Mark 8

Yesu'a fo tauseni'a vaya'mo ne'ya'mo apami'niya gemae

(Mt 15:32-39)

Aise afina'mo utege'a halate asole vaya'mo e'a ali'a anupa hu'a mai'nae. Ne'ya'apimo ago hano hu'nigeno Yesu'a ge'amo ne'afiya vaya'aife'mo ge hu'nige'a e'nageno'ae'mo, muki vaya'mo nagae'e'mo lole'e mago'e afina'mo lokae'a mai'nageno ne'ya'apimo ohane'niya'mofe'mo nahau hu'na ne'apatove. Mago vaya'amo afagitegati'mo e'naya'mofe'mo ne'ya'mo o'apami'ne'na no'apilegamo fiku ali'na apatesuge'a usayategamo u'a kategamo apaunena aisige'a asagau'a aigae, huno hapa pai'niye. Huno hapa pai'nige'apae'mo ge'amo ne'afiya vaya'mogimo, ka'me kotegamo eta mai'nona'mofe'mo muki vaya'mo apamisuna ne'ya'mo haiyategati'mo aligune, hu'a afi ge'nageno'ae'mo, na magi peleti mayamo ali'nae, huno apafi ge'nige'apae'mo, seveni'a peleti mayamo hane'niye, hu'a ha pai'nae. Agaemo muki vaya'aife'mo hapa paino'ae'mo, mopale'mo maiyo, huno hapa paiteno seveni'a peleti mayamo ali'neno Gotife'mo hao ke heteno lo aeno ge'amo ne'afiya vaya'aina apami'nige'a ali'a apami'nae. Agaemo aise aise noyame ali'naya noyamemo ali'neno Gotife'mo hao ke heteno ge'amo ne'afiya vaya'aife'mo huno'ae'mo, alitapa apamiyo, huno hapa pai'niye. Muki vaya'amogimo ne'a apamu hute'a ne'ya atupa'amo ali'a seveni'a honafa yuvapafi'mo male'a havai te'nae. Fo tauseni'a agufa vaya'mogimo ne'nae. Netageno alino apatege'a u'nae. 10 Utageno ge'amo ne'afiya vaya'e'mo sipifi'mo hai'a maite'a Nalamanuta haopalegamo u'nae.

Falasi mono vaya'mogimo, no'agona kava'mo alika lave liyo, hu'a hu'naya gemae

(Mt 16:1-4)

11 Mago Falasi vaya'mo Yesutegamo e'a mago geleti'mo aepa fai'a ge kavetamo hu'nae. Hu'apae'mo, koku'nategati'mo no'agona lokiya aune kava'mo alika lave ligeta ageno, hu'a amalageka hu'a afi ge'nae. 12 Yesu'a avamusa'mo aiteno'ae'mo, na kava hige'apae'mo hemeni afina'mo mai'naya vaya'mogi hu'apae'mo, no'agona lokiya aune kava'mo alika lave liyo, hu'a nehae. Alagi lama gemo lapa nepauve, huno, nagaemo mago aune kava'mo hemeni afina'mo mai'naya vaya'aina ali'na apave oliguve, huno hapa paiteno apataleno halate sipifi'mo haino maiteno mugagaya faligamo lakaeno u'niye.

Heloti'e Falasi vaya'mogi'e'mo nehaya kavafe'mo hu'niya gemae

(Mt 16:5-12)

14 Ge'amo ne'afiya vaya'mogimo peleti mayae'mo apake kani'nige'a o'ali'a u'nageno sipifi'mo magoke peleti mayatomo hane'niye. 15 Yesu'a ina gemo lokiya gemo huno hapa pai'niye. Alagepa hutapa yagaiyo. Falasi vaya'ai peleti mayafi'mo aeno apafu neleya ya'e Heloti akame nehaya vaya'ai peleti mayafi'mo aeno apafu neleya ya'efe'mo ehetapiye, huno hapa pai'nige'apae'mo 16 apakai'apimo ge huge afige hu'apae'mo, peleti mayatimo ohane'niya'mofe'mo mani gemo nehiye, hu'a hu'nageno'e'mo 17 Yesu'a ani gemo ago afi'niya'mofe'mo, na kava higetapae'mo peleti mayamo o'ali'naya kavafe'mo ge huge afige nehae. Hu'nova kava'mo agetapa aeto osutapa maime maime etapa hemeni'e'mo agetapa aeto osu'nafiye. Lokiya lapaipamo haneme haneme eno hemeni'e'mo ani agufa lapaipage'mo hane'nifiye. 18 Lapaulagamo hane'niya'monanafa o'age'nafiye. Lapakesamo hane'niya'monanafa o'afi'nafiye. Hu'nova kavafe'mo ago lapake kani'nifiye. 19 Nagaemo faefu'a peleti mayamo ali'na akaya he'na faefu tauseni'a vaya'mo apami'nogetapae'mo atupa'amo alitapa na magi honafa yuvapafi'mo maletapa havai te'nae, huno apafi ge'nige'apae'mo, tuolofu'ae, hu'a ha pai'nae. 20 Nagaemo seveni'a peleti mayamo ali'na akaya he'na fo tauseni'a vaya'mo apami'nogetapae'mo atupa'amo alitapa na magi honafa yuvapafi'mo maletapa havai te'nae, huno apafi ge'nige'apae'mo, seveni'ae, hu'a ha pai'nae. 21 Agaemo, ageme ageme etapa mai'nayana hemeni'e'mo o'age'nafiye, huno apafi ge'niye.

Yesu'a Metasaita taonifi'mo uno aulagamo ali hu'niya vekamo alino ayakeno ate'niya gemae

22 Apakaemo u'a Metasaita taonifi'mo ava'yi hu'nage'apae'mo mago vaya'mogi aulagamo ali hu'niya vekamo avaleli'a Yesutegamo e'apae'mo, kahao ke honanagi agaete'mo kaya'mo malo, hu'a ha pai'nageno 23 ani aulagamo ali hu'niya vekamo ayate alino avalelino taoni malaga u'niye. Uno avenatu'na heteno ayatala'mo aulagalate'mo maleteno'ae'mo, mago ya'mo ne'agapiye, huno afi ge'niye. 24 Afi ge'nigeno alino maku huno ageteno'ae'mo, apakovana vaya'mo yosagana hu'a mai'ne'a umenitata nehae, huno ha pai'nigeno 25 halate ayatala'mo aulagalate'mo male'neno'ae'mo, alika maku huka ago, huno hu'nigeno aulagala'mo ageno ayaketeno muki ya'amo ageno alagepa huno age'niye. 26 Yesu'a no'alegamo alino ateteno'ae'mo, ukae'mo taonifi'mo uka ohaika taonifi'mo mai'nisaya vaya'aife'mo hapa opaiyo, huno ha pai'niye.

Pita'a Yesufe'mo, Kalaisigamo mai'nane, huno hu'niya gemae

(Mt 16:13-20; Lu 9:18-21)

27 Yesu'e ge'amo ne'afiya vaya'e'mo Sisaliya Filipai kotegamo hane'niya taoni'afi taoni'afi'mo ugefe'mo kategamo ne'u'apae'mo, vaya'mogimo nagaefe'mo, ina la'nae, hu'a nehae, huno apafi ge'nige'apae'mo, 28 Mago vaya'amogi kagaefe'mo hu'apae'mo, Yoni'a ani'mo faleno ne'apateya vekamo mai'niye, hu'a huge mago vaya'amogi, Ilaiya'a mai'niye, hu'a huge mago vaya'amogi, Gotitegati gemo alini e'a ae'a hakalo hu'a hapa nepaiya vayapati vekamo mai'niye, hu'a huge hu'a nehae, hu'a ha pai'nae. 29 Ha pai'nageno'ae'mo, Ani gemo hu'a nehaya'monanafa lapakaemo nagaefe'mo ina la'nae, hutapa nehae, huno apafi ge'nigeno Pita'a ha paino'ae'mo, Goti'a huno'ae'mo, Kalaisi ne'mo ali'na atesugeno emineno ma mopafati'mo afole aigiye, huno hu'niya vekamo Kalaisigamo mai'nane, huno ha pai'niye. 30 Huno ha pai'nigeno Yesu'a, ina la'namofi hutapa mago vekae'mo alagi ha opaiyo, huno hapa pai'niye.

Yesu'a, falite'na halate he tiguve, huno hu'niya gemae

(Mt 16:21-28; Lu 9:22-27)

31 Ani afina'mo Yesu'a aepa faino alino apaya ne'maleno'ae'mo, Vemo mafa'nemo'a muki alu kana ya alu kana ya'mo ne'alisige'apae'mo vayatama vayanagi mono hu'a ne'apataya vaya'aite'mo yagai'a ne'apataya vayanagi ke'aepa gemo avo'mo kae'a ali'a apaya ne'malaya vayanagi hu'a apakame'yamo amisage'apae'mo kamiti amagisageno faliteno lole'e mago'e afina'mo utesigeno halate ago he tigiye, huno hapa pai'niye. 32 Yesu'a ani gemo huno afole aino hapa pai'nigeno Pita'a amasage huno avalelinuno ge hauno'ae'mo, ani hana agufa hosu kate'mo visanafe'mo kagesamo o'afiyo, huno ha pai'nigeno 33 aino afe leno ge'amo ne'afiya vaya'aina aulu hapaeno apake'neno Pitafe'mo ge hauno'ae'mo, Sataniyo, huno, ataleka nakamelegamo uvo. Goti'a agesa afi'niya kavafe'mo kagesamo o'afi'napa ma mopafi vaya'mogimo apakesamo ne'afiya agufa kavafe'mo kagesamo afi'nane, huno ha pai'niye. 34 Agaemo muki vaya'e ge'amo ne'afiya vaya'efe'mo ge hu'nige'a e'nageno hapa paino'ae'mo, ina lagimo nakame hisayafe'mo hu'nisafi apakai'apimo hapau'niya kavafe'mo ha'ao, hute'a atale'a malipu yosa'apimo ali'a kofili'a nakame hiyo. 35 Ina lagimo ma mopafi'mo alagepa hu'a maige maige hu'a maisaya kavate'mo yagai'a ate'a mai'nisafi falisageno'ae'mo alagepa hu'a ne'maiya kava'apimo alagi hano hugiye. Ina lagimo nagaetefenagi alagepa faigoko ge'nilefenagi hu'a alagepa hu'a ne'maiya kava'apimo atale'nisayana alagepa hu'a maisaya ya'apimo aligae. 36 Mago vekamo'a muki ma mopafi hane'niya ya'amo alino hano hu'niya'monanafa auneme'amo lageso hisiyana akamelegati mago'e ya'mo ali'nifiye. Ha'ao, o'ali'nifa hogote ya'mo ago atale'niye. 37 Auneme'amo lageso hisiyana na agufa miyateti'mo halate miya faino aligiye. 38 Hemeni afina'mo mai'naya vaya'mogi anau'apimo'mo atale'a kumai he'a ne'vaya a'negana hu'a mai'nae. Ani vayapati'mo ina lagimo nagae'e ge'nile'efe'mo apavagage nehisifigeno Vemo mafa'nemo'a Afo'amotegati'mo ha le konali ya'amo aliteno apaote enisole vaya'a'e'mo eminesiya afina'mo apakaefe'mo avagage hugiye, huno hapa pai'niye.

Copyright information for `KYG