Matthew 25

Naya lole'a a'mafa'ne anaga'aife'mo apava gemo hu'niya gemae

Goti'a yagaino apatesiya afina'mo afole aisigeno'ae'mo hisiya kava huno naya lole'a a'mafa'ne anaga'mogimo ve'e'mo lokae'a ohavae'naya a'mafa'ne anaga'aitegamo afole ai'niye. Ani a'mafa'ne anaga'mogimo saufa a'mo aligefe hu'niya veka'e'mo u'a fotu hisayafe'mo u'nae. Ani kava hu'a naya magokayaga'a a'mafa'nemogimo negi nagi apakesa afi'nage'apae'mo naya magokayaga'a a'mafa'nemogimo alagepa hu'a afite'a age'nae. Negi nagi a'mafa'nemogi lamu'apimo ali'naya'monanafa lamu'apifi'mo lakite'a ata kaesaya ani'a'apimo o'ali'naya'monanafa alagepa hu'a afite'a age'naya a'mafa'nemogi lamu'apifi'mo lakite'a ata kaesaya ani'api'e'mo alini'a u'nae. Saufa a'mo aligefe hu'niya vekamo o'meno yatala afina'mo mai'nige'apae'mo muki a'mafa'ne anaga'amo apau mai'mai hu'nige'a ago apau kale'nae.

Hani'ilaga folagu'mo keya ae'a ge hu'apae'mo, saufa a'mo aligefe hu'niya vekamo ago ne'eyanagi he titetapa fotu hiyo, hu'a ge hu'nae. Hu'a keya ae'nage'apae'mo naya lole'a a'mafa'ne anaga'mogimo ve'e'mo lokae'a ohavae'naya a'mafa'ne anaga'mo apaupati'mo he ti'a lamu'apimo alo hu'nae. Negi nagi a'mafa'nemogimo alagepa hu'a afite'a age'naya a'mafa'ne anaga'aife'mo, lamutifi ani'amo ago leno hano hugefe hu'nigi ani'mo mago lamiyo, hu'a apafi ge'nage'apae'mo, ha'ao, hu'a, lapamisunana anitimo ago leno hano hugiye. Lamufi laki'a ata nekaya ani'mo miya nefaiya vaya'aitegati'mo utapa miya failitapa eyo, hu'a hapa pai'nae. 10 Ani'mo miya faisayafe'mo u'nageno'ae'mo saufa a'mo aligefe hu'niya vekamo ago eno ava'yi hu'niye. Ago alo hu'a mai'naya a'mafa'ne anaga'mogi agae'e'mo magokepi lokaeli'a hai'a ne'ya'mo yagita hu'naya nopi'mo mai'nageno'ae'mo kitamo ki male'niye.

11 Henaga'amo naya magokayaga'a a'mafa'nemo ve'e'mo lokae'a ohavae'naya a'mafa'ne anaga'mo e'a, Ala kava nene, hu'a, kitamo yakika lato, hu'a ge hu'nageno'ae'mo 12 ge'apile'mo aeno atagaina huno hapa paino'ae'mo, alagi lama ge lapa nepauve, huno, olapake'nove, huno hapa pai'niye, huno hapa paiteno'ae'mo, 13 Vemo Mafa'nemo hainu afina'mo eminesifi na agufa kanale'mo eminesifi, hutapa o'afi'naya'mofe'mo alagepa hutapa kava yagaitapa maiyo, huno hapa pai'niye.

Ali'ya'amo ne'aliya vaya'mo monimo apami'niya kavafe'mo aeno kalafefa gemo hu'niya gemae

(Luk 19:11-27)

14 Ani kava huno Goti'a yagaino apatesiya afina'mo afole aisiya kava huno mago vekamo'a no'amo ataleno alu kotega ugefe huno'ae'mo ali'ya'amo ne'aliya vaya'aife'mo ge hu'nige'a e'nageno'ae'mo, kagemi ya'nile'mo yagaitapa nateyo, huno hapa pai'niye. 15 Agaemo magoke magoke vaya'mogimo alopa ali'ya'mo alisifi aise ali'ya'mo alisifi huno agesamo afiteno'ae'mo apamete apamete huno moni'ale'mo yagai'a atesayafe'mo alino fako huno apami'niye. Agaemo monimo alino fako huno mago vekamo faefu tausenimo amite mago vekamo tu tausenimo amite mago vekamo vani tausenimo amite huno apamiteno u'niye. 16 Faefu tausenimo ami'niya vekamo'a malage huno alininuno ani monileti'mo ali'ya'mo aliteno akamelegati'mo mago'e faefu tausenimo ali'niye. 17 Ani kava huno tu tausenimo ami'niya vekamo'a akamelegati mago'e tu tausenimo ali'niye. 18 Ali'niya'monanafa vani tausenimo ami'niya vekamo'a alininuno ami'niya monimo keli kafiteno ani kelifi'mo maleteno aeno ati kae male'niye.

19 Yatala afina'mo utegeno ali'ya aepa vekamo halate atagi neno eno apami'niya monileti'mo ali'ya'mo ali'naya monie'mo ava gemo afisiyafe'mo e'niye. 20 Faefu tausenimo ali'niya vekamo'a akamelegati'mo mago'e faefu tausenimo alinineno, Ala kava nene, huno, monimo faefu tausenimo nami'nane. Ago, huno, alininu'na ali'ya'mo alite'na akamelegati'mo mago'e faefu tausenimo ali'nove, huno ha pai'nigeno 21 ali'ya aepa vekamo'a ha paino'ae'mo, ali'yakamo o'ataleka kanale ali'ya'mo ali'nana vekae, huno, alagepa kava'mo hu'nane. Aise yate'mo alagepa huka yagai'nana'mofe'mo alopa yate'e'mo afa'a yagaisanafe'mo kavale'na kategauvanagi eka nagae'e'mo kamogaga aiyo, huno ha pai'niye. 22 Inagi tu tausenimo ami'niya vekamo'a eno ha paino'ae'mo, monimo tu tausenimo nami'nane. Ago, huno, alininu'na ali'ya'mo alite'na akamelegati'mo mago'e tu tausenimo ali'nove, huno ha pai'nigeno'ae'mo 23 ali'ya aepa vekamo'a, ali'yakamo o'ataleka kanale ali'ya'mo ali'nana vekae, huno, alagepa kava'mo hu'nane. Aise yate'mo alagepa huka yagai'nana'mofe'mo alopa yate'e'mo afa'a yagaisanafe'mo kavale'na kategauvanagi eka nagae'e'mo kamogaga aiyo, huno ha pai'niye. 24 Inagi vani tausenimo ami'niya vekamo'a eno ha paino'ae'mo, Ala kava nene, huno, kage'novana kagaemo lokiya kaipa vekamo mai'nekae'mo avina ya'mo ohakale'nana hoyafati'mo ne'ya'mo alige haleti'ya'amo ohale'nana nopati'mo ne'ya'mo alige huka ne'alina vekamo mai'nana'mofe'mo 25 kolikamo hute'na nami'nana vani tauseni monikamo alininu'na keli kafite'na kelifi'mo male'nove. 26 Ago, huno, monikamo afa'a hane'niye, huno ha pai'nigeno'ae'mo ali'ya aepa vekamo'a, ali'yafe'mo alaga nekahaeya vekamogae, huno, Avina ya'mo ohakale'nana hoyafati'mo ne'ya'mo alige haleti'ya'amo ohale'nana nopati'mo ne'ya'mo alige nehane, huka nage'napiye. 27 Nage'nana'mofe'mo na kava higekae'mo moni'nimo monimo ne'malaya nopi'mo o'male'nane. Male'nanesinana halate atagi ne'na e'nae'mo akamelegati mago'e monimo ali'novesine. 28 Agaetegati'mo monimo vani tausenimo alitapa teni tausenimo ali'niya vekamo amiyo. 29 Ali'naya vaya'mo mago'e hu'na ali'na apamisuge'a mago'e ya'mo aligae. O'ali'naya vaya'ai apayapati'mo apami'nova ya'mo hapa falegauve. 30 Inagi afa ali'ya'mo ne'aliya vekamo atafaulitutapa malaga hani kopi'mo asagautapa yaga autapa atalegeno avi'ya huge avepi'mo hanige huno maino.

Alino fako huno apatesiya kavafe'mo ava gemo hu'niya gemae

31 Vemo mafa'nemo'a ha le konali ya'amo aliteno enisole vaya'a'e'mo emineno kini siate'mo yagaino apatesiyafe'mo fai maigiye. 32 Fai mai'nisige'apae'mo muki ma mopafi vaya'mo e'a aulagale'mo ali'a anupa hu'a maigae. Afule'mo ne'yagaiya vekamo'a sipisipi'e meme'e'mo magokepi lokae'a mai'nageno'ae'mo alino fako huno ne'apateya kava huno vaya'mo alino fako huno apategaiye. 33 Agaemo sipisipi vaya'mo alino lamaga haopale'mo apateteno meme vaya'mo alino hoga haopale'mo apategaiye. 34 Apate'neno'ae'mo ala kini ne'apimo'a lamaga haopale'mo mai'nisaya vaya'aife'mo, Afo'nimo'a fiku lapa maeno lapami'nigetapa aulagale'mo alagepa hutapa mai'naya'mofe'mo afa'a lapamogaga aisaya vayanagi eyo. Goti'a ma mopamo alo hu'niya afina'mo lapamisiyafe'mo alo huno lapate'niye. Mafa'ne'apimogimo afo'apimogi ya'mo ne'aliya kava hutapa faletapa haita muki ya'amo aliyo. 35 Naga te'nigetapae'mo ne'ya'mo namige anife'mo nahau'nigetapae'mo ani'mo namige alu kotegati'mo e'nogetapae'mo navalelitetapa alitapa falu hutapa natege hutapa mai'nae. 36 Kukena'nimo ohane'nigetapae'mo kukenamo alinitetapa vaitapa natege kaita nahau'nigetapae'mo yagaita natege kalavusifi'mo mai'nogetapae'mo etapa nagege hutapa mai'naya'mofe'mae, huno hapa paigiye. 37 Fatago vaya'mogimo, Ala kava nene, hu'a, Hainu afina'mo kage'nonageka kaga te'nigetae'mo ne'ya'mo kami'none. Hainu afina'mo anife'mo kahau'nigetae'mo ani'mo hefita kami'none. 38 Hainu afina'mo alu kotegati'mo e'nanagetae'mo kavaleliteta alita falu huta kate'none. Hainu afina'mo kukenakamo ohane'nigeta aliniteta vaita kate'none. 39 Hainu afina'mo kaita kahau'nigetae'mo eta kage'none. Hainu afina'mo kalavusifi'mo mai'nanagetae'mo eta kage'none, hu'a afi gegae. 40 Ala kini ne'apimo'a, lama ge lapa nepauve, huno, lapakaemo nagae vayapati'mo ina agufa nagana'nimogitegamo ani kava hu'naya kava'mo nagaetegage'mo hu'nae, huno hapa paigiye.

41 Huno hapa paiteno hoga haopale'mo mai'nisaya vaya'aife'mo, Afo'nimo'a huno faipa huno lapate'niya vayanagi nagaetegati'mo ataletapa lapaune hetapa viyo. Goti'a Nevo'e hosu apaune vaya'a'e'mo maisayafe'mo alo hu male'niya ata kopi'mo leno yu oseno lege lege huno ne'maiya ata kopi'mo lamitapa maiyo. 42 Naga te'nigetapae'mo ne'ya'mo o'namige anife'mo nahau'nigetapae'mo ani'mo hefitapa o'namige alu kotegati'mo e'nogetapae'mo navalelitetapa alita falu hutapa o'natege kukena'nimo ohane'nigetapae'mo alinitetapa vaitapa o'natege kaita nahau'nigetapae'mo yagaitapa o'natege kalavusifi'mo mai'nogetapae'mo yagaitapa o'natege hutapa mai'naya'mofe'mae, huno hapa paigiye. 44 Apakaemo hu'apae'mo, Ala kava nene, hu'a, hainu afina'mo kage'nonageka kaga tege anife'mo kahauge alu kotegati'mo ege kukenakamo ohanege kaita kahauge kalavusifi'mo maige huka mai'nanageta kaha o'mae'none, hu'a afi gegae. 45 Afi gesageno'ae'mo, lama ge lapa nepauve, huno, nagae vayapati'mo ina agufa nagana'nimogitegamo ani kava osu'naya'mofe'mo nagaetegamo osu'nae, huno hapa paigiye. 46 He, agaemo kayoteti'mo apamagime apamagime uno apamagino hano osugiya'monanafa fatago vaya'mo alagepa hu'a maige maige hu'a maigae, huno hapa pai'niye.

Copyright information for `KYG