Matthew 10

Yesu'a apa vaya'mo alino apate'nige'a u'naya gemae

(Mak 3:13-19; Luk 6:12-16)

Yesu'a tuolofu'a vaya'mo ge'amo ne'afiya vaya'aife'mo ge hu'nige'a e'a mai'nageno'ae'mo hosu apaune vaya'mo ali'a hapafai'a apatalege muki alu kaita alu kaita'mo hapau'nisiya vaya'mo ali'a hapage'a apatege hisaya himamu'apimo apami'niye. Ani tuolofu'a apa vaya'ai apaki'apimo hane'niye. Hogote ne'mo Saimoni'mo mago alu agi'amo Pita'agi agana'amo'mo E'nalu'agi Sepeti mafa'nela'mo Yemisi'agi agana'amo'mo Yoni'agi Filipi'agi Matolomiyu'agi Tomasi'agi Matiyu'a takesi moni ne'aliya vekagi Afiyasi mafa'nemo Yemisi'agi Ta'niyasi'agi Saimoni'mo gamani kavate'mo yagai'a ne'apataya kavafe'mo Seloti pati nenagi Yutasi Isakaliyoti kotega vekamo Yesu kutulu ya'mo nesiya vekamogi hu'a mai'nae.

Yesu'a ani tuolofu'a vaya'mo alino apateteno'ae'mo, Yu nofi vayapati'mo o'mai'nisaya vaya'aitega'e Samaliya vaya'aitega'e'mo o'viyo. Isaleli vayapati'mo lageso hu'naya sipisipi vaya'aitegage'mo viyo. Utapae'mo, Goti'a yagaino apatesiya kava'mo alagi hogo'amo afole aigefe hiye, hutapa aeta hakalo hutapa hapa paiyo. Kaita hapau'nisiya vaya'mo alitapa hapagetapa apatege falisaya vaya'mo alitapa he titapa apatege lepalosi ya'mo hapau'nisiya vaya'mo alita alagepa hutapa apatege hosu apaune vaya'mo alitapa hapafaitapa apatalege hulitapa viyo. Nagaemo fiku lapa mae'na lapami'nova kava hutapa fiku hapa maetapa apamiyo. Goli monimogi siluva monimogi ata leno asagalifa monimogi hutapa kutapifi'mo ailitapa o'viyo. 10 Vaya'ai ali'ya'mo ne'aliya vaya'mo afa'a maisaya ya'apimo ali'a apamisaya kava'mo hane'niya'mofe'mo kutapimogi lole siotitapimogi lole sutapimogi hayopa kayotapimogi hutapa alinitapa o'viyo.

11 Lapakaemo mago alopa taonifi'mofi aise taonifi'mofi hutapa utapa ava'yi hutetapae'mo ina la'mo alagi alisiya vekamo mai'niye, hutapa apafi getapa ani vekamo agetetapa no'afi'mo uta haitapa maime maime ne'utapae'mo ataletapa viyo. 12 Nopi'mo faleta nehaitapae'mo, alagepa hutapa maiyo, hutapa hapa paiyo. 13 Ani nopi'mo alagi alisaya vaya'mo mai'nisayana hisaya getapimo'a apakaepi'mo hanesige'a alagepa hu'a maigae. Alagi alisaya vaya'mo o'mai'nisayana alagepa hutapa maiyo, hutapa hisaya getapimo'a halate aino atagi neno lapakaitapilegamo egaiye. 14 Mago vaya'mogi ali'a falu fala hu'a olapatege getapimo o'afige hisayana ani vaya'ai no'apifati'mofi taoni'apifati'mofi hutapa ataletapa ugefe nehutapae'mo ili aetapa apatetetapa mumusopamo lapaigopalegati'mo aitapa fopo hutaletapa apataletapa viyo. 15 Lama ge lapa nepauve, huno, Goti'a agoti huno apatesiya afina'mo Gomola taonifi'mo mai'naya vaya'e Sotomi taonifi'mo mai'naya vaya'e'mo hanageke ya'mo aligaya'monanafa ani taonifi'mo mai'naya vaya'mogimo mago'e hu'a ae'a apaka se'a lusi hanageke ya'mo aligae.

16 Afiyo, hu'na, Nagaemo ali'na lapatesugetapa sipisipigana hutapa afela kalamo mai'naya folagapi'mo ugae. Nagalo'yavemogimo vaya'mogi o'apamagisayafe'mo vase vase hu'a ne'vaya kava hutapa viyo. Kaugo'yave namamogimo vaya'mo ohapae'a afa'a ne'maiya kava hutapa maiyo. 17 Ehetapiye. Mago vaya'mogi kalavusi hu'a lapatete'a agotile'mo lapavaleli'u'a mono no'apifi'mo nofi kayoteti'mo lapamagigae. 18 Agotile'mo lapavaleli'u'a lapatesagetapa gamani vaya'ai apaulagale'e kini vaya'ai apaulagale'e'mo he titapa mai'netapa Yu nofi vayapati'mo o'mai'naya vaya'aife'mo alagepa faigoko gemo aetapa hakalo hutapa hapa paigae. 19 Agoti hu'a lapatesagetapae'mo na agufa gemo huteta haiya agufa ge huta ge'apile'mo aeta atagaina huta hapa paigune, hutetapa lapausoli osiyo. Ani afina'mo afole aisigeno'ae'mo Goti Auneme'amo'mo hapa paisaya gemo alino lapamigiye. 20 Lapakaitapimo ani gemo afa'a osugaya'monanafa afotapimo Auneme'amo'mo lapavayafati'mo ge hugiye.

21 Vaya'mogimo konaga'apimo apamagisayafe'mo apavale'a alu vaya'ai apayapi'mo apamigae. Ani kava hu'a afo'apimogimo mafa'ne'apimo apavale'a apamigae. Ani kava hu'a mafa'ne'apimogimo ita'api afo'apimogimo apavaleli u'a apamigae. 22 Muki vaya'mogimo nagi'nilefe'mo apaini hu'a lapategaya'monanafa o'ataletapa atafautapa alagi hutapa maime maime ne'visageno'ae'mo hano hisiya afina'mo afole aisigeno'ae'mo Goti'a lapakufamo alino katino lapategaiye. 23 Mago taonifati'mo apaini hu'a lapatesagetapae'mo ataletapa lapaune hetaletapa alu taonifi'mo viyo. Lama ge lapa nepauve, lapakaemo muki Isaleli vaya'ai taoni'afi taoni'afi'mo uteta hutapa hano osu'nisageno'ae'mo Vemo mafa'nemo eminegaiye.

24 Alino apaya ne'malege'a ne'afiya vaya'mogimo alino apaya ne'maleya vekamo ae'a no'agasae. Ani kava huno ali'ya'amo ne'aliya ne'mo'a ali'ya aepa veka'amo aeno no'agase. 25 Mago ne'mo'a alino aya ne'maleya vekagana huno mai'nisiyana kanalene. Ani kava huno mago ali'ya'amo ne'aliya ne'mo'a ali'ya aepa veka'agana huno mai'nisiyana kanalene. Vaya'mogimo afamo anaga aepa nefe'mo Satani agi'amo Mielisemuligae hu'a hute'a hu'a faipa hu'a ne'atesayana agae afamo anaga vaya'aife'mo mago'e hu'a hu'a faipa hu'a apategae.

Gotifeke'mo koli hiyo, huno hu'niya gemae

(Luk 12:2-7)

26 Hugaya'mofe'mo ma mopafi vaya'aife'mo koli osiyo. Muki hu'a ae'a ati nekaya kava'apimo alino afole aino apave lisige'a agegae. Muki hu'a fala nekiya ge'apimo ha le yategamo huno afole aino hisige'a afigae. 27 Hanipi'mo lapa nepauva gemo ha le yategamo aetapa hakalo hutapa hapa paiyo. Lapakaemo vase hutapa afi'naya gemo nokato'mule'mo haitapa mai'netapae'mo muki vaya'aife'mo alopa gefati'mo aetapa hakalo hutapa hapa paiyo. 28 Apakaemo amega apakufa'amo kamiti apamagigaya'monanafa apakupi mafa'ne'amo alagi o'apamagisaya vaya'aife'mo koli osiyo. Apakufa'e apakupi mafa'ne'e'mo alino ata kopi'mo yaga auno apatalesiya vekaeke'mo koli'amo hiyo. 29 Ago age'nayana lole aise namala'mo magoke asagalifa monileti'mo miya nefaiya'monanafa afotapimo'mo afa'a faligiye huno osisiyana magoke namamo faliteno mopafi'mo asagauno o'aigiye. 30 Ani kava huno muki lapayokapi'mo magoke magoke huno lekana paino ne'age. 31 Lapakaemo asole namamo ago aetapa apaka setapa mai'naya'mofe'mo koli osiyo.

32 Muki vaya'ai apaulagale'mo nagi'nimo ne'aya vaya'ai apaki'apimo koku'napi Afo'nimo aulagale'mo aegauve. 33 Aegauva'monanafa vaya'ai apaulagale'mo nagaefe'mo, o'age'nona vekae, hu'a nehisaya vaya'aife'mo koku'napi Afo'nimo aulagale'mo olapake'nova vayane, hu'na hapa paiguve.

Nagaefeke'mo hogoteno lapaino, huno hapa pai'niya gemae

(Luk 12:51-53; 14:26-27)

34 Nagaefe'mo, muki vaya'mo alagepa hu'a yuna he'a magokepi lokae'a maisayafe'mo emine'niye, hutapa lapakesa ne'afifiye. Ha'ao, alagepa hu'a magokepi lokae'a maisayafe'mo o'me'nofa kame hu'a apatesage'a kame hu'a apatesage'a hu'a maisayafe'mo e'nove.

35 Mafa'ne'apimogimo afo'apimogife'mo kame hu'a apatesage'a a'mafa'ne'apimogimo ita'apimogife'mo kame hu'a apatesage'a apanofelo'apimogimo anekalo apanofelo'apimogife'mo kame hu'a apatesage'a hu'a maisayafe'mo
e'nove.

36 Mago vaya'mogimo afamo anaga'api'e'mo kame kame hu'a maigae.
37 Mago vaya'mogimo ita'api afo'apimogifeke'mo hogoteno hapau apayamopafi'mo hapau'nisigeno nagaefe'mo henaga'amo hapau apayamopafi'mo hapau'nisiyana vaya'nimo maisaya vaya'mo o'mai'nae. Ani kava hu'a mago vaya'mogimo mafa'ne'api'e'mofi a'mafa'ne'api'e'mofi huno hogoteno hapau apayamopafi'mo hapau'nisigeno nagaefe'mo henaga'amo hapau apayamopafi'mo hapau'nisiyana vaya'nimo alagi maisaya vaya'mo o'mai'nae. 38 Mago vaya'mogimo malipu yosa'apimo ali'a kofili'e'a nakame hu'a no'visayana vaya'nimo alagi maisaya vaya'mo o'mai'nae. 39 Ma mopafi'mo alagepa hutage'mo maigune, hu'a apakesa ne'afisaya vaya'mo alagepa hu'a ne'maiya kava'apimo alagi hano hugiye. Mago vaya'mogimo nagi'nilefe'mo ma mopafi'mo alagepa hu'a ne'maiya kava'apimo atalesayana alagepa hu'a maisaya ya'mo aligae.

Alagepa miya'apimo alisaya vaya'aife'mo hu'niya gemae

(Mak 9:41)

40 Mago vaya'mogimo lapakaemo ali'a falu fala hu'a nelapatesayana ani kava hu'a nagae'e'mo ali'a falu fala hu'a ne'natae. Ani kava hu'a nagaemo ali'a falu fala hu'a ne'natesaya vaya'mogimo alino nate'nige'na e'nova ne'e'mo ali'a falu fala hu'a ne'atae. 41 Gotitegati gemo alinineno aeno hakalo huno hapa nepaiya vekamo ne'egeno'ae'mo mago ne'mo Gotitegati gemo alinineno aeno hakalo huno hapa nepaiya ne'mo mai'niya'mofe'mo alino falu fala huno ne'atesiyana Gotitegati gemo alini e'a ae'a hakalo hu'a hapa nepaiya vaya'mogi alisaya agufa miya'amo apakae'e'mo magokepi'mo aligiye. Goti aulagale'mo fatago vekamo ne'egeno'ae'mo mago vekamo Goti aulagale'mo fatago vekamo mai'niya'mofe'mo alino falu fala huno ne'atesiyana fatago vaya'mogi alisaya agufa miya'amo apakae'e'mo magokepi'mo aligiye. 42 He lama ge lapa nepauve, huno, mago ne'mo'a afa vekamo'mo nakame nehiya vekamo ageteno'ae'mo nakame nehiya vekamo mai'niya'mofe'mo lanitani ani'mo hefino amisiyana miya'amo alagi aligiye, hu'na lapa nepauve, huno hapa pai'niye.

Copyright information for `KYG