Mark 7

Yu vaya'mogi apakinago vaya'aife'mo hu'niya gemae

(Mt 15:1-9)

Falasi mono vaya'e ke'aepa gemo avo'mo kae'a ali'a apaya ne'malaya vaya'e'mo Yulusalemu kotegati'mo Yesutegamo e'a ali'a anupa hu'a mai'nae. Mai'ne'apae'mo apakayana mago Yesu ge'amo ne'afiya vaya'mogi Yu mono gemo akame hu'a apaya'mo sese osu'ne'a ne'ya'mo afa'a ali'a ne'nage'a apakete'apae'mo, hosu kava'mo nehae, hu'a hu'nae. Falasi mono vaya'e muki Yu vaya'mogi'e'mo apakinago vaya'ai ge'apimo akame hisayafe'mo apaya'mo sese osu'nisayana ne'ya'mo afa'a ali'a o'negae. Maketi kumategati'mo e'apae'mo apaya'mo sese osu'nisayana ne'ya'mo afa'a ali'a o'negae. Apakaemo apakinago vaya'ai ke'aepa gemo asole gemo akame hute'a kapu'apigi samo'apigi yuvapa'apigi hipa'apigi hu'a sese nehae. Falasi mono vaya'e ke'aepa gemo avo'mo kae'a ali'a apaya ne'malaya vaya'mogi'e'mo Yesufe'mo ani kavafe'mo, Na kava hige'apae'mo gekamo ne'afiya vaya'mogi laginago vaya'ai ke'aepa gemo akame hu'a apaya'mo sese osu'ne'a ne'ya'mo fiku ali'a ne'nae, hu'a afi ge'nae. Hu'a afi ge'nageno'ae'mo, Aiyeya'a lapakaefe'mo alagi lama gemo Gotitegati'mo ali'niye. Lapakaemo aetapa ati nekaya vayane. Aiyeya'a huno'ae'mo,

Ani vaya'mogi apavaya'aletike'mo nagi'nile'mo ali'a asaga hu'a ne'nataya'monanafa apaipa'amo'mo afagi'ale'mo hane'niye.
Nagaefe'mo fikumo mono nehae. Vaya'mogimo afisayafe'mo ma mopafi vaya'ai ke'aepa gemo ali'a apaya ne'malae,
huno avo'mo kae male'niye.
Ani gelefe'mo lapakaemo Goti ke'aepa ge'amo ataletapa ma mopafi vaya'ai ge'apimo akame nehae. Akame nehutapa kapugi samogi muki yanagi hutapa sese nehae. Goti ke'aepa ge'amo ataletapa lapakinago vaya'ai ke'aepa gemo akame hisayafe'mo alagepa hutapa afi'nae, huno ke avoya gemo hu'niye. 10 Mosese'a huno'ae'mo,Itatapi afotapimogi apaki'apile'mo alitapa asaga hutetapa apaiyafi'mo maiyo. Mago vaya'mogimo ita'api afo'apimogife'mo hu'a faipa hu'a apatesayana kamiti apamagige'a faliyo, huno hu'niye. 11 Huno hu'niya'monanafa mago vekamo'mo ita'amofe'mofi afo'amofe'mofi, kaha maesiya kagemi ya'nimo Goti'mo amisuva yake'mo hane'niyanage'na olanamiguve, huno hana paisiya'mo'mo lapakaemo, he, kanalene, huta hutetapae'mo, ita'amo'mofi afo'amo'mofi huno hana o'maegaiye, hutapa nehae. 13 Ani agufa gemo hutetapae'mo Goti ge'amo ago amagita ataletetapa lapakinago vaya'ai gege'mo akame nehae. Mago'e hutapa ani agufa kava'mo nehae, huno hu'niye.

Vaya'mo alino hosu huno ne'apateya kavafe'mo hu'niya gemae

(Mt 15:10-20)

14 Yesu'a halate muki vaya'aife'mo ge hu'nige'a e'a ali'a anupa hu'a mai'nageno'ae'mo, Ge'nimo afitapa aeto hiyo. 15 Malaga hane'nisiya ya'mo'a vaya'ai apakupafi'mo nelamisiyana vaya'mo alino hosu huno o'apategaiya'monanafa apaipafatike'mo haineno apavayafati'mo afole aisiya gemoke'mo vaya'mo alino hosu huno apategaiye. 16 Gemo afisaya lapakesamo hane'nisiyana mani gemo afiyo, huno hapa pai'niye. 17 Agaemo muki ve a'nemo apatalenuno haino nopi'mo mai'nige'apae'mo ge'amo ne'afiya vaya'mogi aeno kalafefa ge'amo aepa'ae'mo ge hu'a afi ge'nae. 18 Afi ge'nageno'ae'mo, lapakae'e'mo afitapa aeto nosafiye. Muki malaga hane'nisiya ya'mo'a lamino apakupafi'mo hane'neno alino hosu huno o'apategaiye, hutapa o'afi'nafiye. 19 Apaipafi'mo nolamifa apakupafike'mo nelamige'a ago aifa le'a ne'atalaya'mofe'mo alino hosu huno o'apategaiye. Ani kava'mo huno apakupamo'mo muki ne'ya'mo alino alagepa huno ne'ate, huno hapa pai'niye 20 Yesu'a mago'e gemo huno'ae'mo, mago vekamo'a agai'a aipafati'mo haineno afole ne'aiya ya'moke'mo agai'amo alino hosu huno ne'ate. 21 Apakufafi'mo hane'niya ya'mo apaipafati'mo hosu apakesamo afole aige kumai kava'mo afole aige a'mafa'nemo ne'aliya kava'mo afole aige vaya'mo nehapaya kava'mo afole aige 22 kumaya ne'aliya kava'mo afole aige hapa'ye nehiya kava'mo afole aige muki agufa agafa hosu kava'mo afole aige aigofe kava'mo afole aige ge o'afi'a kumai kava'mo nehaya kava'mo afole aige apakete'a apaipa kafamo nehapaya kava'mo afole aige hu'a faipa hu'a ne'apataya gemo afole aige himu'namu kava nehaya kava'mo afole aige negi nagi kava'mo afole aige huno afole ne'aiye. 23 Asole ani agufa hosu kava'mo apaipafati'mo afole aiteno vaya'aina alino hosu huno ne'apate, huno hapa pai'niye.

Mago a kanomo'mo Yesufe'mo agesa afino fatago hu'niya gemae

(Mt 15:21-28)

24 Yesu'a mani kotegamo ataleno Taiya taoni'e Saitoni taoni'e'mo hane'na'a haopalegamo u'niye. Uno mago nopi'mo haino mai'neno'ae'mo mago vekamo'mo, Yesu'a ani nopi'mo eno mai'niye huno hisiyafe'mo ohau'niya'monanafa ago age'nae. 25 Mago a kanomo'a Yesu ava gemo afiteno eno'ae'mo aiyafi'mo ale'ya faino ape huno mai'niye. Ani a kanomo a'mafa'ne'amo aipafi'mo hosu aune vekamo mai'niye. Ani a kanomo Yu nofi a kanomo o'mai'nifa Galiki nofi a'mo mai'nigeno ko'amo Siliya Finisiya kotegamo hane'niye. Agaemo Yesufe'mo ina gemo huno afi ge'niye. Kahao ke hovanagi hosu aune vekamo a'mafa'ne'nimo aipafati'mo alika hafaika atalo, huno afige afige huno mai'nigeno Yesu'a ha paino'ae'mo, 27 hogote'a mafa'nemogimo ne'ya'mo ne'a apamu hugae. Mafa'nemogi nesaya ne'yapati'mo ali'na kalamo apamisuvana kanale osugiye, huno ha pai'nigeno'ae'mo, 28 Ala kava nene, huno, lama gemo hu'nana'monanafa hi'yalamu'mo afe'alumelagamo kalamo mai'ne'a mafa'nemogi nete'a atalaya ne'ya atupamo ne'naya yane, huno ha pai'nigeno'ae'mo, 29 ani gemo nehana'mofe'mo nokalegamo afa'a uvo. Hosu aune vekamo a'mafa'nekamo aipafati'mo ago ataleno u'niye, huno ha pai'niye. 30 Ha pai'nigeno no'alegamo uno ageyana a'mafa'ne'amo hipale'mo afa'a havaeno mai'nigeno age'niye. Hosu aune vekamo aipafati'mo ago ataleno u'niya'mofe'mo afa'a havaeno mai'niye.

Yesu'a mago agesamo akani'nigeno age no'aiya vekamo alino alagepa huno ate'niya gemae

31 Yesu'a Taiya haopalegati'mo atalenuno Saitoni taonimo aeno aga senuno mago'e huno naya lole'a taonimo aeno aga senuno Galeliya ani kotu haopale'mo uno ava'yi hu'niye. 32 Mago vaya'mogimo agesamo akani'nigeno age no'aiya vekamo avaleli'a Yesutegamo e'apae'mo, kahao ke honanagi agufale'mo kaya'mo male'neka alika alagepa huka ato, hu'a afi ge'nageno'ae'mo 33 Yesu'a muki vaya'aina anile'mo apataleno ani vekamo agai'age'mo avalelinuno ati yagaina ayatalateti'mo agesa katalapi'mo vaiteno ati yagaina ayate'mo avi'na heteno avenafu'nale'mo male'niye. 34 Male'neno koku'nategamo alino maku huno ageteno avamusamo aiteno agai'a gefati'mo huno'ae'mo, efata ani gemo huno aika halo aiyo, huno ha pai'nigeno 35 agesamo aino halo ai'nigeno avenafu'nale'mo atafauno ne'maiya ya'mo ataleno u'nigeno agemo alagepa huno ai'niye. 36 Yesu'a, ani kavafe'mo ava gemo hutapa hapa opaiyo, huno hapa pai'niye. Mago'e mago'e huno ani gemo hapa pai'niya'monanafa o'afi'a mago'e hu'a ava gemo hulitata hu'a hapa pai'nae. 37 Hapa pai'nage'apae'mo muki vaya'mogi afite'a lusi kava hu'a hapau aite'apae'mo, muki nehiya kava'amo alagepa kava'age'mo nehiye, hu'a hute'a, Apakesamo akani'niya vaya'aina alino halo aino apatege apake no'aiya vaya'aina alino alagepa huno apatege nehiye, hu'a hu'nae.

Copyright information for `KYG