Mark 9

Huno hapa paiteno'ae'mo, Alagi lama gemo lapa nepauve, huno, hemenimo mai'naya vayapati'mo mago vaya'amo ofali'a afa'a mai'ne'a Goti'a yagaino ne'apateya kava'mo himamu'aleti'mo alino afole aino atesige'a agegae, huno hapa pai'niye.

Kalaisi'a aeto agufa agufamo alino hamale'niya gemae

(Mt 17:1-13; Lu 9:28-36)

Sigisi'a afina'mo utegeno Yesu'a Pita'agi Yemisi'agi Yoni'agi huno apavalelinuno yatala avefi'mo apakai'apige'mo hai'nae. Hai'a mai'ne'apae'mo agayana Yesu'a aeto agufa agufamo ali'nigeno apaulagale'mo kukena'alegati'mo aeno lata late nehuno yaveyave'age'mo hu'niye. Mago ma mopafi vekamo'a kukena'amo sese hisigeno'ae'mo ani agufa yaveyave osisiya agufa kava'mo hu'niye. Apakaemo anakayana Ilaiya'e Mosese'e'mo afole aite'ana Yesu'e'mo ge huge afige hu'a mai'nae. Pita'a, Tisao, huno, manile'mo maisunana kanale hu'niye. Lole'e mago'e hage no'mo kigune. Kagae no'mo kite Mosese no'mo kite Ilaiya no'mo kite huta kigune, huno ha pai'niye. Lusi kava hu'a koli hu'a mai'naya'mofe'mo Pita'a na agufa gemo hugufi, huno agesamo o'afino fiku gemo hu'niye. Hu'nigeno hiya'mo kino apati kae'nigeno ani hiyapati'mo mago gemo huno'ae'mo, ani vekae'mo nahau nayamopafi'mo ne'nahaiya mafa'ne'nimo mai'nigi ge'amo afiyo, huno hapa pai'niye. Malage huno muki haopalegamo alino ha le'nige'a age'nayana lole vekala'mo o'anake'nafa Yesu'a agai'age'mo mai'nige'a age'nae. Aveleti'mo atale'a u'a nelami'apae'mo Yesu'a, age'naya kavafe'mo ava gemo hutapa hapa opaitapa maime maime ne'vigeno'ao Vemo mafa'nemo kanolufati'mo he tisiya afinake'mo ava gemo hutapa hapa paiyo, huno hapa pai'niye. 10 Ani gemo afite'apae'mo mago vaya'aife'mo ava gemo hu'a hapa opai'a apakai'apige'mo kanolufati'mo he tisiya kavafeke'mo ge huge afige hu'a mai'nae. 11 Apakaemo Yesufe'mo, Na kava hige'apae'mo ke'aepa gemo ali'a apaya ne'malaya vaya'mogi hu'apae'mo, Ilaiya'a hogoteno afole aitesigeno'ae, hu'a hu'nae, hu'a afi ge'nageno'ae'mo, 12 He, Ilaiya'a muki kava'mo alino api aino atesiyafe'mo hogoteno ago afole aigiya'monanafa na kava higeno'ae'mo, Vemo mafa'nemo'a muki alu kana ya alu kana ya'mo ali'nisige'apae'mo, ina agufa vekamo mai'niye, hu'a hute'a agi'ale'mo ali'a afepi ategae, huno avo'mo kae male'niye. 13 Lapa nepauva'monanafa Ilaiya'a ago afole ai'nige'apae'mo agaetegamo hapau'niya agufa kava'mo ago hu'a amagi'nae. Goti mukufi'mo avo'mo kae male'niya gemo'a ani kavafe'mo hu'niye, huno hapa pai'niye.

Yesu'a hosu aune vekamo aipafi'mo mai'niya mafa'nemo alino alagepa huno ate'niya gemae

(Mt 17:14-21; Lu 9:37-43)

14 Apakaemo ge'amo ne'afiya vaya'aitegamo e'a apakayana asole vaya'mogimo fai'a ku ai'a apake'a mai'nage'a ke'aepa gemo avo'mo kae'a ali'a apaya ne'malaya vaya'e'mo ge vai'nae. 15 Ani asole vaya'mogimo Yesu'a e'nige'a agete'apae'mo hapau aite'a malage hu'a nagu nagu hu'a u'a ge amamae'nae. 16 Agaemo huno'ae'mo, na agufa kavafe'mo apakae'e'mo etapa ge huge afige hutapa mai'nae, huno apafi ge'nigeno'ae'mo 17 asole vayapati'mo magoke vekamo'a Yesu ge'ale'mo aeno atagaina huno ha paino'ae'mo, Tisao, huno, hosu aune vekamo'a ve mafa'ne'nimo avayamo alino akani male'nige'nae'mo kagaetegamo avaleli'na ne'ove. 18 Hosu aune vekamo'a muki aupilagamo umenitata nehigeno'ae'mo atafauno alino mopafi yaga auno atale'nigeno avayafati'mo avenatu'na'mo'a hu'nigeno avepi'mo haniteno agufamo alino lokiya vaiteno ne'maiye. Nagaemo gekamo ne'afiya vaya'aife'mo, ani hosu aune vekamo alita hafaitapa ataleyo, hu'na hapa pai'nova'monanafa ali'a hafai'a o'atale'nae, huno ha pai'niye. 19 Ha pai'nigeno'ae'mo, ma mopafi'mo hemeni afina'mo mai'naya vayanagi lapakesa afitapa fatago nosaya vayanagi hu'na lapa pai'nae'mo, na magi afina'mo lapakae'e'mo maiguve. Na magi afina'mo lapakae'e'mo mai'ne'na kanamo alige alige hu'na maiguve. Nagaetegamo avalelitapa eyo, huno hapa pai'niye. 20 Apakaemo agaetegamo ani mafa'nemo avaleli'a ne'ageno'ae'mo hosu aune vekamo'a Yesu'mo ageteno'ae'mo malage huno alino ago'ya faino atale'nigeno hafosamo'a apamagi'nige'apae'mo nehaya agufa kava huteno mopafi'mo asagauno aiteno heleve heleve nehigeno avayafati'mo avenatu'na'mo hu'niye. 21 Yesu'a ani mafa'nemo afo'amofe'mo, haiya afinateti'mo ani kava'mo hu'niye, huno afi ge'nigeno'ae'mo, aise mafa'nemo mai'niya afinateti'mo ani kava'mo aepa faino haume eno hemenimo nehaiye. 22 Agaemo kamiti amagisiyafe'mo muki afina'ae afina'ae'mo amagino atafi'e anipi'e'mo ne'ate. Mago kava'mo lagaetegamo afa'a hisuekae'mo kahau huka lateteka laha mao, huno ha pai'nigeno'ae'mo 23 Yesu'a, kagaemo kagesa afika fatago hisana'mo'mo kanalene. Agesa afino fatago hisiya vekamo'a muki kava'mo afa'a hugiye, huno ha pai'nigeno 24 malage huno ani mafa'nemo afo'amo'mo aulagafati'mo aunumo emine'nigeno alopa gefati'mo ge huno'ae'mo, Ala kava nene, huno, Nagesa afi'na fatago hu'nova'monanafa nagesa afi'na fatago osu'novanagi afa'a naha mao, huno ha pai'niye. 25 Yesu'a apakeyana asole vaya'mo apakaetegamo nagu nagu hu'a e'nageno apaketeno hosu aune nefe'mo, agesamo alika akanika ateteka avayamo ge osisiyafe'mo alika akanika ate'nana hosu aune vekamo aipafati'mo emikeka kaune heka uteka halate eka haika aipafi'mo alagi o'maiyo, huno lokiya gemo huno ha pai'niye. 26 Huno ha pai'nigeno hosu aune vekamo'a kagegage huteno ani mafa'nemo alino ago'ya faino atale'nigeno hafosamo'a apamagi'nige'apae'mo nehaya agufa kava huge huge huno mai'nigeno hosu aune vekamo ataleno u'niye. Ani mafa'nemo faligekana huno mai'nige'apae'mo asole vaya'mogi hu'apae'mo ago fali'niye, hu'a hu'naya'monanafa 27 Yesu'a ha maeno ayate'mo alino he tino ate'niye. 28 Yesu'a atalenuno haino nopi'mo mai'nige'apae'mo ge'amo ne'afiya vaya'ageke'mo mai'ne'apae'mo, na kava higetae'mo hosu aune vekamo afa'a alita hafaita o'atale'none, hu'a afi ge'nageno'ae'mo, 29 ne'ya'mo mosi'netapa nunumu nehaya kavatetike'mo ani agufa hosu aune vekamo afa'a alita hafaitapa atalegae, huno hapa pai'niye.

Yesu'a halate mago'e huno, falite'na he tiguve, huno hapa pai'niya gemae

(Mt 17:22-23; Lu 9:43-45)

30 Apakaemo ani koteti'mo atale'a Galeliya kotegamo u'a ae'a aga se'a u'nae. Yesu'a ge'amo ne'afiya vaya'age'mo alino apaya male'niya'mofe'mo mago vaya'mogi Yesu'a eno mai'niye, hu'a hute'a esayafe'mo ohau'niye. Alino apaya maleno'ae'mo, Vemo mafa'nemo avaleli'u'a vaya'ai apayapi'mo apamisage'a kamiti amagigae. Amagisageno faliteno'ae'mo lole'e mago'e afina'mo utesigeno halate he tigiye, huno hapa pai'niye. 32 Apakaemo alino apaya male'niya gemo aepa'amo alagepa hu'a afi'a aeto osu'apae'mo loka hu'a afi gesayafe'mo hu'nayana koli hu'nae.

Ina la'mo hogote vekamo mai'niye, huno hu'niya gemae

(Mt 18:1-5; Lu 9:46-48)

33 Apakaemo Kapeneyamu taonifi'mo u'a ava'yi hute'a nopi'mo hai'a mai'ne'apae'mo Yesu'a ge'amo ne'afiya vaya'aife'mo ina ge huno apafi ge'niye. Kategamo ne'etapae'mo na agufa yane gemo hutetapa ge vai'nae. 34 Kategamo ne'e'apae'mo, lagaepati'mo ina la'mo hogote vekamo mai'niye, hu'a hute'a ge vai'naya gelefe'mo Yesu'a ge huno apafi ge'nige'apae'mo ge'ale'mo ae'a atagaina hu'a ha opai'nae. 35 Yesu'a fai mai'neno tuolofu'a vaya'mo ge'amo ne'afiya vaya'aife'mo ge hu'nige'a e'nageno'ae'mo, lapakaepati'mo mago vekamo'a hogote vekamo maigesuve, huno hu'nisiya vekamo'a hogote vekamo maisiyafe'mo henaga vekagana huno mai'neno muki vaya'aite'mo kayokayo veka'apimo mai'neno ali'ya'apimo alino maino, huno hapa pai'niye. 36 Hapa paiteno vaya'ai apaulagale'mo mago aise mafa'nemo alino he tino ate'niye. Ate'neno ani mafa'nemo anu ki'neno hapa paino'ae'mo, 37 Ina lagimo mani agufa mafa'nemo avale'a ali'a falu fala hu'a ne'atesafi ani kava hu'a navale'a ali'a falu fala hu'a ne'natae. Ali'a falu fala hu'a natesaya vaya'mogimo ani kava hu'a alino nate'nige'na emine'nova veka'e'mo avale'a ali'a falu fala hu'a nela'ata'ae, huno hapa pai'niye.

Yesu'a, mago vekamo kametimo o'mai'nisiyana lao vekamo mai'niye, huno hu'niya gemae

(Lu 9:49-50)

38 Yoni'a agaefe'mo, Tisao, huno, age'nonana mago vekamo'a kagikaleti'mo hosu apaune vaya'aina alino hapa faino ne'apatalegeta age'none. Lagaepati vekamo o'mai'niya'mofe'mo ani agufa kava'mo osuka afa'a atalo, huta ha pai'none, huno ha pai'niye. 39 Yesu'a, ha'ao, afa'a ato, hutapa osiyo. Mago vekamo'a nagi'nileti'mo no'agaya agufa aune kava'mo nehisiya'mo'mo nagi'nilefe'mo huno faipa huno o'nategaiye. 40 Mago vekamo'a kame huno nolatesiya'mo'mo lao vekamo mai'niye. 41 Lama gemo lapa nepauve, huno, mago vekamo'mo lapaketeno'ae'mo, Kalaisi vaya'amo mai'nae, huno agesamo afiteno nagi'nilefe'mo kapufi ani'mo hefino lapamisiyana miya'amo aligiye, huno hapa pai'niye.

Hosu kava'mo hisayafe'mo apayate ne'aliya kavafe'mo hu'niya gemae

(Mt 18:6-9; Lu 17:1-2)

42 Huno hapa paiteno'ae'mo, Mago vekamo'a ani agufa aise mafa'nemo'mo nagaefe'mo agesa afino fatago nehiya mafa'nemo'a hosu kava'mo hisiyafe'mo ayate'mo ali'nisiyana lusi hanageke ya'mo aligiye. Aligiya'monanafa hogoteno ayate'mo o'ali'nisige'apae'mo atafau'a alopa yafate'mo nofi aete'a lugo'afi'mo aete'a avaleli u'a solovala anipi'mo yaga au'a atalesageno'ae'mo aise hanageke ya'mo aligiye. 43 Inagi lapaya'mo'a hosu kava'mo hisayafe'mo alino he tino nelapatesigetapae'mo hetapa hatagautapa ataleyo. Magoke lapaya'mo hane'nisiyana maige maige hutapa maisaya kotegamo haitapa faletapa maisayana kanale hugiye. Lole lapaya'mo hane'nisiyana alagi yu oseno lege lege huno ne'maiya ata kopi'mo lamitapa maisageno'ae'mo alagi hosugiye. 44 Ata kopi'mo muki afina'mo hagifamogi apakufafi'mo ne'nayanageno atamo alagi yu osegaiye. 45 Lapaiyamo'mo hosu kava'mo hisayafe'mo alino he tino nelapatesigetapae'mo hetapa hatagautapa ataleyo. Magoke lapaiyamo hane'nisiyana maige maige hutapa maisaya kotegamo haitapa faletapa maisayana kanale hugiya'monanafa lole lapaiyamo hane'nisiyana alagi yu oseno lege lege huno ne'maiya ata kopi'mo lamitapa maisageno'ae'mo alagi hosugiye. 46 Ata kopi'mo muki afina'mo hagifamogimo apakufafi'mo ne'nayanageno atamo alagi yu osegaiye. 47 Lapaulagamo'mo hosu kava'mo hisayafe'mo alino he tino nelapatesigetapae'mo alita katitapa ataleyo. Magoke lapaulagamo hane'nisiyana maige maige hutapa maisaya kotegamo haitapa faletapa maisayana kanale hugiya'monanafa lole lapaulagamo hane'nisiyana alagi yu oseno lege lege huno ne'maiya ata kopi'mo lamitapa maisageno'ae'mo alagi hosugiye. 48 Ata kopi'mo muki afina'mo hagifamogimo apakufafi'mo ne'nayanageno atamo alagi yu osegaiye. 49 Ne'yate'mo solemo nefalaya kava huno muki vaya'ai apakufale'mo ata apalegaiye. Ani kava'mo hu'a Gotina ne'amiya yate'mo solemo falegaiye. 50 Solemo kanale ya'mo hane'niya'monanafa haga nehiya ya'amo hano hisige'apae'mo haiya kava hu'a halate haga nehiya ya'amo ali'a hamale'a atesageno haga hugiye. Lapaipafi'mo solekana huno hane'nisigetapa magoke lapaipa lapakesamo alitetapa alagepa hutapa magokepi lokaetapa maiyo, huno hapa pai'niye.

Copyright information for `KYG