Matthew 9

Yesu'a mago kanage kanaga osuno ne'maiya vekamo alino alagepa huno ate'niya gemae

(Mak 2:1-12; Luk 5:17-26)

Yesu'a sipifi'mo haino maiteno aino atagi neno agai'a taoni'alagamo uno ava'yi hu'niye. Mago vaya'mogi kanage kanaga osuno yakaikona'ale'mo havaeno ne'maiya vekamo avaleli'e'a Yesu haopale'mo ate'nae. Yesu'a agai'ae'mo apakesa afi'a fatago hu'naya kava'apimo apaketeno'ae'mo kanage kanaga osuno ne'maiya vekae'mo ha paino'ae'mo, mafa'ne'nimogae, huno, hosu kavakamo ali'na atale'novanagi koli osuka kaipamo'mo falu hino, huno ha pai'niye. Ke'aepa gemo avo'mo kae'a ali'a apaya ne'malaya vaya'mogimo, Ani vekamo'a Gotife'mo huno faipa huno ne'ate, hu'a apaipafi apakesamo afi'nae. Yesu'a apakesamo afi'naya apakesamo apaketeno'ae'mo, na kava higetapae'mo hosu lapaipa lapakesa ne'afiye. Nagaemo hu'nae'mo, hosu kavakamo ali'na atale'nove, hu'na hu'novanage'na hemenimo he tika umenitata huvo, hu'na hisuvana haiya gemo'mo lokiya'amo ohane'niye. Vemo mafa'nemo'a hosu kava'apimo alino atalesiya himamu'amo alino lapave ligiye, huno hapa paiteno kanage kanaga osuno ne'maiya vekae'mo, he tika yakaikonakamo aliteka nokalegamo uvo, huno ha pai'nigeno he tino no'alegamo u'niye. Asole vaya'mogimo ani kava'mo agete'apae'mo lusi kava hu'a hapau aite'a Goti'a ani agufa himamu'amo vaya'mo alino ne'apamiya'mofe'mo agi'ale'mo ali'a asaga hu'a ate'nae.

Matiyufe'mo ge hu'niya gemae

(Mak 2:13-17; Luk 5:27-32)

Yesu'a ani haopalegati'mo ataleno uno ageyana takesi moni ne'aliya vekamo agi'amo Matiyu'a takesi monimo ne'aliya nopi'mo fai mai'nigeno age'niye. Ageteno'ae'mo, ataleka eka nakame huvo, huno ha pai'nigeno ataleno eno akame huno u'niye.

10 Yesu'a haino Matiyu nopi'mo fai mai'nige'apae'mo asole vaya'mo takesi moni ne'aliya vaya'e hosu vayane, hu'a nehaya vaya'mogi'e'mo e'a agae'e ge'amo ne'afiya vaya'e'mo magokepi lokae'a mai'ne'a ne'ya'mo ne'nae. 11 Falasi mono vaya'mogi apakete'apae'mo ge'amo ne'afiya vaya'aife'mo, Na kava higeno tisa vekatapimo'a takesi moni ne'aliya vaya'e hosu vaya'e'mo magokepi lokaeno mai'neno ne'ya'mo ne'ne, hu'a ge hu'a apafi ge'nae.

12 Yesu'a ani gemo afiteno'ae'mo, lota vaya'mogimo kaita ohapau'niya vaya'aitegamo u'a ali'ya'mo no'alifa kaita hapau'niya vaya'aiteke'mo u'a ali'ya'mo ne'aliye. 13 Goti mukufi gemo'a huno'ae'mo,Afumo he'a ofalini namisayafe'mo o'nahau'niya'monanafa hapau hu'a apatesayafeke'mo nahau'niye, huno avo'mo kae male'niya gemo aepa'amo afisayafe'mo utapa kahauya hutapa ageyo. Nagaemo fatago vaya'aifeke'mo keya ae'na ge hisuvafe'mo o'me'nofa hosu vaya'aife'mo keya ae'na ge hisuge'a e'a apaipamo ali'a afe lesayafeke'mo e'nove, huno hapa pai'niye.

Ne'ya'mo mo nesiya kavafe'mo hu'niya gemae

(Mak 2:18-22; Luk 5:33-39)

14 Ani afina'mo Yoni ge'amo ne'afiya vaya'mogi e'a hu'apae'mo, lagae'e Falasi mono vaya'e'mo muki afina'mo ne'ya'mo o'neta mo nesuna'monanafa na kava hige'a gekamo ne'afiya vaya'mogi ne'ya'mo mo nosiye, hu'a ge hu'a afi ge'nae. 15 Yesu'a hapa paino'ae'mo, saufa a'mo ali'niya veka'e ao vaya'a'e'mo magokepi lokae'a mai'ne'apae'mo yulagefa no'aiya'monanafa henaga'amo mago vaya'mogimo a'mo ali'niya vekamo apakaetegati'mo avaleli'a visage'apae'mo ne'ya'mo o'ne'a mo sigae.

16 Atafa lavolavomo apake ne'aige'apae'mo saufa lavolavomo sese osu'naya lavolavoleti'mo lagau'a nofakaniye. Saufa lavolavoleti'mo lagau'a fakanite'a sese nehisageno'ae'mo atupa'amo'mo aino vayu husigeno atalagauno alino avala aigiye. 17 Ani kava hu'a vaya'mogi saufa nofi alagafati ani'mo ali'a afu agufa ke'mo atafa he'niya kepi'mo nolakiye. Ali'a lakisayana atafa ke'mo hane'niya'mofe'mo aeno apalo atino ani'mo asagauno aisigeno ke'amo hosugiye. Saufa afu agufa kepi'mo saufa ani'mo ali'a lakisageno'ae'mo saufa ani'mo'a saufa kepi'mo alagepa huno hanegaiye, huno hapa pai'niye.

Kaita hau'niya a kanomo alino hageno ateteno fali'niya a'mafa'nemo alino he tino ate'niya gemae

(Mak 5:22-43; Luk 8:41-56)

18 Ani gemo hapa nepaigeno'ae'mo Yu monote'mo ne'yagaiya vekamo'mo eno aiyafi'mo ape huno ale'ya faino mai'neno'ae'mo, a'mafa'ne'nimo hemenimo ago fali'nige'na ne'ogi uka agufale'mo kaya'mo malegeno he tino, huno ha pai'nigeno 19 Yesu'a he tino u'nige'a ge'amo ne'afiya vaya'e'mo magokepi lokae'a u'nae.

20 Ne'vageno'ae'mo mago a kanomo tuolofu'a kafuga aigu'ya'mo hauge hauge huno mai'niya a kanomo'mo Yesu akamelegati'mo eno yatala kukenamo atupale'mo ayateti'mo ame ali'niye. 21 Agaemo, kukena'aleke'mo ame alisugeno'aeke'mo aigu'ya'nimo hano hugiye, huno aipafi'mo agesamo afi'niye. 22 Yesu'a aino afe leno ageteno'ae'mo, A'mafa'ne'nimogae, huno, kagesamo afika fatago nehana kavakamo'mo alino hano huno kate'niyanagi koli osuka afa'a maiyo, huno ha nepaigeno'ae'mo aigu'ya'amo malage huno hano hu'niye.

23 Yesu'a uno yagaino ne'apateya vekamo nopi'mo faleno haino apakeyana feliopa kepati'mo nehaya agufa apake aige asole vaya'mogimo kagegage huge hu'a mai'nageno apaketeno'ae'mo, 24 Ataletapa kumatega utapa lamiyo. Mani a'mafa'nemo ofali'nifa afa'a au kaleno mai'niye, huno hapa pai'nige'apae'mo hu'a faipa hu'a atete'a kigi hu'a ate'nae. 25 Muki vaya'amo he ti'a kumatega lami'nageno'ae'mo Yesu'a ani a'mafa'nemo male'naya nopi'mo haino ayate'mo alino he tino ate'niye. 26 Ani kava'mo hu'niya ava gemo muki haopalegamo aino atagu faeno uneno hu'niye.

Yesu'a anaulagamo ali hu'niya vekala'mo alino ayakeno anate'niya gemae

27 Yesu'a ani haopalegati'mo ataleno ne'vige'anae'mo lole vekala'mo anaulagamo ali hu'niya vekala'mo akame hu'ana ne'u'anae'mo, Nevini aginagomo, hu'ana, Kahau huka la'ato, hu'ana hume hume e'na'ae.

28 Yesu'a nopi'mo faleno haino mai'nige'ana e'ana mai'na'ageno hana paino'ae'mo nagaemo lanaulagamo afa'a ali'na ayakegauve, hutana lanakesa afitana fatago neha'afiye, huno anafi ge'nige'anae'mo, He, Ala kava nene, hu'ana hu'na'ageno'ae'mo 29 anaulagale'mo aya'mo male'neno'ae'mo, Ani kavafe'mo lanakesa afitana fatago hu'na'a'mofe'mo mani kava'mo lanakaete'mo afole aigiye, huno hana pai'nigeno anaulagala'mo ayake'nige'ana age'ana ayake'na'ae. 30 Yesu'a lokiya gemo hana paino'ae'mo, mago vaya'aife'mo hapa opai'ao, huno hana pai'niya'monanafa 31 u'ana ava gemo ae'ana hakalo hu'ana hapa pai'na'ageno muki mani haopalegamo aino atagu faeno uneno hu'niye.

Agemo no'aiya vekamo alino alagepa huno ate'nigeno agemo ai'niya gemae

32 Lole vekala'mo atale'ana ne'va'age'apae'mo mago vaya'mogi hosu aune ne'mo aipafi'mo mai'nigeno age o'aino ne'maiya vekamo Yesutegamo avaleli'e'a ate'nae. 33 Yesu'a hosu aune ne'mo alino hafaino atale'nigeno'ae'mo age o'aino ne'maiya vekamo'a aepa faino age ai'nige'apae'mo ali'a anupa hu'a mai'naya vaya'mogi agete'a hapau aite'apae'mo, Hogoteno Isaleli kotegamo ani agufa kava'mo afole o'ai'niye, hu'a hu'nae.

34 Hu'naya'monanafa Falasi mono vaya'mogi hu'apae'mo, hosu apaune vaya'aite'mo yagaino ne'apateya vekamo himamu'aleti'mo hosu apaune vaya'mo alino hapafaino ne'atale, hu'a hu'nae.

Yesu'a hau huno apate'niya gemae

35 Yesu'a alopa taonifi'e aise taonifi'e'mo uneno huno Yu vaya'ai mono nopi'e mono nopi'e'mo alino apaya malege Goti'a yagaino ne'apateya kavafe'mo alagepa faigoko gemo aeno hakalo huno hapa paige muki alu kaita alu kaita'mo hapau'niya vaya'mo alino hapageno apatege huno uneno huno mai'niye. 36 Agaemo asole vaya'mo apaketeno'ae'mo aipafi'mo hau huno apate'niye. Sipisipile'mo yagaino ne'apateya vekamo ago apataleno u'nige'a sipisipi afumo atagu fae'a u'e'a hu'a mai'nayana hapa maesiya vekamo o'mai'nige'a mai'naya kava hu'a asole vaya'mo mai'nageno apaketeno'ae'mo hau huno apate'niye. 37 Inagi ge'amo ne'afiya vaya'aife'mo, hoyafi'mo lusi ne'ya'mo afu le'niya'monanafa alisaya vaya'mo aise'amo mai'nae. 38 Ago afu le'niya'mofe'mo hoya aepa vekae'mo nunumu higeno'ao hoya'afati'mo ne'ya'mo alisaya vaya'mo alino apatesige'a ugae, huno hapa pai'niye.

Copyright information for `KYG