'ne anaga'ai apakufale'mo aya'mo male'neno, Goti'a lapa maeno, huno hu'niya gemae

(Mt 19:13-15; Lu 18:15-17)

13 Mago vaya'mogimo Yesu'a aise mafa'ne anaga'ai apakufale'mo aya'mo maleno apatesiyafe'mo apavaleli'a Yesutegamo ne'age'apae'mo ge'amo ne'afiya vaya'mogi ge hapau'nae. 14 Yesu'a ani kava'mo ageteno'ae'mo hosu aipamo kali'nigeno ge'amo ne'afiya vaya'aife'mo, aise mafa'ne'aina apatafautapa o'apatege'a nagaetegamo afa'a o'meyo, hutapa osige'a nagaetegamo afa'a eyo. Ani agufa mafa'nemo Goti'a yagaino ne'apateya kote'mo hane'niya ya'mo apakai'api ya'mo hane'niya'mofe'mae. 15 Lama gemo lapa nepauve, huno, ina lagimo aise mafa'nemogi Gotitegati'mo ne'aliya agufa kava'mo hu'a o'ali'nisafi Goti'a yagaino ne'apateya kegi'yafi'mo afa'a hai'a ofalegae, huno hapa pai'niye. 16 Hapa paiteno mafa'nemo apavaleno alino asagauno apanu kiteno aya'mo maleno apateteno'ae'mo, Goti'a lapa maeno, huno hapa pai'niye.

Fe'no'e vekamo ava gemae

(Mt 19:16-30; Lu 18:18-30)

17 Yesu'a ugefe'mo kate'mo ne'vigeno'ae'mo mago vekamo nagu nagu huno eno ale'ya faino mai'neno'ae'mo, Alagepa tisao, huno, maige maige hu'na maisuva ya'mo alisuvafe'mo na agufa kava'mo hisuve, huno afi ge'nigeno'ae'mo 18 Yesu'a, na kava higekae'mo nagaefe'mo alagepa tisao huka hane. Gotike'mo magoke'age'mo alagepa vekamo mai'niye. 19 Ke'aepa gemo ago afi'nananavaya'mo ohapao. Kumai kava'mo osuvo. Kumaya'mo o'aliyo. Aigofe gemo osuvo. Aigofe'mo huteka kumaya'mo o'aliyo. Itaka afokala'mogani anaiyafi'mo maiteka ge'animo afiyo, huno ha pai'nigeno'ae'mo, 20 Tisao, huno, neya mafa'nemo mai'nova afinateti'mo ani muki hana ke'aepa ge'amo akame hume hume e'na hemeni'e'mo akame nehuve, huno ha pai'niye. 21 Yesu'a ageteno'ae'mo agaefe'mo hau ayamopafi'mo hau'nigeno'ae'mo, magoke kavakamo'mo alagi kanale osu'niye. Muki ke'aepa ge'amo akame huteka uka haika hapaisanafe'mo uka muki kagemi yakamo alinikuka maketi huge'apao miya faitesageka alisana monimo alinikeka kagemi ya'apimo ohane'nisiya vaya'aina apamigeno'ao alopa kagemi yakamo koku'napi'mo haneno. Apamiteka eka nakame huvo, huno ha pai'nigeno 22 afi'niya'monanafa alopa kagemi ya'amo hane'niya'mofe'mo hosu augosa kaliteno aipamo'mo kana hu'nigeno ataleno u'niye.

23 Yesu'a ge'amo ne'afiya vaya'aina aulu hapaeno apaketeno'ae'mo, Alopa kagemi ya'apimo ali'nisaya vaya'mogi Goti'a yagaino ne'apateya kote'mo haisayafe'mo lusi kava huno lokiya vai'niye. 24 Ge'amo ne'afiya vaya'mogimo ani gemo afite'apae'mo hapau aite'a atete hu'nae. Hapau ai'naya'monanafa Yesu'a, mafa'ne'nimogitapae, huno, kagemi ya'apie'mo, laha maegaiye, hu'a apakesamo ne'afiya vaya'mogi Goti'a yagaino ne'apateya kote'mo haisayafe'mo lusi kava huno lokiya vai'niye. 25 Kamo afumo'a nekaya kapi'mo haino falesiyafe'mo lokiya vai'niya'monanafa mago kagemi ya'e vekamo'mo Goti'a yagaino ne'apateya kegi'yafi'mo haino falesiyafe'mo mago'e huno lokiya vai'niye, huno hapa pai'nige'apae'mo 26 lusi kava hu'a hapau aite'a apakai'apimo hu'apae'mo, ina lagimo maige maige hu'a maisaya ya'mo aligae, hu'a hute'a ge huge afige hu'a mai'nae. 27 Yesu'a aulu hapaeno apaketeno'ae'mo, vaya'mogimo ani kava'mo afa'a osugaya'monanafa Goti'a ani kava'mo afa'a hugiye, huno hapa pai'niye.

28 Pita'a Yesufe'mo, Afiyo, huno, muki kagemi yatimo ago ataleta eta kakame huta uteta nehune, huno ha pai'nigeno'ae'mo 29 lama gemo lapa nepauve, huno, muki vaya'mogimo nagaetefenagi alagepa faigoko gelefenagi hu'a no'apimo atale'nisafi konaga'apimogimo apatale'nisafi apasa'apimogimo apatale'nisafi afo'apimogimo apatale'nisafi ita'apimogimo apatale'nisafi mafa'ne'apimo apatale'nisafi a'apimo apatale'nisafi a'mafa'ne'apimo apatale'nisafi hoya'apimo atale'nisafi hu'a atale'nisaya vaya'mogimo hemenimo vani hataleti agufa ya'mo alite'a no'api alige konaga'apimogi alige apasa'apimogi alige ita'apimogi alige mafa'ne'apimogi alige hoya'api alige hu'a aligae. Aligaya'monanafa mago vaya'mogi apakaetegamo hosu kava'mo hugaya'monanafa henaga'amo afole aisiya afina'mo alagepa hu'a maige maige hu'a maisaya ya'apimo alite'a maigae. 31 Maigaya'monanafa hemenimo asole vaya'mogi hogote vaya'mo ne'maiya vaya'mogimo henaga'amo henaga vaya'mo maisage'a henaga ne'maiya vaya'mogimo hogote vaya'mo maigae.

Yesu'a faliteno he tisiya kavafe'mo halate mago'e huno hapa pai'niya gemae

(Mt 20:17-19; Lu 18:31-34)

32 Apakaemo Yulusalemu taoni kate'mo ne'u'apae'mo Yesu'a uno hogotetege'apae'mo ge'amo ne'afiya vaya'mo akame hu'a ne'u'apae'mo apakesa ala'amo afite'a hapau aite'a koli hume hume u'nae. Yesu'a kesi kate'mo apavalelinuno halate mago'e huno agaetegamo afole aisiya kavafe'mo hapa paino'ae'mo, 33 Hemenimo lagaemo Yulusalemu taonifi'mo ne'visunageno'ae'mo mago vekamo'a kutulu ya'mo aliteno Vemo mafa'nemo avaleno mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'e'mo apamisige'apae'mo agoti hu'a atete'a, afa'a faligiye, hu'a hutesage'a Yu nofi vayapati'mo o'mai'naya vaya'ai apayapi'mo avale'a ategae. 34 Apamisage'apae'mo hu'a faipa hu'a atege apavenatu'na he'a atege nofi kayoteti'mo amagige hute'a kamiti amagigae. Lole'e mago'e afina'mo utesigeno halate he tigiye, huno hapa pai'niye.

Yemisi'e Yoni'e'mo ala netala'mo maigu'ae, hu'ana hu'na'a gemae

(Mt 20:20-28)

35 Yemisi'e Yoni'e'mo Sepeti mafa'nela'moganimo Yesutegamo e'anae'mo, Tisao, hu'ana, kafi gesu'a kava'mo huka la'atesanafeke'mo la'ahau'niye, hu'ana ge hu'ana afi ge'na'ageno'ae'mo, 36 na agufa kava'mo hu'na lanatesuve, huno anafi ge'nige'anae'mo, 37 ha le konali yakamo aliteka fai mai'nekae'mo yagaika apatesana afina'mo la'agaepati'mo mago vekae'mo, eka lamaga nahaopale'mo fai maiyo, huka ha paiteka mago vekae'mo, eka hoga nahaopale'mo fai maiyo, huka la'aha paiyo, hu'ana ha pai'na'ae. 38 Yesu'a, na agufa kavafe'mo afi neko'afi hutana o'afi'na'ae. Nesuva kapufati'mo afa'a nesa'afi hosu yateti'mo ali'a fale'a natesaya ya'mo afa'a aliga'afiye, huno anafi ge'nige'anae'mo, 39 he, afa'a neteta'a aligu'ae, hu'ana ha pai'na'ageno'ae'mo he, huno, nesuva kapufati'mo netetana hosu yateti'mo ali'a fale'a natesaya ya'mo afa'a aliga'ae. 40 Aliga'a'monanafa lamaga nahaopale'mo fai maige hoga nahaopale'mo fai maige hutana fai mai'ao hu'na hisuva gemo nagai'ni ya'mo ohane'niye. Gotike'mo ago alo huno anate'niya vekalake'mo alino anamigiye, huno hana pai'niye.

41 Naya lole'a vaya'mo ge'amo ne'afiya vaya'mogi ani gemo afite'apae'mo Yemisi'e Yoni'efe'mo apaipa le'a anate'nae. 42 Yesu'a ge hu'nige'a e'nageno'ae'mo, Yu nofi vayapati o'mai'naya vaya'aite'mo yagai'a ne'apateya vaya'mogi ali'a afepi apatete'a yagai'a ne'apatae. Ani kava'mo hu'a ala apaki vaya'mogi ina kava hiyo ma kava hiyo, hu'a nehae. 43 Nehaya'monanafa lapakaemo ani kava'mo osisaya kava'mo hane'niye. Lapakaepati'mo mago vekamo'a, ala nagi vekamo maigesuve, huno hu'nisiyana kayokayo vekatapimo maino. 44 Lapakaepati'mo mago vekamo'a, hogote vekamo maigesuve, huno hu'nisiyana kalavusi ali'ya'mo aliteno kayokayo vekatapimo maino. 45 Ani kavatefe'mo Vemo mafa'nemo agaete'mo kayokayo hu'a atesaya agufa vekamo maisiyafe'mo emi'no'me'nifa kayokayo veka'apimo mai'neno agufa'aleti'mo miya faino hatu maeno apatesiyafe'mo emine'niye, huno hapa pai'niye.

Yesu'a mago aulagamo ali hu'niya vekamo alino ayakeno ate'niya gemae

(Mt 20:29-34; Lu 18:35-43)

46 Apakaemo Yeliko taonifi'mo u'a ava'yi hu'nae. Yesu ge'amo ne'afiya vaya'e asole vaya'e'mo Yeliko taonimo atale'a akame hu'a u'nageno Matimeyasi'a Timiyasi mafa'nemo aulaga ali hu'niya vekamo'a ka agi'nale'mo fai mai'neno monie'mo aukaya huno mai'niye. 47 Mago vaya'mogi hu'apae'mo, Yesu'a Nasalasa vekamo ne'e, hu'a hu'naya gemo afiteno'ae'mo aepa faino ge huno'ae'mo, Yesuo, huno, Nevini aginagomo kahau huka nato, huno ha pai'nige'apae'mo asole vaya'mogi hu'apae'mo, ge osuka afa'a maiyo, hu'a ge hau'naya'monanafa mago'e mago'e huno ge huno'ae'mo, Nevini aginagomo, huno, kahau huka nato, huno ge huge huge huno mai'niye. 49 Yesu'a eno he tino mai'neno'ae'mo, ani vekae'mo ge higeno'ao nagaetegamo eno, huno hapa pai'nige'a aulagamo ali hu'niya vekae'mo, kaipamo lokiya vaika kato. Kagaefe'mo ge nehigi he tiyo, hu'a ha pai'nageno 50 alonoku'mo alino asagino ataleteno malage huno aeno hailo huno he tino Yesutegamo e'niye. 51 Yesu'a, na kava hu'na katesuve, huno afi ge'nigeno aulagamo ali hu'niya vekamo'a, Tisao, huno, naulagamo alika ayakeka nato, huno ha pai'nigeno'ae'mo, 52 kagesa afika fatago hu'nana kavakamo'a alino alagepa huno kate'nigi afa'a uvo, huno ha pai'nigeno malage huno aulagamo ageno ayaketeno kate'mo akame huno u'niye.

Copyright information for `KYG