Mark 11

Yesu'a Yulusalemu taonifi'mo kini vekagana huno hai'niya gemae

(Mt 21:1-11,18-19; Lu 19:28-40; Yo 12:12-19)

Apakaemo Yulusalemu taoni haopale'mo Metapesi taoni'e Metani taoni'e'mo Alifi'aepa avele'mo hane'niya taonifi'mo u'a ava'yi hute'apae'mo agaemo lole vekala'mo ge'amo ne'afi'a vekala'mo alino anate'niye. Alino anateteno hana paino'ae'mo, nagae naulagale'mo hane'niya taonifi'mo utana hai'ao. Uta haitana ava'yi hutetanae'mo agesa'ana mago aikeli noki afumo nofi ae'a ate'nisaya noki afule'mo mago vaya'mo fai'a o'mai'naya noki afumo mai'nisigetana agega'ae. Agetetanae'mo hatu maetana avalelitana e'ao. Mago vaya'mogi, na kava hisa'afe'mo hatu ne'ma'ae, hu'a lanafi gesagetanae'mo, Ala kava ne'mo'a ali'ya'amo hane'nigeta'aene, hutana hisa'ageno'ae'mo malage huno alino atesigeno manile'mo egaiye, huno hana pai'niye. Anakaemo u'ana aga'ana ani aikeli noki afumo no kipate'mo nofi ae'a ate'nageno kate'mo mai'nige'ana agete'ana hatu mae'na'ae. Hatu ne'ma'age'apae'mo mago anile'mo he ti'a mai'naya vaya'mogi, na kava hisa'afe'mo hatu ne'ma'ae, hu'a anafi ge'na'age'anae'mo Yesu'a hana pai'niya gemo hapa pai'na'age'a anatale'na'age'ana avaleli'ana u'na'ae. Yesutegamo avaleli e'anae'mo yatala kukena'animo alapa'age kukenamo asagi'ana agotofule'mo male'na'ageno Yesu'a haino fai mai'niye. Asole vaya'mogimo ani kava hu'a yatala kukena'apimo alapa'age kukenamo asagi'a kapi'mo yakaige mago vaya'amogi u'a yahaofilaga yosa akopamo he'a yage'a kapi'mo yakaige hu'a maleme maleme u'nae. U'a hogote'naya vaya'mogi'e henaga akame hu'a e'naya vaya'mogi'e'mo alopa gefati'mo ge hu'apae'mo, amuse higetao.

Ala kava ne'mo agi'alefe'mo ne'eyanagi ha maeno, hu'a hute'a,
10 Laginago netimo Nevini'a kini vekamo mai'neno yagaino ne'apateya kava huno Ala kava ne'mo agi'aleti'mo yagaino apatesiya vekamo Goti'a ha maeno. Gotifeke'mo amuse higetao, hu'a hute'a hume hume u'nae.

11 Agaemo noki afule'mo maiteno Yulusalemu taonifi'mo haino ava'yi huteno Yu vaya'ai alopa mono nopi'mo haino muki yakofe'mo aulu haeno ageno mai'niye. Mai'niya'monanafa ago hani hugefe'mo hu'nige'apae'mo agae'e ge'amo ne'afiya vaya'e'mo Metani taonifi'mo ai'a atagine'a e'nae.

Yesu'a fiki yosae'mo ge hu'nigeno falu te'niya gemae

12 Ega'amo Metani taonifati'mo ne'e'apae'mo Yesu'a aga te'nigeno ageyana muga afagi'ale'mo fiki yosamo hane'nigeno ageyana asole haitamo male'nigeno ageteno alagamo ae'negaiye, huno huteno u'niye. Uno ageyana haita'age hane'nigeno age'niye. Fiki yosamo'mo alaga ne'aeya afina'mo ohane'niya'mofe'mo alagamo o'ae'niye. 14 Yesu'a huno'ae'mo, halate alagamo o'aesanage'a vaya'mogi e'a lagi'a o'negae, huno hu'nige'a ge'amo ne'afiya vaya'mogi afi'nae.

Yesu'a alopa mono nopati'mo alino hapa faino apatale'niya gemae

(Mt 21:12-17; Lu 19:45-48; Yo 2:13-22)

15 Apakaemo Yulusalemu taonifi'mo u'a ava'yi hute'a Yesu'a Yu vaya'ai alopa mono nopi'mo haino ageyana ani mono nopi'mo maketi ne'malaya vaya'mo mai'nageno apaketeno alino hapa faino apatale'niye. Agaemo alu vaya'ai monimo alite'a Yu vaya'ai monimo ne'apamiya vaya'ai hi'yalamu'apimo alino ago'ya faino atalege namamo miya nefaiya vaya'ai sia'apimo alino ago'ya faino atalege hu'niye. 16 Agaemo, mono no kate'mo kagemi yatapimo ali'nitutetapa osiyo, huno hapa paiteno ka akanino apate'niye. 17 Alino apaya maleno'ae'mo,vaya'mogimo no'nie'mo hu'apae'mo, nunumu nehaya none, hu'a hugae, huno avo'mo kae o'male'nifiye. Lapakaemokumaya vaya'mo e'a fala ki'a ne'maiya nokana hutapa alita hamaletapa ate'nae, huno hapa pai'niye.

18 Mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'mogi'e'mo ani kavafe'mo ava gemo afite'apae'mo amagisaya kafe'mo kahauya hu'a mai'nae. Muki vaya'mogimo ge'amo afite'apae'mo hapau ai'naya'mofe'mo agaefe'mo koli hu'nae. 19 Hani hugefe'mo hu'nigeno'ae'mo taonifi'mo ataleno u'niye.

Falu te'niya yosamo ava gemae

(Mt 21:20-22)

20 Kotilamiyapi'mo kate'mo ne'u'apae'mo ageyana fiki yosamo'mo muki haita'agi akopa'agi hafu'ya'agi huno alagi falu te'nige'a age'nae. 21 Pita'a Yesu'mo hu'niya kavafe'mo agesamo afino ho hu'niye. Huteno'ae'mo, Tisao, huno, ago. Ge hau'nana fiki yosamo ago falu te'niye, huno ha pai'nigeno 22 Yesu'a, Gotife'mo lapakesa afitapa fatago hiyo. 23 Lama gemo lapa nepauve, huno, mago vekamo'a lole agesamo o'afi'neno, hisuva gemo alagi afole aigiye, huno agesa afino fatago hu'neno'ae'mo mani avee'mo, nokamo atalekuka solovala anipi'mo asagauka aiyo, huno hu'nisiya'mo'mo huvo huno hisiya kava'mo afa'a hugiye. 24 Ani kava'mo hane'niya'mofe'mo lapa nepauve, huno, lapakaemo na agufa ya'mo aliguve, hutapa nunumu hutapa afi nekesafi lapakesa afitapa fatago hu'netapa hiyo afa'a aligayanagi. 25 Nunumu hugefe'mo he titapa mai'netapae'mo hosu lapaipamo kalitapa ate'nisaya vekamo hosu kava'amo alitapa atalegeno'ao koku'napi Afotapimo'a ani kava huno hosu kavatapimo alino ataleno. 26 Hosu kava'amo alitapa o'atalesayana koku'napi Afotapimo'a ani kava huno hosu kavatapimo afa'a alino o'atalegaiye, huno hapa pai'niye.

Yesufe'mo, ina la'mo ani agufa ali'ya'mo aliyo, huno kaha pai'niye, hu'a afi ge'naya gemae

(Mt 21:23-27; Lu 20:1-8)

27 Apakaemo halate Yulusalemu taonifi'mo e'apae'mo agaemo alopa mono no kumate'mo umenitata nehige'apae'mo mono hu'a ne'apataya vaya'aite'mo yagai'a ne'apataya vayanagi ke'aepa gemo avo'mo kae'a ali'a apaya ne'malaya vayanagi vayatama vayanagi hu'a agaetegamo e'nae. 28 E'a ha pai'apae'mo, haiya agufa alagena ya'mo yagaika ne'apatana alagena ya'mo ali'nekae'mo ani agufa kava'mo nehane. Ina la'mo ani agufa kava'mo huvo, huno kaha pai'niye, hu'a afi ge'nae. 29 Afi ge'nageno'ae'mo Yesu'a, nagae'e'mo mago gemo loka hu'na lapafi gegauve. Ge'nile'mo aetapa atagaina hutapa naha paisage'nae'mo haiya agufa alagena ya'mo yagai'na ne'apatova alagena ya'mo ali'nofi, hu'na lapa paiguve. 30 Goti'a Yoni'mo ani'mo faleno apatesiyafe'mo lekana paino ate'nifi vaya'mogimo lekana pai'a ate'nae, huno apafi ge'nige'apae'mo 31 apakai'apimo ge huge afige hu'apae'mo, Lagaemo hutae'mo Goti'a lekana paino ate'niye, huta hisunana agaemo huno'ae'mo, na kava higetapae'mo Yoni ge'ae'mo lama gemo nehiye, hutapa osu'nae, huno lafi gegaiye. 32 Hugiya'mofe'mo lagaemo hutae'mo, vaya'mogi lekana pai'a ate'nae, huta hisunana ani gemo'e'mo hosugiye. Apakaemo muki vaya'aife'mo koli hu'naya'mofe'mo ani gemo osu'nae. Muki vaya'mogimo Yonife'mo alagepa vekamo Gotitegati gemo alinineno aeno hakalo huno hapa nepaiya vekamo mai'niye, hu'a apakesamo afi'nae. 33 Afi'naya'mofe'mo Yesufe'mo, o'afi'none, hu'a ha pai'nageno'ae'mo, ani kava'mo hu'na haiya agufa alagena ya'mo yagai'na ne'apatova alagena ya'mo ali'ne'na ani kava'mo nehufi, hu'na lapa opaiguve, huno hapa pai'niye.

Copyright information for `KYG