Matthew 15

Yu vaya'ai apakinago vaya'mogi gee'mo hu'niya gemae

(Mak 7:1-13)

Ani afina'mo Falasi vaya'e ke'aepa gemo avo'mo kae'a ali'a apaya ne'malaya vaya'e'mo Yulusalemu taonifati'mo Yesutegamo e'apae'mo, na kava hige'apae'mo gekamo ne'afiya vaya'mogimo laginago vaya'ai ge'apimo amagi'a ne'atalae. Neyalate'mo hapa pai'naya gemo afite'a akame nehaya kava hu'a akame hu'a apaya'mo sese osu'ne'a ne'ya'mo fiku ali'a ne'nae, hu'a ha pai'nageno Yesu'a, ani kava hutapa alu gemo lapakinago vaya'ai gemo akame hisayafe'mo na kava higetapae'mo Goti ke'aepa ge'amo amagitapa ne'atalae. Goti'a huno'ae'mo,Itatapi afotapimogife'mo hapao ke hetetapa ge'apimo afitetapa akame hiyo. Ita'api afo'apimogife'mo hu'a faipa hu'a apatesaya mafa'ne'aina ago kamiti apamagiyo, huno hu'niya'monanafa lapakaemo hutapae'mo, mago vekamo'a ita'amofe'mofi afo'amofe'mofi huno hana maesiyafe'mo huno'ae'mo, Goti'a agai'a yane, huno huteno ita'amofe'mofi afo'amofe'mofi huno, hana maeno o'anamige hanao ke osege hugiye, hutapa nehae. Hutapa hutetapae'mo lapakaitapi getapige'mo akame hisayafe'mo Goti ge'amo aetapa ati nekae. Aetapa ati nekaya vayanagi afiyo, Aiyeya'a Gotitegati gemo alinineno aeno hakalo huno hapa pai'niya gemo'mo lapakaefeke'mo alagi lama gemo hane'niye. Agaemo huno'ae'mo,

Mani vaya'mogi apavaya'aletike'mo nahao ke nehaya'monanafa apaipa apakesa'amo ali'a nagaetegamo atalageno no'mefa afagitegamo ali'a atalageno ne'viye.
Nagaefe'mo fiku faku hu'a mono nehae. Ali'a apaya ne'malaya gemo ma mopafi ge'age'mo Hane'niye,
huno avo'mo kae male'niye, huno hapa pai'niye.

10 Yesu'a muki vaya'aife'mo eyo, huno ge hu'nige'a e'a mai'nageno'ae'mo, lapakaemo afitetapae'mo afitapa aeto hiyo. 11 Apavayafi'mo ne'naya ne'ya'mo'a alino hosu huno no'apatefa apavayafatike'mo nehaya gemo'a alino hosu huno ne'apate, huno hapa pai'niye.

12 Huno hapa paitege'a ge'amo ne'afiya vaya'mo agaetegamo e'a ha pai'apae'mo, Falasi mono vaya'mogi hu'nana gemo afite'apae'mo hosu apaipamo kali'nae, huka apake'napiye, hu'a afi ge'nageno'ae'mo, 13 muki ya'amo koku'napi afo'nimo'a ohakale'nisiya ya'mo hafu'ya'a'e'mo alino vakaino atalegaiye. 14 Afa'a apateyo. Apaulagamo ali hu'nige'a alu vaya'mo ka ali'a ho hu'a apavaleli'a ne'vaya vayane. Mago aulagamo ali hu'nisiya vekamo'a alu vekamo aulagamo ali hu'nisiya vekamo ayate'mo alino avalelino visiyana magokepi u'ana kelifi'mo asagau'ana aiga'ae, huno hapa pai'niye. 15 Pita'a, aeka kalafefa gemo hu'nana gemo aepa'amo laha paiyo, huno afi ge'nigeno'ae'mo, 16 asole afina'mo afi'naya'monanafa lapakae'e'mo afitapa aeto nosafiye. 17 Ne'ya'mo ne'naya ya'mo'a apaipafi'mo nelamige'apae'mo aifa le'a ne'atalae, hutapa o'afi'nafiye. 18 Apavayafi'mo ne'ya'mo afa'a ne'a ne'nakaiya'monanafa apaipafati'mo afole aiteno haineno apavayafati'mo afole ne'aiya gemoke'mo alino hosu huno ne'apate. 19 Apaipafati'mo afole ne'aiya kava'mo hane'niyana hosu apakesa ne'afiya kava'mo hanege vaya'mo nehapaya kava'mo hanege kumai kava'mo hanege a'nemo apayate ne'aliya kava'mo hanege kumaya'mo ne'aliya kava'mo hanege aigofe gemo nehaya gemo hanege hu'a faipa hu'a ne'apataya gemo hanege huno hane'niye. 20 Ani agufa kava'moke'mo alino hosu huno ne'apateya'monanafa apaya'mo sese osu'ne'a ne'ya'mo fiku ali'a ne'naya kava'mo'a alino hosu huno no'apate, huno hapa pai'niye.

Agesamo afino fatago hu'niya a kanoe'mo ava gemo hu'niya gemae

(Mak 7:24-30)

21 Inagi Yesu'a ani koteti'mo ataleno Taiya taonimo hanete Saitoni taonimo hanete huno hane'niya haopalegamo u'niye. 22 Ne'vigeno'ae'mo mago Kenani nofi a kanomo ani haopalega mai'niya a kanomo'a agaetega eno alopa gefati'mo, Ala kava ne'mo Nevini aginagomo, huno, kahau huka nato. Mago hosu aune vekamo'a a'mafa'ne'nimo aipafi'mo haino mai'neno'ae'mo alagi alino hosu huno ne'ate, huno ha pai'niya'monanafa 23 Yesu'a mago ge'ale'mo aeno atagaina huno ha opai'niye. Ge'amo ne'afiya vaya'mo agaetegamo e'a, Kahao ke honagi lakame huno ne'eno keya keya hulino ne'eya a kanomo alika ha faitalegeno vino, hu'a ha pai'nae. 24 Yesu'a, Goti'a naha paino'ae'mo, Yu nofi vaya'mo lageso hu'naya sipisipi vaya'alegage'mo uvo, huno huteno alino nate'nige'na e'nove, huno ha pai'niye. 25 Ani a kanomo'a eno aiyafi'mo ale'ya faino ape huno mai'neno'ae'mo, Ala kava nene, naha mao, huno hu'nigeno'ae'mo 26 Nagaemo mafa'nemogi peleti mayamo ali'na kalamo apamisuvana kanale osugiye, huno ha pai'nigeno'ae'mo, 27 Ala kava nene, he, lama gemo hana'monanafa nopi'mo ne'maiya kalamogi afo'apimogimo hi'yalamute'mo ne'ya'mo ne'nageno'ae'mo ne'ya atupamo asagauno ne'aige'apae'mo kalamogi afa'a ne'naya yane, huno ha pai'niye. 28 Yesu'a, kagaemo mago'e huka kagesa afika fatago nehane. Nehana'mofe'mo kahau'niya kava'mo afa'a huguve, huno ha paiteno ani afina'mo a'mafa'ne'amo alino alagepa huno ate'niye.

Yesu'a alu kaita alu kaita'mo hapau'niya vaya'mo alino hapageno apate'niya gemae

29 Yesu'a ani kotegamo ataleno Galeliya ani kotu agi'nale'mo uteno avefi'mo haino itopale'mo mai'niye. 30 Asole vaya'mo apaiya hosu'niya vayanagi apaulaga ali hu'niya vayanagi apaiya apaya'mo kafafe kafafa hu'niya vayanagi apake no'aiya vayanagi alu kaita alu kaita'mo hapau'niya vayanagi hu'a apavaleli'e'a Yesu aiyafi'mo apate'nageno alino alagepa huno apate'niye. 31 Ani asole vaya'mo apake'nayana apake no'aiya vaya'mogimo apake aige apaiya apaya'mo kafafe kafafa hu'niya vaya'mo alagepa hu'a maige apaiyamo hosu'niya vaya'mo alagepa hu'a u'e'a huge apaulagamo ali hu'niya vaya'mo apaulagamo age'a ayakege hu'nage'a apakete'apae'mo hapau ai'nae. Inagi Isaleli vaya'ai Goti'apimo agi'ale'mo ali'a asaga hu'nae.

Yesu'a fo tauseni'a vaya'mo ne'ya'mo alino fako huno apami'niya gemae

(Mak 8:1-10)

32 Yesu'a ge'amo ne'afiya vaya'aife'mo ge hu'nige'a e'nageno hapa paino'ae'mo, apakaemo lole'e mago'e afina'mo nagae'e'mo magokepi lokae'a mai'nageno'ae'mo hemenimo ne'ya'apimo ohane'nige'na nahau hu'na ne'apatove. No'apilegamo ali'na apatesuge'a visayategamo apaka tesigeno apaunena aisiya kavafe'mo o'nahau'niye, huno hapa pai'niye. 33 Inagi ge'amo ne'afiya vaya'mogi hu'apae'mo, ka'me kotega eta mai'nona'mofe'mo haiyateti'mo ne'ya'mo aliniteta alita fako huta mani asole vaya'mo apamigune, hu'a ge hu'a afi ge'nae. 34 Yesu'a, lapakaemo na magi peleti mayamo ali'nae, huno apafi ge'nige'apae'mo, seveni'a peleti mayagi magoke magoke aise noyamegi huno hane'niye, hu'a ha pai'nae. 35 Agaemo asole vaya'aife'mo, etapa mopale'mo itopale'mo maiyo, huno hapa paiteno'ae'mo 36 seveni'a peleti maya'e noyame'e'mo ali'neno Gotife'mo haoke heteno alino akaya heno ge'amo ne'afiya vaya'mo apami'nige'a muki vaya'mo ali'a apami'nae. Muki vaya'amogimo ne'a apamu hu'nae. 37 Inagi ge'amo ne'afiya vaya'mogi ne'ya atupa'amo ali'a seveni'a alopa hona yuvapafi'mo male'a havaite'nae. 38 Fo tauseni'a vemogi ne'nayana a'ne mafa'ne'api'e'mo apakaemo lekana opai'nae. 39 Netageno'ae'mo Yesu'a alino apatege'a utageno sipifi'mo haino Maganala haopalegamo u'niye.

Copyright information for `KYG