Matthew 6

Afa'a hapa mae'a ne'apamiya kavafe'mo ava ge hu'niya gemae

Ehetapiye, hu'na, Vaya'mogimo lapakesayafe'mo apaulagale'mo vaya'mo hapa maesaya agufa kava'mo osiyo. Hisageno'ae'mo koku'napi afotapimo'a miyatapimo olapamigiye.

Ae'a ati nekaya vaya'mogimo kagemi ya'apimo ohane'nisiya vaya'mo apamisayafe'mo pikuli nehaya vaya'aife'mo hapa pai'apae'mo, hogoteta utapa pikulimo hiyo, hu'a hapa nepaiye. Pikulimo hu'nage'apae'mo vaya'mogi ala apaki'apimo apamisayafe'mo mono nopi'mofi kategamofi hu'a kagemi ya'api ohane'niya vaya'mo ali'a ne'apamiye. Ani kava osiyo. Lama ge lapa nepauve, miya'apimo ago ali'nae. Ani kava'mo nehaya'monanafa kagemi ya'apimo ohane'nisiya vaya'mo apamigefe'mo nehisageno'ae'mo hoga lapaya'mo'mo lamaga lapaya'mo'a hisiya kavafe'mo o'ageno. Afotapimo'a fala kitapa apamisaya kavatapimo ageteno'ae'mo muki vaya'ai apaulagale'mo miyatapimo lapamigiye.

Mani gemo hutapa nunumu hiyo, huno hu'niya gemae

(Luk 11:2-4)

Ae'a ati nekaya vaya'mogimo muki vaya'mogi apakesayafe'mo muki mono nopi'mo he ti'a mai'ne'a nunumu huge u e'a nehayatega'e'mo he ti'a mai'ne'a nunumu huge nehae. Ani kava hutapa nunumu osiyo. Lama ge hu'nae'mo, miya'apimo ago ali'nae. Nehaya'monanafa Afotapimofe'mo nunumu hugefe'mo notapifi'mo haitapa kitamo ki male'netapa fala kino ne'maiya nefeke'mo nunumu hiyo. Afotapimo'mo fala kita nehaya kavatapimo ne'ageya ne'mo'a muki vaya'ai apaulagale'mo miyatapimo lapamigiye. Goti ge'amo alagi no'afiya vaya'mogimo muki afina'mo magoke agufa ge'age'mo huli huli'a ne'u'apae'mo, muki afina'amo nehuna gemo afa'a afigiye, hu'a apakesa ne'afiye. Ani kava hutapa nunumu osiyo. Apakaekana hutapa o'maiyo. Lapakaemo hogotetapa afotapimofe'mo kafu hisaya kavafe'mo ge hutapa afi oke'nageno'ae'mo ago age'niye.

Lapakaemo nunumu hugefe'mo ina ge hutapa hiyo,

koku'napi Afotimogae, hutapa, kagikamo alagepa huno kaote hane'niyanage'a ali'a asaga hisaya kava'mo hane'niye.
10 Vaya'aite'mo yagaika apatesana kavakamo afole aino. Muki koku'napi vaya'mogimo kahau'niya kavakamo akame nehaya kava hu'a ma mopafi vaya'mogimo kahau'niya kavakamo akame hiyo. 11 Hemenimo nesuna ne'ya'mo lamiyo. 12 Lagaetegamo hosu kava'mo nehaya vaya'aife'mo afa'a ateyo, huta nehuna ge huka lagaemo kagaetegamo hosu kava'mo nehisunagekae'mo afa'a ateyo, huka huvo. 13 Lamalageka hisiya kavategamo lavalelikuka olateka hosu kavategati'mo alika aika atagineka lategeta eno. Kagaika himamukaleti'e ha le konali yakaleti'e'mo yagaika ne'apatane. He, lama ge.
14 Apakaemo lapakaetegamo hosu kava'mo nehaya vaya'aife'mo, kanalenagi afa'a ateyo, hutapa hapa paisageno'ae'mo koku'napi Afotapimo'mo ani agufa gege'mo huno lapakae hosu kavafe'mo afa'a ateyo, huno lapa paigiya'monanafa 15 alu vaya'ai hosu kava'apimo alitapa o'atalesayana ani kava huno Afotapimo'mo hosu kavatapimo afa'a alino o'atalegaiye, huno hapa pai'niye.

Ne'ya'mo mo nesiya kavafe'mo hu'niya gemae

16 Ae'a ati nekaya vaya'mogimo ne'ya'mo o'ne'a mosi'a mai'ne'apae'mo ne'ya'mo mo nesiya kava'apimo ali'a apave lisayafe'mo hosu apaugosamo nekaliye. Lama ge lapa nepauve, miya'apimo ago ali'nae. Ne'ya'mo mositapa mai'netapae'mo hosu lapaugosamo okaliyo. 17 Ne'ya'mo mositapa mai'netapae'mo uvelimo alitapa lapakenopafi'mo faletetapae'mo lapaugosafi'e'mo faleyo. 18 Vaya'mogimo, ne'ya'mo o'ne'a mosi'a mai'nae, hu'a osisayafe'mae. Afotapimo'mo fala kino mai'niya ne'mo'a lapakaemo fala nekiya kavatapimo ageteno'ae'mo muki vaya'ai apaulagale'mo miyatapimo lapamigiye.

Alagepa ya'apimo age'a alu ai ne'malaya kavafe'mo hu'niya gemae

(Luk 12:33-34)

19 Alagepa kagemi yatapimo ma mopafi'mo agetapa alita alu ai o'maleyo, kafamo'mo hatagauge o'ani'ya faige kumaya vaya'mogi no'mo ae'a yaki'a kumaya'mo alige hugae. 20 Alagepa kagemi yatapimo agetapa koku'napike'mo alu ai maleyo, kafamo'mo ohatagauge o'ani'ya ofaige kumaya vaya'mogi no'mo ae'a yaki'a kumaya o'alige hugae. 21 Alagepa yatapimo agetapa alu ai ne'malaya kotegage'mo lapaipa lapakesamo haino nehane.

Apakupi'mo kani aeno ha neleya kavafe'mo hu'niya gemae

(Luk 11:34-36)

22 Lapaulagamo lapakupi lamugana huno hane'niye. Lapaulagamo'mo ageno alagepa huno ne'agesiyana lapakupi'mo aeno ha lesigeno ha le ya'mo havaiteno hanegaiye. 23 Lapaulagamo'mo hosu kava'mo huno ne'agesiyana lapakupi'mo hani husigeno hani ya'mo'a havaiteno hanegaiye. Lapakupi'mo aeno ha nolesiyana lusi kava huno hani hu'niya ya'mo lapakupi'mo nehane.

Kagemi yafe'mo ava gemo hu'niya gemae

(Luk 16:13; 12:22-31)

24 Mago ali'ya'mo ne'alisiya vekamo'a lole ali'ya aepa vekala'anite'mo afa'a ali'ya o'aligiye. Agaemo mago alu ali'ya aepa nefe'mo ohau'nisigeno mago alu nefeke'mo hau ayamopafi'mo hau'nisigeno ge'amo afiteno alu ali'ya aepa nefe'mo ohau'nisigeno akame'ya amigiye. Lapakaemo ani kava hutapa Goti ali'ya'e ma mopafi ali'ya'e'mo afa'a o'aligae.

25 Inagi ma mopafi maisaya kavafe'mo, na ne'ya'mo negaune, hutapa huge na ani'mo negaune, hutapa huge na kukenamo lagufale'mo alita vaigune, hutapa huge hutetapa lapakesa ala'amo afitapa lapausoli osiyo. Ofalitapa afa'a ne'maiya kavake'mo hogote kava'mo hane'nigeno ne'ya'mo henaga ya'mo hane'niye. Lapakufage'mo hogote ya'mo hane'nigeno kukenamo henaga ya'mo hane'niye. 26 Haleli u'e'a nehaya nama anaga'aife'mo lapakesa afiyo. Nama anaga'mogimo avina ya'mo ohakalege hoya'apifati'mo ne'ya'mo o'alige ne'ya'mo ali'a no'apifi'mo alu ai o'malege nehaya'monanafa koku'napi afotapimo'mo ne'ya'apimo afa'a ne'apamiye. Lapakaemo nama anaga'mo ago aetapa apaka setapa hogote vaya'mo mai'nae. 27 Lapakaepati'mo ina la'mo hausoli huteno agesa ala'amo ne'afisiyana afa'a maisiyafe'mo aise afina'mo mago'e huno alino yatala huno ategaiye.

28 Na kava higetapae'mo kukenatapimo alisayafe'mo lapausoli hutetapa lapakesa ala'amo ne'afiye. Kahaufilaga kahaumo'mo ause neheya kavafe'mo lapakesa afiyo. Kahaumo'a ali'ya'mo o'alige kukenamo alo osuge nehiya'monanafa afa'a nehage. 29 Nehageya'monanafa ausemo'a ala ne'apimo kini vekamo Salomoni'a vaino ali'niya kukena'amo ago aeno agase'niye. 30 Inagi Goti'a kahaufilaga kahaumo hemenimo hane'niyanageno egamo ata lesiya kahaumo ausemo alino vaino ne'ateya'mofe'mo kukenatapimo mago'e huno lapamigiye. Gotifeke'mo laha maegaiye, hutapa aise'amo lapakesa afitapa fatago nehae. 31 Lapakaemo, haiyateti'mo ne'yatimo aliniteta negaune, hutapa huge, haiyateti'mo anitimo hefita negaune, hutapa huge, haiyateti'mo kukenatimo alita vaigune, hutapa huge hutetapa lapausoli hutetapa lapakesa ala'amo o'afiyo. 32 Malaga vaya'mogimo mani yafe'mo hapa'ye nehige'apae'mo kahauya hu'a mai'nae. Koku'napi afotapimo'mo ofalitapa afa'a maisayafe'mo ne'yatapi'e kukenatapi'e'mo alisaya yatapimo hane'niye, huno ago age'niye. 33 Lapakaemo hogotetapa Goti'a yagaino ne'apateya vayapi'mo haitapa maige fatago kava'amo alige hutapa maisayafe'mo kahauya hiyo Goti'a muki ya'mo ma mopafi maisaya ya'mo magokepi'mo lapamigiya'mofe'mae. 34 Lapamigiya'mofe'mo egamo afole aisiya kavafe'mo lapausoli hutetapa lapakesa ala'amo o'afiyo. Ega afinafe'mo agai'a yafeke'mo agesamo afigiye. Hemenimo afole ne'aiya hanageke ya'mo haine.

Copyright information for `KYG