Psalms 106

Isaleli vaya'mogi hosu kava'mo hu'naya kavafe'mo apava gemae

Ala kava ne'mo agi'ale'mo alitapa asaga hiyo. Alagepa vekamo mai'niya'mofe'mo hao ke heyo. Muki afina'mo hau huno apatege apatege huno ne'maiye. Ina lagimo hu'niya kavafe'mo ava gemo hugae. Alagepa kava'mo lusi kanale kava'mo hu'niya'mofe'mo ina lagimo ani kava'mo hu'a agi'ale'mo ali'a asaga hugae. Ge'amo afite'a akame hu'a muki afina'mo alagepa kava'mo nehaya vaya'mogimo Goti aulagale'mo alagepa hu'a mai'nayanage'a afa'a apamogaga aigae.

Ala kava nene, hu'na, Vayakamo hapa maesana afina'mo nagae'efe'mo kagesamo afiyo. Apakufamo alika katika apatesana afina'mo nagae'e'mo nagufamo alika katika nato. Naha maege'nao vayakamo alagepa hu'a maisage'na apakete'nae'mo apakaegi'e'mo magokepi namogaga aite'na vayaka'e'mo Goti vaya'amo mai'none, hu'na hute'na magokepi lamogaga aigune. Laginago vaya'mogimo hosu kavake'mo hu'a mai'naya kava huta hosu kavake'mo huta mai'none. Laginago vaya'mogi Isipi kotegamo mai'nageno'ae'mo Goti'a lokiya aune kava'mo hu'niyana age'a aeto osu'nae. Hau huno apate'niya kavafe'mo alagepa hu'a apakesamo o'afi'nafa ago apake kani'niye. Apakaemo solovala anite'mo u'a ava'yi hute'ae'mo anaga hogote vekalegamo hosu kava'mo hute'a ge'amo ago amagi'a atale'nae. Amagi'a atale'naya'monanafa lapa maegauve, huno hu'niya gemo akame huno himamu'amo alino apave lisiyafe'mo apakufamo alino katino apate'niye. Agaemo solovala anife'mo, aika kaka vao, huno hu'nigeno aino akaka vae'nigeno ani'mo folagapi'mo hau hu'niya mopale'mo apavalelino u'niye. 10 Agaemo kame vaya'ai apayapati'mo apakufamo ago alino katino apateteno'ae'mo ani kava huno kame vaya'apilegati'mo apavalelino e'nige'a e'a afa'a mai'nae.

11 Ani'mo'a kame vaya'apimo ago aeno apati kae'nige'a muki vaya'amo ago fali'nae. 12 Ani kava hu'nige'apae'mo ge'ae'mo apakesamo afi'a fatago hu'nae.

13 Hu'naya'monanafa hu'niya kavafe'mo ago apake kani'nige'apae'mo agaefe'mo na kava hisune, hu'a afi oke'ne'a afa kava'mo hu'nae. 14 Ka'me kotega mai'ne'ae'mo hosu hapa'ye hu'nige'a Goti'mo amalageka hu'a ate'nae. 15 Agaefe'mo lamiyo, hu'a ge hu'naya gemo afi'niya'monanafa kaita'mo apami'nige'a ago fali'nae. 16 Ka'me kotega mai'ne'ae'mo Mosese'e Ala kava ne'mo ali'ya'amo ne'aliya vekamo Eloni'efe'mo, aetana laga ose'na'a'mofe'mo yagaitana olate'ao, hu'a hu'nageno mopamo aino akaka vae'nige'a Neteni'e afamo anaga'a'enagi Amilami'e afamo anaga'a'enagi hu'a asagau'a ai'nageno aino akaniteno aeno apati kae'niye. 18 Koku'napati'mo atamo emineno hosu kava'mo hute'a anakame hu'naya vaya'e'mo alagi leno apasaga li'niye. 19 Alu afina'mo apakaemo goli yafateti'mo pulumakamo aune'amo alo hute'a mono hu'nae. 20 Apakaemo ani kava hu'a ha le konali Goti'mo atale'a agae aimu'yale'mo kahaumo ne'neya pulumakamo aune'alefe'mo mono hu'nae. 21 Goti'a lokiya aune kava'mo Isipi kotegamo huteno apakufamo alino katino apate'niya kavafe'mo ago apake kani'niye. 22 Agaemo Isipi kotegamo aune kava'mo huteno solovala anite'e'mo lokiya kava'mo hu'nige'apae'mo hapau ai'nae. 23 Henaga'amo Goti'a aipamo leno apateteno'ae'mo vaya'nimo ali'na apago'ya lagau'na apatalegauve, huno nehigeno'ae'mo ali'ya'amo alisiyafe'mo Goti'a lekana paino ate'niya vekamo Mosese'a nunumu huno apateteno'ae'mo apamagisiya ka'mo ago akani male'nigeno Goti'a afa'a apate'niye. 24 Apateteno alagepa mopamo lapamiguve, huno hu'niyana apakesamo afi'a fatago osu'naya'mofe'mo ina agufa mopamo hane'niye, hu'a hute'a alagepa mopae'mo ohapau'niye. 25 Apakaemo seli no'apifi'mo mai'ne'ae'mo Goti ge'amo akame osu'a ge nege nege hu'age'mo mai'nae. 26 Ani kava hu'a mai'nageno'ae'mo ani vaya'aife'mo ka'me kotegamo lapamagite'na henaga'amo lapakinago vaya'mo alagepa mopa'apileti'mo ali'na hapa faitalesuge'a alu vaya'ai kotegamo u'a falige falige hu'a maigae, huno hapa pai'niye.

28 Henaga'amo Piyo kotega aigofe goti'apimo agi'amo Malife'mo mono hute'a auneme'amo ohane'niya aigofe goti'a ofalinimo amite'a ami'naya ofalini ya'mo ali'a ne'nae. 29 Ani kava hu'nageno'ae'mo Ala kava ne'mo'a aipamo leno apateteno alopa kaita'mo apami'niye. 30 Apami'nigeno Finiyasi'a he tino hosu kava'mo hu'naya vaya'mo apamagi'nige'a fali'nageno Goti'a mago'e huno kaita'mo alino o'apamino atale'niye. 31 Finiyasi'a ani alagepa kava'mo hu'nigeno'ae'mo Goti'a naulagale'mo fatago kava'mo hu'niye, huno hu male'niyanageno fatago kava'amo muki afina'mo hanege hanege huno hanegaiye. 32 Apakaemo Melima kotegamo yafapati'mo ani'mo emine'niya kotegamo hosu kava'mo hu'nageno'ae'mo Goti'a aipamo leno apate'niye. Hosu kava'mo hu'nageno'ae'mo Mosese'a hosu aipamo kali'nigeno agesamo o'afi'neno malage huno hosu gemo hu'nigeno Goti'a kana ya'mo alino ami'niye. 34 Henaga'amo Goti'a, alu nofi vaya'mo muki vaya'amo apamagige'a faliyo, huno hu'niya gemo o'afi'nae. 35 O'afi'a alu nofi vaya'ai a'mafa'ne'apimo alige a'mafa'ne'apimo apamige hu'a mai'ne'apae'mo hosu kava'apimo akame hu'a mai'nae. 36 Aigofe goti'apimogife'mo mono hu'naya'mofe'mo Goti'a apamagi'niye. 37 Apakaemo mafa'ne'api'e a'mafa'ne'api'e'mo apamagi'a hosu apaune vaya'mo ofalinimo apami'nae. Apakaemo mago kava'mo osu'naya nute mafa'ne'apimo apamagite'a Kenani vaya'ai aigofe goti'apimogimo ali'a apami'nae. Apamagi'naya mafa'ne'apimogi kola'mo'a mopamo alagi alino hosu huno ate'niye. 39 Apakaemo Goti'a apakame'ya amite'a hosu kava'mo hute'a apakai'apimo ali'a hosu hu'a apate'nae. 40 Ani kava hu'nageno'ae'mo Ala kava ne'mo'a agai'a vaya'aife'mo aipamo leno apateteno ohau'niye. 41 Hapa o'maeno afa'a apakeno apatale'nige'apae'mo alu nofi vaya'mo kame vaya'apimogimo e'a yagai'a apate'nae. 42 Kame vaya'apimogi yagai'a apate'nage'a apaiyafi'mo mai'ne'a ge'apimo akame hu'nae. 43 Agaemo asole afina'mo apakufamo alino katino apateme apateme e'niya'monanafa apakame'ya amite'a hosu kava'mo hute'apae'mo hanageke ya'mo ali'nae. 44 Ani kava hu'a mai'naya'monanafa agaefe'mo keya ae'a ge hu'nageno hau huno apate'niye. 45 Kotalake gemo huguve, huno hu male'niya ge'ae'mo agesamo afi'niye. Apakaefe'mo hau huno apateteno halate agesamo afi'niye. 46 Agaemo kalavusi ali'yate'mo apavaleli u'a apate'naya vaya'aife'mo hapa pai'nige'a hapau hu'a apate'nae. 47 O Gotiyo, hu'na, Ala kava netimogae, lagufamo alika katika lateteka alu nofi vaya'ai apayapati'mo lavaleka alika anupa huka lategetao kaote kagikale'mo alita asaga huta ateteta kahao ke heteta lamogaga aino.

48 Isaleli vaya'ai Goti'apimo agi'ale'mo alitapa asaga hiyo. Hemenimo agi'ale'mo alitapa asaga hutetapa muki afina'efe'mo agi'ale'mo alitapa asaga hiyo. Muki vaya'amogitapamo he, lama ge hutapa hiyo. Agi'ale'mo alitapa asaga hiyo.

Goti'a hosu kavategati'mo apakufamo alino katino ne'ateya kavafe'mo ava gemo hu'niya gemae

Copyright information for `KYG