Mark 16

Yesu'a halate ago he ti'niya gemae

(Mt 28:1-8; Lu 24:1-12; Yo 20:1-10)

Sapati afina'mo utege'apae'mo Maliya'a Maganala kotega anagi hamo'amo Maliya'mo Yemisi ita'amo'agi Salome'agi hu'a alagepa atumo ne'aiya uvelileti'mo alini'u'a agufale'mo fale'a atesayafe'mo miya fai'nae. Hogote afina'mo kotilamiyapi'mo yegemo eno haine'nige'apae'mo ani a'ne anaga'mo kanolulegamo u'nae. Kategamo ne'u'apae'mo apakai'apimo, ina la'mo laha maeno yafa'mo alino heleve hu male'nisigetae, hu'a hu'nae. Alopa yafa'mo hane'niya'mofe'mae, hu'a apakesamo afili'a e'nae. E'a agayana yafa'mo avayale'mo ohane'nifa afayatagage'mo hane'nige'a age'nae. Apakaemo yafakapi'mo fale'u'a hai'a agayana neya vekamo yaveyave'age yatala lavolavomo vaili'niya vekamo lamaga haopale'mo fai mai'nige'apae'mo agete'a hapau ai'nae. Agaemo, lapau o'aiyo, lapakaemo Yesu'a Nasalasa taonifi vekamo malipu yosale'mo nili ai'nageno fali'niya vekamo agesayafe'mo ne'ae. Ageyo, huno, Mafi o'mai'nifa ago he tino u'niye. Ki'a ate'naya ya'age'mo hane'niyanagi ageyo. Hane'niya'mofe'mo utapa ge'amo ne'afiya vaya'aife'mo hapa paige Pitafe'mo ha paige hiyo. Yesu'a Galeliya kotegamo visugetapa nagegae, huno lapa pai'niyanageno uno hogonetesigetapa ani kotegamo utapa agegae, hutapa hapa paiyo, huno hapa pai'niye. Ani a'ne anaga'mo yafa kapati'mo nelami'apae'mo atale'a apaune hetale'a ne'u'apae'mo atete hapauge lusi kava hu'a hapau aige koli huge huli'a u'naya'mofe'mo apakaemo mago vaya'aife'mo alagi ge osu'a afa'a u'nae.

Yesu'a vaya'ai apaulagale'mo alino afole ai'niya gemae

(Mt 28:9-10; Yo 20:11-18)

Hogote afina'mo salefi kotilamiyapi'mo Yesu'a hogoteno afa'a mai'neno'ae'mo Maliya'a Maganala kotega a kanomo aipafati'mo seveni'a hosu apaune vaya'mo alino hapa faino apatale'niya a kanomo aulagale'mo alino afole ai'nigeno age'niye. 10 Ageteno u'niyana agae'e'mo magokepi lokae'a ne'maiya vaya'mogimo yulagefa aige avi'ya huge hu'a mai'nageno uno hapa pai'niye. 11 Hapa paino'ae'mo, Yesu'a ago he tino afa'a mai'nige'na age'nove, huno hapa pai'niyana ani gee'mo lama gemo nehiye, hu'a apakesamo o'afi'nae. 12 Henaga'amo lole vekala'mo taonifilagati'mo ne'va'ageno'ae'mo aeto agufa agufamo aliteno lole vekala'ani anaulagale'mo alino afole ai'niye. 13 Afole ai'nige'ana agete'anae'mo halate ai'ana atagi ne'e'ana mago vaya'amogife'mo hapa pai'na'age'apae'mo afi'nayana ani ge'anie'mo apakesamo o'afi'nae. 14 Henaga'amo leveni'a vaya'mogi ne'ya'mo ne'nageno apaulagale'mo alino afole ai'nige'a muki'amogi agete'apae'mo age'naya vaya'mogi hapa pai'naya ge'apie'mo apakesamo o'afi'naya'mofe'mo apaipamo'mo lokiya vai'nige'a apakesa afi'a fatago osu'nageno ge hapau'niye. 15 Agaemo, muki ma mopafi vaya'aitegamo utapa alagepa faigoko ge'nimo muki vaya'aife'mo aetapa hakalo hutapa hapa paiyo. 16 Muki vaya'mogimo apakesa afi'a fatago hute'a ani'mo falesageno'ae'mo Goti'a apakufamo alino katino apategaiye. Apategaiya'monanafa muki vaya'mogimo apakesa afi'a fatago osisayana Goti'a agoti huno apateteno'ae'mo, hosu vayane, huno hugiye. 17 Apakesa afi'a fatago nehaya vaya'mogi ina agufa no'agaya aune kava'mo hugae. Apakaemo nagi'nileti'mo hosu apaune vaya'aina ali'a hapa fai'a apatalege saufa apakemo aige 18 vaya'mo nehapaeya nagalo'yavemo atafauge hugae. Ani kava'mo hu'a vaya'mo nete'a nefaliya ani'mo nesayana ofaligae. Kaita hapau'nisiya vaya'ai apakufale'mo apaya'mo male'ne'a ali'a alagepa hu'a apategae, huno hapa pai'niye. 19 Ala kava ne'mo'a ani gemo huno hapa paitegeno'ae'mo Goti'a koku'napi'mo avalelinuno haino ate'nigeno lamaga haopale'mo fai mai'niye.

20 Apakaemo muki haopalegamo umenitata hu'a ae'a hakalo hu'a hapa pai'nageno'ae'mo Ala kava ne'mo'a apakae'e'mo magokepi lokaeno ali'ya'mo aliteno hapa pai'naya gele'mo alagena aune kavateti'mo alino lokiya vaino ate'niye. He, lama ge.

Copyright information for `KYG