Mark 15

Yesu'mo Pailatitegamo avaleli'a u'naya gemae

(Mt 27:1-2; 27:11-14; Lu 23:1-5; Yo 18:28-38)

Kotilamiyapi'mo malage hu'a mono hu'a ne'apataya vaya'aite'mo yagai'a ne'apataya vayanagi vayatama vayanagi ke'aepa gemo avo'mo kae'a ali'a apaya ne'malaya vayanagi mago'e kanisole vayanagi hu'a ge huge afige hu'nae. Hute'apae'mo Yesu'a ayatalate'mo nofi ki'a atete'a avaleli'u'a gamani vekamo agi'amo Pailati ayapi'mo ami'nae. Pailati'a, Yu vaya'aite'mo yagaika ne'apatana kini vekamo mai'napiye, huno afi ge'nigeno'ae'mo, he, ago alagi gemo nehane, huno ha pai'niye. Mono hu'a ne'apataya vaya'aite'mo yagai'a ne'apataya vaya'mogi, ina hosu kava'mo hu'niye ma hosu kava'mo hu'niye, hu'a hute'a hu'a faipa hu'a ate'nae. Pailati'a halate loka huno'ae'mo, ani gele'mo aeka atagaina huka mago gemo afa'a osugapiye. Muki kava'ae'mo kagaefe'mo nehaya gemo afiyo, huno ha pai'nigeno Yesu'a halate mago'e huno ge osuno mai'nigeno'ae'mo Pailati'a hau ai'niye.

Malamasife'mo ava gemo hu'niya gemae

(Mt 27:15-26; Lu 23:13-25; Yo 18:39—19:16)

Pailati'a Yu vaya'ai Pasova hopa afina'mo kalavusi hu'a ne'apataya vayapati'mo muki vaya'mogimo kafuga'ae kafuga'ae'mo magoke vekamo lekana pai'a ate'naya vekamo ategeno ute ute hu'niye. Ani afina'mo mago vekamo agi'amo Malamasi'a kalavusi hu'a ate'naya vekamo mai'niye. Malamasi'e mago vaya'mogi'e'mo gamani vaya'aina kamiti apamagite'a ali'a hapa fai'a apatalesayafe'mo hu'nage'apae'mo kalavusi hu'a apate'nae. Asole vaya'mo ali'a anupa hu'a mai'ne'a Pailatife'mo, muki kafuga'ae kafuga'ae'mo nehana agufa kavake'mo huka lato, hu'a ha pai'nageno'ae'mo Lapakaete'mo yagaino nelapateya kini netapimo hatu maetapa atesayafe'mo nehafiye, huno apafi ge'niye. Agaefe'mo mono hu'a ne'apataya vaya'aite'mo yagai'a ne'apataya vaya'mogi apaipa kafamo hae'naya'mofe'mo avaleli'e'a nayapi'mo nami'nae, huno agesamo afi'niye. Afi'niya'mofe'mo Yesufe'mo ge huno apafi ge'niya'monanafa 11 mono hu'a ne'apataya vaya'aite'mo yagai'a ne'apataya vaya'mogi muki vaya'ai apaipafi'mo hu'a fugali nehu'apae'mo, Pailatife'mo hutapae'mo, Malamasike'mo ato, hutapa ha paiyo, hu'a hapa pai'nae. 12 Pailati'a halate asole vaya'aife'mo, Malamasi'mo hatu mae'na atesuvana Yu vaya'aite'mo yagaino ne'apateya kini nene hutapa agi ne'aya vekalegamo na kava'mo hisuve, huno apafi ge'niye. 13 Apafi ge'nige'apae'mo alopa gefati'mo halate hu'apae'mo, malipu yosale'mo nili aiteka alika he tika ato, hu'a hu'nageno 14 na agufa hosu kava'mo hu'nigetapae'mo malipu yosale'mo nili aigefe nehae, huno apafi ge'nige'apae'mo, malipu yosale'mo nili aiyo, nili aiyo, hu'a hu'nae. 15 Pailati'a asole vaya'mogimo amuse hu'a atesayafe'mo apakaetefe'mo Malamasi'mo hatu maeno ate'nigeno u'niye. Hatu maeno ateteno ati vaya'aife'mo, Yesu'mo nofi kayoteti'mo amagiyo, huno hapa paiteno ati vaya'ai apayapi'mo malipu yosale'mo nili aite'a ali'a he ti'a atesayafe'mo avaleno apami'niye.

Ati vaya'mogi Yesufe'mo kigi yokalo gemo hu'a ate'naya gemae

(Mt 27:27-31; Yo 19:2-3)

16 Ati vaya'mogimo avaleli'u'a gamani vaya'aite'mo yagaino ne'apateya vekamo nopi'mo hai'a ate'ne'apae'mo muki ati vaya'aife'mo ge hu'nage'a e'a ali'a anupa hu'a mai'nae. 17 Apakaemo haesa yatala kukenamo yagai'a ne'apataya kini vaya'mogi ne'vaiya agufa kukenamo aigofe kukenamo ali'a vai'a ate'ne'a aufe nofi'mo ali'a aigofe kakolitamo yagai'a ne'apataya kini vaya'mogi ne'malaya agufa kakolitamo alo hute'a agenopale'mo male'a ate'nae. 18 Male'a ate'ne'a he ti'a aepa fai'a hu'apae'mo, Yu vaya'aite'mo ala'apimo yagaika ne'apatana kini ne'apimogae alagepa huka maiyo, hu'a aigofe gemo hute'a hu'a amuse hu'a ate'a mai'nae. 19 Agenopale'mo kayoteti'mo amagige apavenatu'na he'a atege hute'a apale'ya fai'ne'a aigofe mono hu'nae. 20 Hu'a ami malete'a kigi yokalo gemo hu'a ate'a hano hute'apae'mo haesa kukenamo asagi'a malete'a agai'a kukena'amo ali'a vai'a ate'nae. Vai'a atete'a malipu yosale'mo nili aite'a ali'a he ti'a atesayafe'mo avaleli'a u'nae.

Yesu'mo malipu yosale'mo nili ai'naya gemae

(Mt 27:32-44; Lu 23:26-43; Yo 19:17-27)

21 Kate'mo ne'vageno'ae'mo Saimoni'a Sailini kotega vekamo Alekasana'e Lufasi'e'mo afo'animo'mo ko'amo ataleno ne'ege'a fotu hu'nae. Ati vaya'mogi, alika kofilika uvo, hu'a hute'a ali'a kofi'a ate'nageno malipu yosamo kofilino u'niye. 22 U'a Gogatagayagae hu'a agi ne'aya agimo aepa'amo anu ayamufagayagamo u'a ava'yi hu'nae. 23 U'a ava'yi hute'a nofi alagafati anipi'mo atu neheya malasinimo agi'amo meyamo ali'a lakite'a ami'nayana alino o'ne'niye. 24 Apakaemo malipu yosale'mo nili aite'a ali'a he ti'a ate'nae. Kukena'amo alisayafe'mo yafateti'mo yokalo lete'a ali'a fako hu'a ali'nae. 25 Yegemo leno hakale hu'nige'apae'mo ali'a he ti'a ate'nae. 26 Pailati'a mago avo'mo ina kava'mo hu'nigetae'mo amagi'none, hu'a nekaya agufa avo'mo kae'niye. Ani gemo avo'mo kaeno'ae'mo,

Yu vaya'aite'mo ala ne'apimo yagaino ne'apateya kini nene

huno avo'mo kaeteno agenopale atulu yosale'mo male'niye.
27 Lole vekala'moganimo vaya'mo apamagite'ana kumaya'mo ne'ali'a vekala'mo agae'e'mo malipu yosale'mo nili aite'a mago vekamo ali'a lamaga haopale'mo he ti'a atete'a mago vekamo ali'a hoga haopale'mo he ti'a ate'nae. 28 Ani kavafe'mo Goti mukufi'mo avo'mo kae male'niya gemo afole ai'niye. Ani gemo'a huno'ae'mo,Agae'e ke'aepa gemo amagi'a ne'atalaya vaya'e'mo magoke agufa vaya'mo mai'nae, hu'a apakesamo afi'nae, huno hu'niye. 29 Kate'mo u e'a hu'naya vaya'mogimo agete'a keka hute'apae'mo, he, hu'a, alopa mono no'mo he'na halagape vaite'na lole'e mago'e afina'mo halate ki'na hano huguve, huka hu'nana vekamogi kagaika kagufamo alika katika kahau vaiyo, hu'a hute'a hu'a faipa hu'a ate'nae. 31 Ani ge hu'a mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'mogi'e'mo apakai'apimo hu'apae'mo, alu vaya'aina afa'a hapa mae'niyanageno agai'amo afa'a hau o'vaigiye. 32 Kalaisi ne'mo Isaleli vaya'aite'mo yagaino ne'apateya kini vekamogeno aino akaino eminesigeta agetetae'mo lama gemo nehiye, huta hugune, hu'a hute'a hu'a faipa hu'a ate'nae. Ani agufa gemo hu'ana lole vekala'mo agae'e'mo magokepi nili aite'a ali'a he ti'a anate'naya vekala'mogani'e'mo hu'ana faipa hu'ana ate'na'ae.

Yesu'mo ago fali'niya gemae

(Mt 27:45-56; Lu 23:44-49; Yo 19:28-30)

33 Felugakuku'mo muki haopalagamo lole'e mago'e aovamo hani huteno une'mo yegemo le'niye. 34 Une afafamo Yesu'a alopa gefati'mo keya aeno ge huno'ae'mo, Eloi, Eloi lama samakatani, huno hu'niye. Ani gemo aepa'amoGoti'nimo, Goti'nimo, huno, na kava higeka nataleka u'nane, huno hu'niye. 35 Hu'nige'apae'mo mago vaya'mo haopale'mo he ti'a mai'naya vaya'mogimo ani gemo afite'apae'mo, Afiyo, hu'a, Ilaiyafe'mo ge nehiye, hu'a hute'a 36 mago vekamo nagu nagu hununo kaki'nofagana ya'mo alino nofi alagafati anipi'mo aeteno yatala kanipa kayote'mo faino lanu paiteno nesiyafe'mo ami'niye. Amiteno'ae'mo, afa'a ageta maigetao Ilaiya'a emineno malipu yosaleti'mo aino akaino atesifigeta agegaune, huno hu'niye. 37 Yesu'a alopa gefati'mo keya aeteno fali'niye.

38 Fali'nigeno'ae'mo alopa mono nopi'mo alapa'age lavolavoleti'mo ae'a akani male'naya lavolavomo anagati'mo aeno apake ailino lamino afelaga lole hu'niye. 39 Ati vaya'aite'mo yagaino ne'apateya vekamo'mo aulagale'mo he tino mai'neno afi'nigeno alopa gefati'mo keya aeno ge huteno fali'nigeno ageteno'ae'mo, alagi lama gemo nehuve. Ani vekamo Goti mafa'ne'amo mai'niye, huno hu'niye. 40 Mago a'ne anaga'mo aise afagi'ale'mo he ti'a mai'ne'a aulu he'a age'a mai'nae. Ani a'nefi'mo Maliya'a Maganala kotega anagi Maliya'a henaga Yemisi'e Yosesi'e'mo ita'animo'agi Salome'agi hu'a mai'nae. 41 Yesu'a hogoteno Galeliya kotegamo umenitata nehige'apae'mo ani a'ne anaga'mogimo akame hu'a u'e'a nehu'apae'mo ha mae'nae. Mago asole a'ne anaga'mo agae'e'mo Yulusalemu kotegati'mo e'naya a'ne anaga'e'mo anifi'mo mai'nae.

Yesu agufa'amo yafakapi'mo alininuno kino ate'niya gemae

(Mt 27:57-61; Lu 23:50-55; Yo 19:38-42)

42 Yegemo lamino falegefe hu'nigeno'ae'mo Yosefe'a Alamatiya kotega hogote kanisole vekamo'mo Goti'a yagaino apatesiya kava'mo afole aisiya afinafe'mo agava mai'niya vekamo e'niye. Ani afina'mo alo nehaya afina'mo hane'niya'mofe'mo egamo Sapati afina'mo afole aigiye, huno huteno Yosefe'a lokiya'amo aliteno'ae'mo koli aipamo okali'nigeno uno Pailatife'mo, Yesu kefa'amo aligesuve, huno afi ge'nigeno 44 Pailati'a, ago malage huno fali'nifiye, huno huteno agesa ala'amo afino hau aiteno ati vaya'aite'mo yagaino ne'apateya vekae'mo ge hu'nigeno e'nigeno'ae'mo, ago fali'nifiye, huno afi ge'nigeno'ae'mo, 45 ago fali'niye, huno ha pai'nigeno Yosefefe'mo, kanalenagi uka aliyo, huno ha pai'niye. 46 Yosefe'a yaveyave lavolavomo miya failineno male'neno Yesu agufa'amo aino akaino alinine emineno lavolavofi'mo hayaeteno alininuno yafa kapi'mo kino ateteno alopa yafa'mo alino heleve heleve hulinuno yafa ka avayale'mo aino akani male'niye. 47 Maliya'a Maganala kotega a'e hamo'amo Maliya'mo Yosesi ita'amo'e'mo age'na'ageno kino ate'nige'ana age'na'ae.

Copyright information for `KYG