Psalms 105

Goti'a Isaleli vaya'aite'mo alagepa huno yagaino apate'niya kavafe'mae

Ala kava nefeke'mo hao ke heyo. Agaefeke'mo ge hiyo. Hu'niya kavafe'mo ava gemo afisayafe'mo muki alu nofi vaya alu nofi vaya'aife'mo aeta hakalo hutapa hapa paiyo. Agaefeke'mo yoke huge samu yokemo huge hiyo. Lapau ne'aiya kava'ae kava'ae'mo ava gemo hiyo. Aote agi'alefe'mo ala lapakitapimo alitetapa lapamogaga aiyo. Ala kava nefe'mo kahauya nehaya vaya'mogimo apamogaga aiyo. Ala kava netegamo utapa himamu'amo alisayafe'mo kahauya hutapa maiyo. Augosamo agesayafe'mo kahauya hiyo. Emalehamu'a Ala kava ne'mo ali'ya'amo ne'aliya veka'amo aginago vaya'amogitapae, hu'na, Yekopu'a lekana paino ate'niya vekamo aginago vaya'amogitapae, hu'na, lokiya kava'a'e aune kava'a'efe'mo lapakesamo afiyo. Alino fako huno apateteno ani kava'mo hiyo, huno hu'niya ge'ae'mo lapakesamo afiyo.

Agaemo Ala kava netimo Gotitimo'ae. Agaemo muki ma mopafi vaya'mo alino fako huno apateteno ani kava'mo hiyo, huno nehiye. Agaemo muki afina'mo agai'a kotalake ge'ae'mo agesamo afiteno o'ataleno akame huno ne'maiye. Vaya'mo afole aite afole aite hume hume ne'visageno'ae'mo afole aino, huno hu'niya gee'mo age okanino agesamo afino mai'niye. Agaemo Emalehamu'e'mo kotalake gemo hu maleteno Emalehamu mafa'ne'amo Aisikife'mo ani kava'mo huguve, huno hu maleteno Aisiki mafa'ne'amo Yekopufe'mo hanege hanege huno hanesiya kotalake ge'amo hu male'niye. 11 Kenani mopamo ali'na haki'na lapamisugeno lapakaitapi mopatapimo hanegaiye, huno ha pai'niye.

12 Aise vaya'amogi ina agufa nata vaya'mo mai'ne'apae'mo u'a mago nofi vaya'ai mopale'mo maige'a atale u'a mago alu nofi vaya'ai mopale'mo maige'a atale u'a ani kava hu'a mago kini vekamo'a yagai'niya mopale'mo u'a maige'a atale u'a mago alu kini vekamo'a yagai'niya mopale'mo maige maige hu'a mai'nae. 14 Ani kava hu'a mai'naya'monanafa Ala kava ne'mo'a agai'a vaya'aite'mo hosu kava'mo hu'a yagai'a o'atesayafe'mo o'ataleno yagaino apate'niye. 15 Inagi yagai'a ne'apataya kini vaya'aife'mo, uvelimo fale'na apate'nova vaya'mo apame o'aliyo. Nagaetegati gemo alini e'a ae'a hakalo hu'a hapa nepaiya vaya'mo maitapa halove hutapa apatetetapa hanageke ya'mo alitapa o'apamiyo, huno ke hapau'niye.

16 Ala kava ne'mo'a, kafu hisaya kava'mo ali'na afole ai'na ategauve, huno agesamo afiteno hogoteno vaya'amo hapa maesiya vekamo Yosefe'mo alino ate'nigeno u'niye. Yosefe nepu'amogimo avale'a alu nofi vaya'mo apami'nage'a kalavusi ali'ya'mo alisiya mafa'nemo maisiyafe'mo miya fai'a avaleli'a u'nae. 18 Isipi kotegamo uno mai'nige'a kalavusi hu'a atete'apae'mo aiyalate'mo seli nofiteti'mo ki'a ate'nageno lusi kava huno kana hau'niye. 19 Ani kava huno mai'nigeno'ae'mo Ala kava ne'mo'a amalageka huno ateme ateme ne'vigeno'ae'mo afole aigiye, huno hu'niya kava'mo afole ai'niye. 20 Hogote kini vekamo'a ali'ya'amo ne'aliya vekae'mo, hatu maeka ato, huteno alino ate'nigeno uno Yosefe'mo hatu maeno ate'niye. 21 Hatu maeno ateteno'ae'mo, muki Isipi mopale'e vaya'aite'e'mo yagaika apato, huno ha pai'nigeno Yosefe'a hogote gamani vaya'mo mai'ne'a yagai'a ne'ataya vaya'aite'e'mo yagaino apateteno vayatama vaya'mo alino apaya male'niye.

23 Ani kava huno yagaino apate'nige'apae'mo Isaleli vaya'mo Isipi kotegamo e'nae. Yekopu'e muki afamo anaga vaya'a'e'mo e'a Hamu aginago vaya'ai mopale'mo Isipi kotegamo mai'nae. 24 Mai'nageno'ae'mo Ala kava ne'mo'a vaya'amo hapa mae'nige'a asole mafa'nemo ali'a apate'nage'a ai'a atagu fae'a maite'a lokiya vaya'mo hamalete'a kame vaya'apimo ae'a apakase'nae. 25 Agaemo Isipi vaya'ai apaipa apakesamo alino afe leno apate'nige'apae'mo agai'a vaya'aitegamo apaini hu'a apatete'a ali'ya'amo ne'aliya vaya'aife'mo humi apate'nae. 26 Agaemo ali'ya'amo ne'aliya veka'amo Mosese'e lekana paino ate'niya vekamo Eloni'e'mo alino anate'nige'ana kini vekalegamo u'na'ae. 27 Anakaemo Goti lokiya kava'amo no'agaya agufa aune kava'mo Isipi kotegamo hu'na'ae. 28 Agaemo hani hisiya kava'mo alino ate'nigeno emineno hani hu'niye. Isaleli vaya'mogi ge'amo o'atale'a afi'nae. 29 Agaemo ani'mo kola ani'mo alino hamaleno ate'nige'a noyame anaga'mo fali'a hano hu'nae. 30 Lokuloku anaga'mo ai'a atagu fae'a muki ani mopale'mo mai'ne'ae'mo kini vaya'mo nehavaya no'apifi'mo hai'a mai'nae. 31 Ge hu'nige'apae'mo asole kosi anaganagi apayokapi nama anaganagi hu'a e'a muki ani mopale'mo ai'a atagu fae'a mai'nae. 32 Afa ko'mo aiyo, huno osu'nifa ko mopa ko'mo aiyo, huno hu'nigeno muki ani kote'mo alino alave huteno lusi ko mopa ko'mo aiteno nofi'e fiki yosa'e'mo amagi'niye. Hafosa hai'nigeno muki haopalegamo hane'niya yosamo amagino lo ae'niye. 34 Ge hu'nige'a asole akenu anaga'mo neya akenu'age hu'a lekana opaisuna agufa akenu anaga'mogimo e'a muki hegafatalili ya'e muki hoyalega hane'niya ne'ya'api'e'mo ne'a hano hu'a atale'nae. 36 Muki Isipi vaya'ai yege mafa'ne'apimo apamagi'niye. 37 Apamagiteno Isaleli vaya'mo hatu maeno apate'nige'a Isipi kotegamo atale'a ugefe'mo nehu'apae'mo Isipi vaya'ai siluva yafa'api'e goli yafa'api'e'mo alini'a u'nae. Muki vaya'amo kaita ohapau'nige'a lokiya vai'a mai'ne'a u'nae. 38 Isipi vaya'mogimo apakaefe'mo lusi kava hu'a koli hu'naya'mofe'mo Isaleli vaya'mo apatale'a ne'vage'apae'mo apamogaga ai'nae. 39 Goti'a muki feluga'amo ulunapi'mo uge maige hisayafe'mo hiyateti'mo aino apati kaeteno muki hani'ilaga'amo aeno ha leno apatesiyafe'mo koku'napati'mo ata le'nigeno aeno ha leno apate'niye. 40 Apakaemo Gotife'mo afi ge'nageno'ae'mo hifakana agufa nama anaga'mo apate'nige'a haleli u'a mai'nage'a apatafau'a kae'a ne'nae. Agaemo lusi ne'ya'mo koku'napati'mo alino apami'nige'a ali'a ne'a apamu hu'nae. 41 Agaemo ani'mo ohane'niya kotegamo yafapi'mo amagino apalo ati'nigeno yafapati'mo alopa anikefamo emine'nige'a ne'nae. 42 Agaemo ali'ya'amo ne'aliya veka'amo Emalehamufe'mo ani kava'mo huguve, huno hu male'niya ge'ae'mo agesamo afi'niya'mofe'mo ani kava'mo hu'niye.

43 Ani kava nehuno'ae'mo vaya'amo apavalelino ne'vige'apae'mo lekana paino apate'niya vaya'amogimo yoke hu'a apamogaga ai'nae. 44 Agaemo alu nofi vaya alu nofi vaya'ai mopamo alino apami'nige'a hoya'api'e'mo ali'nae. 45 Ge'amo afite'a ke'aepa ge'amo akame hisayafe'mo ani kava'mo hu'niye. Ala kava ne'mo agi'ale'mo alita asaga hutapa ateyo.

Copyright information for `KYG