Psalms 104

Goti'a muki ya'amo alo hu'niya gemae

O, Naune'nameyo, hu'na, Ala kava ne'mo agi'ale'mo alika asaga huka ato. Ala kava neo, O Goti'nimogae, hu'na, ala kagi vekamo mai'nane. Ala kagika'e alopa konali yaka'e'mo kukenagana huka alika vaiteka ne'maine. Ha le yakamo kukenakagana huka alika vaiteka ne'maine. Koku'na'mo seli nokana huka alika atale male'nane. Anagamo hiyapi anite'mo nokamo akalo huka ki male'nane. Hiya'mo kalekagana huno hane'nigeno yasimo'mo kavalelino ne'viye. Agaemo enisole vaya'amo yasigana huno alo huno apate'niye. Ali'ya'amo ne'aliya vaya'mo ata vaikana huno alo huno apate'niye.

Kagaemo ma mopamo muki afina'mo hanege hanege huno hanesiyafe'mo faika ate'nane. Solovala ani'mo alika ate'nanageno eno ma mopamo aeno ati kaeteno avemo alino agase'niye. Solovala anife'mo, kaune ho, huka hu'nanageno aune heno u'niye. Hakalu hu'nanageno afiteno'ae'mo nagu nagu huno lami'niye. Aveleti'mo aino laki lamino aune hetaleno lamino ani yamufi'mo asagauno aiteno ate'nana no'ale'mo halate hane'niye. Kegi'yamo huka ku aika ate'nananageno halate eno ma mopamo aeno ati okaegaiye.

10 Meti ani'mo alino ate'nigeno ani yamufi'mo nelamiye. 11 Nelamige'apae'mo muki afela afumogimo ne'nae. Afela nokimogimo ne'nageno'ae'mo apainagamo hau nosiye. 12 Ani agi'nale'mo hane'niya yosafi'mo nama anaga'mogi apano'mo ki malete'a yosa akopale'mo mai'ne'a apake ne'aiye.

13 Anagamo akalo huka ki male'nana nopati'mo ani'mo alika avele'mo laki'nanageno'ae'mo ko'mo ne'aigeno'ae'mo muki ma mopafi ya'mo nehage. 14 Muki pulumakamogi kahaumo nesayafe'mo alika hageka ateteka vaya'mogi hoyafi'mo hakalesaya ne'yate'mo yagai'ne'a ali'a nesayafe'mo alika hageka ne'atane. 15 Ani kava huka ma mopafi vaya'mogimo apamogaga aisayafe'mo nofi alagafati ani'mo alika apamige apaugosafi'mo uvelimo falesageno fayu fayu hisige'a amuse hisayafe'mo uvelimo alika apamige apaipamo alino lokiya vaino apatesiyafe'mo peleti mayamo alika apamige huka alika ne'amine. 16 Ko'mo ne'aigeno'ae'mo Lemanonigayagamo Ala kava ne'mo'a fai male'niya yosamo'mo lusi kava huno ani'mo ne'aliye. 17 Ani yosale'mo muki nama anaga'mogimo apano'mo nekiye. Mago alopa namamogimo mago yosale'mo apano'mo nekiye. 18 Afela meme anaga'mogimo yatala avele'mo umenitata nehage'apae'mo mago afela afu anaga'mo yafa kapi'mo u'a fala nekiye.

19 Kagaemo kaimo alo hu male'nanageno muki afina'mo kaimo eno ne'ateya kavafe'mo lekana nepaiye. Yegemo lamino nefaleya afina'mo agetageno lamino nefale. 20 Kagaemo hani huvo, huka nehanageno hani'mo nehige'apae'mo muki yagagafamo fala ki'a mai'nayategati'mo e'a umenitata nehae. 21 Afela laiyoni ana'aumogi Gotitegati'mo ne'ya'mo ali'a nesayafe'mo kahauya hu'a kae kae nehae. 22 Yegemo nelege'apae'mo kelifi'mo lami'a havae'a ne'maiye. 23 Fala ki'a ne'maige'apae'mo vaya'mo he ti'a u'a ali'ya'apimo ne'aligeno'ae'mo yegemo lamino nefale.

24 O Ala kava nene, hu'na, asole kava'mo nehane. Ageteka afi'nana kavakaleti'mo muki ma mopafi ya'e vaya'e'mo alo hu male'nanage'apae'mo ma mopafi'mo kili pae'a mai'nae. 25 Solovala ani'mo muga afagi'ale'mo hane'nigeno lusi yatala ani'mo vasilonafi'mo muki apaune'apame'e ya'mo mai'nae. 26 Muga alopa anipi'mo asole sipimo ne'vage'apae'mo alopa noyamemogi nagosa'mo aili'a u'e'a hu'a yokalomo nele'ae'mo ae'a hailo hu'a haite'a emi ete'a nehae.

27 Muki'amogimo ne'ya'mo alika apamisanafe'mo apaka netege'a kagava ne'maiye. 28 Ne'ya'mo alika ne'apaminage'aphae'mo ne'nae. Kayapati'mo ali'a ne'a apamu neae. 29 Kakame'yamo ne'apaminage'apae'mo kolikamo nehae. Apavamusate'mo ne'alinage'apae'mo falite'a halate mopamo ali'a nehamalae. 30 Kaunekame'mo alika ate'nanageno uno alino afole aino ne'apate. Muki haopalegamo saufa ya'e vaya'e'mo alo huteka alika afole aika ne'apatane.

31 Ala kava ne'mo ha le konali ya'amo'mo alagi hanege hanege huno haneno. Ala kava ne'mo'a alo hu'niya yatefe'mo amogaga aino. 32 Agaemo mopale'mo aulu heno ne'agegeno'ae'mo imima ne'aliye. Avele'mo ame ne'aligeno'ae'mo halinamo ne'aiye. 33 Nagaemo ofali'na muki afina'mo afa'a mai'ne'nae'mo Ala kava ne'mo agi'ale'mo ali'na asaga hu'na yoke huguve. 34 Ala kava nefe'mo namogaga ne'auva'mofe'mo agaefeke'mo nagesa afifi hu'na ne'mauvanageno amuse huno natesiyafe'mo nahau'niye. 35 Agaemo hosu vaya'mo ma mopafati'mo alagi alino hano huno apatalesiyafe'mo nahau'niye.

O naune'nameyo, hu'na, Ala kava ne'mo agi'ale'mo alika asaga huka ato. Ala agi'amo amiyo.

Copyright information for `KYG