Mark 13

Yesu'a ma mopamo hano hisiya afinafe'mo ava gemo hu'niya gemae

(Mt 24:1-2; Lu 21:5-6)

Yesu'a Yu vaya'ai alopa mono nopati'mo nelamigeno'ae'mo mago vekamo ge'amo ne'afiya vekamo'a, Tisao, huno, ago kanale yafateti'mo alagepa noko'age'mo ki male'naya noko'mo hane'niye, huno ha paiteno amuse hu'niye. Yesu'a, alagepa noko'age'mo age'napiye. Magoke yafate'mo akalo akalo huno ohanegaifa he'a halagape vaite'a muki yafa'amo ali'a ai'a atagu fae'a aote aote hu'a atalegae, huno ha pai'niye. Agaemo Alifi'aepa avefi'mo haino fai mai'nigeno'ae'mo Yu vaya'ai alopa mono no'mo aulagale'mo hane'nige'apae'mo Pita'agi Yemisi'agi Yoni'agi E'nalu'agi hu'a apakai'apige'mo mai'ne'apae'mo, hainu afina'mo afole aigiye. Afi'nisunageno afole aisi yafe'mo laha paiyo, hu'a afi ge'nae. Yesu'a aepa faino hapa paino'ae'mo, humi olapatesayafe'mo ehetapiye, huno, alagepa hutapa yagaiyo. Asole vaya'mogimo nagi'nimo aete'apae'mo, nagaemo Kalaisi'namo ne'ove, hu'a hute'a asole vaya'aina humi apategae. Lapaopale'mo kame hisaya kavafe'mo ava gemo hisagetapa afige afagitega kame hisaya kavafe'mo ava gemo hisagetapa afige hutetapae'mo lapau aitetapa koli osiyo. Ani kava'mo afole aigiya'monanafa hano hisiya afina'mo henaga'age'mo afole aigiye. Mago nofi vaya'mogi u'a alu nofi vaya'e'mo kame hugae. Mago gamani vaya'mogi u'a alu gamani vaya'e'mo kame hugae. Imima'mo aote aote huno alige kafu hu kava'mo afole aige hanageke kava'mo afole aige huno afole aigiya'monanafa apakafu nekiya kava'mo saufamogeno afole aigiye. Mago vaya'mogimo lapatafau'a kanisole vaya'ai agotile'mo lapavaleli'a uge alu mono nopi alu mono nopi'mo lapamagige hute'a gamani vaya'aite'mo yagai'a ne'apataya vaya'aitega'e yagai'a ne'apataya kini vaya'ai apaulagale'e'mo nagi'nilefe'mo utapa he ti netapa lama gemo hugae. 10 Hogote'a muki alu nofi vaya alu nofi vaya'aife'mo nava gemo hu'a alagepa faigoko ge'nimo ae'a hakalo hu'a hapa pai'a hano hugae. 11 Lapatafau'a agoti hu'a lapatesayafe'mo lapavaleli'u'a apamisagetapae'mo hogotetapa hutapae'mo, na agufa gemo hugupi, hutapa osutapa ani afina'mo Goti'a alino lapamisiya gemo hapa paiyo. Lapakaemo hapa opaigafa Aote Auneme'amo'a hapa paigiye. 12 Mago vaya'mogi konaga'apimo apamagisage'a falisayafe'mo apavale'a apamige mafa'ne'apimo apavale'a apamige ita'api afo'apimogimo apavale'a apamige hugae. 13 Muki vaya'mogimo nagi'nilefe'mo apaini hu'a lapategaya'monanafa o'atale'a atafau'a alagi hu'a maime maime ne'visaya vaya'aina hano hisiya afina'mo apakufamo alino katino apateteno hapau vaigiye. 14 Lekana nepaiya vaya'mogitapamo mani gemo aepa'amo alagepa hutapa afiyo. Lapakaemo agegayanalusi hosu ya'mo'a alino hano huno atesiya agufa ya'mo hane'nisigetapa agegae. Neniyo'a Gotitegati gemo alinineno aeno hakalo huno hapa nepaiya vekamo'a ani yafe'mo avo'mo kae male'niye. Ani agufa hosu ya'mo ohane'nisiya nopi'mo hane'nisigetapa agetetapae'mo ataletapa lapaune heyo. Yutiya kotega mai'nisaya vaya'mogi avelegamo apaune hetale'a hai'a maiyo. 15 Inagi nokato'mule mai'nisaya vaya'mogimo kagemi ya'apimo alini'a visayafe'mo lami'a no'apifi'mo ohaiyo. 16 Hoya'apifilaga mai'nisaya vaya'mogi saketi'apimo ali'a vaisayafe'mo halate ai'a atagi ne'a o'meyo. 17 Vaehae, hu'na, ani afina'mo apaipagu'e mai'nisaya a'ne'e mafa'nemo nu ne'apamisaya a'ne'efe'mo nahau huve. 18 Yasi alisiya afina'mo lapaune osesayafe'mo nunumu hiyo. 19 Ani afina'mo afole aisiya hanageke ya'mo'a hogoteno afole ai'niya hanageke ya'mo Goti'a ma mopamo alo hu'niya afinateti'mo afole aime aime e'niya hanageke yanagi muki afole aisiya hanageke yanagi huno ago aeno aga seno afole aigiye. 20 Ala kava ne'mo'a ani agufa hanageke afina'mo alino hogo huno o'ate'niyesinana muki vaya'amo ago fali'naesina'monanafa lekana paino apate'niya vaya'aitefe'mo ani hanageke afina'mo ali'na hogo hu'na ategauve, huno agesamo afi'niye. 21 Mago vaya'mogi hu'apae'mo, Ageyo, hu'a, Kalaisi'a manile mai'niye, hu'a huge, ageyo, hu'a, mugalega mai'niye, hu'a huge hisagetapae'mo, lama gemo nehae, hutapa lapakesamo o'afiyo. 22 Mago vaya'mogi, Kalaisi'na mai'nove, hu'a huge Gotitegati gemo alini'ne'na ae'na hakalo hu'na hapa nepauva vekamo mai'nove, hu'a huge hute'a no'agaya apaune kava'mo hute'a ago lekana paino apate'niya vaya'aife'mo humi apatesayafe'mo ani kava'mo hugaya'monanafa afa'a humi o'apategae. 23 Nagaemo muki afole aisiya kavafe'mo ago lapa pai'novanagi alagepa hutapa yagaiyo.

Vemo mafa'nemo henaga'amo eminesiya gemae

(Mt 24:29-31; Lu 21:25-28)

24 Ani afina'mo lusi hanageke ya'mo afole aitesigeno'ae'mo yegemo olesigeno kaimo olegaiye. 25 Muki kanefi'amo koku'napati'mo aino atafaino asagauno aigiye. Koku'napi hane'niya ya'amo'mo atete nehisigeno'ae'mo alino aino atagu faeno atalegaiye. 26 Ne'atalesige'apae'mo agesayana Vemo mafa'nemo'a ha le konali ya'amo aliteno himamu'a'e'mo hiyate'mo eminesige'a agegae. 27 Agaemo enisole vaya'amo alino apatesige'a ma mopamo lole'e lole'e atupale'e koku'na atupale'e'mo u'e'a hu'a lekana paino apate'niya vaya'amo apavaleli e'a ali'a anupa hu'a apategae.

28 Fiki yosae'mo ae'na kalafefa gemo huguvanagi afitetapae'mo agetapa aeto hiyo. Fiki yosamo'a ausisi aeteno anupa ne'malegetapae'mo saufa kafugamo lamigefe hiye, hutapa nehae. 29 Ani kava'mo hutapa lapa pai'nova gemo afole aisigetapae'mo ani afina'mo alagi hogo hiye, hutapa hiyo. 30 Lama gemo lapa nepauve, huno, hemeni afina'mo mai'naya vayapati'mo ofali'nisageno muki lapa nepauva kava'mo afole aigiye. 31 Koku'na'e ma mopa'e'mo hano hugiya'monanafa ge'nimo alagi hano osuno afa'a hanege hanege huno hanegaiye.

Hainu afina'mo afole aisifi huno hu'niya gemae

(Mt 24:36-44)

32 Na afinapi na kanalepi hu'a muki vaya'mogimo o'afi'nae. Koku'napi enisole vaya'mogi'e Mafa'ne'amo'e'mo o'afi'naya'monanafa Afo'amoke'mo afi'niye. 33 Hainu afina'mofi hutapa o'afi'naya'mofe'mo ehetapiye, hu'na, alagepa hutapa yagaitapa mai'netapa nunumu hutapa maiyo. 34 Ina kavakana huno hane'niyanagi afiyo. Mago no aepa vekamo ataleno afagi kotega ugefe huno'ae'mo ali'ya'ale'mo mai'naya vaya'aife'mo hapa paino'ae'mo, ina ya'nile'e ma ya'nile'e'mo yagaitapa nateyo, huno hapa paiteno alino fako huno apaote apaote huno yagaino apate'niye. Agaemo kipa'ale'mo ne'yagaiya vekae'mo alagepa huka kava yagaika maiyo, huno ha pai'niye. 35 Ani kava'mo hutapa alagepa hutapa yagaitapa maiyo. Lapakaemo no aepa vekamo hainu afina'mo egaifi une'mo esifi felugakuku'mo esifi kokole age ne'aiya agufa afina'mo esifi kotilamisiyapi'mo esifi hutapa o'afi'naya'mofe'mae. 36 Alagepa hutapa kava yagaitapa maiyo, fiku yanageno malage huno eno lapakesiyana lapau kaletapa mai'nisageno lapakegaiye. 37 Lapa nepauva agufa gege'mo hu'na muki vaya'aife'mo alagepa hutapa yagaitapa maiyo, hu'na hapa nepauve, huno hapa pai'niye.

Copyright information for `KYG