Mark 2

Yesu'a kanage kanaga osuno ne'maiya vekamo alino alagepa huno ate'niya gemae.

(Mt 9:1-8; Lu 5:17-26)

Ketogufa afina'mo ago utegeno Yesu'a halate atagi neno eno Kapeneyamu taonifi'mo ko'ale'mo mai'nige'a agete'apae'mo, no'afi'mo ago eno mai'niye, hu'a hapa pai'nage'a afite'apae'mo asole vaya'mo malage hu'a e'a mai'naya nopi'mo hai'a ali'a anupa hu'a mai'a kili paete'a kipatega'e'mo maili'a emi e'nageno maisaya ya'mo alagi ohane'niye. Yesu'a Goti ge'amo aeno hakalo huno hapa nepaige'apae'mo lole'e lole'e vaya'mogimo kanage kanaga osuno ne'maiya vekamo hi'yopa male'a alini'a Yesutegamo e'nae. Nopi'mo ago kili pae'naya'mofe'mo Yesu'a mai'niya haopale'mo avaleli'a ohai'nafa apakaemo nokato'mule'mo hi'yopa alini'a hai'ne'a Yesu'a mai'niya yateti'mo nokato'mumo ali'a akai male'ne'a hi'yopa kayote'mo nofi aete'a aline'a atalageno lami'niye. Yesu'a apakeyana agaefe'mo apakesa afi'a fatago hu'nageno apaketeno'ae'mo kanage kanaga osuno ne'maiya vekae'mo ha paino'ae'mo, Mafa'ne'nimogae, huno, hosu kavakamo ago ali'na atale'nove, huno ha pai'niye. Mago vaya'mo ke'aepa gemo ali'a apaya ne'malaya vaya'mo nopi'mo fai mai'ne'apae'mo, na kava higeno ani agufa gemo hu'niye. Gotife'mo huno faipa huno ate'niye. Gotike'mo vaya'ai hosu kava'apimo afa'a alino atalegaiye, hu'a apaipafi'mo apakesamo afi'nae. Yesu'a apaipafi'mo apaketeno'ae'mo, na kava higetapa hosu lapaipa lapakesamo ne'afiye. Nagaemo hosu kavakamo ali'na atale'nove, hu'na hu'novanage'na he tika hi'yopa kayokamo aliteka uvo hu'na hisuvana haiya agufa kava'mo'a lokiya kava'mo ohane'niye. 10 Lapakaemo Vemo mafa'nemo'a ma mopafi'mo mai'neno'ae'mo vaya'ai hosu kava'apimo alino atalesigetapa agesayafe'mo himamu'amo ali'na lapave liguve, huno huteno kanage kanaga osuno ne'maiya vekae'mo ha paino'ae'mo, 11 he tika hi'yopa kayokamo aliteka nokalegamo uvo, hu'na kaha nepauve, huno ha pai'nigeno 12 apaulagale'mo malage huno he tino hi'yopa kayo'amo aliteno u'niye. U'nige'a agete'apae'mo hapau aite'a Goti agi'ale'mo ali'a asaga hu'a atete'apae'mo, lagaemo hogoteta ani agufa kava'mo alagi o'age'none, hu'a hu'nae.

Yesu'a Livaife'mo ge hu'niya gemae

(Mt 9:9-13; Lu 5:27-32)

13 Yesu'a halate aino atagi neno Galeliya kotega ani kotutegamo u'niye. Uno mai'nige'apae'mo asole vaya'mo e'a ali'a anupa hu'a mai'nageno alino apaya male'niye. 14 Apatalenuno ageyana mago takesi moni ne'aliya vekamo Livai'a Afiyasi mafa'nemo takesi moni ne'aliya nopi'mo fai mai'nigeno age'niye. Ageteno'ae'mo, eka nakame huvo, huno hu'nigeno Livai'a he tinuno akame hu'niye. 15 Henaga'amo Yesu'a uno Livai nopi'mo ne'ya'mo neno mai'niye. Asole vaya'mo takesi moni ne'aliya vayanagi ke'aepa gemo akame nosaya vayanagi hu'a e'a agae'e ge'amo ne'afiya vaya'e'mo magokepi lokae'a mai'ne'a ne'ya'mo ne'nae. Ani afina'mo asole ani agufa vaya'mo e'a aepa fai'a akame hu'nae. 16 Falasi mono vaya'e ke'aepa gemo avo'mo kae'a ali'a apaya ne'malaya vaya'mogi'e'mo apakayana Yesu'e'mo takesi moni ne'aliya vayanagi ke'aepa gemo akame nosaya vayanagi hu'a magokepi lokae'a mai'ne'a ne'ya'mo ne'nage'a apakete'apae'mo ge'amo ne'afiya vaya'aife'mo hapa pai'apae'mo, na kava higeno ani agufa vaya'e'mo magokepi lokaeno mai'neno ne'ya'mo ne'ne, hu'a apafi ge'nae. 17 Yesu'a ani gemo afiteno'ae'mo ge'apile'mo aeno atagaina huno hapa paino'ae'mo, Lota vaya'mogimo kaita ohapau'niya vaya'aite'mo u'a ali'ya'mo no'alifa kaita hapau'niya vaya'aiteke'mo u'a ali'ya'mo ne'aliye. Nagaemo alagepa vaya'aife'mo eyo, hu'na ge hisuvafe'mo emi'no'me'nofa hosu vaya'aifeke'mo eyo, hu'na ge hisuge'a e'a apaipamo ali'a afe lesayafe'mo emine'nove, huno hapa pai'niye.

Ne'ya'mo o'ne'a mo nesiya kavafe'mo hu'niya gemae.

(Mt 9:14-17; Lu 5:33-39)

18 Mago afina'mo Yoni ge'amo ne'afiya vaya'e Falasi mono vaya'mogi'e'mo mono kava'mo akame hu'a ne'ya'mo o'ne'a mo si'nae. Mago vaya'mo Yesutega e'apae'mo, na kava hige'a Yoni ge'amo ne'afiya vaya'e Falasi mono vaya'mogi'e'mo mono kava'mo akame hu'a ne'ya'mo o'ne'a mo si'a mai'naya'monanafa gekamo ne'afiya vaya'mogimo ne'ya'mo mo nosiye, hu'a afi ge'nae. 19 Yesu'a, a'nemo ne'aliya afina'mo ne'ya'mo o'ne'a mo nesifiye. Ha'ao a aligefe hu'niya vekamo apakae'e'mo magokepi lokaeno mai'nige'apae'mo apamogaga ai'a ne'ya'mo ne'nae. 20 Henaga'amo mago vaya'mogi a'mo aligefe hu'niya vekamo avaleli'a visage'apae'mo ne'ya'mo o'ne'a mo sigae. 21 Atafa lavolavomo halo ne'aige'apae'mo saufa lavolavomo sese osu'naya lavolavoleti'mo lagau'a nofakaniye. Saufa lavolavoleti'mo lagau'a fakanisayana sese nehisageno'ae'mo atupa'amo aino vayu hisigeno atalagauno alino avala aisigeno mago'e huno alopa ka'mo halo aigiye. 22 Ani kava hu'a vaya'mogimo saufa nofi alagafati ani'mo ali'a atafa afu agufa kepi'mo he nofiye. Hefisayana ani'mo'a atafa ke'mo ago aeno apalo atino ani'mo asagauno aisigeno ke'a'e'mo alagi hosugiye. Saufa ani'mo saufa afu agufa kepi'mo hefisageno'ae'mo afa'a hanegaiye, huno hapa pai'niye.

Sapati afinafe'mo hu'niya gemae.

(Mt 12:1-8; Lu 6:1-5)

23 Mago Sapati afina'mo Yesu'e ge'amo ne'afiya vaya'e'mo viti hoyamo laisigana ya'mo hane'niya hoya folagapi'mo u'nae. Yesu ge'amo ne'afiya vaya'mogimo viti alagamo lagi'a neme neme u'nae. 24 Falasi mono vaya'mogi Yesufe'mo, Apako, hu'a, gekamo ne'afiya vaya'mogimo Sapati afina'mo ke'aepa getimo ago amagi'a ne'atalae, hu'a ha pai'nae. 25 Yesu'a, Nevini'e avagi hu'a u'naya vaya'mogi'e'mo apaka te'nige'apae'mo hu'naya kavafe'mo ava gemo lekana paitapa o'afi'nafiye. 26 Amaiyata'a mono huno ne'apateya vekamo mai'nigeno'ae'mo Nevini'a mono nopi'mo haino Goti'mo ofalinimo ami'naya peleti mayamo alino neteno avagi hu'a u'naya vaya'aina alino apami'niye. Muki vaya'mogimo no'naya ne'ya'mo hane'niya'monanafa mono hu'a ne'apataya vaya'amogige'mo nesaya ne'ya'mo hane'niyana ani ne'ya'mo ne'nayana hosu kava'mo osu'nae. 27 Goti'a muki vaya'mogi Sapati afina'mo ha maesayafe'mo hu o'male'nifa Sapati afina'mo'a muki vaya'mo hapa maesiyafe'mo hu male'niye. 28 Ani kava'mo hu'niya'mofe'mo Vemo mafa'nemo'a Sapati afinate'e'mo ne'yagaiye, huno hapa pai'niye.

Copyright information for `KYG