Matthew 11

Yoni'a ani faleno ne'apateya vekamo'mo Yesutegamo alino apate'nige'a u'naya gemae

(Luk 7:18-35)

Yesu'a tuolofu'a vaya'mo ge'amo ne'afiya vaya'aife'mo mani kava'mo hiyo, huno hapa paino hano huteno'ae'mo ani haopalega ataleno Galeliya kotega taoni'afi taoni'afi'mo alino apaya malege aeno hakalo huno hapa paige hume hume visiyafe'mo u'niye.

Yoni'a kalavusi hu'neno'ae'mo Kalaisi'a hu'niya kavafe'mo ava gemo afiteno'ae'mo ge'amo ne'afiya vaya'mo alino apate'nige'a agaetegamo u'nae. U'a Yesufe'mo, Yoni'a huno'ae'mo, egaiye huno hu'niya ne'mo kagaemofi alu vekae'mo agava maisune, hu'a ge hu'a afi ge'nae. Yesu'a hapa paino'ae'mo, Atagi netutapa Yonife'mo muki afi'naya ge'e ali'ya'mo ne'alugetapa nage'naya kava'ni'efe'mo nava gemo hutapa ha paiyo. Apaulagamo ali hu'niya vaya'mo age'a ayakege apaiyamo hosu'niya vaya'mo alagepa hu'a u'e'a huge lepalosi ya'mo hapau'niya vaya'mo alagepa apakufamo hanege apakesamo akani'niya vaya'mogimo gemo alagepa hu'a afige fali'naya vaya'mo he tige kagemi ya'apimo ohane'nisiya vaya'aife'mo alagepa faigoko gemo ae'na hakalo hu'na hapa nepauge'a afige nehae, hutapa uta ha paiyo. Natale'a o'u'a nagaefe'mo alagi apakesa afi'a fatago nehaya vaya'mo Goti aulagale'mo alagepa hu'a mai'nayanage'a afa'a apamogaga aigae, huno hapa pai'niye. Yoni ge'amo ne'afiya vaya'mo atale'a ne'vageno'ae'mo Yesu'a asole vaya'mo ali'a anupa hu'a mai'naya vaya'aife'mo aepa faino Yonife'mo ava gemo huno hapa paino'ae'mo, Lapakaemo na agufa ya'mo agesayafe'mo ka'me kotegamo u'nae. Lapakaemo yasimo'mo hopale'mo alisigeno'ae'mo uti uti aisiya ya'mo agesayafe'mo u'nafiye. Hopamo agesayafe'mo o'u'nisayana na agufa ne'mo agesayafe'mo u'nae. Lapakaemo alagepa kukenamo alino vai'niya vekamo agesayafe'mo u'nafiye. Ha'ao alagepa kukenamo ali'a ne'vaiya vaya'mo yagai'a ne'apataya vaya'ai nopike'mo mai'nae. Lapakaemo haiya agufa ne'mo agesayafe'mo u'nae. Lapakaemo Gotitegati gemo alinineno aeno hakalo huno hapa nepaiya vekamo agesayafe'mo u'nafiye. He, lapakaemo Gotitegati gemo alini e'a ae'a hakalo hu'a hapa nepaiya vaya'mo aeno apaka se'niya vekamo agesayafe'mo u'nae. 10 Ani vekae'mo ava gemo huno'ae'mo,

nagaemo hogote'na apa veka'nimo ali'na atesugeno uno hogoteteno ka'mo valino kategaiye,
huno avo'mo kae male'niye.
11 Lama ge lapa nepauve, huno, Yoni'a ani faleno ne'apateya vekamo'mo muki ma mopafi vaya'mo ago aeno apaka se'niya'monanafa Goti'a yagaino ne'apateya kegi'yafi'mo mai'naya vayapati'mo henaga ne'mo'a Yoni'mo ago aeno aga se'niye. 12 Yoni'a aeno hakalo huno hapa pai'niya afinateti'mo afela vayakana hu'a apaya mukiki nehaya vaya'mogi Goti'a yagaino ne'apateya kote'mo apaya mukiki hu'a u'a haite haite hu'a hemeni'e'mo hai'a nefalae. 13 Hogote'a muki vaya'mogi Gotitegati gemo alini'e'a ae'a hakalo hu'a hapa nepaiya vaya'e Mosese'e'mo afole aisiya kavafe'mo ava gemo hume hume ne'ageno'ae'mo Yoni'mo afole ai'niye. 14 Apakaemo hu'apae'mo, Ilaiya'a hogoteno afole aigiye, hu'a avo'mo kae male'naya gee'mo lapakesa afitapa fatago hutetapa mai'nisayana Yonife'mo agaemae, hutapa agegae. 15 Lapakaemo gemo afisaya lapakesamo hane'nisiya'mo'mo afiyo. 16 Hemenimo mai'naya vaya'mo na agufa vaya'mo mai'nafige'na lapa paigesuve. Apakaemo mafa'nemogi kigi yokalo hisayafe'mo maketi kumate'mo itopale'mo ne'maiya mafa'negana hu'a mai'nae. Mago mafa'ne anaga'mogi mago mafa'ne anaga'aife'mo, 17 Lagaemo ogefage yokemo hu'nona'monanafa olapau'nigetapa omo ohage'nae. Faiyosago yokemo hu'nona'monanafa olapau'nigetapa yulagefa o'ai'nae, hu'a nehae. 18 Yoni'a eno ne'ya'e ani'e'mo o'neno mosino mai'nige'apae'mo ohapau'nige'a hosu aune ne'mo aipafi'mo mai'niye, hu'a hu'nae. 19 Vemo mafa'nemo'a eno ne'ya'e ani'e'mo neno mai'nige'apae'mo ohapau'nige'a lusi ne'ya'e ani'e'mo ne'neya ai'agaefa vekamo mai'niye, hu'a nehae. Takesi moni ne'aliya vaya'e hosu vaya'e'mo apao vekamo mai'niye, hu'a nehaya'monanafa Goti mafa'ne'amogimo alagepa huno ageteno afi'niya kavafe'mo, alagepa kava'mo neha'ae, hu'a nehae.

Muki taoni'afi taoni'afi'mo mai'naya vaya'mogi apakesa afi'a fatago osu'naya vaya'aife'mo hu'niya gemae

(Luk 10:13-15)

20 Yesu'a umenitata hu'niya taoni'afi taoni'afi'mo asole no'agaya lokiya aune kava'mo hu'niya'monanafa apaipamo ali'a afe ole'naya'mofe'mo ani afina'mo aepa faino ge hapau'niye. 21 Kolasini taonifi'mo mai'naya vaya'mogitapae, hu'na, vaehae. Metasaita taonifi'mo mai'naya vaya'mogitapae, hu'na, vaehae. Taonitapifi'mo no'agaya lokiya naune kava'mo hu'nova agufa kava'mo Taiya taonifi'e Saitoni taonifi'e'mo mago vaya'mogi hu'naesinana akeya'vilagamo apaipamo ago ali'a afe lete'a hosu kogu kukenamo ali'a vaite'a la'nefamo ali'a fale'naesine. 22 Lapa pai'nae'mo agoti huno apatesiya afina'mo Taiya taonifi'e Saitoni taonifi'e'mo mai'naya vaya'mogi aise hanageke ya'mo aligaya'monanafa lapakaemo mago'e hutapa lusi hanageke ya'mo aligae. 23 Kapeneyamu taoniyo, hu'na, koku'napi'mo alino asaga huno lapatesigetapa haigafiye. Ha'ao, ata kopike'mo lamigae. Taonitapifi'mo no'agaya lokiya naune kava'mo hu'nova agufa kava'mo mago vaya'mogi Sotomi taonifi'mo hu'naesinana Sotomi taonimo afa'a haneme haneme eno hemeni'e'mo afa'a hane'niyesine. 24 Lapa pai'nae'mo, Goti'a agoti huno apatesiya afina'mo Sotomi taonifi'mo mai'naya vaya'mogi hanageke ya'mo aligaya'monanafa lapakaemo mago'e hutapa lusi hanageke ya'mo aligae, huno hapa pai'niye.

Yesutegamo e'a mai'a falu hu'a maisaya kavafe'mo hu'niya gemae

(Luk 10:21-22)

25 Ani afina'mo Yesu'a nunumu huno'ae'mo, Afo, Koku'napi'e ma mopafi'e'mo ne'yagaina Ala kava ne'mogae, hu'na, agete'a afi'naya vaya'e sukulu hu'naya vaya'mogi'e'mo ani kava'mo alagi o'agesayafe'mo alika fala ki male'nana'monanafa aise mafa'ne anaga'mo alika apave li'nana'mofe'mo kahao ke nehove. 26 He, Afo, hu'na, kagaemo ani kahau'niya kava'mo afa'a nehane. 27 Afo'nimo'a ali'ya'amo alisuvafe'mo muki ya'amo alino nami'niye. Muki vaya'mogimo mafa'ne'amo o'nage'naya'monanafa Afo'nimoke'mo nage'niye. Muki vaya'mogimo afo'nimo'mo o'age'naya'monanafa nagaemo agege nahau'nige'na ali'na apave li'nova vaya'mogi'e'mo agege huta mai'none.

28 Muki vaya'mo alaga lapaege kanamo alige hutapa ne'maiya vaya'mogitapa nagaetegamo eyo maitapa falu hutapa maisaya ya'mo ali'na lapamiguvanagi. 29 Nagaemo yuna naipa'age ne'mo mai'ne'na yagu yaga kava'mo nehuva'mofe'mo ali'ya'nimo alitetapa ali'na lapaya malesuva gemo afige afige hutapa maiyo, lapaipamo'mo kanale hisigeno lapakupi mafa'nemo maino falu hugiyanagi. 30 Hiyo, hu'na lapa paisuva gemo lokiya gemo ohane'niya'mofe'mo ali'na kofi'na lapatesuva kana ya'mo'a kana olapaugiye.

Copyright information for `KYG