Matthew 21

Yesu'a Yulusalemu taonifi'mo haino ne'vige'apae'mo haoke he'naya gemae

(Mak 11:1-11; Luk 19:28-40; Yon 12:12-19)

Apakaemo Yulusalemu taoni haopale'mo e'a ava'yi hute'apae'mo Metapesi taonimo Alifi avele'mo hane'niya taonifi'mo ago e'a ava'yi hute'a Yesu'a lole vekala'mo ge'amo ne'afi'a vekala'mo alino anateteno'ae'mo, lanaulagale'mo hane'niya taonifi'mo utana hai'ao. Haitana malage hutana agesa'ana mago noki afumo ita'amo'e aikeli'a'e'mo nofi ae'ana anate'naya nokila'mo mai'nisa'agetana anakega'ae. Hatu maetana anavalelitana e'ao. Mago vekamo'a ge huno lanafi gesigetanae'mo, Ala kava ne'mo ali'ya'amo alisa'afe'mae, hutana ha paisa'ageno'ae'mo malage huno alino anatesige'ana ega'ae, huno hana pai'niye. Gotitegati gemo alinineno aeno hakalo huno hapa nepaiya vekamo'a hu'niya gemo afole aisiyafe'mo ani kava'mo afole ai'niye. Mani gemo'mo,

Saiyoni taonifi'mo mai'naya vaya'aife'mo huno'ae'mo, Ageyo, huno, alatapimo kini vekamo lapakaetegamo ne'e. Yagu yaga kava'mo nehiya vekamo mai'neno aikeli noki afule'mo fai maiteno ne'e,
huno hu'niye.

Ge'amo ne'afi'a vekala'mo Yesu'a hu'niya gemo akame hu'ana u'ana noki afumo aikeli'a'e'mo anavaleli'ana e'anae'mo kukena'animo asagi'ana anakotofule'mo yakai'ana anate'na'ageno Yesu'a magoke nokile'mo haino fai mai'niye. Asole vaya'mogimo alapa'age kukena'apimo asagi'a ali'a atale'a kate'mo yakaime yakaime u'a ate'nae. U'a hogotege akame hu'a uge hu'naya vaya'mogimo, Nevini aginagomo agi'ale'mo alitapa asaga hiyo.

Ala ne'mo agi'alefe'mo ne'eya vekamo ha maeno. Anaga Goti ala agi'ale'mo alitapa asaga hiyo,
hu'a alopa gefati'mo hu'nae.

10 Yesu'a Yulusalemu taoni kegi'yafi'mo faleno hai'nige'apae'mo muki taonifi'mo mai'naya vaya'mogi hapau ai'a atete hute'a, ina la'ae, hu'a ge hu'a apafi ge'nage'apae'mo 11 asole vaya'mo akame hu'a e'naya vaya'mogi, Yesu'mo Galeliya kotega Nasalasa taonifi vekamo Gotitegati gemo alinineno aeno hakalo huno hapa nepaiya vekamae, hu'a hapa pai'nae.

Yesu'a alopa mono nopi'mo haino mai'niya gemae

(Mak 11:15-19; Luk 19:28-40; Yon 12:12-19)

12 Yesu'a Yu vaya'ai alopa mono nopi'mo haino mago ya'mo miya faige maketi huge hu'a mai'naya vaya'mo alino hapa faino apatale'niye. Alu nofi vaya'ai monimo alite'a Yu vaya'ai monimo ne'apamiya vaya'ai hi'yalamu'apimo alino ago'ya faino atalege namamo maketi nehaya vaya'ai sia'apimo alino ago'ya faino atalege hu'niye. 13 Agaemo hapa paino'ae'mo, avo'mo kae male'niya gemo'mo huno'ae'mo,vaya'mogi no'nie'mo, nunumu nehaya none, hu'a hugae, huno avo'mo kae male'niya'monanafa lapakaemo kumaya ne'aliya vaya'mo e'a fala ki'a ne'maiya none, hutapa alita hamaletapa ate'nae, huno hapa pai'niye.

14 Apaulagamo ali hu'niya vaya'e apaiyamo hosu'niya vaya'e'mo mono nopi'mo agaetegamo e'nageno alino alagepa huno apate'niye. 15 Mono hu'a ne'apataya vaya'aite'mo yagai'a ne'apataya vaya'e ke'aepa gemo avo'mo kae'a ali'a apaya ne'malaya vaya'mogi'e'mo hu'niya kava'mo age'a hapau ai'naya kava'mo agege mafa'ne anaga'mogimo mono nopati'mo hu'apae'mo, Nevini aginagomo agi'ale'mo alitapa asaga hiyo, hu'a hu'naya gemo afige hu'a mai'ne'apae'mo apaipamo le'niye. 16 Apakaemo Yesufe'mo, mafa'ne anaga'mogi nehaya gemo afi'napiye, hu'a afi ge'nageno'ae'mo, he afi'nove. Goti gemo'mo huno'ae'mo,aise mafa'ne anaga'e nute mafa'nemogi'e'mo kagikale'mo ali'a asaga hisayafe'mo alika apaya male'nane, huno hu'niya gemo lekana opai'nafiye, huno apafi ge'niye. 17 Apataleno uno Metani taonifi'mo havae'niye.

Yesu'a fiki yosae'mo ke hau'nigeno falu te'niya gemae

(Mak 11:12-14,20-24)

18 Uno havaeteno'ae'mo kotilamiyapi'mo taoni kate'mo ne'vigeno'ae'mo aga te'niye. Fiki yosamo ka agi'nale'mo hane'nigeno ageteno uno alaga'ae'mo age'niyana haita'age'mo hane'nigeno ageteno'ae'mo, alagamo halate alagi o'aegane, huno hu'nigeno malage huno falu te'niye. 20 Ge'amo ne'afiya vaya'mogimo ani kava'mo agete'apae'mo hapau aite'a, haiya kava higeno fiki yosamo malage huno falu te'niye, hu'a afi ge'nae. 21 Yesu'a, Lama ge lapa nepauve, huno, lapakesa afitapa fatago hu'netapae'mo lole lapakesa o'afi'nisayana fiki yosae'mo hu'nova agufa gemo afa'a hugae. Ani kava hutapa mani avee'mo, nokamo atalekuka solovala anipi'mo asagauka aiyo, hutapa hisageno uno asagauno aigiye. 22 Lapakesa afitapa fatago hisayana nunumu hutapa afi gesaya ya'mo afa'a aligae.

Yesufe'mo, ali'ya'mo alisanafe'mo ina la'mo alino kate'niye, hu'a afi ge'naya gemae

(Mak 11:27-33; Luk 20:1-8)

23 Yesu'a halate alopa mono nopi'mo haino alino apaya ne'malege'apae'mo mono hu'a ne'apataya vaya'aite'mo yagai'a ne'apataya vaya'e Yu vaya'ai vayatama vaya'e'mo agaetegamo e'apae'mo, haiya agufa yakamo ne'yagaina ya'mo ali'nekae'mo mani kava nehane. Ina la'mo mani kava'mo huvo, huno kaha pai'niye, hu'a afi ge'nageno 24 Yesu'a ge'apile'mo aeno atagaina huno hapa paino'ae'mo, mago kavafe'mo ge hu'na lapafi gegauve. Aetapa atagaina hutapa naha paisage'nae'mo haiya agufa alagena ya'nimo yagai'nova ya'mo ali'ne'na mani kava'mo nehufi hu'na lapa paiguve. Yoni'a ani faleno apatesiyafe'mo haiyateti'mo alagena ya'amo ali'niye. 25 Goti'a lekana paino ate'nifi ma mopafi vaya'mogi lekana pai'a ate'nae, huno apafi ge'nige'a apakai'apimo ge huge afige hu'apae'mo, lagaemo koku'nategati'mo ali'niye, huta hisunageno'ae'mo, koku'nategati'mo ali'nisigetapae'mo na kava higetapa ge'ae'mo lama gemo hu'niye, hutapa osu'nae, huno laha paigiye. 26 Hugiya'mofe'mo ma mopafi vaya'mogimo lekana pai'a ate'nae, huta hisunana vaehae asole vaya'mogi hu'apae'mo, Gotitegati gemo alinineno aeno hakalo huno hapa nepaiya vekae, hu'a nehaya'mofe'mo apakaefe'mo koli hune, hu'a hu'nae. 27 Hu'a hute'a Yesufe'mo, o'afi'none, hu'a ha pai'nageno'ae'mo ani kava hu'na haiya agufa alagena ya'nimo yagai'nova ya'mo ali'ne'na ani agufa kava'mo nehufi hu'na lapa opaiguve, huno hapa pai'niye.

Lole mafa'nela'anife'mo aeno kalafefa gemo hu'niya gemae

28 Yesu'a Yu monote ne'yagaiya vaya'aife'mo, hemenimo hisuva ge'nie'mo na yane hutapa lapakesa afigae. Mago vekamo'a lole mafa'ne'ala'mo mai'na'ae. Agaemo yege mafa'ne'ae'mo ha paino'ae'mo, mafa'ne'nimo, huno, hemenimo uka nofi hoya'nifi'mo ali'ya'mo aliyo, huno ha pai'nigeno'ae'mo 29 o'uguve, huno huteno henaga'amo aipamo alino afe leteno u'niye. Afo'animo'mo agana'amofe'mo ani agufa gemo hu'nigeno, 30 ala nene, huno, he afa'a uguve, huno hu'niya'monanafa o'u'niye. 31 Haiya mafa'nemo'a afo'amo ge'amo afi'niye, huno apafi ge'nige'apae'mo, yege mafa'ne'amo'ae, hu'a ha pai'nae. Yesu'a, lama ge lapa nepauve, takesi moni ne'aliya vaya'e kumai kava nehaya a'nemogi'e'mo ae'a lapaka se'a u'a hogote'a Goti'a yagaino ne'apateya kopi'mo fale nehaiye. 32 Yoni'a lapakaetegamo eno alagepa kava'mo hisaya kavafe'mo ago alino lapave li'nigetapa age'naya'monanafa lapakesa afitapa fatago osu'nage'apae'mo takesi moni ne'aliya vaya'e kumai kava'mo nehaya a'nemogi'e'mo apakesa afi'a fatago hu'nae. Mani kava'apimo lapakaemo ago age'naya'monanafa lapaipamo alitapa afe oletapa Yoni ge'ae'mo lapakesa afitapa fatago osu'nae, huno hapa pai'niye.

Hosu vaya'mogi nofi hoyale'mo ne'yagaiya kavafe'mo aeno kalafefa gemo hu'niya gemae

(Mak 12:1-12; Luk 20:9-19)

33 Yesu'a, mago'e gemo hu'na ae'na kalafefa gefati'mo huguvanagi afiyo, huno hapa pai'niye. Mago mopa aepa vekamo'a nofi hoyamo vaiteno kegi'ya hu maleteno nofi alagamo ae'a lata paisaya kelimo kafi maleteno yatala no'mo nofi hoyale'mo yagaisaya vaya'ai no'mo ki male'niye. Agaemo mago vaya'mogi hoya'ale'mo yagai'a ne'atesageno atagi neno eno'ae'mo alino fako huno mago nofi alaga'amo agai'amo alisige'a apakaemo mago nofi alaga'amo alisayafe'mo apavaleno apateteno afagi kotegamo u'niye. 34 Nofi alagamo ago afu le'nigeno'ae'mo agaemo ali'ya'amo ne'aliya vaya'mogi nofi alaga hetama'amo alisayafe'mo alino apate'nige'a hoya'ale'mo ne'yagaiya vaya'aitegamo u'nae. 35 Apakaemo vaya'amo apatafaute'a mago vekamo amagige mago vekamo kamiti amagi'a fali'a atege mago vekamo yafa kayoteti'mo amagige hu'nae. 36 Halate agaemo mago alu vaya'mo ali'ya'amo ne'aliya vaya'mo mago'e huno alino apate'nige'a u'nage'apae'mo apakaetegamo magoke agufa kavake'mo hu'nae. 37 Henaga'amo mafa'ne'amo alino ate'nigeno u'nigeno'ae'mo, mafa'ne'nimo ge'amo afa'a afigae, huno hu'niye. 38 Ne'ege'a hoya'ale'mo ne'yagaiya vaya'mogi agete'apae'mo, ani mafa'ne'amo'mo afo'amo hoyamo aligiye. Amagigetao falitesigeta agaemo alisiya hoyamo lagaemo aligunanagi, hu'a hute'a 39 atafau'a alini'u'a malaga yaga au'a atale'ne'a kamiti amagi'nae. 40 Hoya aepa vekamo'a eno'ae'mo hoya'ale'mo ne'yagaiya vaya'aitegamo na agufa kava'mo hugiye, huno apafi ge'nige'apae'mo, 41 agaemo alagi alino hosu huno apateteno ani vaya'mo apamagigiye. Agaemo alu vaya'mo apavaleno apatesige'a hoya'ale'mo yagai'ne'a nofi alagamo afu lesige'apae'mo lagi'a male'ne'a ali'a amigae, hu'a hu'nae. 42 Yesu'a, lapakaemo mago Goti gemo avo'mo kae male'niya gemo lekana opai'nafiye. Ani gemo'mo huno'ae'mo,

Yafateti'mo no nekiya vaya'mogimo mago no nekiya yafafe'mo, afa yafane, hu'a hute'a ali'a atale'naya'monanafa kanale hogote kona yafa'mo afole ai'niye. Ala kava ne'mo'a mani kava'mo alino afole aino ate'nigeta ageteta lahau aitetae'mo, vae, alagepa kava'mo hu'niye, huta hu'none,
huno hu'niye.
43 Inagi ani kavafe'mo lapa nepauve, huno, Lapakaemo Goti'a yagaino ne'apateya kopi'mo mago'e hutapa ali'ya'mo o'aligae. Lapayapati'mo lapa faleno hoya'ale'mo alagepa hu'a yagai'a ate'ne'a nofi alagamo lagi'a amisaya vaya'mo alino apamigiye. 44 Vaya'mo mani yafate'mo asagau'ai'a apago'ya faisageno aino afi'neno aise aise hugiye. Mani yafa'mo haiya vaya'aite'mo asagauno aisifigeno kamiti apamagino aino latapaino mumusopagana huno apatalegaiye, huno hapa pai'niye.

45 Mono hu'a ne'apataya vaya'aite'mo yagai'a ne'apataya vaya'e Falasi vaya'mogi'e'mo Yesu'a aeno kalafefa gemo hu'niya gemo afite'apae'mo, lagaefe'mo hu'niye, hu'a hu'nae. 46 Apakaemo kalavusi hu'a ategefe'mo hu'naya'monanafa asole vaya'mogi, Gotitegati gemo alinineno aeno hakalo huno hapa nepaiya vekae, hu'a hu'naya'mofe'mo koli hu'nae.

Copyright information for `KYG