Matthew 7

Ali'a fako hu'a ne'apataya kavafe'mo hu'niya gemae

(Luk 6:37-38,41-42)

Goti'a kavatapimo alino fako huno olapatesiyafe'mo alu vaya'ai kava'apimo alitapa fako hutapa o'apateyo. Haiya kava hutapa vaya'ai kava'apimo alitapa fako hutapa ne'apatesafi ani agufa kavake'mo huno alino fako huno lapategaiye. Na agufa kavateti'mo alitapa fako hutapa ne'apatesafi ani agufa kavake'mo huno alino fako huno lapategaiye. Na kava higetapae'mo konagatapimo aulagafi'mo afaya'mo hane'nigetapa ne'agaya'monanafa lapaulagafi'mo latapa yakefamo hane'niya ya'mo no'agae. Latapa yakefamo lapaulagafi'mo hane'niya'monanafa na kava higetapae'mo konagatapie'mo, kaulagafati'mo afaya'mo ali'na atalegauve, hutapa nehae. Aetapa ati nekaya vayane, hu'na, alagepa hutapa agetetapa konagatapimo aulagafati'mo afaya'mo alitapa atalesayafe'mo hogotetapa lapaulagafati'mo latapa yakefamo alitapa akaitapa ataleyo.

Gotitegati'mo aote ya'mo alitapa kalamo o'apamiyo. Lapakaemo alopa miyateti'mo miya nefaiya sesumo alitapa yaga autapa afu anaga'mo o'apamiyo, fiku apaiyaleti'mo ae'a latapaite'a lapaegae.

Nunumu hisuna kavafe'mo hu'niya gemae

(Luk 11:9-13)

Ge hutapa afi nekegeno'ao afa'a alino lapamigiyanagi. Kahauya hiyo agetapa ava tegayanagi. Hakalu hakalu nehigeno'ao kitamo yakino lapategaiyanagi. Muki vaya'mogi Gotife'mo ge hu'a afi nekaya vaya'mogimo afa'a aligae. Kahauya nehaya vaya'mogimo age'a ava te'a aligae. Hakalu hakalu nehaya vaya'mo fale'a haisayafe'mo kitamo yakino apategaiye.

Lapakaepati'mo mago mafa'nemo'a afo'amofe'mo, mayamo alika namiyo, huno afi nekesigeno'ae'mo afo'amo'mo mago yafa'mo alino amigifiye. 10 Inagi mago noyame alika namiyo, huno afi nekesigeno'ae'mo afo'amo'mo nagalo'yavemo alino amigifiye. Ha'ao, alino o'amigiye. Lapakaemo mafa'netapimo mago hosu ya'mo alitapa no'apamiye. 11 Lapakaemo hosu vaya'mo mai'naya'monanafa mafa'netapimo alagepa yake'mo alitapa ne'apamiya kava huno koku'napi afotapimo'mo mago'e huno aeno lapaka seno mai'neno'ae'mo ge hu'a afi nekaya vaya'mo alagepa ya'mo alino apamigiye. 12 Mosese ke'aepa ge'e Gotitegati gemo alini e'a ae'a hakalo hu'a hapa nepaiya vaya'ai gemo'e'mo aepa'amo'mo huno'ae'mo, lapakaitapimo na agufa kavafe'mo lapau'nisifi ani agufa kavake'mo hutapa muki vaya'aitegamo hiyo.

Lole katalafe'mo hu'niya gemae

(Luk 13:24)

13 Alino apago'ya lagauno apatalesiya kate kipa'mo alopa kipa'e alopa ka'e'mo hane'nige'a muki asole vaya'mo ani kate'mo ne'vaya'mofe'mo aise kipapi'mo haitapa faleyo. 14 Afa'a maisaya ya'mo alisaya kate kipa'mo aise kipa'mo hane'nigeno lokiya ka'mo hane'nige'a magoke magoke vaya'mogige'mo ha ha hu'a kahauya hu'a age'a ava netae, huno hapa pai'niye.

Yosae'mo aeno kalafefa ge hu'niya gemae

(Luk 6:43-44, 13:25-27)

15 Aigofe vaya'mogi Gotitegati gemo alini e'a ae'a hakalo hu'a hapa nepaiya vaya'aife'mo ehetapiye. Apakaemo sipisipi agufamo he'a kalopae'a apakufale'mo vaili'ne'a ne'aya'mofe'mo afela kalamo'mo vaya'mo nehapaeya kalagana hu'a mai'nae. 16 Apaipafati'mo alagamo ne'aesigetapa apaketetapae'mo, haiya agufa vaya'mo mai'nafi, hutapa apakegae. Aufe yosamo'mo haga nehiya nofi alagamo afa'a ne'aefiye. Hosu kahaumo'a haga alagamo afa'a ne'aefiye. Ha'ao. 17 Alagepa yosamo'mo alagepa alaga'age'mo ne'ae. Hosu yosamo'mo hosu yosa alaga'age'mo ne'ae. 18 Alagepa yosamo'mo hosu yosa alagamo afa'a o'aegaiye. Ani kava huno hosu yosamo'mo alagepa yosa alagamo afa'a o'aegaiye. 19 Muki yosa'amo alagepa alagamo no'aeya yosamo ago he'ya aite'a ali'a atafi'mo yaga au'a nekae. 20 He, apaipafati'mo alagamo ae'nisigetapa apaketetapae'mo haiya agufa vaya'mo mai'nafi hutapa apaketapa aeto hugae.

21 Muki vaya'mogimo nagaefe'mo hu'apae'mo, ala kava nene, ala kava nene, hu'a nehaya vaya'mogimo Goti'a yagaino ne'apateya kote'mo afa'a fale'a ohaigaya'monanafa koku'napi afo'nimo'mo hau'niya kava'age'mo nehaya vaya'age'mo afa'a fale'a haigae. 22 Ani alopa afina'mo afole ne'aisige'apae'mo asole vaya'mogimo nagaefe'mo, Ala kava nene, Ala kava nene, hu'a, kagikaleti'mo Goti ge'amo aeta hakalo huta hapa opai'nopiye. Kagikaleti'mo vaya'ai apaipafati'mo hosu apaune vaya'mo alita hapa faita o'apatale'nopiye. Kagikaleti'mo asole no'agaya aune kava'mo osu'nopiye, hu'a naha paisage'nae'mo, 23 hosu kava nehaya vayanage'na alagi olapake'novanagi nagaetegati'mo ago ataletapa lapaune heyo, hu'na hapa paiguve.

Lole vekala'moganimo no'mo ki male'na'a kavafe'mo anava gemo hu'niya gemae

(Luk 6:47-49)

24 Ani kavafe'mo hu'nae'mo, muki vaya'mogimo mani hapa nepauva gemo afite'a akame nehaya vaya'mogimo mago afiteno age'niya vekamo'a no'amo alopa yafate'mo faino ateteno ki male'niya vekagana hu'a mai'nae. 25 Ko'mo aige ani'mo hege yasimo alige hulino eno no'amo alino ago'ya faisiyafe'mo hu'niyana alopa yafate'mo no'amo faino ateteno ki male'niya'mofe'mo asagauno o'ai'niye. 26 Inagi muki vaya'mogimo mani nehuva gemo fiku afite'a akame nosaya vaya'mo mago negi vekamo'a no'amo ani asuepale'mo fiku ki male'niya vekagana hu'a mai'nae. 27 Ko'mo aige ani'mo hege yasimo alige hulineno no'amo alagi alino ago'ya faino atale'nigeno lusi kava huno asagauno ai'niye, huno hapa pai'niye.

28 Yesu'a mani gemo hapa paino hano hu'nige'apae'mo afa vaya'mogimo afi'a hapau ai'nae. 29 Yesu'a ke'aepa gemo ali'a apaya ne'malaya tisa vaya'apigana huno alino apaya o'male'nifa himamu'aleti'mo alino apaya male'niya'mofe'mo afi'a hapau ai'nae.

Copyright information for `KYG