Mark 4

Avina ya'mo hakale'niya vekamo ava gemae.

(Mt 13:1-9; Lu 8:4-8)

Halate Yesu'a Galeliya kotega ani kotu agi'nale'mo aepa faino alino apaya male'niye. Asole vaya'mo agaetegamo e'a ali'a anupa hu'a mai'nageno'ae'mo sipifi'mo haino fai mai'niye. Sipimo anipi'mo hane'nige'a ani agi'nale'mo mai'nae. Agaemo mago'e huno aeno kalafefa gemo huno alino apaya maleno'ae'mo, Afiyo, huno, mago vekamo'a avina ya'mo hakalesiyafe'mo hoya'alegamo u'niye. Avina ya'mo yaga auno ataleme ataleme u'nigeno'ae'mo mago avina ya'mo kate'mo asagauno ai'nige'a nama anaga'mogi e'a ne'nae. Mago avina ya'mo yafa agotofule'mo aise mopamo hane'niya yate'mo asagauno ai'niye. Aise mopamo hane'niya'mofe'mo malage huno hage'nigeno'ae'mo yegemo'mo haineno ne'agegeno'ae'mo leno asaga li'niye. Hafu'yamo o'ae'niya'mofe'mo ago falu te'niye. Mago avina ya'mo aufe nofi'mo hane'niya mopafi'mo asagauno ai'nigeno aufe nofi'mo'a hageno hai'neno kino ati kae'nigeno alagamo o'ae'niye. Mago avina ya'mo alagepa mopafi'mo asagauno aiteno hageno haineno alagamo ae'niye. Teti'a alagamo aege sigisiti'amo aege vani hataleti'amo aege huno ae'niye. Gemo afisaya lapakesamo hane'nisiyana mani gemo afiyo, huno hapa pai'niye.

10 Yesu'a agai'age'mo mai'nige'apae'mo ge'amo afi'naya vaya'e tuolofu'a vaya'mo ge'amo ne'afiya vaya'mogi'e'mo e'a, mani aeka kalafefa gemo hu'nana gemo aepa'amo laha paiyo, hu'a afi ge'nageno'ae'mo 11 Goti'a yagaino ne'apateya kavafe'mo ava gemo fala ki'niya gemo aepa'amo afisayafe'mo ago alino lapami'niya'monanafa malaga vaya'aife'mo ani agufa ae'na kalafefa ge'age'mo hu'na hapa nepauve.

12 Agege agege hu'a maigayana age'a aeto osuge afige afige hu'a maigayana afi'a aeto osuge hu'a maisayafe'mo ani agufa ae'na kalafefa gemo hapa nepauve. Afi'a aeto hute'a ai'a atagine'a Gotitegamo esageno hosu kava'apimo afa'a alino o'atalesiyafe'mo ani agufa ae'na kalafefa gemo hapa nepauve,
huno hapa pai'niye.

13 Hapa paiteno'ae'mo, ani ae'na kalafefa gemo aepa'amo o'afi'nafiye. Ani ae'na kalafefa gemo aepa'amo o'afi'nisayana haiya kava hutapa muki ae'na kalafefa gemo aepa'amo afigae. 14 Avina ya'mo nehakaleya vekamo'a Goti ge'amo nehakale. 15 Mago avina ya'mo kate'mo asagauno ai'niya avina yakana hu'a vaya'mogi Goti ge'amo ne'afigeno'ae'mo Satani'a eno apaipafi'mo hakale'niya gemo alinino ne'viye. 16 Mago avina ya'mo yafa agotofule'mo asagauno ai'niya avina yakana hu'a vaya'mogi Goti ge'amo afite'apae'mo malage hu'a apamogaga ne'aiye. 17 Apamogaga ne'aiya'monanafa hapafu'ya'apimo o'ae'niya'mofe'mo aise afina'mo mai'nageno'ae'mo apakaetegamo hanageke ya'mo afole aige Goti ge'amo no'afiya vaya'mogi apaini hu'a apatege nehage'apae'mo malage hu'a ago asagau'a ne'aiye. 18 Mago avina ya'mo aufe nofi hane'niya mopafi'mo asagauno ai'niya avina yakana hu'a mago vaya'mogi Goti ge'amo afite'apae'mo ma mopafi kavafe'mo hapausoli huge monimo'a humi apate'nige'a lusi kava huno hapauge mago'e ya'mo alisayafe'mo hapa'ye huge hu'a ne'maigeno'ae'mo ani kava'mo'a Goti ge'amo ago aeno ati nekaegeno'ae'mo alagamo no'ae. 20 Mago avina ya'mo alagepa mopafi'mo asagauno ai'niya avina yakana hu'a mago vaya'mogi Goti ge'amo afite'apae'mo ali'a apaipafi'mo ne'malageno'ae'mo teti'a alagamo aege sigisiti'a alagamo aege vani hataleti'a alagamo aege hu'a ne'maiye, huno hapa pai'niye.

Lamu kanife'mo ava gemo hu'niya gemae.

(Lu 8:16-18)

21 Hapa paiteno'ae'mo, lamufi'mo kani ae'a kaete'apae'mo paketi afe'alumelaga malege hipagapi'mo malege hu'a ne'malafiye. Ha'ao hi'yalamuteke'mo ne'malae. 22 Muki ya'amo fala kino hane'niyanageno henaga'amo afole aigiye. Muki ya'amo aeno ati kae male'niyanageno henaga'amo ha le yategamo afole aigiye. 23 Gemo ne'afisaya lapakesamo hane'nisiyana mani gemo afiyo. 24 Gemo ne'afitapae'mo alagepa hutapa lapakesamo afiyo. Afitetapae'mo lapaipa lapakesamo ne'amisageno'ae'mo Goti'a ani kava huno lapamigiye. Alagepa hutapa ne'afisayana mago'e huno alino lapamigiye. 25 Ali'naya vaya'aina mago'e huno alino apamigiye. O'ali'nisaya vaya'ai apayapati'mo aise'amo ali'nisaya ya'mo hapafaleno atalegaiye, huno hapa pai'niye.

26 Hapa paiteno'ae'mo, Goti'a yagaino ne'apateya kava huno mago vekamo'a avina ya'mo hoyafi'mo nehakale. 27 Hani'ilagamo havaege felugamo umenitata huge nehigeno'ae'mo avina ya'mo nehageya'monanafa no'age. 28 Mopamoke'mo ani agufa ali'ya'mo ne'aligeno ne'ya'mo afole ne'aiye. Hogoteno yosa'age'mo hageteno'aeke'mo haita'amo maleteno ne'ya'amo afole ne'aiye. 29 Ne'ya'amo nelegeno'ae'mo ani vekamo'a naipeleti'mo heno hatagauno ne'aliye, huno hapa pai'niye.

Masateti avina yafe'mo ava gemo hu'niya gemae

(Mt 13:31-32; Lu 13:18-19)

30 Hapa paiteno'ae'mo, Goti'a yagaino ne'apateya kava'mo'a na agufa kavakana huno hane'niye. Ani kavafe'mo haiya agufa aune gemo hisune. 31 Ina kava'mo huno mago vekamo'a aise avina ya'mo agi'amo masateti avina ya'mo hakale'niye. Muki avina ya'amo alopa avina ya'mo hane'niya'mofe'mo ani aise avina ya'mo ago aeno aga se'niye. 32 Aise avina ya'mo hane'niya'monanafa hakale male'nigeno'ae'mo hagenuno haino alopa heteno'ae'mo muki ne'ya'amo ago aeno aga seno akopamo ae'nige'apae'mo nama anaga'mogimo akopa'amo ulunapi'mo apano'mo nekiye, huno hapa pai'niye. 33 Yesu'a mago'e huno ani agufa aeno kalafefa gefati'mo afa'a afisayafe'mo aeno hakalo huno hapa pai'niye. 34 Aeno kalafefa ge'age'mo huno hapa pai'niya'monanafa agai'ageke'mo mai'neno'ae'mo ge'amo ne'afiya vaya'aifeke'mo ani gemo aepa'amo hapa pai'niye.

Yesu'a yasi'e ani'e'mo afa'a hane'ao, huno hu'niya gemae

(Mt 8:23-27; Lu 8:22-25)

35 Ani afina'mo une'amo Yesu'a ge'amo ne'afiya vaya'aife'mo, mugagayaga faligamo vigetao, huno hapa pai'niye. 36 Hapa pai'nige'a muki vaya'amo apatale'a Yesu'a mai'niya sipifi'mo hai'a maite'a avaleli'a u'nae. Ne'vageno'ae'mo mago alu sipi'e'mo u'nige'a lokaeli'a u'nae. 37 Ne'vageno'ae'mo lusi kava huno yasimo aliteno ani'mo aino holakau holakau huno haineno sipifi'mo aeno havaite'nigeno aeno lapanegefe'mo hu'niye. 38 Yesu'a sipimo akamelegamo afita aino havaeno mai'niye. Ge'amo ne'afiya vaya'mogi haune'a ate'ne'apae'mo, tisao, hu'a, lagaemo aise afina'mo ani'mo nesuna agufa kava'mo nehunanagi lagaefe'mo kagesamo no'afipiye, hu'a ha pai'nae. 39 He tino yasie'mo ge hauteno anife'mo, afa'a maiyo, huno hu'nigeno yasimo hano hu'nigeno ani'mo afa'a hane'niye. 40 Yesu'a ge'amo ne'afiya vaya'aife'mo, na kava higetapa lusi kava hutapa koli nehae. Na kava higetapae'mo nagaefe'mo lapakesa afitapa fatago nosae, huno hapa pai'nige'apae'mo 41 lusi kava hu'a koli nehu'a apakai'apimo ge huge afige hu'apae'mo, na agufa vekamo mai'niye. Yasimo'e ani'mo'e'mo ge'amo ne'afi'ae, hu'a hu'nae.

Copyright information for `KYG