Matthew 8

Lepalosi ya hau'niya vekamo alino alagepa huno ate'niya gemae

(Mak 1:40-44; Luk 5:12-14)

Yesu'a avelegati'mo emine'nige'apae'mo asole vaya'mo akame hu'a emi'e'nae. Inagi lepalosi ya hau'niya vekamo agaetegamo eno ale'ya fai'neno'ae'mo, Ala kava nene, huno, kahau'nisiyana afa'a alika alagepa huka nategane, huno hu'niye. Hu'nigeno Yesu'a aya'mo alino ataleno agufale'mo male'neno'ae'mo, Nahau'niyanagi alagepa huka afa'a maiyo, huno nehigeno'ae'mo lepalosi ya'amo malage huno hano hu'niye. Yesu'a ha paino'ae'mo, kate'mo ne'ukae'mo mago vaya'aife'mo hapa opaika mono huno ne'apateya vekalegage'mo uka ali'na alagepa hu'na kate'nova kagufamo alika ave liyo. Apakaemo lepalosi ya'amo ago hano hu'niye, hu'a kagesayafe'mo kagufamo alika ave liteka akeya'vilagamo Mosese'a amiyo, huno hu'niya ofalinimo alika amiyo, huno ha pai'niye.

Ati vaya'aite'mo yagaino ne'apateya vekae'mo ava ge hu'niya gemae

(Luk 7:1-10)

Yesu'a Kapeneyamu taonifi'mo uno nehaigeno'ae'mo mago Lomu nofi vekamo ati vaya'aite'mo yagaino ne'apateya vekamo'a ha maesiyafe'mo ge huno afi ge'niye. Ala kava nene, huno, ali'ya'nimo ne'aliya vekamo no'nifi'mo lusi kava huno agafu ki'nigeno alagi kanage kanaga osuno havaeno ne'maiye, huno ha pai'nigeno'ae'mo, U'na afa'a ali'na alagepa hu'na ategauve, huno ha pai'niye. Yagaino ne'apateya vekamo'a, Ala kava nene, huno, Alagepa vekamo o'mai'nova'mofe'mo no'nifi'mo eka haikeka maisanafe'mo o'nahau'niyanagi ke'age'mo hugeno'ao ali'ya'nimo ne'aliya vekamo hagesigeno he tino alagepa huno maino. Mago vaya'mogi yagai'a ne'natege'na nagaemo ati vaya'aite'mo yagai'na ne'apatove. Mago vekae'mo uvo, hu'na nehugeno'ae'mo ne'viye. Mago vekae'mo eno, hu'na nehugeno'ae'mo ne'e. Ali'ya'nimo ne'aliya vekae'mo hu'nae'mo, ani ali'ya'mo aliyo, hu'na nehugeno'ae'mo ani ali'ya'mo afa'a ne'aliye, huno ha pai'niye.

10 Yesu'a ani gemo afiteno'ae'mo hau ai'niye. Agaemo akame nehaya vaya'aife'mo, Lama ge lapa nepauve, huno, Nagaemo muki Isaleli vaya'ai apaipafi'mo ani agufa lokiya apakesa afi'a fatago hu'naya kava'apimo o'apake'nove. 11 Lapa nepauve, asole vaya'mo Yu nofi vayapati'mo o'mai'naya vaya'mo yegemo haine ne'eya kotegati'mo ege yegemo lamino nefaleya kotegati'mo ege hu'a Goti'a yagaino ne'apateya kopi'mo hai'a Emalehamu'agi Aisiki'agi Yekopu'agi hu'a magokepi lokae'a mai'ne'a ne'ya'mo ne'a maigaya'monanafa 12 Goti'a yagaino ne'apateya koteti'mo mafa'ne'amo hani kopi'mo alino yaga auno apatalesige'apae'mo malaga mai'ne'a avi'ya huge apavepi'mo hani'a agafu kige hu'a maigae, huno huteno 13 yagaino ne'apateya vekae'mo, Naha maegaiye, huka kagesa afika fatago hu'nana'mofe'mo kaha maegauvanagi afa'a uvo, huno ha pai'nigeno ani afina'mo ali'ya'amo ne'aliya vekamo kaita'amo hage'nigeno he tino alagepa huno mai'niye.

Yesu'a asole vaya'mo alino alagepa huno apate'niya kavafe'mo ava gemo hu'niya gemae

(Mak 1:29-31; Luk 4:38-39)

14 Yesu'a Pita nopi'mo faleno haino ageyana Pita ayemo'amo'mo amuko kaita'mo hau'nigeno havaeno mai'nigeno age'niye. 15 Agaemo ageteno ayate'mo aya'mo male'nigeno amuko kaita hau'niya kaita'amo ago hage'nigeno he tino ne'ya'mo alo huno apami'niye.

16 Une'amo Yesutegamo asole hosu apaune vaya'mo vaya'ai apaipafi'mo mai'naya vaya'mo apavaleli'e'a apate'nae. Yesu'a ge'aleti'mo hosu apaune vaya'mo vaya'ai apaipafati'mo alino hapa faitalege'a u'nageno muki alu kaita alu kaita'mo hapau'niya vaya'e'mo alino hapageno apate'niye. 17 Agaemo Aiyeya'a Gotitegati gemo alinineno aeno hakalo huno hapa nepaiya vekamo'a mani kavafe'mo hu'niya gemo afole aisiyafe'mo hu'niye. Aiyeya'a huno'ae'mo,

Agaemo alu kaita alu kaita'mo lahau'niya kaita'mo laha maeno alinino uno atale'niye,
huno avo'mo kae male'niye.

Akame hisa'a vekala'anife'mo hana pai'niya gemae

(Luk 9:57-60)

18 Yesu'a apakeyana asole vaya'mogimo e'a fai'a ku ai'a ate'nageno apaketeno'ae'mo ge'amo ne'afiya vaya'aife'mo, mugagayaga faligamo lakaeta vigetao, huno hapa pai'niye. 19 Mago ne'mo ke'aepa gemo avo'mo kaeno alino apaya ne'maleya vekamo'a agaetegamo eno ha paino'ae'mo, Tisao, huno, haiya kotegamo visapige'na afa'a kakame hu'na uguve, huno ha pai'nigeno'ae'mo 20 Yesu'a ge'ale'mo aeno atagaina huno ha paino'ae'mo, Afela kalamogi nehavaya kelimo hanege namamogi apano'mo hanege hu'niya'monanafa Vemo mafa'nemo havaesiya no'mo ohane'niye, huno ha pai'niye.

21 Mago alu vekamo ge'amo ne'afiya vekamo'mo huno'ae'mo, Ala kava nene, huno, kanalene, huka huge'nao hogote'na u'na afo'nimo'mo ali'na ki'na atete'nae, huno hu'nigeno'ae'mo, 22 fali kavategamo ne'maiya vaya'mogimo falisaya vaya'apimo ali'a ki'a apategayanagi kagaemo ataleka eka nakame huvo, huno ha pai'niye.

Yesu'a yasi'e ani'efe'mo afa'a mai'ao, huno hu'niya gemae

(Mak 4:36-41; Luk 8:22-25)

23 Yesu'a sipifi'mo haino mai'nige'a ge'amo ne'afiya vaya'mo akame hu'a hai'a sipifi'mo maite'a u'nae. 24 Ne'vageno'ae'mo malage huno ani kotute'mo lusi kava huno yasimo ali'nigeno ani'mo'a aino holakau holakau huno haino sipifi'mo havaiteteno aeno lapanegefe'mo hu'niya'monanafa Yesu'a auke'mo kaleno mai'niye. 25 Ge'amo ne'afiya vaya'mogimo u'a hau ne'a atete'apae'mo, Ala kava nene, hu'a, hogo'amo ago ani'mo nesuna agufa kava'mo nehunagi he tika lagufamo alika katika lato, hu'a hu'nageno'ae'mo, 26 Aise'ato'amo lapakesa afitapa fatago hu'naya vayanagi na kava higetapae'mo koli nehae, huno hapa paiteno he tino yasi'e ani'efe'mo afa'a mai'ao, huno ke hanau'nige'ana yasi'e ani'e'mo alagi afa'a hane'na'ae. 27 Muki vaya'amogimo ani kava'mo agete'apae'mo hapau aite'a, Vae, hu'a, yasimo'e ani'mo'e'mo ge'amo afite'ana afa'a mai'na'agi ani vekamo na agufa vekamo mai'niye, hu'a hu'nae.

Yesu'a lole vekala'ani anaipafati'mo hosu apaune vaya'mo alino hapa faino apatale'niya gemae

(Mak 5:1-17; Luk 8:26-37)

28 Yesu'a ani kotu'mo lakaeno mugagayaga faliga Gegasini vaya'ai haopalega uno ava'yi nehige'anae'mo lole vekala'mo fali'naya vaya'mo ki'a ne'apataya yafa no kapati'mo e'ana Yesu'e'mo fotu hu'na'ae. Anaipafi'mo hosu apaune vaya'mo mai'naya'mofe'mo lusi kava hu'ana negi malete'ana afela kava'mo neha'a vekala'mo mai'na'a'mofe'mo muki vaya'mo ani haopalegamo o'u'nae. 29 Anakaemo e'ana Yesu'e'mo fotu hute'anae'mo, Goti mafa'ne'amogae, hu'a, lagaetegamo na kava huka latesanafe'mo ne'ane. Kayo'mo lamisana afina'mo afole o'ai'niyanagi lagafu kisiya ya'mo alika lamisanafe'mo ne'apiye, hu'a afi ge'nae.

30 Asole afu anaga'mo aise afagi'ale'mo kahaumo ne'a mai'nae. 31 Hosu apaune vaya'mogimo Yesufe'mo, Alika laha faika latalegefe'mo hukae'mo asole afu anaga'ai apaipafi'mo alika laha faitalegeta faletuta haita maino, hu'a ha pai'nageno'ae'mo, 32 afa'a viyo, huno hapa pai'nige'a lole vekala'ani anaipafati'mo atale'a apaune he'a u'a afu anaga'ai apaipafi'mo fale'a hai'nae. Fale'a hai'nage'apae'mo muki afu anaga'amo aulafilagati'mo nagu nagu hu'a lami'a anipi'mo asagau'a aite'a ani'mo nete'a fali'nae. 33 Ani afu anaga'aite'mo yagai'a ne'apataya vaya'mo apaune hetale'a u'a taonifilagamo muki hu'niya kavafe'mo ava gemo hu'a hapa paige Yesu'a ani lole vekala'ani anaipafi'mo hosu apaune vaya'mo mai'naya vekala'anitegamo hu'niya kavafe'mo ava gemo hu'a hapa paige hu'a hapa pai'nae. 34 Muki taonifi'mo mai'naya vaya'mogimo u'a Yesu'mo agete'apae'mo, kahao ke honanagi, lagae koteti'mo ataleka uvo, hu'a ha pai'nae.

Copyright information for `KYG