Matthew 18

Ina la'mo hogote vekamo mai'niye, hu'a hu'naya gemae

(Mak 9:33-37; Luk 9:46-48)

Ani afina'mo ge'amo ne'afiya vaya'mogi Yesutegamo e'a, ina la'mo Goti'a yagaino ne'apateya vayapati'mo hogote ne'mo mai'niye, hu'a afi ge'nae. Yesu'mo aise mafa'nee'mo ge hu'nigeno e'nigeno'ae'mo apaulagale'mo alino he tino ateteno'ae'mo, alagi lama ge lapa nepauve, alino mafa'negana huno hamaleno olapatesigetapa mai'nisayana Goti'a yagaino ne'apateya kegi'yafi'mo faleta ohaigae. Mago vekamo'a agufamo alino afepi ateteno mani agufa mafa'negana huno mai'nisiyana Goti'a yagaino ne'apateya vayapati'mo hogote vekamo maigiye. Vaya'mogi nagi'nilefe'mo mani magufa mafa'nemo apavale'a ali'a falu fala hu'a ne'apatesayana ani kava hu'a navale'a ali'a falu fala hu'a ne'natae.

Mago vekamo'a mani agufa mafa'nemo'a nagaefe'mo agesa afino fatago nehiya mafa'nemo'a hosu kava'mo hisiyafe'mo ayate ali'nisiyana lusi hanageke ya'mo aligiye. Aligiya'monanafa hogoteno ayate o'ali'nisige'apae'mo atafau'a alopa yafate'mo nofi aete'a lugo'afi'mo aete'a solovala anipi'mo ali'a yaga au'a atalesageno'ae'mo aise hanageke ya'mo aligiye. Vaehae, hu'na, apayate aligaya'monanafa apayate alisaya vaya'mogi lusi hanageke ya'mo alite'a avovo hu'a yulagefa aigae. Magoke lapaya'mo'mofi magoke lapaiyamo'mofi huno hosu kava'mo hisayafe'mo lapayate'mo ne'alisigetapae'mo hetapa hatagautapa ataleyo. Magoke lapaya'mofi magoke lapaiyamofi huno hane'nisigetapae'mo afa'a maige maige hutapa maisayategamo faletutapa haisayana kanale hugiye. Lole lapayatala'mofi lole lapaiyala'mofi huno hane'nisiya'mo'mo ata kopi'mo alino yaga auno lapatalesigeno'ae'mo hosugiye. Lapaulagamo'mo hosu kava'mo hisayafe'mo lapayate ne'alisigetapae'mo alitapa katitapa ataleyo. Magoke lapaulagamo hanesiya'mo'mo afa'a maige maige hutapa maisayategamo faletutapa haitapa maisayana kanale hugiye. Lole lapaulagamo hanesiya'mo'mo ata kopi'mo alino yaga auno lapatalesigeno'ae'mo hosugiye.

Lageso hu'niya sipisipie'mo aeno kalafefa ge hu'niya gemae

(Luk 15:3-7)

10 Ehetapiye, huno, aise mafa'ne anaga'aife'mo ina agufa vayane, hutapa osiyo. Lapa nepauve, huno, yagai'a ne'apataya enisole vaya'mogimo muki afina'mo koku'napi afo'nimo augosamo age'nae. 11 Vemo mafa'nemo'a lageso hu'naya vaya'ai apakufamo alino katino apatesiyafe'mo emine'niye. 12 Na lapakesa ne'afiye. Vani hataleti'a sipisipimo mai'nisayapati'mo magoke sipisipimo apataleno uno lageso husiya'mo'mo afo'amo'a na kava hugiye. Afa'a mai'nisaya sipisipi anaga'amo apataleno uno kahauya huno ageno ava tesiyafe'mo avelegamo afa'a ohaisifiye. Ha'ao, afa'a haigiye. 13 Alagi lama ge lapa nepauve huno, Kahauya huno ageno avate'nisiyana naeti naeni'amo afa'a mai'naya sipisipi'ae'mo aise'amo amogaga ne'aino'ae'mo lageso hu'niya sipisipi'ae'mo mago'e huno lusi kava huno amogaga aigiye. 14 Ani kava huno koku'napi afotapimo'mo mani agufa aise mafa'nefati'mo magoke mafa'nemo alagi lageso osugiye, huno hu male'niye, huno hapa pai'niye.

Konaga'apimogi hosu kava'apimo ali'a api ai'a ne'apataya kavafe'mo hu'niya gemae

15 Konagatapimo'a lapakaetegamo hosu kava'mo hu'nisiya'mo'mo agaetega uka lanakaitanige'mo mai'netanae'mo ha maeka hosu kava'amo alika aveliyo. Gekamo afisiyana agufamo alika katika ategane. 16 Gekamo o'afisigekae'mo magoke vekamofi lole vekala'mofi huka anavalelika agaetegamo uvo.Agoti hugefe'mo lole vekala'mofi lole'e mago'e vaya'mogimofi hu'a apavayafati'mo hisaya gemo afite'apae'mo ali'a fako hisageno lama gemo afole aigiye. 17 Agaemo anavalelika visana vekala'ani ge'animo o'afisigekae'mo siosi vaya'aife'mo hapa paiyo. Agaemo siosi vaya'ai ge'apimo o'afisigekae'mo Goti ge'amo no'afisaya vaya'aitega'e takesi monimo ne'aliya vaya'aitega'e'mo nehana kava huka agaetega huvo, huno huteno, 18 Alagi lama ge lapa nepauve, huno, ma mopafi mai'netapae'mo kitamo ki malesayana ani kava huno koku'napi ne'mo'a kitamo ki malegaiye. Kitamo yaki malesayana ani kava huno koku'napi ne'mo'a kitamo yaki malegaiye.

19 Mani kavatefe'mo mago'e gemo lapa nepauve, huno, Hainu afina'mo lapakaepati'mo lole vekala'moganimo mago kavafe'mo nunumu hu'anae'mo la'amiyo hu'ana magoke anaipa anakesa ali'ne'ana hu'nisa'ana koku'napi afo'nimo'mo afa'a hana maeno anamigiye. 20 Nagi'nilefe'mo lole vekala'mofi lole'e mago'e vaya'mogimofi huno alino anupa huno apate'nisage'nae'mo nagaemo apakae folaga'apifi'mo maiguve, huno hapa pai'niye.

Ali'ya'mo ne'aliya vekamo'a hau huno o'ate'niya gemae

21 Mago afina'mo Pita'a Yesutegamo eno ha paino'ae'mo, Ala kava nene, konaga'nimo'a nagaetegamo hosu kava'mo hisige'nae'mo na magi afina'mo hosu kava'amo ali'na atalete atalete hu'na ali'na atalegauve. Seveni'a afina'mo ali'na atalesufiye, huno afi ge'niye. 22 Yesu'a ha paino'ae'mo, ha'ao, huno, seveni'a afina'mo hosu kava'amo alika o'ataleka seveni tamisi seveti'a afina'mo hosu kava'amo alika atalo. 23 Ani kava hisaya kava'mo hane'niya'mofe'mo mago kini ne'mo'a hu'niya kava huno Goti'a yagaino apategaiye. Kini ne'apimo'a ali'ya'amo ne'aliya vaya'ai anona'apilefe'mo alino alagepa huno avo'mo kae'niye. 24 Aepa faino alino alagepa huno avo'mo nekaege'apae'mo 25 mago alopa tauseni moni anona'amo hane'niya vekamo agaetegamo avaleli'a e'nae. Moni'amo alagi ohane'niya'mofe'mo kava ne'amo'a hapa paino'ae'mo, ani vekagi a'agi mafa'ne'agi muki kagemi ya'agi hutapa alitetapa apavalelitutapa maketi hige'apao miya faitesagetapae'mo moni'amo alinitetapa anona'nilefe'mo namiyo, huno hapa pai'niye. 26 Ali'ya'amo ne'aliya vekamo'a ani gemo afiteno'ae'mo mopafi'mo asagauno aiteno ale'ya faino mai'neno'ae'mo, muki anonakalefe'mo afa'a kamiguvanagi kaipamo'mo falu hu'ninage'nao, huno afi ge'niye. 27 Afi ge'nigeno'ae'mo kava ne'amo'mo hau huno ateteno, afa'a ato, huno ha paiteno anona'amo afa'a atale'niye. 28 Ali'ya'amo ne'aliya vekamo ne'vigeno'ae'mo magokepi lokae'ana ali'ya'mo ne'ali'a vekamo aise moni anona'amo hane'niya vekamo e'nigeno ageteno'ae'mo anu kili'neno lugo'ale'mo atafau'neno'ae'mo, anona'nilefe'mo monimo alinikeka namiyo, huno ha pai'niye. 29 Magokepi lokae'ana ali'ya'mo ne'ali'a vekamo'a ani gemo afiteno'ae'mo aiyafi'mo asagauno aiteno ale'ya faino mai'neno'ae'mo, kaipamo'mo falu hu'ninage'nao anonakalefe'mo afa'a kamiguvanagi, huno ha pai'niya'monanafa 30 ge'amo o'afino kalavusi huno ateteno'ae'mo, maime maime ne'ukae'mo namisanage'naeke'mo kalavusifati'mo afa'a hatu mae'na kategauve, huno ha pai'niye. 31 Ali'ya'amo ne'aliya vaya'mogimo ani kava'mo agete'apae'mo lusi kava huno apaipamo'mo kana hu'nige'apae'mo u'a kava ne'apie'mo muki ani age'naya kava'ae'mo ava ge hu'a ha pai'nae. 32 Kava ne'apimo'a ali'ya'amo ne'aliya vekae'mo ge hu'nigeno e'nigeno'ae'mo, hosu ali'ya'mo ne'alina vekamogae, huno, nagaefe'mo aukaya huka ge hu'nanage'nae'mo lusi alopa anonakamo afa'a atale'nove. 33 Nagaemo nahau hu'na kate'nova kava huka magokepi lokaetana ali'ya ne'ali'a vekae'mo kahau huka atesana kava'mo hane'niye, huno ha paiteno 34 aipamo leno ateteno kayo'mo amisageno agafu kisiyafe'mo avaleno kalavusi vaya'aite'mo yagai'a ne'apataya vaya'ai apayapi'mo ateteno, kalavusifi'mo maime maime ne'ukae'mo muki anona'nilefe'mo namisanage'naeke'mo afa'a hatu mae'na kategauve, huno ha pai'niye. 35 Yesu'a ani gemo hapa paiteno'ae'mo, lapakaemo lapaipafati'mo konagatapimogi hosu kava'apimo alitapa o'atalesayana koku'napi Afo'nimo'mo kini ne'apimo'a hu'niya agufa kava'mo lapakaetegamo hugiye, huno hapa pai'niye.

Copyright information for `KYG